མཛད་པ་པོ། རྗེ་བཙུན་ཆོས་ཀྱི་རྒྱལ་མཚན།
བརྗོད་བྱ། གྲུབ་མཐའ་བཞིའི་གཞི་ལམ་འབྲས་གསུམ་གྱི་རྣམ་གཞག
རིག་མཛོད་འཕྲུལ་དེབ་ཨང་། SJRB-0057
ཡིག་ཆའི་རྣམ་པ། PDF
ལྗིད་ཚད། 689KB
བསྐྱར་སྒྲིག་པ། རིག་མཛོད་ཆེན་མོའི་རྩོམ་སྒྲིག་པ།
༢༠༡༥ ལོའི་ཟླ་དང་པོར་གསར་དུ་རྩོམ་སྒྲིག་བྱས།
༢༠༢༢ ཟླ་ ༦ ཚེས་ ༡༢ ལ་བསྐྱར་དུ་རྩོམ་སྒྲིག་བྱས།
ངོ་སྤྲོད་མདོར་བསྡུས། རྗེ་བཙུན་ཆོས་ཀྱི་རྒྱལ་མཚན་མཆོག་ནི། ཕྱི་ལོ་༡༤༦༩ ལོར་ཉང་སྟོད་དུ་སྐུ་འཁྲུངས། དགུང་ལོ་བདུན་པར་གནས་རྙིང་ཆོས་རྗེ་ཀུན་དགའ་བདེ་ལེགས་རིན་ཆེན་ལས་དགེ་བསྙེན་གྱི་སྡོམ་པ་ཞུས། པཎ་ཆེན་ཡེ་ཤེས་རྩེ་མོ་སོགས་བསྟེན་ནས་གཞུང་ཆེན་ལ་གསན་སྦྱོང་མཛད། དགུང་ལོ་ཉེར་གསུམ་པར་བཀྲ་ཤིས་ལྷུན་པོའི་དགེ་བསྐོས་མཛད། དཔལ་འཁོར་བདེ་ཆེན་སོགས་སུ་གྲྭ་སྐོར་གནང་། རྗེ་ཤེས་རབ་བཟང་པོ་སོགས་ལས་བསྙེན་རྫོགས་བསྒྲུབས། དགུང་ལོ་ཉེར་བདུན་པར་གཙང་དུ་མདོ་སྔགས་ཀྱི་ཆོས་འཁོར་བསྐོར། དགུང་ལོ་ཞེ་གསུམ་པར་སེར་བྱེས་མཁས་སྙན་གྲྭ་ཚང་གི་མཁན་པོ་མཛད། དགུང་ལོ་ང་ལྔ་པར་སྟག་རྩེ་རིན་ཆེན་སྒང་གི་མཁན་པོ་གནང་། དགུང་ལོ་རེ་དགུ་པར་སེ་རའི་མཁན་ཁྲིར་ཕེབས་ཏེ་འཆད་ཉན་ལེགས་པར་བསྐྱངས། ༡༥༤༤ ལོར་ཞི་བར་གཤེགས་སོ། །བཀའ་རྩོམ་གྱི་སྐོར་ལ། སེར་བྱེས་གྲྭ་ཚང་གི་རྗེ་བཙུན་པའི་གསུང་འབུམ་དཔེ་བསྡུར་མའི་རྩོམ་སྒྲིག་པས་ལེགས་བསྒྲིགས་བྱས་པའི་དཔེ་གཟུགས་གླེགས་བམ་བཅོ་ལྔ་བཞུགས།

མཛད་པ་པོ། ཨཱ་ཙཱརྱ་དཔལ་བརྩེགས།
བརྗོད་བྱ། ཆོས་ཕྱོགས་ཀྱི་ཐ་སྙད།
རིག་མཛོད་འཕྲུལ་དེབ་ཨང་། SJRB-0002
ཡིག་ཆའི་རྣམ་པ། PDF
ལྗིད་ཚད། 1.1MB
རྩོམ་སྒྲིག་པ། རིག་མཛོད་ཆེན་མོའི་རྩོམ་སྒྲིག་པ།
༢༠༢༢ ཟླ་ ༦ ཚེས་ ༢༥ ལ་གསར་དུ་རྩོམ་སྒྲིག་བྱས།
ངོ་སྤྲོད་མདོར་བསྡུས། ལོ་ཙཱ་བ་སྐ་བ་དཔལ་བརྩེགས་སམ་བན་དེ་དཔལ་བརྩེགས་མཆོག་ནི། འཕན་པོའི་ཡུལ་དུ་རུས་མིང་སྐ་བ་ཡིན་པའི་ཡབ་སྐ་བ་བློ་ལྡན་དང་ཡུམ་འབྲོ་བཟའ་རྡོ་རྗེ་ལྕམ་གཉིས་ཀྱི་སྲས་སུ་འཁྲུངས། བཙན་པོ་ཁྲི་སྲོང་ལྡེ་བཙན་གྱི་དུས་སུ་བྱོན་པའི་ལོ་ཙཱ་བ་རབ་དགུའི་ནང་གསེས་གཞོན་གསུམ་སྟེ། འབྲོ་སྐ་བ་དཔལ་བརྩེགས་དང༌། ཅོག་རོ་ཀླུའི་རྒྱལ་མཚན། སྣ་ནམ་ཞང་ཡེ་ཤེས་སྡེ་བཅས་གསུམ་ལ་ཡོངས་གྲགས་སུ་སྐ་ཅོག་ཞང་གསུམ་ཞེས་པའི་ཡ་གྱལ་གྱི་ལོ་ཙཱ་བ་ཞིག་ཡིན། སྔ་འགྱུར་གྱི་ལོ་རྒྱུས་ཕལ་ཆེ་བའི་ནང་སྐ་ཅོག་ཞང་གསུམ་མཁན་སློབ་ཆོས་གསུམ་གྱི་སྐབས་སུ་ལོ་ཙཱ་བ་མཛད་པ་མ་ཟད། མཁན་ཆེན་སྐུ་གཤེགས་རྗེས་རྒྱ་ནག་གི་སློབ་དཔོན་ཧྭ་ཤང་དང༌། སློབ་དཔོན་ཀ་མ་ལ་ཤཱི་ལ་གཉིས་དམ་པའི་ཆོས་ཀྱི་རྩོད་པ་མཛད་ཅིང་ཧྭ་ཤང་ཕམ་པར་མཛད་པའི་རྗེས་སུ། སྒོམ་རིམ་ཐོག་མཐའ་བར་གསུམ་དང་དབུ་མ་སྣང་བ་བཅས་བརྩམས་ནས་བཙན་པོ་ཁྲི་སྲོང་ལྡེ་བཙན་ལ་གནང་། སྒོམ་རིམ་རྣམ་པ་གསུམ་ཞང་ཡེ་ཤེས་སྡེས་བོད་སྐད་དུ་བསྒྱུར་ཞིང་། དབུ་མ་སྣང་བ་སྐ་བ་དཔལ་བརྩེགས་ཀྱིས་བོད་སྐད་དུ་བསྒྱུར་གནང་མཛད་པ་བཅས་ལ་བརྟེན་ནས་སྐ་ཅོག་ཞང་གསུམ་མཁན་སློབ་ཆོས་གསུམ་ཞལ་བཞུགས་དུས་ཀྱི་ལོ་ཙཱ་བ་ཡིན། ཆོས་འབྱུང་མེ་ཏོག་སྙིང་པོ་ལས་ཀྱང་སྐ་ཅོག་ཞང་གསུམ་ནི་རྒྱལ་པོ་ཁྲི་སྲོང་ལྡེ་བཙན་གྱི་སྐུ་ཚེའི་སྨད་དུ་བྱོན་པའི་ལོ་ཙཱ་བ་ཡིན་པར་གསུངས། ལོ་རྒྱུས་ནང་དུ་ཡོད་པ་བཞིན་སྐ་ཅོག་ཞང་གསུམ་ལ་ཁྲི་སྲོང་ལྡེ་བཙན་གྱི་སྐབས་སུ་ལོ་ཙཱ་བ་གཞོན་གསུམ་ཞེས་གསུང་སྲོལ་ཡོད་པའི་རྒྱུ་མཚན་ཡང་འདི་ཉིད་ཡིན་པར་སྙམ། བཀའ་བསྟན་ཤེར་ཕྱིན་གྱི་གཞུང་དང་། འདུལ་བ། གསང་སྔགས་སོགས་ལོ་ཙཱ་བ་འདི་ཉིད་ཀྱིས་བསྒྱུར་བའི་བཀའ་བསྟན་ཤིན་ཏུ་མང་ངོ་། །
༢༠༢༢ ཟླ་ ༦ ཚེས་ ༢༥ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་ཏེ་བསྒྲིགས།

མཛད་པ་པོ། འཕགས་མ་དབྱངས་ཅན་མ།
བརྗོད་བྱ། མཚམས་སྦྱོར་དང་རྣམ་དབྱེ་སོགས།
རིག་མཛོད་འཕྲུལ་དེབ་ཨང་། SJRB-0288
ཡིག་ཆའི་རྣམ་པ། PDF
ལྗིད་ཚད། 642KB
རྩོམ་སྒྲིག་པ། རིག་མཛོད་ཆེན་མོའི་རྩོམ་སྒྲིག་པ།
༢༠༡༥ ལོའི་ཟླ་བདུན་པར་གསར་དུ་རྩོམ་སྒྲིག་བྱས།
༢༠༢༢ ཟླ་ ༦ ཚེས་ ༢༦ ལ་བསྐྱར་དུ་རྩོམ་སྒྲིག་བྱས།
ངོ་སྤྲོད་མདོར་བསྡུས། འཕགས་མ་དབྱངས་ཅན་མ་ནི། ཕྱི་ནང་གཉིས་ཀས་ཤེས་རབ་ཀྱི་ལྷར་བརྩི་སྲོལ་ཡོད་ཅིང་། འདིའི་བྱུང་རིམ་ལའང་ཕྱི་ནང་གཉིས་ཀས་བརྗོད་ཚུལ་མི་འདྲ་བར་ཡོད། སྒྲ་མདོ་འདི་ནི། འཕགས་ཡུལ་ལྷོ་ཕྱོགས་སུ་སྐུ་འཁྲུངས་པའི་སློབ་དཔོན་ཨ་ནུ་བྷཱུ་ཏི་འམ་རང་བཞིན་བཟང་པོ་ཞེས་བྱ་བ་དེས། པཎྜི་ཏ་སྟོང་ཕྲག་དུ་མ་འདུས་ནས་སྒྲ་རིག་པའི་སྐོར་ལ་བགྲོ་གླེང་གནང་བའི་སྐབས། སློབ་དཔོན་གྱིས་སྐྱེས་བུ་རྣམས་ལ་ཞེས་པའི་དོན་ལ། པུཾ་སུ་ཞེས་བརྗོད་དགོས་ཀྱང༌། པུཾ་ཀྵུ་ཞེས་པ་ངག་ནས་ཤོར་བ་ན། ཚོགས་པ་ཀུན་གྱིས་འཕྱ་སྨོད་བྱས་པས། སློབ་དཔོན་གྱིས་རང་གིས་ནོར་བ་ཡིན་པ་དགོངས་བཞིན་དུ་ངོ་ཚ་ནས། འདི་ལྟ་བུ་སྔོན་གྱི་སྒྲ་མཁན་རྣམས་ཀྱི་གཞུང་ན་ཡོད་པས་གླེགས་བམ་ནངས་པར་བསྟན་པར་བྱ་འོ་གསུངས་ནས་ཚོགས་པ་གྱེས་སོ། །ནང་དུ་སླེབས་ནས་དགེ་སྦྱོར་རྣམས་བསྐྱངས་ཏེ་ནམ་ཕྱེད་སླེབས་པ་ན། དེ་འདྲའི་པོ་ཏི་མེད་པས་ནངས་པར་དེ་དག་གི་གདོང་ལ་ཇི་ལྟར་བལྟ། དེ་བས་ཤི་བ་དགའ་སྙམ་ནས་རལ་གྲིས་མགུལ་པར་གཟས་པས་ས་ལ་ཁྲག་ཉིལ་གྱིས་ལྷུང་བའི་མོད་ལ། འཕགས་མ་དངོས་སུ་བྱོན་ནས་བུ་བུ་གདུང་བ་མ་བྱེད་ཅེས་གསུངས་ནས། བརྡ་སྤྲོད་པ་དབྱངས་ཅན་གྱི་མདོ་སྐད་ཅིག་ལ་སྩལ་ཏེ་དབུགས་ཕྱུང༌། སྔོན་གྱི་སྒྲ་མཁན་དྲང་སྲོང་ཀ་ཏིའི་བུས་བྱས་པའི་གཞུང་བརྟི་ཀ་ཞེས་པ་ལས། རིགས་དང་བརྩོན་པ་ཆེན་པོའི་དོན་ལ་ཀཀ྄་ ཨཱ་ག་མ་སྦྱིན་པར་བྱ་ཞེས་པའི་ཁུངས་ལུང་བསྟན་ནས། རྨའི་ཟུག་རྔུ་ཡང་མེད་པར་མཛད། དེ་ནས་འཕགས་མ་དངོས་ཀྱིས་སྩལ་བའི་མདོ་དེ་ལ་གཞུང་འགྲེལ་རབ་བྱེད་གསལ་ལྡན་ཞེས་པ་མཚན་མོ་ཐུན་གཅིག་གི་རིང་ལ་གྲུབ་པར་མཛད་དེ། འཕགས་མའི་བྱིན་རླབས་ཀྱིས་ཡིག་ཤོག་ཀྱང་ཡུན་རིང་ལོན་པའི་དཔེ་རྙིང་ལྟ་བུར་གྱུར། ཉི་མ་ཤར་བ་ན་རྒོལ་བ་ཚོགས་པའི་མདུན་སར་རྩེད་མོའི་ཚུལ་གྱིས་གླེགས་བམ་བསྟན། ཀུན་ལ་གྲགས་པའི་ཀ་ཏིའི་བུའི་ལུང་དྲངས་པས་ཚོགས་པ་ཀུན་མགུ་བར་བྱས། དེ་ནས་མགུལ་གྱི་རྨ་ཤུལ་དང་ལོ་རྒྱུས་རྣམས་བསྙད་པས་ཀུན་ངོ་མཚར་དུ་གྱུར། མཁས་པ་མང་པོས་ཞུས་པ་ལ་བརྟེན་མདོ་འགྲེལ་པ་དང་བཅས་ཚར་གཅིག་བཤད་ནས་ཕྱོགས་ཀུན་ཏུ་དར་བར་བྱས་སོ་ཞེས་གྲགས་སོ། །

མཛད་པ་པོ། སྐྱོབ་པ་འཇིག་རྟེན་མགོན་པོ།
བརྗོད་བྱ། ཕྱག་རྒྱ་ཆེན་པོའི་ཆོས་སྐོར།
རིག་མཛོད་འཕྲུལ་དེབ་ཨང་། SJRB-0228
ཡིག་ཆའི་རྣམ་པ། PDF
ལྗིད་ཚད། 632KB
བསྐྱར་སྒྲིག་པ། རིག་མཛོད་ཆེན་མོའི་རྩོམ་སྒྲིག་པ།
༢༠༡༥ ཟླ་བདུན་པར་གསར་དུ་རྩོམ་སྒྲིག་བྱས།
༢༠༢༢ ཟླ་ ༦ ཚེས་ ༡༢ ལ་བསྐྱར་དུ་རྩོམ་སྒྲིག་བྱས།
ངོ་སྤྲོད་མདོར་བསྡུས། སྐྱོབ་པ་འཇིག་རྟེན་མགོན་པོ་མཆོག་ནི། ཕྱི་ལོ་ ༡༡༤༣ ལོར་སྐུ་འཁྲུངས། ཡབ་ལས་རྡོ་རྗེ་འཇིགས་བྱེད་ཀྱི་ཆོས་སྐོར་དང་། ཁུ་བོ་དར་མ་སོགས་ལས་མདོ་སྔགས་ཀྱི་ཆོས་མང་དུ་གསན། ༡༡༦༧ ལོར་དབུས་ཀྱི་གདན་ས་ཕག་མོ་གྲུར་ཕེབས་ཏེ། འགྲོ་མགོན་ཕག་མོ་གྲུ་པ་རྡོ་རྗེ་རྒྱལ་པོ་བླ་མར་བསྟེན། མདོ་སྔགས་ཀྱི་ཟབ་ཆོས་མང་དུ་གསན། དགུང་ལོ་སོ་ལྔ་པར་བསྙེན་པར་རྫོགས། ༡༡༧༩ ལོར་འབྲི་གུང་དུ་ཕེབས། གདན་ས་འབྲི་གུང་མཐིལ་བྱང་ཆུབ་གླིང་ཕྱག་བཏབ་ནས་འདུས་ཚོགས་ཤིན་ཏུ་རྒྱས་ཤིང་། སྒྲུབ་པ་ཉམས་བཞེས་མཛད་མཁན་ཁྲི་ཕྲག་མང་པོ་བྱུང་བར་བཤད། དེ་ནས་འབྲི་གུང་སྐྱོབ་པའི་ཆོས་བརྒྱུད་འཛིན་མཁན་རྣམས་ལ་འབྲི་གུང་བཀའ་བརྒྱུད་པ་ཞེས་དང་། ཁོང་ལ་ཡང་འབྲི་གུང་སྐྱོབ་པ་ཞེས་གྲགས། སློབ་མ་མཆོག་ཏུ་གྱུར་པ་དབོན་བསོད་ནམས་གྲགས་པ་སོགས་མང་དུ་བྱུང་། ༡༢༡༧ ལོར་སྐུ་གཤེགས། གསུང་རྩོམ་ལ། པོད་བཅུ་ཙམ་བཞུགས།

མཛད་པ་པོ། རྗེ་བཙུན་ཏཱ་ར་ནཱ་ཐ།
བརྗོད་བྱ། དངོས་བསྟན་སྟོང་ཉིད་ཀྱི་རིམ་པ།
རིག་མཛོད་འཕྲུལ་དེབ་ཨང་། SJRB-0202
ཡིག་ཆའི་རྣམ་པ། PDF
ལྗིད་ཚད། 560KB
བསྐྱར་སྒྲིག་པ། རིག་མཛོད་ཆེན་མོའི་རྩོམ་སྒྲིག་པ།
༢༠༡༥ ཟླ་བརྒྱད་པར་གསར་དུ་རྩོམ་སྒྲིག་བྱས།
༢༠༢༢ ཟླ་ ༦ ཚེས་ ༢༤ ལ་བསྐྱར་དུ་རྩོམ་སྒྲིག་བྱས།
ངོ་སྤྲོད་མདོར་བསྡུས། རྗེ་བཙུན་ཏཱ་ར་ནཱ་ཐ་མཆོག་ནི། ཕྱི་ལོ་༡༥༧༥ལོར་དབུས་ཀྱི་ཇོ་མོ་ཁ་རག་དང་ཉེ་བར་སྐུ་འཁྲུངས། དགུང་ལོ་བཞི་པར་ཇོ་ནང་བླ་མ་ཀུན་དགའ་གྲོལ་མཆོག་གི་ཡང་སྤྲུལ་དུ་ངོས་འཛིན་མཛད། སྟག་ལུང་པ་ཀུན་དགའ་བཀྲ་ཤིས་རྒྱལ་མཚན་གྱི་དྲུང་ནས་བཀའ་གདམས་གླེགས་བམ་གྱི་ལུང་ཞུས་པ་དང་སྦྲགས་རབ་བྱུང་དང་དགེ་ཚུལ་གྱི་སྡོམ་པའང་མནོས། རྗེ་གྲུབ་པའི་དབང་ཕྱུག་ལས་རས་ཆུང་སྙན་བརྒྱུད་ཀྱི་ཆོས་རྫོགས་པར་ཞུས། དགུང་ལོ་བཅུ་བདུན་པར་བསྙེན་པར་རྫོགས། དབུས་སུ་ཕེབས་ཏེ་རིས་མེད་ཀྱི་བླ་མ་མང་པོ་ལས་ཆོས་མང་དུ་གསན། དགུང་ལོ་སོ་གཅིག་ནས་རིས་མེད་ཀྱི་བླ་སློབ་མང་པོར་མདོ་སྔགས་འཆད་མཉན་མཛད། དགུང་ལོ་ཞེ་གཅིག་པར་རྟག་བརྟན་དམ་ཆོས་གླིང་གི་གནས་གཞི་གསར་དུ་བཙུགས། ༡༦༣༤ ལོར་སྐུ་གཤེགས། ཁོང་གི་གསུང་རྩོམ་ལ་པོ་ཏི་ཀ་ནས་ཙའི་བར་བཅུ་བདུན་བཞུགས།