![རིག་མཛོད་རྩོམ་སྒྲིག་པ།](/media/k2/users/2.jpg)
རིག་མཛོད་རྩོམ་སྒྲིག་པ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་(Laptop, iPad, iPod iPhone & Android) གང་ཡིན་ཐོག་ཏུ་རང་རང་གི་ཐུགས་འདོད་ལྟར་ཕབ་ལེན་དང་གསན་གཟིགས་གནང་རོགས།
དྲ་ཚིགས།: www.serajeyrigzodchenmo.org ཡིག་འབྲེལ་དྲ་བྱང་། serajeyrigzodchenmo@gmail.com
ཚད་མ་རྣམ་པར་ངེས་པའི་ཊཱིཀ་ཚིག་དོན་རབ་གསལ།
མཛད་པ་པོ། བུ་སྟོན་ཐམས་ཅད་མཁྱེན་པ།
བརྗོད་བྱ། ཚད་མ་རིག་པའི་སྐོར།
རིག་མཛོད་འཕྲུལ་དེབ་ཨང་། SJRB-0449
མ་ཕྱིའི་པར་རྩ། ཞོལ་ཤིང་པར་ལ་གཞི་བཅོལ་བ་ཡིན།
ཡིག་ཆའི་རྣམ་པ། PDF ཤོག་གྲངས། 747 ལྗིད་ཚད། 3.3MB
རྩོམ་སྒྲིག་ཁང་། སེར་བྱེས་རིག་མཛོད་ཆེན་མོ།
༢༠༢༤ ཟླ་བརྒྱད་པར་གསར་དུ་རྩོམ་སྒྲིག་བྱས།
ངོ་སྤྲོད་མདོར་བསྡུས། བུ་སྟོན་རིན་ཆེན་གྲུབ་ནི། ཕྱི་ལོ་ ༡༢༩༠ ལོར་གཙང་གི་ཤབ་སྨད་སྒོམ་གནས་ཞེས་པར་སྐུ་འཁྲུངས། དགུང་ལོ་ལྔ་ནས་ཡི་གེའི་སྦྱོར་ཀློག་སྦྱངས། དགུང་ལོ་བརྒྱད་པར་གསང་སྔགས་རྙིང་མའི་ཆོས་སྐོར་རྣམས་གསན། གསོ་རིག་སྨན་དཔྱད་སོགས་ལའང་སྦྱང་བརྩོན་གནང་། དགུང་ལོ་བཅོ་བརྒྱད་པར་དགེ་ཚུལ་གྱི་སྡོམ་པ་དང་། དགུང་ལོ་ཉེར་གསུམ་པར་བསྙེན་རྫོགས་ཀྱི་སྡོམ་པ་མནོས། སྒྲ་ཙནྡྲ་པ་སོགས་དང་། སྙན་ངག །སྡེབ་སྦྱོར། མངོན་བརྗོད་སོགས་ལ་སྦྱངས་ཤིང་། སྐད་རིགས་དུ་མ་མཁྱེན་པའི་ལོ་ཙཱ་བར་གྱུར། བླ་མ་གང་མང་ལས་གཞུང་དང་གཞུང་འགྲེལ་དང་། ཟབ་ཆོས་མན་ངག་སོགས་མང་པོ་གསན། དགུང་ལོ་སོ་གཅིག་པར་ཞ་ལུ་ཆོས་སྡེའི་གདན་ས་བཟུང་། སྣར་ཐང་གི་བསྟན་འགྱུར་ལ་ཞུས་དག་དང་དཀར་ཆག་བསྒྲིགས། སོག་པོའི་གོང་མས་རྒྱ་ནག་ཏུ་གདན་དྲངས་ཀྱང་མ་ཕེབས། སྒྲ་དང་གསང་སྔགས་ཀྱི་གཞུང་མང་པོ་འཕྲོ་བསྒྱུར་དང་གཞི་བསྒྱུར་མཛད། སློབ་མ་ལ། སྒྲ་ཚད་པ་རིན་ཆེན་རྣམ་རྒྱལ་སོགས་མང་དུ་བྱུང་། ༡༣༦༤ ལོར་སྐུ་གཤེགས། ཁོང་གི་གསུང་རྩོམ་ལ་པོད་ཉེར་དྲུག་བཞུགས། བོད་ཀྱི་མཁས་པའི་ཁྲོད་དུ་ཆོས་རྗེ་བུ་སྟོན་ནམ་བུ་སྟོན་ཐམས་ཅད་མཁྱེན་པ་ཞེས་གྲགས།
PDF ཕབ་ལེན། |
---|