སེར་བྱེས་མཁན་རབས་ཉེར་དགུ་པ་ངག་དབང་དོན་གྲུབ་མཆོག་ནི། བོད་མཚོ་སྔོན་ཕྱོགས་སུ་སྐུ་འཁྲུངས། དབུས་སུ་ཕེབས་ཏེ་སེར་བྱེས་གྲྭ་ཚང་དུ་ཆོས་ཞུགས་བྱས་ཏེ་གཞུང་ཆེན་ཁག་ལ་སློབ་གཉེར་མཐར་ཕྱིན་པར་གནང་།
༧རྒྱལ་བ་བསྐལ་བཟང་རྒྱ་མཚོ་དང་། ལྕང་སྐྱ་རོལ་བའི་རྡོ་རྗེ། རྗེ་ངག་དབང་བྱམས་པ་སོགས་ལས་མདོ་སྔགས་ཀྱི་ཟབ་ཆོས་གང་མང་ཞུས། བླ་མའི་བཀའ་བཞིན་སེར་བྱེས་མཁན་ཆེན་བློ་བཟང་ཆོས་འཕེལ་གྱི་རྗེས་སུ་སེར་བྱེས་གྲྭ་ཚང་གི་སློབ་དཔོན་དུ་ཕེབས་ཏེ་འཆད་ཉན་འཕེལ་བར་མཛད།
གྲྭ་ཚོགས་ཧ་ཅང་ཆེ་བས་རྗེ་ངག་དབང་བྱམས་པ་དང་བཀའ་གྲོས་ཀྱིས་ཕོ་ལྷ་བསོད་ནམས་སྟོབས་རྒྱལ་ལ་སྙན་བསྐུལ་ཞུས་པ་ལྟར་སྲིད་སྐྱོང་དེ་ཉིད་ཀྱིས་ཐུགས་ཁུར་གནང་སྟེ་གྲྭ་ཚང་གི་འདུ་ཁང་གསར་བཞེངས་གནང་།
དེ་ནས་གྲྭ་ཚང་གི་སློབ་དཔོན་དགོངས་ཞུས་གནང་སྟེ་དགོན་གསར་བཀྲ་ཤིས་ཐེག་ཆེན་གླིང་གི་བླ་བྲང་དུ་བཞུགས་ཏེ་ཐགས་དམ་ཉམས་བཞེས་དང་། དོན་གཉེར་ཅན་རྣམས་ལ་ལམ་རིམ་དང་བསྐྱེད་རྫོགས་སོགས་མདོ་སྔགས་ཀྱི་ཆོས་སྦྱིན་གང་མང་གནང་ཞིང་མཐར་དགུང་ལོ་བརྒྱད་ཅུ་བཞེས་ནས་དགོངས་པ་ཆོས་དབྱིངས་སུ་ཐིམ་ཚུལ་བསྟན།

༢༠༡༥.༠༨.༠༦ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།