སློབ་དཔོན་ཀ་མ་ལ་ཤཱི་ལ་ནི། མཁན་ཆེན་ཞི་བ་འཚོའི་དངོས་སློབ་ཡིན་ཞིང་། བོད་སྐད་དུ་པདྨའི་ངང་ཚུལ་ལམ་རྒྱལ་བའི་ངང་ཚུལ་ཞེས་བྱ་ཞིང་། རྣལ་འབྱོར་སྤྱོད་པའི་དབུ་མ་རང་རྒྱུད་པའི་རང་ལུགས་འཛིན་པའི་རྒྱ་གར་གྱི་པཎྜི་ཏ་ཆེན་པོ་ཞིག་ཡིན། ཐུའུ་བཀྭན་གྲུབ་མཐའ་ལས། སློབ་དཔོན་ཞི་འཚོས་དབུ་མ་རྒྱན་དང༌། སློབ་དཔོན་ཡེ་ཤེས་སྙིང་པོས་དབུ་མ་བདེན་གཉིས། ཀ་མ་ལ་ཤཱི་ལས་དབུ་མ་སྣང་བ་མཛད་ཅིང༌། དེ་གསུམ་ལ་རང་རྒྱུད་ཤར་གསུམ་དུ་གྲགས། རང་རྒྱུད་པ་ལ་དབྱེ་ན། གཞིའི་རྣམ་བཞག་སེམས་ཙམ་པ་དང་མཐུན་པར་ཁས་ལེན་པའི་རྣལ་འབྱོར་སྤྱོད་པ་དང༌། མདོ་སྡེ་པ་ལྟར་རྡུལ་ཕྲ་རབ་བསགས་པའི་ཕྱི་རོལ་གྱི་དོན་ཁས་ལེན་པའི་མདོ་སྡེ་སྤྱོད་པའི་དབུ་མ་རང་རྒྱུད་པ་གཉིས་དང༌། སྔ་མ་ལ་ཡང་རྣམ་བདེན་པ་དང་མཐུན་པ་དང༌། རྣམ་རྫུན་པ་དང་མཐུན་པའི་དབུ་མ་པ་གཉིས་ཡོད་པའི་ཞི་བ་འཚོ་དང༌། ཀ་མ་ལ་ཤཱི་ལ་དང༌། འཕགས་པ་གྲོལ་སྡེ་ལྟ་བུ་སྔ་མ་དང༌། ཞེས་འབྱུང་།
ཇོ་ནང་ཀུན་མཁྱེན་གྱི་རྒྱ་གར་ཆོས་འབྱུང་དུ། རྒྱ་གར་ཡུལ་དབུས་ཀྱི་རྒྱལ་པོ་དཔལ་ལྡན་ཆོས་སྐྱོང་ངམ་དྷརྨ་པཱ་ལས་རྒྱལ་སྲིད་ལོ་དྲུག་ཅུ་རྩ་བཞི་མཛད། སེང་བཟང་དང༌། ཡེ་ཤེས་ཞབས་བླ་མར་བསྟེན། དཔལ་བི་ཀྲ་མ་ལ་ཤཱི་ལའི་གཙུག་ལག་ཁང་བཞེངས། སློབ་དཔོན་ཀ་མ་ལ་ཤཱི་ལ་ཡང༌། རྒྱལ་པོ་འདིའི་རིང་ལ་བྱོན་པར་མངོན་པས་དེ་ལས་སྔ་ཕྱིར་བྱུང་བར་མི་བསམ་མོ། །ཞེས་འབྱུང་།
མཁན་ཆེན་ཞི་བ་འཚོ་ཕོ་བྲང་རིམ་དགུའི་འོག་ཁང་དུ་རྟས་འཕྲ་བརྒྱབ་སྟེ་ཡེ་ཤེས་དབང་པོ་ལ་ཞལ་ཆེམས་བཞག་སྟེ་སྐུ་གཤེགས། དེར་བོད་ཀྱི་གོང་མ་ལྷ་བཙན་པོ་ཁྲི་སྲོང་ལྡེ་བཙན་གྱིས་ཡེ་ཤེས་དབང་པོ་ཆོས་ཀྱི་རིང་ལུགས་སུ་བསྐོས། ༼ཡེ་ཤེས་དབང་པོ་ནི་བོད་ཀྱི་རབ་བྱུང་བའི་ཐོག་མ་སད་མི་བདུན་ལས་རྒན་གསུམ། གཞོན་གསུམ། བར་མ་གཅིག་བཅས་ཡོད་པའི་བར་པ་སྦ་གསལ་སྣང་དང་། གཞན་དུ་རླངས་སུ་ག་ཏ་རབ་ཏུ་བྱུང་བའི་མཚན་ཡེ་ཤེས་དབང་པོ་ཡིན་ནོ་ཞེས་ཀྱང་འབྱུང་། ༽
ཡེ་ཤེས་དབང་པོས་གསོལ་བ་བཞིན་དུ་དགེ་འདུན་ལ་རྐྱེན་རིས་སྩལ་བས་བན་དྷེ་མྱང་ཏིང་ངེ་འཛིན་ལ་སོགས་པ་ཡེ་ཤེས་དབང་པོའི་ཞལ་མི་ཉན་པ་ཀུན་མ་མགུ་ཞིང་། རྐྱེན་རིས་ཀྱི་འབངས་དག་གི་ཐལ་ཆེ་བའི་བྱ་སྤྱོད་ཀྱིས་མྱང་ལ་སོགས་པས་སྡིག་པ་བསགས་པ་དེས་ཡེ་ཤེས་དབང་པོ་སྒོམ་པར་ཁ་གཡར་ཏེ་བྲོས་ནས་དབེན་པ་ལྷོ་བྲག་མཁར་ཆུ་བཙན་གྱི་བྲག་ཕུག་ཏུ་སྒོམ་པ་ལས་རི་བྱ་ལ་སོགས་པ་ཀུན་ཀྱང་རྡོ་དང་ཤིང་ལ་འབབ་པ་བཞིན་དུ་ཡེ་ཤེས་དབང་པོའི་ལུས་ལ་གནས། ཤུལ་དུ་སྦ་དཔལ་དབྱངས་རིང་ལུགས་སུ་བསྐོས།
དེའི་ཚེ་རྒྱ་ནག་གི་ཧྭ་ཤང་མ་ཧཱ་ཡ་ན་བྱ་བ་ཞིག་བྲག་དམར་དུ་ཡོད་པ་ལས། དེས་ལུས་ངག་གི་ཆོས་སྤྱོད་མི་དགོས། ལུས་ངག་གི་དགེ་བས་འཚང་མི་རྒྱ། དྲན་པ་མེད་ཅིང་ཡིད་ལ་བྱར་མེད་པ་བསྒོམས་པས་འཚང་རྒྱ་ཟེར་ནས་སྒོམ་བསླབས་པས་བོད་ཀྱི་བན་དེ་མང་ཤོས་ཀྱིས་ཁོའི་ཆོས་ལ་བསླབས་ཏེ་བསམ་ཡས་ཀྱི་གཙུག་ལག་ཁང་ལ་མཆོད་པ་འཕྲོ་ཆད། སློབ་གཉེར་དང་ལུས་ངག་གི་དགེ་བ་རྒྱུན་ཆད། སྦ་རཏྣ་དང་བཻ་རོ་ཙ་ན། དཔལ་དབྱངས་ལ་སོགས་ཉུང་ཤས་ཤིག་སློབ་དཔོན་ཞི་བ་འཚོའི་ཆོས་སློབ་བོ། །
དེར་ལྟ་སྤྱོད་མ་མཐུན་ནས་རྩོད་པ་ལ་༼ སློབ་དཔོན་ཞི་བ་འཚོའི་ལུགས་དང་ཧྭ་ཤང་གི་ལུགས་གཉིས་ལ་རིམ་པ་བཞིན་ཙེན་མིན་པ་དང་སྟོན་མུན་པ་ཟེར། སྦ་བཞེད་དུ། བཙན་པོས་རྒྱའི་སྟོན་པའི་ཆོས་འདི་བག་ཙམ་མིན་ནམ་གསུངས་པས་སྟོན་མིན་པ་བྱ་བར་གྲགས། གཅིག་ཤོས་ན་རེ་དྲང་སྲོང་བཟོད་པར་སྨྲ་བས་ལུས་ལ་མེ་བཏང་ནས་ཀྱང་མཆོད་པ་ཕུལ་བས་སེམས་ཅན་ལ་བརྩེ་བའི་བསམ་པས་ཚོགས་བསག་པ་གལ་ཆེ་ཟེར་བས། རྒྱལ་པོ་ན་རེ་ལུས་ལ་མེ་གཏོང་བའི་བརྩེ་བ་དེ་ཡང་ཆོས་མིན་ནམ་བྱས་པས་བརྩེ་མིན་པ་བྱ་བར་གྲགས། ཞེས་དང་། བུ་སྟོན་ཆོས་འབྱུང་དུ། སྟོན་མུན་དང་ཙེན་མུན་ནི་རྒྱའི་སྐད་དེ། ཅིག་ཅར་པ་དང་རིམ་གྱིས་པ་ཞེས་སོ། །ཞེས་དང་། དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་སུ། སྦ་བཞེད་དུ། བཙན་པོས་རྒྱའི་ཆོས་འདི་མིན་ནམ་བྱས་པས་ཏྭོན་མུན་དང་། ལུས་ལ་མེ་གཏོང་བའི་བརྩེ་བ་དེ་ཆོས་མིན་ནམ་བྱས་པས་བརྩེ་མིན་པར་གྲགས་པས་བཤད་པ་ནི་ལྷད་ཞུགས་པའི་བླུན་ཚིག་གི་རྟོག་བཏགས་ལས་རྒྱུ་མཚན་མེད་ཅིང་། ཏྭོན་མུན་དང་རྩེན་མུན་ཞེས་པ་རྒྱ་ནག་གི་སྐད་དེ། བོད་སྐད་དུ་ཅིག་ཅར་པ་དང་རིམ་གྱིས་པར་འགྱུར་ཞེས་མཁས་པའི་དབང་པོ་བུ་སྟོན་ཞབས་གསུང་བ་ལེགས་སོ། །ཞེས་འབྱུང་། མིང་འདི་གཉིས་ཀྱི་ཡི་གེ་མི་འདྲ་བ་ཁ་ཤས་འབྱུང་། སྟོན་མུན་པ། ཏོན་མིན་པ། ཏྭོན་མུན་པ། བརྩེ་མིན་པ། ཙེན་མུན་པ། རྩེན་མུན་པ། ཙེན་མིན་པ་སོགས་སོ། ། ༽ བཙན་པོས་མཁན་ཆེན་བོདྷི་སཏྭའི་ལུགས་བཞིན་དུ་ལྟ་སྤྱོད་གྱིས་ཤིག་གསུངས་པས། སྟོན་མུན་པ་རྣམས་ཁྲོས་ཏེ་ཆུ་གྲི་རྣོན་པོ་རེ་ཉེར་ཞིང་ཙེན་མིན་པ་ཡོངས་གསོད་ཟེར་བས་རྒྱལ་པོ་ཐུགས་མ་བདེ་ནས། ཡེ་ཤེས་དབང་པོ་འཕྲལ་དུ་ཤོག་ཅིག་ཅེས་ཕོ་ཉ་དུ་མ་ཞིག་བརྫངས་པ་ལས་མ་ཁུགས་ནས་ནང་བློན་གནོན་ཁམས་པ་ ༼ ཉང་ཆོས་འབྱུང་དུ། ནང་བློན་ཆེན་པོ་ཁམས་པ་གོ་ཆ་ཞེས་འབྱུང་། ༽ བཏང་སྟེ་ཁྱོད་ཀྱིས་ཡེ་ཤེས་དབང་པོ་ཁུགས་ན་ཁྱོད་ལ་ཟངས་ཆེན་པོ་བྱ་དགར་སྦྱིན། མ་ཁུགས་ན་ཁྱོད་གསོད་དོ་ཞེས་བཀའ་སྩལ་ཏེ་སྒྲོམ་བུ་བསྐུར་ནས་བཏང་ངོ༌། །
གནོན་ཁམས་པས་མཁར་ཆུར་ཕྱིན། བྲག་ཕུག་འདོམ་བཅུ་གཉིས་པ་དཔྱང་ཐག་ལ་འགྲོ་དགོས་པ་ཞིག་ཏུ་ཕྱིན་ཏེ་ཡེ་ཤེས་དབང་པོ་ལ་གཤེགས་པར་ཞུ། མ་བྱོན་ན་བདག་གསོད་པར་ཡོད་པས་བྲག་གཡང་འདི་ལ་བདག་མཆོངས་ཏེ་འགུམ་མོ་ཞེས་ཞུས་པས་ཡེ་ཤེས་དབང་པོ་བྱོན་ཏེ། བོད་ཀྱི་གོང་མ་ལྷ་བཙན་པོ་ཁྲི་སྲོང་ལྡེ་བཙན་ལ་མཁན་པོའི་ལུང་བསྟན་ཡོད་ཚུལ་ཞུས་པས་སྙེལ་སོས་ཏེ༑ མཁན་པོ་འདའ་ཁར་འདི་སྐད་གསུངས་ཏེ་སྤྱིར་ནི་སངས་རྒྱས་ཀྱི་བསྟན་པ་གར་བྱུང་བར་མུ་སྟེགས་ཀྱི་རྒོལ་བ་རེ་འགྲན་ཟླར་འོང་ན་ཡང་བོད་ཡུལ་དུ་བསྟན་པ་ལྔ་བརྒྱའི་ཐ་མ་ལ་བྱུང་བས་མུ་སྟེགས་ཀྱི་རྒོལ་པ་ནི་མི་འབྱུང༌། སངས་རྒྱས་པ་ཉིད་ལྟ་བ་མ་མཐུན་ཏེ་རྩོད་པར་འགྱུར་གྱི་དེ་ལྟ་བུ་བྱུང་ན་ངའི་སློབ་མ་ཀ་མ་ཤཱི་ལ་བྱ་བ་ཞིག་བལ་ཡུལ་ན་འདུག་པ་སྤྱན་དྲོངས་ལ་དེ་དང་རྩོད་པ་བྱེད་དུ་ཆུག་ལ་རྒྱལ་པོས་བསྡུམས་གྱིས་ཤིག །རྩོད་པ་ཆོས་ཕྱོགས་སུ་འདུམ་པར་འགྱུར་རོ་ཞེས་གསུང་གི་དེ་ཡང་དེ་ལྟར་མཛད་དུ་གསོལ་ཞེས་གསོལ་པ་དང༌། བཙན་པོས་ཀ་མ་ལ་ཤཱི་ལ་སྤྱན་འདྲེན་པའི་ཕོ་ཉ་བཏང་བ་ཧྭ་ཤང་གིས་གོ་ནས་ཡུམ་རྒྱས་པ་ལ་སོགས་པ་མདོ་སྡེ་ཟབ་མོ་རྣམས་སྤྱན་དྲངས་ཏེ་བཤད་པ་བསླབས། བསྟན་བཅོས་ལ་ཆོས་བྱ་མི་དགོས་ཉལ་བས་ཆོག་ཅེས་སྟོན་པ་བསམ་གཏན་ཉལ་བའི་འཁོར་ལོ། དེ་ལ་རྩོད་པ་སྤོང་བ་བསམ་གཏན་གྱི་ལོན། ཡང་ལོན་གཉིས། དེ་རིགས་པས་བསྒྲུབ་པ་ལྟ་བའི་རྒྱབ་ཤ་ལུང་གིས་བསྒྲུབ་པ་མདོ་སྡེ་བརྒྱད་ཅུ་ཁུངས་ལ་སོགས་པ་བྱས། མདོ་སྡེ་དགོངས་པ་ངེས་འགྲེལ་རང་གི་ལྟ་སྤྱོད་དང་འགལ་བར་མཐོང་ནས་རྡོག་པས་གྲིལ་ལོ། །
བཙན་པོས་ཀ་མ་ལ་ཤཱི་ལ་བལ་ཡུལ་ནས་བསམ་ཡས་སུ་གདན་དྲངས། ཀ་མ་ལ་ཤཱི་ལ་བྱོན་ཏེ། བསམ་ཡས་ཀྱི་ཐད་ཀའི་ཕ་རིའི་ཆུ་འགྲམ་དུ་ཕེབས་པ་དང་། ཧྭ་ཤང་ན་རེ། བདག་གིས་ཀྱང་པཎྜི་ཏ་བྱོན་པ་ལ་བསུ་བ་བྱེད་དོ་གསུངས་ཏེ་ཚུ་རིའི་ཆུ་འགྲམ་དུ་བྱོན་ནོ། །དེར་ཧྭ་ཤང་བྱོན་པ་ཀ་མ་ལ་ཤཱི་ལས་གཟིགས་ཏེ། ཀ་མ་ལ་ཤཱི་ལའི་ཐུགས་ལ་ཧྭ་ཤང་འདི་རིགས་པ་དང་ལྡན་ན་བདག་གིས་ངེས་པར་ཐུལ་གྱི་རིགས་པ་དང་མི་ལྡན་ན་མི་ཐུལ་དགོངས་ཏེ། ཧྭ་ཤང་གི་རིགས་པ་བརྟགས་པའི་ཕྱིར་དུ། ཁམས་གསུམ་འཁོར་བར་འཁྱམ་པའི་རྒྱུ་ནི་གང་ཡིན་ཞེས་འདྲི་བའི་བརྡ་སྟོན་པའི་ཕྱིར་དུ། ཀ་མ་ལ་ཤཱི་ལས་ཁོང་རང་གི་དབུ་ལ་ཕྱག་ཤིང་ལན་གསུམ་བསྐོར་བས། དེ་ཧྭ་ཤང་གིས་གཟིགས་ཏེ༑ འཁོར་བར་འཁྱམ་པའི་རྒྱུ་གཟུང་འཛིན་གཉིས་ལས་བྱུང་ཞེས་ལན་འདེབས་པའི་ཕྱིར་དུ། བེར་གྱི་ཐུ་བ་ནས་བཟུང་སྟེ་ལན་གཉིས་ས་ལ་བརྡབ་པས། ཀ་མ་ལ་ཤཱི་ལའི་ཐུགས་ལ་ཧྭ་ཤང་རིགས་པ་དང་ལྡན་པ་ཞིག་འདུག་པས། བདག་གིས་ཐུལ་བར་འདུག་གོ་དགོངས་ནས་ཤིན་ཏུ་དགྱེས་པར་གྱུར་ཏོ༑ །
དེ་ནས་བསམ་ཡས་སུ་ཕེབས་པ་དང་། རྒྱལ་པོའི་ཞལ་ནས། བདག་ནི་སངས་རྒྱས་ཀྱི་བསྟན་པ་ལ་རབ་ཏུ་མོས་ནས། གཙུག་ལག་ཁང་སྡེ་སྐོར་དང་བཅས་པ་བཞེངས། རྒྱ་གར་ནས་པཎྜི་ཏ་གདན་དྲངས། སྡེ་སྣོད་གསུམ་གྱི་ཆོས་ཐམས་ཅད་བསྒྱུར་ཞིང་ཡང་དག་པར་གཏན་ལ་ཕབ། དགེ་འདུན་གྱི་སྡེ་བཙུགས། ཆོས་ལ་དགོངས་པ་གཅིག་ཏུ་མཐུན་པ་ཞིག་ཡིན་ནའང། རྒྱ་ནག་ནས་ཧྭ་ཤང་བྱོན་ཏེ། ཆོས་ལ་ལྟ་བ་མ་མཐུན་པར་སོ་སོར་བྱེ་བས། མཁས་པ་ཀ་མ་ལ་ཤཱི་ལ་གདན་དྲངས་པ་ཡིན། བསྟན་པ་གཅིག་ལ་སྟོན་པ་གཉིས་མི་འོངས་པས། སངས་རྒྱས་བཅོམ་ལྡན་འདས་ཀྱི་དགོངས་པ་མཐུན་པར་སྒྲོགས། གླིང་གི་རྩོད་པ་མཛོད་ལ་ང་རྒྱལ་མ་མཛད་པར་རྩོད་པ་སུ་རྒྱལ་བ་དེ་ལ་ཕམ་པ་དེས་མེ་ཏོག་གཏོར་ཅིག་གསུངས་སོ། །
དེར་སེམས་བསྐྱེད་བྱང་ཆུབ་གླིང་དུ་གདན་ཁྲི་ཆེན་པོ་བཤམས་ཏེ། རྒྱལ་པོ་གུང་ལ་བཞུགས། གཡས་ཕྱོགས་སུ་ཧྭ་ཤང་དཔོན་སློབ་རྣམས་བཞུགས། གཡོན་ཕྱོགས་སུ་ཀ་མ་ལ་ཤཱི་ལ་དཔོན་སློབ་བཞུགས།
ཧྭ་ཤང་ན་རེ་ལས་དགེ་དང་མི་དགེ་སྤྱད་ན་མཐོ་རིས་དང་ངན་སོང་དུ་འགྲོ་བས་འཁོར་བ་ལས་མི་ཐར་ཞིང་སངས་རྒྱས་ཐོབ་པ་ལ་བསྒྲིབ་པ་ཡིན། དཔེར་ན་སྤྲིན་དཀར་ནག་གང་གིས་ཀྱང་ནམ་མཁའ་ལ་བསྒྲིབ་པ་དང་འདྲ། གང་ཞིག་ཅི་ལ་ཡང་མི་སེམས། ཅི་ཡང་མི་བསམ་པ་དེ་འཁོར་བ་ལས་ཡོངས་སུ་ཐར་བར་འགྱུར་རོ། །ཅི་ལ་ཡང་མི་སེམས་མི་རྟོག་མི་དཔྱོད་པ་ནི་མི་དམིགས་པ་ཡིན་པས། ཅིག་ཅར་དུ་འཇུག་པ་ནི་ས་བཅུ་པ་དང་འདྲའོ། །ཟེར་རོ། །
ཀ་མ་ལ་ཤཱི་ལའི་ཞལ་སྔ་ནས། དེ་ལྟར་ཅི་ལ་ཡང་མི་བསམ་ཟེར་བ་དེ་ནི་སོ་སོར་རྟོག་པའི་ཤེས་རབ་སྤངས་པ་ཡིན་ནོ། །ཡང་དག་པའི་ཡེ་ཤེས་ཀྱི་རྩ་བ་སོ་སོར་རྟོག་པའི་ཤེས་རབ་ཡིན་པས། དེ་སྤངས་པས་འཇིག་རྟེན་ལས་འདས་པའི་ཤེས་རབ་ཀྱང་སྤངས་པར་འགྱུར་རོ། །སོ་སོར་རྟོག་པའི་ཤེས་རབ་མེད་ན་རྣལ་འབྱོར་པ་ཐབས་གང་གིས་རྣམ་པར་མི་རྟོག་པ་ལ་གནས། གལ་ཏེ་ཆོས་ཐམས་ཅད་དྲན་པ་མེད་ཅིང་ཡིད་ལ་བྱ་བ་མེད་པ་ཡིན་ན། ཉམས་སུ་མྱོང་བ་ཐམས་ཅད་མི་དྲན་ཞིང༌། ཡིད་ལ་མི་བྱ་བར་མི་ནུས་སོ། །གལ་ཏེ་བདག་གིས་ཆོས་དྲན་པར་མི་བྱའོ་སྙམ་ན་དེ་ཤིན་ཏུ་དྲན་པ་ཡིད་ལ་བྱས་པར་འགྱུར་རོ། །དྲན་པ་མེད་པ་ཙམ་པོ་ལ་བྱེད་ན་བརྒྱལ་བའམ། འབོག་པའི་དུས་སུ་རྣམ་པར་མི་རྟོག་པར་འགྱུར་རོ། །ཡང་དག་པའི་སོ་སོར་རྟོག་པ་མེད་པར་མི་རྟོག་པ་ལ་འཇུག་པའི་ཐབས་མེད་དོ། །དེ་དྲན་པ་ཙམ་པོ་བཀག་ཀྱང་ཡང་དག་པའི་སོ་སོར་རྟོག་པ་མེད་ན་ཆོས་ཐམས་ཅད་ངོ་བོ་ཉིད་མེད་པ་ལ་ཇི་ལྟར་འཇུག་ནུས། སྟོང་པ་ཉིད་མ་རྟོགས་པར་སྒྲིབ་པ་སྤངས་པར་མི་འགྱུར་བས་ནའོ། །དེས་ན་ཡང་དག་པའི་ཤེས་རབ་ཀྱིས་ཕྱིན་ཅི་ལོག་གི་སྣང་བ་རྒྱང་བསྲིངས་པ་ཡིན་ནོ། །དེས་ན་དྲན་བཞིན་དུ་མི་དྲན་བྱར་མི་རུང་ངོ༌། །དྲན་པ་དང་ཡིད་ལ་བྱ་བ་མེད་པར་སྔོན་གྱི་གནས་རྗེས་སུ་དྲན་པ་དང་ཐམས་ཅད་མཁྱེན་པར་ཇི་ལྟར་འགྱུར། ཉོན་མོངས་པ་ཡང་ཇི་ལྟར་སྤོང༌། དེ་བས་ན་ཡང་དག་པའི་ཤེས་རབ་ཀྱིས་དོན་ངེས་པར་རྟོགས་པའི་རྣམ་འབྱོར་པས་དུས་གསུམ་ཕྱི་ནང་སྟོང་པར་རྟོགས་ནས་རྟོག་པ་ཉེ་བར་ཞི་སྟེ་ལྟ་བ་ངན་པ་ཐམས་ཅད་སྤངས། དེ་བརྟེན་ནས་ཐབས་ཤེས་རབ་ལ་མཁས་པས་སྒྲིབ་པ་ཐམས་ཅད་བསལ་ནས་སངས་རྒྱས་ཀྱི་ཆོས་ཐམས་ཅད་ཐོབ་པར་འགྱུར་རོ༑ །ཞེས་གསུངས་སོ། །
དེ་ནས་བཙན་པོའི་ཞལ་ནས། འཁོར་ཀུན་གྱིས་ཀྱང་མཆིད་གཤགས་ཐོབ་ཅིག་གསུངས། དེ་ནས་སྦ་ཡེ་ཤེས་དབང་པོས་ཅིག་ཅར་འཇུག་བྱ་བ་དང་། རིམ་གྱིས་འཇུག་བྱ་བ་གཉིས་དཔྱོད་དགོས་ཏེ། རིམ་གྱིས་འཇུག་ན་རྒྱུ་མ་མཆིས་པས། ངེད་དང་མི་འདྲ་ཅིག་ཅར་འཇུག་ན་ཁྱེད་ད་རུང་ཅི་བྱེད། དང་པོ་ནས་སངས་རྒྱས་ན་ཅི་ཉེས། དེ་བས་ན་རི་ལ་འཛེག་པའང་གོམ་པ་རེ་རེས་འཛེག་དགོས་ཏེ། གོམ་པ་གཅིག་གིས་བགྲོད་མི་ནུས་པ་ལྟར། ས་དང་པོ་ཐོབ་པའང་དཀའ་ན། ཐམས་ཅད་མཁྱེན་པ་ལྟ་ཅི་སྨོས། ངེད་རྩེན་མིན་གྱི་ལུགས་ཀྱིས་གསུང་རབ་ཀུན་ལ་ཤེས་རབ་གསུམ་གྱིས་སྦྱངས་པས་དོན་མ་ནོར་བར་ཤེས། ཆོས་སྤྱོད་བཅུ་ལ་བསླབས་ཏེ་བསྒོམས་པས་བཟོད་པ་ཐོབ། ས་དང་པོ་སྐྱོན་མེད་པ་ལ་ཞུགས་ཏེ་ས་བཅུ་རིམ་གྱིས་སྦྱངས་པ་ཚོགས་གཉིས་རྫོགས་ནས་འཚང་རྒྱ་བ་ཡིན། ཁྱེད་ལྟར་ན་ཚོགས་མ་རྫོགས། བློ་མ་སྦྱངས་པར་འཇིག་རྟེན་གྱི་བྱ་བ་ཡང་མི་ཤེས་ན་ཤེས་བྱ་ཐམས་ཅད་ཤེས་པར་ཇི་ལྟར་འགྱུར། ཅི་ཡང་མ་བྱས་པར་ཉལ་བས་ཟན་ཡང་མི་མྱོང་སྟེ། ལྟོགས་ཏེ་འཆི་ན་སངས་རྒྱས་ག་ལ་འགྲུབ། སྟོང་པ་གཅིག་པུས་རང་ལ་ཡང་མི་ཕན་ན་གཞན་གྱི་དོན་ལྟ་ག་ལ་འགྲུབ། ཁུངས་མེད་ཅིང་ཐབས་ཤེས་ཡ་བྲལ་བའི་ཆོས་ཀྱིས་སངས་རྒྱས་ལ་སྐུར་པ་བཏབ་སྟེ་བསླུས་པ་ཡིན། བྱང་ཆུབ་སེམས་དཔའ་ནི་སེམས་ཅན་གྱི་དོན་དུ་སེམས་བསྐྱེད་ནས་སེམས་ཅན་གྱི་དོན་ལྷུར་བྱས་ནས། ཚོགས་བསགས་ནས་ཐབས་ཐམས་ཅད་ལ་མཁས་པར་བསླབ། ཤེས་རབ་རྣམ་པ་གསུམ་ལ་བློ་སྦྱངས། ཡེ་ཤེས་ཀྱི་ཚོགས་བསགས་སྒྲིབ་པ་རྣམ་པ་གཉིས་སྦྱངས། བློའི་དྲི་མ་ཐམས་ཅད་སྤངས་ནས་མཐུ་རྫོགས་པ་དང་སངས་རྒྱས་ནས། སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པར་མཛད་པའི་འཕྲིན་ལས་འཁོར་བ་མ་སྟོངས་ཀྱི་བར་དུ་ལྷུན་གྱིས་གྲུབ་པ་ཡིན་པར་ལུང་དུ་མ་ནས་གསུངས་སོ། །ཅི་ཡང་མི་སེམས་པ་ནི་སྒོ་ང་དང་འདྲའོ། །མ་བརྟག་མ་དཔྱད་པར་གོམ་པ་བོར་ཡང་རྡེག་འཆོས་ན་ཆོས་ག་ལ་རྟོགས། དེ་བས་ན་མདོ་སྡེ་ཆེ་ཆུང་ཞིབ་པར་བསླབས། ཞི་གནས་དང་ལྷག་མཐོང་དབེན་པར་ཡིད་ལ་རྟོག་པ་ཡིད་ལ་མྱོང་བ་ཤར། དེ་ལྟར་རྟོག་པའི་དོན་དུ་ཚོགས་བསགས་ཤིང་། སེམས་ཇི་ལྟ་བུ་ནི་སྒྱུ་མ་ལྟ་བུ་སྟེ། དོན་དམ་པར་དེ་མ་སྐྱེས་པར་རྟོགས་ཏེ། ཆོས་ཐམས་ཅད་ཆུ་སྙིང་པོ་ལྟ་བུར་མ་བཅོས་པར་རྟོགས་ན་དུས་གསུམ་མི་དམིགས་པར་གྱུར་ཏེ། ཆོས་དང་གང་ཟག་ལ་བདག་མ་མཆིས་ཏེ། བྱིང་རྒོད་མ་མཆིས་པར་ཟུང་འབྲེལ་དུ་ངང་གིས་འཇུག་པ་ལགས་ཏེ། སྒོམ་པའང་དེ་ལྟར་ལགས་ཞེས་སྨྲས་པ་དང་། སྟོན་མུན་པས་ལན་སྨྲ་བར་མ་ནུས་ཏེ་མེ་ཏོག་ཕྲེང་བ་སློབ་དཔོན་ལ་ཕུལ་ཏེ་ཕམ་པ་ཁས་བླངས་སོ། །
དེ་ནས་བཙན་པོས་ད་ཕྱིན་ཆད་ལྟ་བ་ཀླུ་སྒྲུབ་ཀྱི་ལུགས་བཟུང༌། སྤྱོད་པ་ཆོས་སྤྱོད་བཅུ་དང་ཕ་རོལ་ཕྱིན་པ་སློབས། སྟོན་མུན་གྱི་ལུགས་བྱེད་དུ་མི་དབང་ངོ་ཞེས་བཀའ་སྩལ་ཏེ་ཧྭ་ཤང་རྒྱའི་ཡུལ་དུ་བརྫངས། དཔེ་རྣམས་བསྡུས་ཏེ་གཏེར་དུ་སྦས་སོ། །ཐུའུ་བཀྭན་གྲུབ་མཐའ་ལས། བསྟན་པ་སྔ་དར་གྱི་དུས་སུ་ལྟ་བ་ནི། རྒྱལ་པོ་ཁྲི་སྲོང་གིས་ལྟ་བ་དང་སྤྱོད་པ་མཁན་པོ་བོ་དྷི་ས་ཏྭའི་ལུགས་བཞིན་གྱིས་ཤིག །ཅེས་ཐོག་མར་ཁྲིམས་བསྒྲགས་པ་དང༌། ཧྭ་ཤང་གི་རྗེས་སུ་ཡང༌། ད་ཕྱིན་ཆད་ལྟ་བ་སློབ་དཔོན་ཀླུ་སྒྲུབ་ཀྱི་ལུགས་ལྟར་བྱ་དགོས་ཤིང༌། ཧྭ་ཤང་གི་ལུགས་ལྟར་བྱེད་ན་ཆད་པས་གཅོད་དོ་ཞེས་དྲིལ་བསྒྲགས་པར་བཤད་པས། དེས་ན་བསྟན་པ་སྔ་དར་ལ་སེམས་ཙམ་པའི་ལུགས་འཛིན་པའི་པཎྜི་ཏ་འགའ་ཞིག་ཀྱང་བྱོན་མོད་ཀྱང༌། གཙོ་བོ་ནི་ཞི་འཚོ་དང༌། ཀ་མ་ལ་ཤཱི་ལའི་ལུགས་ཡིན་པས་དབུ་མ་རང་རྒྱུད་པའི་ལྟ་བ་ཉིད་དར་ཆེའོ། །ཞེས་ཀྱང་འབྱུང་།
བོད་ཀྱི་གོང་མ་ལྷ་བཙན་པོ་ཁྲི་སྲོང་ལྡེ་བཙན་གྱིས་སློབ་དཔོན་ཀ་མ་ལ་ཤཱི་ལ་ལ་ཆོས་ཐམས་ཅད་ཐོས་བསམ་གྱིས་བདག་མེད་པར་གཏན་ལ་ཕབ་པའི་ཆོས་དེ་ཇི་ལྟར་ལགས་པ་ཞིག་ཡི་གེར་བཀོད་པ་ཞུས་པས། སྒོམ་རིམ་དང་པོ་བརྩམས་ནས་བཙན་པོ་ལ་གནང་། བཙན་པོས་གཟིགས་པས་དོན་དགོངས་ནས་དགྱེས་ཏེ། དེའི་དོན་སྟན་ཐོག་གཅིག་ཏུ་སྒོམ་ན་ཇི་ལྟར་སྒོམ་ཞུས་པས། སྒོམ་རིམ་བར་བ་བརྩམས་ནས་གནང་། དེ་ལྟར་སྒོམ་པས་དེ་ལ་འབྲས་བུ་ཇི་ལྟ་བུ་མཆི་ཞུས་པས། སྒོམ་རིམ་ཐ་མ་བརྩམས་ཤིང་འབྲས་བུ་བསྟན་པའི་ཞར་ལ་ཧྭ་ཤང་གི་ལྟ་བ་ནོར་བ་དེ་སུན་ཕྱུང་ནས་གནང་བ་དེ་ལ་ཤིན་ཏུ་དགྱེས་པས། དེའི་དོན་འགྲེལ་དུ་བོ་དྷི་སཏྭའི་དགོངས་པ་ལ་རྩོད་པ་རྒོལ་བར་དོགས་པའི་དོན་དུ་ལུང་དང་རིགས་པ་འབྲེལ་བར་དབུ་མ་སྣང་བ་བརྩམས་ནས་གནང་།
སློབ་དཔོན་འདིའི་འཁྲུངས་འདས་ཀྱི་ལོ་ཚིགས་སོགས་གསལ་པོ་ཞིག་ལོ་རྒྱུས་རྣམས་སུ་མ་མཐོང་ལ། སྐུ་གཤེགས་ཚུལ་ལ། སྦ་བཞེད་དུ། སླད་ཀྱི་བཙན་པོ་སློབ་དཔོན་པདྨ་སམ་བྷ་ཝའི་ཆོས་ཀྱི་འཕྲོ་ལུས་པ་ཐུགས་མ་ཚིམ་ནས། བཻ་རོ་ཙ་ན་དང་གཙང་བཙུན་ལེགས་གྲུབ་འཚོལ་དུ་བཏང་། སླར་ལོག་པ་ལ་པཎྜི་ཏ་མ་བྱོན་པས་བློ་བ་མ་མཆིས་ཏེ། རྒྱའི་སྙན་ཕྲའི་དབང་དུ་ཐལ་ནས། བཻ་རོ་ཙན་ན་ཚ་བ་རོང་དུ་བསྐྲད། ཀ་མ་ལ་ཤཱི་ལ་མུ་སྟེགས་ཀྱི་གཤེད་མ་བཏང་ནས་ནུབ་མོ་སྒྲ་སྒྱུར་གྱི་ཁང་པར་གཟིམས་མལ་དུ་མཁལ་མ་མཉེས་ནས་བཀྲོངས། ཞེས་དང་། གཞན་དུ། དུས་ཕྱིས་ཧྭ་ཤང་གི་རྒྱའི་ཤན་པ་མི་བཞིས། སློབ་དཔོན་ཀ་མ་ལ་ཤཱི་ལའི་མཁལ་མ་མཉེས་ཏེ་དཀྲོངས་སོ། །ཞེས་དང་། ཉང་ཆོས་འབྱུང་དུ། དེ་ནས་བཙན་པོས་སྔ་འགྱུར་དག་པར་བྱེད་པའི་འཕྲོར་ལུས་པ་ལ་ཐུགས་མ་ཚིམ་ནས་པཎ་ཌི་ཏ་མཁས་པ་བཙལ་བར་བྱ་དགོངས་པ་དང་། ནུབ་མོ་སྒྲ་སྒྱུར་གྱི་ཁང་པར་ཀ་མ་ལ་ཤཱི་ལ་མུ་སྟེགས་ཀྱིས་གཤེད་མ་བཏང་བས་གཟིམ་ལམ་དུ་མཁལ་མ་མཉེས་ནས་བཀྲོངས་ཀྱང་ཟེར་ཏེ། དེ་ནི་གཡོག་པོ་གསེར་གཉེར་བ་རྒྱ་གར་དྷ་ན་ཤྲཱི་བྱ་བས་བསད་པ་ཡིན་ནོ། །ཞེས་སོགས་གཤེགས་རྐྱེན་ལ་མི་མཐུན་པ་ཁ་ཤས་ཤིག་འབྱུང་ངོ་། །
གསུང་རྩོམ་ལ། སྒོམ་རིམ་གསུམ་གར་བམ་པོ་རེ་རེ་དང་རྣལ་འབྱོར་སྒོམ་པ་ལ་འཇུག་པ་ཤོ་ལོ་ཀ་སུམ་ཅུ་སྟེ་བཞི་ཞུ་ཆེན་གྱི་ལོ་ཙཱ་བ་ཞང་ཡེ་ཤེས་སྡེའི་འགྱུར། སྒོམ་རིམ་གསུམ་གྱི་དོན་འགྲེལ་དང་རྒྱབ་རྟེན་དུ་ལུང་རིགས་གཉིས་ཀྱི་སྒོ་ནས་ཟབ་དོན་གཏན་ལ་འབེབས་པར་བྱེད་པའི་དབུ་མ་སྣང་བ་བམ་པོ་དགུ་པ་ལོ་ཙཱ་བ་སྐ་བ་དཔལ་བརྩེགས་ཀྱི་འགྱུར། ཤེར་ཕྱིན་བདུན་བརྒྱ་པའི་རྒྱ་ཆེར་བཤད་པ་བམ་པོ་དྲུག་ནམ་མཁའ་སྐྱོང་གི་འགྱུར། ཤེར་ཕྱིན་རྡོ་རྗེ་གཅོད་པ་དབུ་མའི་ཚུལ་དུ་འགྲེལ་པ་བམ་པོ་ལྔ་ཡེ་ཤེས་སྡེའི་འགྱུར། ཤེར་སྙིང་འགྲེལ་པ་འཕགས་པ་ཤེས་རབ་ཀྱི་འགྱུར། དབུ་མ་རྒྱན་གྱི་འགྲེལ་བཤད་བམ་པོ་ལྔ་ཡེ་ཤེས་ལྡེ་ལ་སོགས་པའི་འགྱུར། ༼འདི་ལ་ལྕང་སྐྱའི་གྲུབ་མཐར། འདིའི་དཀའ་འགྲེལ་ཀ་མ་ལ་ཤཱི་ལས་མཛད་པར་གྲགས་པ་ནི་རྫུན་མ་ཡིན་པར་མཁས་གྲུབ་རྗེས་གསུང་ངོ་། །དཀའ་འགྲེལ་འདི་ལ་མི་འཐད་པའི་ཆ་འགའ་ཞིག་ཡོད་ཀྱང་སློབ་དཔོན་ཆོས་ཀྱི་བཤེས་གཉེན་གྱིས་སློབ་དཔོན་ཀ་མ་ལ་ཤཱི་ལའི་ཡིན་པར་བཞེད་པས་སློབ་དཔོན་ཐུགས་མ་རྫོགས་པའི་སྐབས་ཤིག་ཏུ་མཛད་པ་ཡིན་ནམ་བརྟག་པར་བྱའོ་ཞེས་རྗེ་རིན་པོ་ཆེའི་དབུ་མ་རྒྱན་གྱི་ཟིན་བྲིས་ལས་གསུངས་སོ། །ཞེས་འབྱུང་།༽ རྣམ་པར་མི་རྟོག་པ་ལ་འཇུག་པའི་གཟུངས་ཀྱི་འགྲེལ་པ་བམ་པོ་གཉིས། ས་ལུ་ལྗང་པའི་མདོའི་རྒྱ་ཆེར་འགྲེལ་པ་བམ་པོ་ཕྱེད་དང་གཉིས། ལྷོ་ཟ་མོ་ཚངས་དབྱངས་ལ་སྡུག་བསྔལ་གྱི་བྱེ་བྲག་བསྟན་པ། རིགས་པའི་ཐིགས་པའི་ཕྱོགས་སྔ་མ་ཤོ་ལོ་ཀ་བརྒྱ་དཔལ་བརྩེགས་ཀྱི་འགྱུར། སློབ་དཔོན་ཞི་བ་འཚོས་མཛད་པའི་ཚད་མའི་དེ་ཁོ་ན་ཉིད་བསྡུས་པའི་འགྲེལ་པ་སྟོང་ཕྲག་བཅོ་བརྒྱད་པ་གྲགས་འབྱོར་ཤེས་རབ་ཀྱི་འགྱུར། སློབ་དཔོན་དུལ་བའི་ལྷའི་སློབ་མ་ལ་ཕན་པ་དགེ་ཚུལ་གྱི་ཚིག་ལེའུར་བྱས་པ་ལྔ་བཅུ་པའི་འགྲེལ་པ་དོན་བརྒྱད་མ་དགེ་ཚུལ་གྱི་བྱ་བ། རྡོ་རྗེ་ཕག་མོའི་སྒྲུབ་ཐབས་ཨོང་ལོའི་འགྱུར། སྒྲོལ་མའི་སྒྲུབ་ཐབས་ཨོང་ལོའི་འགྱུར། འཇམ་དཔལ་ཁྲོ་བོའི་སྒྲུབ་ཐབས་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས་གཉིས་ཨོང་ལོའི་འགྱུར། རྣལ་འབྱོར་ལམ་གྱི་སྒྲོལ་མ། གསང་བ་ཐུགས་ཀྱི་སྒྲོལ་མ་ལོ་བཙུན་ཆུང་གི་འགྱུར། མཎྜལ་གྱི་ཆོ་ག །དེ་ཁོ་ན་ཉིད་ཕྱག་རྒྱ་ཆེན་པོ་ཡི་གེ་མེད་པའི་མན་ངག་ལོ་བཙུན་ཆུང་གི་འགྱུར་སོགས་མང་།
གཞན་འགྱུར་གྱི་སྐོར་ལ། དཔལ་ཀྱེ་རྡོ་རྗེ་ལས་སྦྱིན་སྲེག་གི་ཆོ་ག་སློབ་དཔོན་བོ་དྷི་གརྦྷས་མཛད་པ་སློབ་དཔོན་ཀ་མ་ལ་ཤཱི་ལ་དང་དགེ་སློང་ཤེས་རབ་སྐྱབས་ཀྱིས་བསྒྱུར་བ་སོགས་མང་།
དུང་དཀར་ཚིག་མཛོད་དུ། མངའ་བདག་ཉང་ཉི་མ་འོད་ཟེར་གྱིས་མཛད་པའི་ཆོས་འབྱུང་མེ་ཏོག་སྙིང་པོར་རྒྱ་ནག་ནས་སློབ་དཔོན་ཀ་མ་ལ་ཤཱི་ལ་སྤྱན་དྲངས་ཞེས་འཁོད་འདུག་པ་དེ་ཁོ་བོའི་བསམ་ཚུལ་ལྟར་ན་མ་ཡིག་བྲིས་མ་གཅིག་ལ་གཅིག་བརྒྱུད་ཀྱིས་དཔེ་བཤུ་བྱས་སྟབས། ཡིག་ཕྲེང་གོང་མ་ནས་འོག་མར་མཆོངས་ཏེ་བྲིས་ནོར་བྱུང་བ་མིན་ནམ་སྙམ་ཡིག་ཕྲེང་གོང་མར་རྒྱ་ནག་ནས་ཧྭ་ཤང་མ་ཧཱ་ཡ་ན་བོད་དུ་ཕེབས་པ་དང་། རྒྱ་གར་ནས་སློབ་དཔོན་ཀ་མ་ལ་ཤཱི་ལ་གདན་དྲངས་ཞེས་གསུངས་རྒྱུ་ཡིན་ངེས་སྙམ་པས་མཁས་དབང་རྣམས་ཀྱིས་དཔྱད་པར་ཞུ་ཞེས་འབྱུང་། ཉང་ཆོས་འབྱུང་ལྕགས་དཔར་མའི་ཤོག་གྲངས། ༣༥༢འ༡༠ན། སློབ་དཔོན་དྷ་ན་ཤི་ལ་བྱ་བའི་མཁས་པ་ཆེན་པོ་སྤྱན་དྲངས། ྿ རྒྱ་ནག་པོའི་ ྿ ཡུལ་ནས་སློབ་དཔོན་ཀ་མ་ལ་ཤཱི་ལ་སྤྱན་དྲངས། ཟ་ཧོར་ཡུལ་ནས་སློབ་དཔོན་བོ་དྷི་ས་ཏྭ་དང་། ཁ་ཆེའི་སློབ་དཔོན་བི་མ་ལ་མི་ཏྲ། ཨུ་རྒྱན་གྱི་སློབ་དཔོན་པད་མ་འབྱུང་གནས་དང་། སློབ་དཔོན་ཆེན་པོ་རྣམ་པ་ལྔ། ྿ རྒྱ་ནག་གི་ ྿ སློབ་དཔོན་ཀ་མ་ལ་ཤཱི་ལ་དང་། ལོ་ཙཱ་བ་རྨ་རིན་ཆེན་མཆོག་གིས་དཔང་སྐོང་ཕྱག་སྟོང་པ་ལ་སོགས་པ་མདོ་སྡེ་རྒྱ་ནག་མ་མང་པོ་བསྒྱུར། ཞེས་འབྱུང་ཞིང་། ཞི་འཚོའི་སློབ་མ་ཀ་མ་ལ་ཤཱི་ལ་གདན་ཞུས་ཀྱི་སྐོར་འོག་ཏུ་འབྱུང་བ་དང་། ཚིག་དོན་གྱི་གོ་རིམ་ལ་བལྟས་ན་ཚིག་མཛོད་ཀྱི་གསུང་ཚུལ་དེ་མི་འཐད་པ་འདྲ་ལ། ཆོས་འབྱུང་སོགས་ཁ་ཤས་སུ་རྒྱ་ནག་གི་མཁས་པ་ཀ་མ་ལ་ཤཱི་ལ་ཞེས་པ་དང་འདིའི་འགྱུར་མང་པོ་ཞིག་བགྲངས་འདུག་ན། སྐབས་དེར་རྒྱ་ནག་ནས་ཕེབས་པའི་མཁས་པ་ཀ་མ་ལ་ཤཱི་ལ་ཞེས་པ་ཞིག་ཡོད་དམ་སྙམ་ལ། བོད་ཀྱི་ལོ་ཙཱ་བའི་ཁྲོད་དུའང་ཀ་མ་ལ་ཤཱི་ལ་ཞེས་པ་ཞིག་འབྱུང་ངོ་། །

༢༠༡༨.༠༡.༠༥ སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

ཟུར་བལྟའི་དཔེ་ཁག
༡༽ སྦ་བཞེད། ༢༽ ཇོ་ནང་ཀུན་མཁྱེན་གྱི་རྒྱ་གར་ཆོས་འབྱུང་།
༣༽ དེབ་དམར་གསར་མ། ༤༽ དེབ་ཐར་དཔྱིད་ཀྱི་རྒྱལ་མོའི་གླུ་དབྱངས།
༥༽ རྒྱལ་རབས་གསལ་བའི་མེ་ལོང་། ༦༽ ལམ་རིམ་བླ་མ་བརྒྱུད་པའི་རྣམ་ཐར།
༧༽ བུ་སྟོན་ཆོས་འབྱུང་། ༨༽ ཐུའུ་བཀྭན་གྲུབ་མཐའ།
༩༽ ཆོས་འབྱུང་མཁས་པའི་དགའ་སྟོན། ༡༠༽ མཁས་པ་ལྡེའུའི་རྒྱ་བོད་ཆོས་འབྱུང་།
༡༡༽ ལྕང་སྐྱའི་གྲུབ་མཐའ། ༡༢༽ ཉང་ཆོས་འབྱུང་།
༡༣༽ བཀའ་ཐང་ཟངས་གླིང་མ། ༡༤༽ དུང་དཀར་ཚིག་མཛོད།
ཟུར་ལྟའི་དཔེ་ཁག
༡༽ ཇོ་ནང་ཀུན་མཁྱེན་གྱི་རྒྱ་གར་ཆོས་འབྱུང་། ༢༽ སྦ་བཞེད། ༣༽ དེབ་དམར་གསར་མ། ༤༽ དེབ་ཐར་དཔྱིད་ཀྱི་རྒྱལ་མོའི་གླུ་དབྱངས། ༥༽ རྒྱལ་རབས་གསལ་བའི་མེ་ལོང་། ༦༽ ལམ་རིམ་བླ་མ་བརྒྱུད་པའི་རྣམ་ཐར། ༧༽ བུ་སྟོན་ཆོས་འབྱུང་། ༨༽ ཐུའུ་བཀྭན་གྲུབ་མཐའ། ༩༽ ཆོས་འབྱུང་མཁས་པའི་དགའ་སྟོན། ༡༠༽ མཁས་པ་ལྡེའུས་མཛད་པའི་རྒྱ་བོད་ཆོས་འབྱུང་རྒྱས་པ། ༡༡༽ ལྕང་སྐྱའི་གྲུབ་མཐའ། ༡༢༽ ཉང་ཆོས་འབྱུང་། ༡༣༽ བཀའ་ཐང་ཟངས་གླིང་མ། ༡༤༽ དུང་དཀར་ཚིག་མཛོད།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།