རིག་མཛོད་རྩོམ་སྒྲིག་པ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་(Laptop, iPad, iPod iPhone & Android) གང་ཡིན་ཐོག་ཏུ་རང་རང་གི་ཐུགས་འདོད་ལྟར་ཕབ་ལེན་དང་གསན་གཟིགས་གནང་རོགས།
དྲ་ཚིགས།: www.serajeyrigzodchenmo.org ཡིག་འབྲེལ་དྲ་བྱང་། serajeyrigzodchenmo@gmail.com
སྐབས་ཉེར་གཅིག་པའི་གྲྭ་ཚང་གི་ཕྱག་མཛོད་བརྗེས།
སེར་བྱེས་གྲྭ་ཚང་གི་གསར་དུ་བསྐོ་བཞག་གནང་བའི་ཕྱག་མཛོད་གསར་པས་ལས་ཁུར་གྱི་རྩིས་ལེན་གནང་སོང་།
ཕྱི་ལོ་ ༢༠༡༩ ལོའི་ཟླ་ ༤ ཚེས་ ༡ ཉིན་སེར་བྱེས་མཁས་སྙན་གྲྭ་ཚང་གི་སྐབས་ཉི་ཤུ་རྩ་གཅིག་པའི་ཕྱག་མཛོད་ཀྱི་ལས་ཡུན་རྫོགས་ཏེ་སྐབས་ཉེར་གཉིས་པའི་ཕྱག་མཛོད་རྣམ་པར་ལས་ཀ་རྩིས་སྤྲོད་གནང་ཡོད་པ་ལྟར་ཉིན་དེར་ཕྱག་མཛོད་གསར་པ་རྣམ་པས་ལས་ཁུར་གྱི་རྩིས་ལེན་གནང་ཡོད་པ་དང་།
ཉིན་དེར་སྐྱབས་རྗེ་མཁན་རིན་པོ་ཆེ་མཆོག་དབུ་བཞུགས་ཐོག་རྟེན་འབྲེལ་དང་སྦྲགས། དགའ་ལྡན་ཕོ་བྲང་གི་ལམ་སྟོན་འོག་ཐེ་ལན་ཌིར་བོད་བརྒྱུད་ནང་བསྟན་དང་གནས་བརྟན་སྡེ་པའི་བར་ཤེས་ཡོན་བརྗེ་ལེན་གྱི་ལས་གཞིར་མཉམ་ཞུགས་བྱས་པའི་སློབ་གཉེར་བ་བྱམས་པ་རྒྱལ་མཚན་དང་བསྟན་འཛིན་རྡོ་རྗེ་གཉིས་ཀྱིས་འཇོམ་ཐོང་དགོན་པའི་མཁན་རིན་པོ་ཆེ་ལུང་ཕོ་ཐོང་མཆོག་གིས་ཁོང་གཉིས་ལ་གནང་བའི་སྟོན་པ་མཉམ་མེད་ཤཱཀྱ་སེང་གེའི་རིང་བསྲེལ་འབྲུ་སྣ་ལྔ་ཅན་ཞིག་དང་། འཁར་རྔ་སྤུས་ལེགས་ཤིག་གྲྭ་ཚང་རིན་པོ་ཆེར་ཕུལ་ཡོད་འདུག
ཕྱག་མཛོད་གསར་པ་བཞི་ནི།
གཞན་ཡང་གནས་ཚུལ་ཞིག་ལ། འདི་ག་སེར་བྱེས་གྲྭ་ཚང་གི་སློབ་གཉེར་བ་བསོད་ནམས་ཕུན་ཚོགས་དང་བློ་བཟང་རྡོ་རྗེའམ་དཔལ་འབྱོར་གཉིས་ཀྱིས་གཞུང་ཆེན་སློབ་གཉེར་གྱི་ཞོར་དུ་དེང་རབས་ཀྱི་ཤེས་ཡོན་ལ་ལོ་ངོ་གསུམ་ལྷག་ལ་སློབ་གཉེར་བྱས་ཏེ། ཨིག་ནོའུ་གཙུག་ལག་སློབ་གཉེར་ཁང་གི་བསླབ་པ་མཐར་སོན་གྱི་རྟེན་འབྲེལ་མཛད་སྒོ་ཐེངས་སོ་གཉིས་པའི་སྐབས་སུ་ཁོང་གཉིས་ལ་ཉེ་བའི་གཙུག་ལག་རབ་འབྱམས་པའི་ལག་འཁྱེར་དངོས་སུ་གནང་ཡོད་འདུག
གཞན་ཁ་སང་༤ ཚེས་༣ ཉིན་སེར་བྱེས་མཁས་སྙན་གྲྭ་ཚང་དུ་གྲྭ་ཚང་གི་དགེ་བསྐོས། དབུ་མཛད། ཕྱག་མཛོད། དེ་བཞིན་ཚོགས་སྡེ་ཁག་གི་འགན་འཛིན་དང་ལས་བྱེད། ཁང་ཚན་གྱི་འཐུས་མི་རྣམས་ལ་རྩིས་འཁོར་ཆེད་མཁས་པ་དགེ་བཤེས་བློ་བཟང་སྨོན་ལམ་མཆོག་གིས་སྨོན་ལམ་ཚིག་མཛོད་ཆེན་མོའི་ལས་འཆར་ངོ་སྤྲོད་དང་མ་འོངས་ལས་དོན་ཡར་རྒྱས་གཏོང་ཕྱོགས། ཚིག་མཛོད་བེད་སྤྱོད་གཏོང་ཕྱོགས། ཚོགས་ཞུགས་པ་རྣམས་ཀྱི་དྲི་བར་ལན་འདེབས་དང་། ཉིན་རྒྱབ་སེར་བྱེས་དཔེ་མཛོད་ཁང་དུ་བོད་ཀྱི་དཔེ་མཛོད་མ་ལག་མཉེན་ཆས་ངོ་སྤྲོད། ཕྱི་ཚེས་ ༤ ཉིན་གྱི་སྔ་དྲོའི་ཆུ་ཚོད་༩ པར་སེར་བྱེས་སྨོན་ལམ་ཚིག་མཛོད་རྩོམ་སྒྲིག་ཁང་དུ་རྩོམ་སྒྲིག་པ་རྣམས་ལ་ཚིག་མཛོད་རྩོམ་སྒྲིག་བྱེད་ཕྱོགས་སྐོར་ནས་ཟབ་སྦྱོང་དང་མཉེན་ཆས་གསར་པ་བེད་སྤྱོད་གཏོང་སྟངས་ལམ་སྟོན། དགོང་མོའི་ཆུ་ཚོད་ ༧ པར་སེར་བྱེས་གྲྭ་ཚང་གི་ཆོས་གྲྭའི་ནང་དགེ་བསྐོས་ལགས་དང་། དབུ་མཛད་ཆེན་མོ། ཕྱག་མཛོད་ཆེན་མོ། རྩོམ་སྒྲིག་པ་རྣམ་པ་གཙོས་སློབ་གཉེར་བ་ཡོངས་ལ་སྨོན་ལམ་ཚིག་མཛོད་ཆེན་མོ་བེད་སྤྱོད་གཏོང་སྟངས་ངོ་སྤྲོད་དང་དྲི་བ་དྲིས་ལན་གནང་སོང་བ་དང་། སེར་བྱེས་མཁས་སྙན་གྲྭ་ཚང་ནས་ཐུགས་རྗེ་ལེགས་འབུལ་དང་། ཞལ་ཐང་བཅས་ཀྱི་གསོལ་རས་སྩལ་ཡོད་འདུག
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༩།༠༤།༠༤ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།
