སེར་བྱེས་རིག་མཛོད་ཆེན་མོ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་ (laptop, iPad, iPod iPhone & Android) སོགས་ཀྱི་ནང་དུ་ཐུགས་འདོད་ལྟར་ཕབ་ལེན་དང་གཟིགས་ཀློག་གནང་རོགས།
དྲ་ཚིགས།: www.serajeyrigzodchenmo.org གློག་འཕྲིན་ཁ་བྱང་། serajeyrigzodchenmo@gmail.com
ཁྲིད་གཞུང་། སྙན་འགྲེལ་དཎྜིའི་དགོངས་རྒྱན།[ག] ལེའུ་གཉིས་པ།
སྒྲ་ཨང་། KADRN2050297
མཁས་པ་གཞན། [རིག་གནས།] སྤྱིའི་ཨང་། ༤༢༥
རྣམ་པ། MP3 རྣམ་གྲངས། 88 ཆེ་ཆུང་། 1.34 GB
ཁྲིད་གཞུང་། སྙན་འགྲེལ་དཎྜིའི་དགོངས་རྒྱན།
མཛད་པ་པོ། བོད་མཁས་པ་མི་ཕམ་རྣམ་རྒྱལ།[༡༦༡༨-]
ཁྲིད་མཚམས། ལེའུ་གཉིས་པ།
འཁྲིད་མཁན། རཀ་ར་ཐུབ་བསྟན་ཆོས་དར།
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༡༨ ལོའི་ཟླ་ ༠༥།༠༢ ལ་གསར་སྒྲིག་བྱས།
༢༠༡༩ ལོའི་ཟླ་བརྒྱད་པའི་ཚེས་ཉེར་དྲུག་ལ་བསྐྱར་སྒྲིག་བྱས།
ངོ་སྤྲོད་མདོར་བསྡུས།
རཀ་ར་རིན་པོ་ཆེ་ཐུབ་བསྟན་ཆོས་དར་མཆོག་ནི། ཕྱི་ལོ་༡༩༢༥ལོར་སྡེ་དགེ་སྤྱི་ཁྱབ་ཀྱི་སྲས་སུ་སྐུ་འཁྲུངས། དགུང་ལོ་ ༢ ཀྱི་སྐབས་རཀ་ར་སྐུ་ཕྲེང་དྲུག་པའི་ཡང་སྲིད་དུ་ངོས་འཛིན་གནང་། ༸གོང་ས་བཅུ་གསུམ་པས་རཀ་ར་ཐུབ་བསྟན་ཆོས་དར་ཞེས་པའི་མཚན་གནང་། ༡༩༣༥ལོར་འབྲས་སྒོ་མང་གྲྭ་ཚང་དུ་ཆོས་ཞུགས་ཀྱིས་སློབ་གཉེར་གནང་། དགུང་གྲངས་བཅུ་དགུའི་སྐབས་ལྷ་རམས་དགེ་བཤེས་ཀྱི་མཚན་བཏགས་བཞེས། དེ་རྗེས་རྒྱུད་སྨད་གྲྭ་ཚང་དུ་སྔགས་ལ་སློབ་གཉེར་མཛད། ཞོར་དུ་དགེ་འདུན་ཆོས་འཕེལ་གྱི་དྲུང་ནས་སྙན་སུམ་སོགས་ལ་སྦྱངས། ༡༩༤༩ལོར་སྔགས་རམས་པའི་མཚན་བཏགས་བཞེས་ཤིང་། སྨད་རྒྱུད་གྲྭ་ཚང་གི་དགེ་བསྐོས་གནང་། རྗེས་ལོ་དེར་སྨག་མཆོག་རིན་པོ་ཆེར་བསླབ་སྡོམ་ཕུལ། ༡༩༥༠ ལོར་རྒྱ་གར་དུ་བསྐྱོད། གཙུག་ལག་སློབ་གཉེར་ཁང་ཤཱན་ཏི་ནཱྀ་ཀེ་ཏན་སོགས་སུ་ལེགས་སྦྱར་དང་ཤར་ནུབ་ཀྱི་རི་མོ་འབྲི་ཚུལ་ལའང་སྦྱངས། ༡༩༥༦ནས་༡༩༦༠བར་རྒྱ་གར་རྒྱལ་ཡོངས་རླུང་འཕྲིན་ལས་ཁུངས་ཀྱི་བོད་སྐད་ལེ་ཚན་དུ་ཞབས་ཞུ་དང་། ལྡི་ལི་གཙུག་ལག་སློབ་གཉེར་ཁང་དུ་ལེགས་སྦྱར་གྱི་སློབ་དཔོན་གཞོན་པའི་ཕྱག་ལས་གནང་། ༡༩༥༩ལོར་ལ་དྭགས་ཀྱི་བུ་མོ་ཞིག་དང་གཉེན་སྒྲིག་གནང་། ༡༩༦༠ལོར་སྟག་འཚེར་རིན་པོ་ཆེས་སུད་སི་ཕིས་ཌ་ལོ་ཛི་རྒྱལ་ཡོངས་བུ་ཕྲུག་ཁྱིམ་སྡེའི་བོད་ཕྲུག་སྐྱབས་བཅོལ་བ་ཚོའི་འགན་འཁུར་བར་འབོད་འགུགས་གནང་། ༢༠༡༢ཟླ་༧ཚེས་༡༠ཉིན་དགུང་གྲངས་༨༧ལ་ཕེབས་སྐབས་སྐུ་གཤེགས། གསུང་རྩོམ་དང་བསྒྱུར་རྩོམ་མང་ཞིང་། སྐུ་ཚེ་གང་བོད་ཀྱི་ཆོས་རིག་སོགས་ཀྱི་ཆེད་དུ་ཕྱག་ལས་གནང་།
