ཆོས་རྗེ་དོན་གྲུབ་རིན་ཆེན་ནི། དགེ་ལྡན་བསྟན་པའི་ཆུ་འགོའམ་མ་དགོན་བྱ་ཁྱུང་དགོན་པ་གསར་འདེབས་གནང་མཁན་དང་། རྗེ་ཙོང་ཁ་པའི་བླ་མ་ཡིན། ཕྱི་ལོ་༡༣༠༩ལོར་མདོ་ཁམས་སྨད་དུ་འཁྲུངས། [འཁྲུངས་ཡུལ་གྱི་སྐོར་ལ་མི་མཐུན་པ་མང་།]
   རབ་ཏུ་བྱུང་ཞིང་དབུས་སུ་བྱོན། སྙེ་ཐང་པ་བཀྲ་ཤིས་སེང་གེ་སོགས་ལ་ཕར་ཕྱིན་དང་། བྱམས་ཆོས་ཐམས་ཅད་མཁས་པར་བསླབས། སྣར་ཐང་གི་ཆོས་གྲྭར་བྱོན་ནས་བཅོམ་ལྡན་རིགས་རལ་གྱི་བུ་ཆེན། བཅོམ་ལྡན་པ་རང་གི་གདན་ས་བ་ལྡོང་སྟོན་རིགས་པའི་སེང་གེ་ལ་ཚད་མ་རྣམ་ངེས་གསན། ཞྭ་ལུར་གྲྭ་སྐོར་ལ་བྱོན་པ་ན་བུ་སྟོན་ཐམས་ཅད་མཁྱེན་པ་ཡང་གདན་སར་ཕེབས་ནས་འདུག་པ་ལ། ཚོགས་སུ་བགྲོ་གླེང་མཛད་པས་ལེགས་པར་ཟིན་ཏེ། ཤར་ཕྱོགས་པ་རིགས་པའི་དཔའ་བོ་ཞེས་གྲགས།
དེ་ནས་རོང་དུ་བྱོན་ཏེ་གསན་རྒྱ་དང་མཁྱེན་རྒྱ་བུ་སྟོན་དང་མཉམ་པར་གྲགས་པའི་རོང་གི་བླ་མ་ཡེ་ཤེས་དཔལ་བའི་དྲུང་ནས་གཤེད་སྐོར་སྤྱི་དང་། ཁྱད་པར་འཇིགས་བྱེད་ཀྱི་དབང་དང་། རྒྱུད་འགྲེལ་གྱི་བཤད་པ། མན་ངག་ཐམས་ཅད་ལེགས་པར་གསན།
   མདོ་ཁམས་སྨད་དུ་ཕེབས་ཏེ་ཤིང་ཀུན་སྡེ་གསར་གྱི་མཁན་པོ་མཛད། དེར་མཁན་པོ་མཛད་ནས་འཆད་ཉན་ཤིན་ཏུ་འཕེལ་སྐབས་ཤིག་ལ། སྙེ་ཐང་བདེ་བ་ཅན་གྱི་གདན་ས་མཛད་པར་ཞུ་བའི་གདན་འདྲེན་པ་བྱུང་བས་དབུས་སུ་ཕེབས། འོན་ཀྱང་དེ་དུས་གདན་ས་བ་བསྐོས་ཚར་བས་གདན་སའི་སྟབས་མ་འཕྲོད་ཀྱང་། ཡོ་བྱད་མང་དུ་བསྣམས་བྱོན་པ་རྣམས་ཀྱིས་བདེ་བ་ཅན་དང་། སྣར་ཐང་སོགས་སུ་གཙུག་ལག་ཁང་དང་དགེ་འདུན་ལ་སྲི་ཞུ་རྒྱ་ཆེར་བསྒྲུབས།
   ཡབ་ཆོས་སྡིངས་འདེབས་མཁན་སྐྱེས་མཆོག་རྟོགས་ལྡན་པ་ཆོས་རྗེ་བསམ་གཏན་དཔལ་གྱི་དྲུང་དུ་སྒྲུབ་པ་ལ་བྱོན། ཕྱག་རྫས་གང་ཡོད་བླ་མ་ལ་ཕུལ། སྒྲུབ་པ་ལ་རྩེ་གཅིག་ཏུ་གཞོལ། ཁྱད་པར་དུ་མཁས་གྲུབ་ཆེན་པོ་མཆིམས་བློ་བཟང་གྲགས་པའི་སྤྱན་སྔར་མདོ་སྔགས་ཀྱི་ཆོས་མང་དུ་གསན་པའི་སྐབས་ཤིག །བླ་མའི་ཞལ་ནས། ཁྱོད་ཀྱི་གནས་དང་གདུལ་བྱ་མདོ་ཁམས་སྨད་དུ་ཡོད། ཁྱད་པར་ཤ་སྦྲང་དང་བྱ་ཁྱུང་ཟེར་བའི་གནས་གཉིས་སུ་དགོན་པ་ཐོབ་ལ་བཤད་སྒྲུབ་ཀྱི་བསྟན་པ་གང་འཕེལ་གྱིས། སྒོས་སུ་བྱ་ཁྱུང་དུ་སྒྲུབ་པ་གཙོ་བོར་མཛོད། དེ་དུས་ཁྱོད་ལ་སློབ་མ་མཁས་གྲུབ་གཉིས་འཛོམས་མང་པོ་འོངས་པའི་ནང་ནས་འགྲན་ཟླ་དང་བྲལ་བ་གཅིག་འབྱུང་བས་དེ་རབ་ཏུ་བྱུང་དུས་བློ་བཟང་གྲགས་པ་ཞེས་མིང་འདི་ཐོགས་ཞེས་གསུངས།
དེ་ནས་བླ་མས་ལུང་བསྟན་པ་བཞིན་སླར་མདོ་ཁམས་སྨད་དུ་བྱོན། ཐོག་མར་ཤ་སྦྲང་གི་གནས་བཙལ་ཏེ་དེར་དགོན་གནས་བཏབ། དེར་ལོ་སྦྲེལ་གྱི་བར་དུ་ཕར་ཚད་ཀྱིས་ཐོག་དྲངས། བྱམས་ཆོས་རྣམས་དང་། བརྟག་གཉིས། སྤྱོད་འཇུག་སོགས་ཀྱི་བཤད་པ་མཛད་ཀྱང་ཐུགས་བཞེད་མ་ཁེངས་པས་ཐུགས་སྐྱོ་ནས་དབོན་པོ་ཤཱཀྱ་བཟང་པོ་གདན་སར་བསྐོས། རང་ཉིད་བྱ་ཁྱུང་གི་གནས་བཙལ་བར་བྱོན།
   དགུ་རོང་བརྒྱུད་བྲག་བྱ་ཁྱུང་མཐོང་བའི་གྲོང་སྣང་རར་བྱོན། ཨ་མེས་དོན་གྲུབ་སེང་གེ་ཞེས་པའི་རྩར་ཕེབས། དེར་དོན་གྲུབ་སེང་གེས་སྦྱིན་བདག་བྱས་ཏེ་སྣང་རའི་གསེང་ཁང་དུ་གྲགས་པ་བཞེངས། དེར་ཚོགས་པ་མང་པོར་ས་སྡེའི་བཤད་པ་ཡང་གནང་བར་གྲགས།
   དེ་ནས་བྲག་བྱ་ཁྱུང་ལ་གཏད་དེ་ཕེབས། རབ་བྱུང་དྲུག་པའི་ས་གླང་ལོ་༡༣༤༩ལ་དགོན་པའི་གཞི་བཏིངས། གཙུག་ལག་ཁང་བཞེངས་པ་ཕྱིས་སུ་མགོན་ཁང་དུ་གྲགས་ཏེ་ད་ལྟའི་འདུ་ཁང་གི་སྟེང་རྒྱབ་ན་ཡོད་པ་དེ་ཡིན་པར་གསུངས། གནས་གཞི་བཏིངས་འཕྲལ་གྲྭ་ཚོགས་བརྒྱ་ཕྲག་བརྒལ་བ་ལ་ཕར་ཚད་ཀྱིས་ཐོག་དྲངས་བྱམས་ཆོས་རྣམས་དང་། བརྟག་གཉིས། སྤྱོད་འཇུག་སོགས་ཀྱི་བཤད་པ་རྒྱ་ཆེར་མཛད།
   བར་སྐབས་ཤིག་ཆོས་རྗེ་ཉིད་སྐུ་འབུམ་ཆུ་དཀར་རི་ཁྲོད་དུ་ཉམས་བཞེས་མཛད་སྐབས་མཚན་ལམ་དུ་རྡོ་རྗེ་འཇིགས་བྱེད་དང་མཇལ་བས་བྱིན་གྱིས་བརླབ་པར་གསོལ་བ་བཏབ། ཁྱད་པར་དུ་ཞལ་དངོས་སུ་བསྟན་དུ་གསོལ་ཞེས་ཞུས་པས། སང་ཕོད་ད་ཙམ་ལུང་པ་འདིའི་མདའ་རུ་འོང༌། དེའི་བར་བདེ་བར་གྱིས་གསུངས་བྱུང་བར། དེ་གང་ཡིན་དཔྱད་པས། རྗེ་ཙོང་ཁ་པ་འཇིག་རྟེན་དུ་འབྱོན་པའི་བརྡར་ཤེས་ནས་རྟེན་འབྲེལ་ཁྱད་པར་ཅན་བསྒྲིག་པར་དགོངས་ཏེ་གསོལ་ཟན་དང་བདུད་རྩི་རིལ་བུ་བསྲེས་པའི་རིལ་བུ་དང་སྲུང་མདུད། རྡོ་རྗེ་འཇིགས་བྱེད་ཀྱི་བྲིས་སྐུ་བྱིན་རླབས་ཅན། བུ་ཆུང་གཙང་སྦྲ་དང་བཅས་སྐྱོང་ལུགས་ཀྱི་ཡི་གེ་དང་བཅས་པ་ཉེ་གནས་ཚུལ་ཁྲིམས་དང་ལྡན་པ་ཞིག་ལ་བསྐུར་གནང་མཛད།
   ཕྱི་ཞིག་ན་ཡབ་ཡུམ་གྱིས་ཆོས་རྗེ་དོན་གྲུབ་རིན་ཆེན་པ་ཉིད་སྤྱན་དྲངས། བཀུར་སྟི་ཕུན་སུམ་ཚོགས་པ་མཛད། རྗེ་འདི་བས་ཀྱང་རྟ་ནོར་གོས་དར་སོགས་ཟང་ཟིང་གི་གནང་སྦྱིན་མཛད་ནས་ཁྱོད་ཀྱི་བུ་འདི་ང་ལ་ཕུལ་ཅིག་ཅེས་བཀའ་སྩལ་པ་བཞིན་ཡབ་ཡུམ་གྱིས་ཀྱང་དགའ་སྤྲོ་དང་བཅས་འབུལ་བར་ཁས་བླངས། ད་ལྟ་སྐུ་འབུམ་འཇམ་དབྱངས་ཀུན་གཟིགས་ཁང་དུ་བཞུགས་པའི་ཕ་བོང་སྟེང་ཆོས་རྗེ་དོན་རིན་པའི་ཞབས་རྗེས་དང་དབྱུག་པའི་རྗེས་གསལ་བར་བཏོད་ཡོད་པ་འདི་ཡང་དེ་དུས་བྱུང་བར་མངོན་ཞེས་གསུངས། སྐབས་དེར་ཆུ་དཀར་རི་ཁྲོད་ཀྱི་སྒྲུབ་ཕུག་ནང་གི་བྲག་གྱེན་དུ་བཏེགས་པའི་ཕྱག་རྗེས་གཉིས་ཀ་གསལ་བར་བཏོད་པ་ད་ལྟའང་མཇལ་དུ་ཡོད།
   དེ་ནས་རྗེ་ཀརྨ་རོལ་པའི་རྡོ་རྗེ་ཤ་རྫོང་རི་ཁྲོད་དུ་ཕེབས་ནས་བཞུགས་སྐབས་ཡབ་ཀྱིས་ཁྲིད་ནས་རབ་ཏུ་བྱུང་བར་ཞུས་ཀྱང་ད་དུང་གཞོན་ནུར་གྱུར་པས་རབ་ཏུ་བྱུང་མ་རན་གསུངས་ནས་དགེ་བསྙེན་བསྒྲུབས། མཚན་ལ་ཀུན་དགའ་སྙིང་པོར་གསོལ། ཕྱིས་དབུས་སུ་ཕེབས་ཤིག་ཅེས་པའི་ལུང་བསྟན་གནང་།
   དེ་ནས་ཡབ་ཡུམ་གཉིས་ཀྱིས་རྗེ་བླ་མ་ཆོས་རྗེ་དོན་རིན་པ་ལ་འབུལ་བར་མཛད། རྗེ་བླ་མས་ཆོས་རྗེའི་དྲུང་དུ་ཡིག་ཀློག་ལ་བྱང་བར་སྦྱངས། རྗེ་བླ་མ་རབ་ཏུ་མ་བྱུང་བའི་སྔ་རོལ་དུ་ཆོས་རྗེ་ཉིད་ཀྱིས་དཔལ་རྡོ་རྗེ་འཇིགས་བྱེད་དང་། འཁོར་ལོ་བདེ་མཆོག་དྲིལ་བུ་ལུགས་དང་། ཀྱེེ་རྡོ་རྗེ་དང་། ཕྱག་ན་རྡོ་རྗེ་ལ་སོགས་པའི་དཀྱིལ་འཁོར་དུ་བཅུག་ཅིང་དབང་བསྐུར། གསང་མཚན་དུ་དོན་ཡོད་རྡོ་རྗེ་ཞེས་བཏགས་ཏེ་རྡོ་རྗེ་ཐེག་པའི་སྒོར་སྨིན་པར་མཛད།
   རྗེ་བླ་མ་དགུང་ལོ་བདུན་པའི་ཚེ། ཆོས་རྗེ་དོན་རིན་པས་མཁན་པོ་དང་། ཏཱ་དབོན་གཞོན་ནུ་སེང་གེའི་སློབ་མ་གཞོན་ནུ་བྱང་ཆུབ་འོད་ཀྱིས་སློབ་དཔོན་མཛད་དེ་རབ་ཏུ་བྱུང་ཞིང་ཚིགས་སྔ་མ་དགེ་ཚུལ་གྱི་སྡོམ་པ་བཞེས་ནས་མཚན་ལ་བློ་བཟང་གྲགས་པ་ཞེས་གསོལ།
   དེ་ནས་རྗེ་དགུང་ལོ་བཅུ་དྲུག་བཞེས་པའི་ཚེ་མཐུན་རྐྱེན་བཅས་དབུས་གཙང་དུ་ཕེབས་པའི་སྐུལ་མ་དང་རྫོངས་པ་མཛད། ཕེབས་ཁར་ཆོས་རྗེ་ཉིད་ཀྱི་ཞལ་ནས། ངས་ཁྱེད་ལ་ཆོས་ཤིག་འཆད་པ་ཡིན། ཅི་འདྲ་ཞིག་འདོད་ཅེས་པ་ལ། སེམས་ལ་ཕན་པའི་ཞལ་ཏ་ཞིག་ཐུགས་ལ་འདོགས་འཚལ་ཞུས་པས། དང་པོ་ཐོས་བསམ་བྱ་ཚུལ། དེ་ནས་དེ་དག་གི་དོན་ཉམས་སུ་བཞེས་ཚུལ། མཐར་བསྟན་འགྲོའི་བྱ་བ་མཛད་ཚུལ་རྣམས་འབྱུང་འགྱུར་ལུང་བསྟན་བསླབ་བྱའི་ཚུལ་དུ་ཚིགས་བཅད་ཀྱི་སྒོ་ནས་རྒྱ་ཆེར་འདོམས་པར་མཛད།
   ཆོས་ཀྱི་རྗེ་དོན་གྲུབ་རིན་ཆེན་པས་རྗེ་བདག་ཉིད་ཆེན་པོ་སྐུ་བྱིས་པའི་དུས་ཉིད་ནས་བདག་གིར་མཛད་དེ་སྐུ་དྲུང་དུ་སྐྱེད་བསྲིངས་པ་དང༌། འཇམ་དཔལ་དབྱངས་དང་དབྱངས་ཅན་མ་ལ་སོགས་པའི་སྒོ་ནས་ཤེས་རབ་འཕེལ་བའི་ཐབས་དུ་མ་དང༌། རབ་ཏུ་བྱུང་བ་དང༌། རྡོ་རྗེ་ཐེག་པའི་སྒོར་སྨིན་པར་མཛད་དེ་ལེགས་པར་བསྐྱངས་ཤིང་། ཕྱིས་དབུས་སུ་འབྱོན་པའི་རྫོང་བདའ་བསླབ་འདོམས་གནང་བ་སོགས་བཀའ་དྲིན་ཧ་ཅང་ཆེ་བ་ཞིག་ཡིན། ཕྱིས་རྗེ་བླ་མས་ཀྱང་ཆོས་རྗེ་ཉིད་ཀྱི་མཚན་བརྗོད་པ་ཙམ་ལའང་ཕྱག་ཐལ་མོ་སྦྱོར་ཞིང་སྤྱན་ཆབ་བསིལ་བ་དང༌། མྱ་ངན་ལས་འདས་ནས་དུས་མཆོད་མ་ཆག་པར་མཛད་པ་སོགས་བཀའ་དྲིན་ཆེ་ཤོས་ཀྱི་བླ་མར་འཛིན་པས། ལེགས་བཤད་གསེར་ཕྲེང་གི་མཆོད་བརྗོད་དུ་ཡང༌། དོན་ཟབ་རྒྱལ་བའི་གསུང་གི་གྲུར་ཞུགས་ཏེ། །གྲུབ་མཐའ་རྒྱ་མཚོའི་ཕ་རོལ་སོན་གྱུར་ཅིང༌། །རྣམ་གྲོལ་རིན་ཆེན་གླིང་དུ་ལུས་ཅན་རྣམས། །ཀུན་ནས་བཀྲི་མཛད་ཆོས་རྗེའི་ཞབས་ལ་འདུད། །ཅེས་དང༌། སྔགས་རིམ་ཆེན་མོའི་མཛད་བྱང་དུ། ལུང་དང་མངོན་པར་རྟོགས་པའི་ཡོན་ཏན་ཕུལ་དུ་བྱུང་བ་མངའ་བ། དོན་གྱི་སླད་དུ་མཚན་ནས་སྨོས་ཏེ། དོན་གྲུབ་རིན་ཆེན་གྱི་ཞལ་སྔ་ནས་ཀྱི་སྐུ་དྲིན་གྱིས་རྡོ་རྗེ་ཐེག་པའི་སྒོར་ཐོག་མར་སྨིན་པར་མཛད། ཅེས་དང༌། རྟག་ངུའི་རྟོགས་བརྗོད་དུ། མི་འཕྲོག་པའི་མཁྱེན་རབ་དང་ཐུགས་རྗེ་ཕུན་སུམ་ཚོགས་པའི་བདག་ཉིད་དོན་གྱི་སླད་དུ་མཚན་ནས་སྨོས་ཏེ་ཆོས་ཀྱི་རྗེ་དོན་གྲུབ་རིན་ཆེན་གྱི་ཞབས་ཀྱི་རྡུལ་སྤྱི་བོར་ལེན་ཅིང༌། ཞེས་སོགས་བསྔགས་བརྗོད་ཚད་མེད་པ་གནང་ངོ༌། །
   རབ་བྱུང་དྲུག་པའི་ཤིང་གླང་༡༣༨༥ལོ་ཆོས་རྗེ་ཉིད་དགུང་ལོ་དོན་བདུན་པར་སྐུ་ཞི་བར་གཤེགས་སོ། །སྐུ་གདུང་རིལ་བོ་མ་ཉམས་པ་དྲི་བཟང་པོའི་ཤིང་གི་སྒྲོམ་དུ་བཞུགས་སུ་གསོལ་ཏེ་འབུམ་པ་བཞེངས། ཕྱིས་སུ་ཨ་གྲོ་ཆོས་རྗེ་ཤེས་རབ་རྒྱལ་མཚན་གྱིས་སོ་ཕག་གིས་སྒྲོན་ཅིང་ལེགས་པར་བཞེངས་པ་དང་། རྒྱལ་བ་བསོད་ནམས་རྒྱ་མཚོའི་བཀའ་ཁྱབ་ལྟར་ཟངས་ཀྱིས་བཏུམས་པ་སོགས་སྲི་ཞུ་རྒྱ་ཆེར་མཛད། ལོ་རེ་བཞིན་དུས་བཟང་ལ་དགོན་པའི་གླིང་དང་གཙུག་ལག་ཁང་དུ་དྲི་བཟང་གིས་ཁྱབ་པ་དང་། སྐུ་གདུང་མཆོད་རྟེན་གྱི་བང་རིམ་ལས་ད་ལྟའི་དུས་སུའང་བདུད་རྩིའི་ཟིལ་བ་འབབ་པ་དེ་ཕྱོགས་ཀྱི་སྐྱ་སེར་རྒན་གཞོན་ཐམས་ཅད་ལ་མཐུན་སྣང་དུ་གྲུབ་པ་ལགས་ཤིང་། བྱ་ཁྱུང་གསེར་གདུང་རིལ་བུ་ཞེས་ཀུན་ལ་གྲགས་སོ། །
གསུང་རྩོམ་ལ། རྒྱུད་བླ་མའི་རྣམ་བཤད་སོགས་ཡོད།།

༢༠༡༨.༠༡.༡༢ སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།