![རིག་མཛོད་རྩོམ་སྒྲིག་པ།](/media/k2/users/2.jpg)
རིག་མཛོད་རྩོམ་སྒྲིག་པ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་(Laptop, iPad, iPod iPhone & Android) གང་ཡིན་ཐོག་ཏུ་རང་རང་གི་ཐུགས་འདོད་ལྟར་ཕབ་ལེན་དང་གསན་གཟིགས་གནང་རོགས།
དྲ་ཚིགས།: www.serajeyrigzodchenmo.org ཡིག་འབྲེལ་དྲ་བྱང་། serajeyrigzodchenmo@gmail.com
མཁན་རིན་པོ་ཆེ་ཕྱོགས་ཕེབས་ཀྱི་མཛད་རིམ་སྙིང་བསྡུས།
སེར་བྱེས་མཁས་སྙན་གྲྭ་ཚང་གི་༧སྐྱབས་རྗེ་མཁན་རིན་པོ་ཆེ་ལོ་དགོན་སྤྲུལ་སྐུ་བསྟན་འཛིན་བྱམས་པ་ཆོས་བཟང་མཆོག་ཕྱི་ལོ་༢༠༡༧ལོའི་ཕྱི་ཟླ་དྲུག་པ་དང་བདུན་པའི་ནང་ལ་ཨ་རི་སོགས་སུ་ཕེབས་ཏེ་མཛད་འཕྲིན་བསྐྱངས།
༢༠༡༧/ ༦/ ༨ ཉིན་ཨ་རིའི་ནིའུ་ཡོག་ཏུ་སེར་བྱེས་ནང་པའི་རིག་གཞུང་བསྟི་གནས་ཁང་གིས་གོ་སྒྲིག་ཞུས་པ་ལྟར་༧སྐྱབས་རྗེ་མཁན་རིན་པོ་ཆེ་དབུ་བཞུགས་ཀྱིས་མ་ཧཱ་གུ་རུའི་འབུམ་ཚོགས་ཚོགས་ཤིང་། འབུམ་ཚོགས་སྐབས་༧མཁན་རིན་པོ་ཆེས་དད་ལྡན་མི་དམངས་རྣམས་ལ་ནང་ཆོས་ངོ་སྤྲོད་གནང་།
༦/༩ ཉིན་ནིའུ་ཡོག་ཏུ་སེར་བྱེས་ནང་པའི་རིག་གཞུང་བསྟི་གནས་ཁང་གིས་གོ་སྒྲིག་ཞུས་པ་ལྟར་སྒྲོལ་དཀར་ཡིད་བཞིན་འཁོར་ལོའི་ཚེ་དབང་གནང་།
༦/༡༠ ཉིན་ནིའུ་ཡོག་ཏུ་སེར་བྱེས་ནང་པའི་རིག་གཞུང་བསྟི་གནས་ཁང་གིས་གོ་སྒྲིག་ཞུས་པ་ལྟར་ཡི་དམ་རྟ་མགྲིན་ཡང་གསང་གི་རྗེས་གནང་གནང་།
༦/༡༡ ཉིན་ཨ་རིའི་ཕི་ལ་འདྲེལ་ཕི་ཡ་རུ་དད་ལྡན་འགའ་ཞིག་གིས་གསོལ་འདེབས་ཞུ་བ་བཞིན་འཕགས་མཆོག་སྤྱན་རས་གཟིགས་ཀྱི་རྗེས་གནང་གནང་།
༦/༡༩ ཉིན་ཨ་རིའི་བོ་སི་ཏྲེན་དུ་ནང་ཆོས་ངོ་སྤྲོད་གནང་།
༦/༢༠ ཉིན་ཨ་རིའི་བོ་སི་ཏྲེན་ཀུ་རུ་ཀུ་ལ་ཆོས་ཚོགས་སུ་དོན་གཉེར་ཅན་འགའ་ཞིག་ལ་བློ་སྦྱོང་ཚིགས་བརྒྱད་མའི་བཀའ་ཁྲིད་གནང་།
༦/ ༢༤ ཉིན་སེར་བྱེས་ཁེ་ན་ཌ་ནང་པའི་རིག་གཞུང་བསྟི་གནས་ཁང་གིས་གསོལ་འདེབས་ཞུ་བ་ལྟར། ཁེ་ན་ཌ་ཁྲོ་རོན་ཊོར་གངས་ལྗོངས་ཆོས་ལྡན་གླིང་བོད་ཀྱི་རིག་གཞུང་བསྟི་གནས་ཁང་གི་ཚོགས་ཁང་དུ་མི་དམངས་རྣམས་ལ་ངེས་འབྱུང་བྱང་སེམས་ཡང་དག་པའི་ལྟ་བ་གཙོ་བོར་གྱུར་པའི་སྔོན་འགྲོའི་གསུང་ཆོས་དང་། རྟ་མགྲིན་ཡང་གསང་གི་རྗེས་གནང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཞབས་བརྟན་གསོལ་འདེབས་རབ་འབྱམས་རྒྱལ་བ་མ་དང་། རྒྱལ་བའི་མཚན་སྔགས་ཀྱི་ལྗགས་ལུང་བཅས་གནང་ཞིང་། མཇུག་ཏུ་བོད་མི་ཡོངས་ཀྱིས་འདོར་དུ་མི་རུང་བའི་འགན་འཁྲི་༧རྒྱལ་བ་ཐམས་ཅད་མཁྱེན་པའི་བཀའ་དགོངས་ཟབ་མོ་རྣམས་ངེས་པར་ཚུལ་བཞིན་ལག་བསྟར་གྱིས་རྒྱལ་བ་དགྱེས་པའི་མཆོད་སྤྲིན་དུ་འགྲོ་ཐུབ་པར་བོད་མི་ཡོངས་ཀྱིས་འབད་བརྩོན་གནང་དགོས་པ་དང་། དེ་ལྟར་གནང་ན་ངེས་པ་དོན་གྱི་བརྟན་ཞུགས་དང་། དེ་བཞིན་འཛམ་གླིང་སྐྱེ་འགྲོ་ཡོངས་ཀྱི་སྤྱི་ནོར་བོད་ཀྱི་ཆོས་དང་རིག་གཞུང་འདི་ཉིད་མི་ཉམས་གོང་འཕེལ་དང་ཉམས་པ་སོར་ཆུད་གནང་དགོས་པ་གལ་ཆེ་བ་དང་། བོད་མི་རྒན་གཞོན་བར་གསུམ་ཡོངས་ནས་བོད་ཀྱི་སྐད་ཡིག་ལ་དོ་སྣང་གནང་དགོས་པ་སོགས་ཀྱི་བཀའ་སློབ་གནང་།
༦ / ༢༥ ཉིན་ཁེ་ན་ཌ་གངས་ལྗོངས་ཆོས་ལྡན་གླིང་བོད་ཀྱི་རིག་གཞུང་བསྟི་གནས་ཁང་གིས་འཛིན་སྐྱོང་འོག །རེས་གཟའ་ཉི་མའི་བོད་ཡིག་སློབ་གྲྭས་ལོ་ལྟར་ལོ་གཅིག་གི་སློབ་མཇུག་གི་ཉིན་མཐའ་མ་དེར། ༼ གངས་ལྗོངས་ང་ཚོའི་ཕ་ཡུལ། ༽ཞེས་འཛིན་གྲྭ་སོ་སོས་ཐུན་མོང་མ་ཡིན་པའི་བོད་མི་རིགས་ཀྱི་རིག་གཞུང་དང་འབྲེལ་བ་ཡོད་པའི་འགྲེམས་སྟོན་ཞིག་གོ་སྒྲིག་བྱེད་ཀྱིན་ཡོད་པ་ལྟར། ལོ་འདིའི་འགྲེམས་སྟོན་གྱི་ལས་རིམ་དེར་སྐུ་མགྲོན་གཙོ་བོར་༧སྐྱབས་རྗེ་མཁན་རིན་པོ་ཆེ་གདན་ཞུ་གནང་བ་བཞིན་ཆེད་ཕེབས་གནང་ཞིང་། གངས་ལྗོངས་ཆོས་ལྡན་གླིང་བོད་ཀྱི་རིག་གཞུང་བསྟི་གནས་ཁང་གི་ཚོགས་གཙོས་མཁན་རིན་པོ་ཆེར་ཕེབས་བསུའི་འཚམས་འདྲི་གནང་བ་དང་། དེ་རྗེས་ཤེས་ཡོན་འགན་འཛིན་དང་དགེ་ཆེ་བཅས་ཀྱིས་གསུང་བཤད་གནང་གྲུབ་མཚམས། ༧སྐྱབས་རྗེ་མཁན་རིན་པོ་ཆེས་ལས་བྱེད་དང་དགེ་སློབ། ཁྱིམ་བདག་བཅས་ལ་གནའ་དེང་གི་ཤེས་ཡོན་སློབ་གསོ་གནང་སྟངས་དང་། བོད་ཀྱི་གདན་ས་གྲྭ་ཚང་ཁག་གི་ནང་དུ་དེང་རབས་ཚན་རིག་གི་སློབ་སྦྱོང་ལམ་ལུགས་གསར་དུ་དབུ་འཛུགས་གནང་དགོས་དོན་སོགས་ལས་འཕྲོས་ཏེ། བོད་མི་རིགས་ཀྱི་མ་འོངས་སོན་རྩ་རུ་གྱུར་པའི་བོད་རིགས་ཕྲུ་གུ་འདི་དག་འདབ་གཤོག་གཉིས་ལྡན་གྱི་བོད་མི་ཚད་ལྡན་ཞིག་ཏུ་གསོ་སྐྱོང་བྱེད་ཐུབ་པ་དགོས་པའི་བཀའ་སློབ་གནང་བ་དང་། དེ་རྗེས་མཛད་རིམ་གཞིར་བཟུང་༧སྐྱབས་རྗེ་མཁན་རིན་པོ་ཆེས་འཛིན་གྲྭ་སོ་སོས་བཟོ་བཀོད་བྱས་པའི་འགྲེམས་སྟོན་ཁག་ལ་གཟིགས་ཞིབ་དང་། སློབ་ཕྲུག་ཚོ་དང་ཕན་ཚུན་བཀའ་མོལ། དྲི་བ་དྲིས་ལན་ཡང་གནང་།
༧/ ༡ ཉིན་གྲྭ་ཚང་རིན་པོ་ཆེ་དང་ཉེ་བའི་དོན་གཉེར་ཅན་འགའ་ཞིག་གིས་གསོལ་འདེབས་ཞུ་དོན་བཞིན། ཁེ་ན་ཌ་ཀེལ་གེ་རིའི་མི་དམངས་ཚོར་སྔོན་འགྲོའི་གསུང་ཆོས་ཡོན་ཏན་གཞི་གྱུར་མ་དང་། དངོས་གཞིར་ཡི་དམ་ཐུགས་རྗེ་ཅན་གྱི་དཀའ་དབང་། མཇུག་ཏུ་བླང་དོར་གྱི་བཀའ་སློབ་བཅས་གནང་།
༧/ ༤ ཉིན་ཨ་རིའི་ལོ་སེ་ཨེན་ཇེ་ལེ་སེར་ཕེབས།
༧/ ༦ ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་གྱི་དགའ་སྟོན་སྐབས། ཨ་རིའི་ལོ་སི་ཨེན་ཇེ་ལེ་སིར། ༧གོང་ས་མཆོག་སྐུ་ཚེ་བསྐལ་བརྒྱར་བརྟན་ཅིང་། ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པའི་སླད་དུ་མཉམ་ཞུགས་གནང་མཁན་གཞན་དང་ལྷན་དུ་མཆོད་མེ་སྟོང་མཆོད་ཕུལ་བ་དང་། སེར་བྱེས་དགེ་རྩ་ཚོགས་པས་གསོལ་འདེབས་ཞུ་དོན་བཞིན། དད་ལྡན་རྣམས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་གནང་།
༧/༨ ཉིན་ཀེལ་ཕཱོར་ནི་ཡའི་ནུབ་ཕྱོགས་སློབ་ཆེན་དུ་ལམ་རིམ་བསྡུས་དོན་གྱི་བཤད་ཁྲིད་གནང་།
ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་འགན་འཛིན་མཁས་དབང་སྐུ་ཞབས་བསྟན་འཛིན་རྡོ་རྗེ་དང་མཇལ་འཕྲད་དང་། སྐུ་ཞབས་གང་ཉིད་ཀྱིས་ཨ་རིས་གཙོས་པའི་ཕྱིའི་རྒྱལ་ཁབ་མང་པོའི་ནང་དུ་བོད་བསྟན་སྲིད་ཀྱི་ཞབས་འདེགས་རྒྱ་ཆེ་ཞུས་གནང་མཛད་པར་རྗེས་སུ་ཡི་རང་དང་བསྔགས་བརྗོད་གནང་བ་དང། ལྷག་པར་མཛད་འཆར་ཤིན་ཏུ་ཆེ་ཡང་ཐུགས་འཕྲད་དུ་ཆེད་ཕེབས་དང་། གསུང་བསྒྱུར་གནང་བ་བཅས་ལ་ཐུགས་རྗེ་ཆེ་ཞུ་བ་དང་། བཞེད་དགོངས་མཐའ་དག་ལྷུན་གྱིས་འགྲུབ་པའི་སྨོན་འདུན་ཡང་ཞུ་གནང་མཛད།
༧/༩ ཉིན་སེར་བྱེས་དགེ་རྩ་ཚོགས་པས་གསོལ་འདེབས་ཞུ་དོན་བཞིན་ཀེལ་ཕཱོར་ནི་ཡར་ཡི་དམ་རྟ་མགྲིན་ཡང་གསང་གི་བཀའ་དབང་གནང་།
༧/ ༡༢ ཉིན་ཨ་རིའི་ཀེལ་ཕཱོར་ནི་ཡ་ཡི་ནང་རོལ་སེཀ་ར་མེན་ཏོ་ཞེས་པའི་གྲོང་ཁྱེར་ནང་དུ་ཡོད་པའི་སེང་གེའི་ང་རོ་ཞེས་པའི་ཆོས་ཚོགས་སུ་སེར་བྱེས་དགེ་རྩ་ཚོགས་པས་གསོལ་འདེབས་ཞུ་དོན་བཞིན་འཕགས་མཆོག་སྤྱན་རས་གཟིགས་ཀྱི་རྗེས་གནང་གནང་།
༧ / ༡༥ ཉིན་ཨ་རིའི་བྱང་ཀེལ་ཕཱོར་ནི་ཡར་སེར་བྱེས་དགེ་རྩ་ཚོགས་པས་གསོལ་འདེབས་ཞུ་དོན་བཞིན། སྒྲོལ་དཀར་ཡིད་བཞིན་འཁོར་ལོའི་ཚེ་དབང། སྒྲོལ་མ་ཉེར་གཅིག་གི་བསྟོད་པ་དང་། སྒྲོལ་མའི་མཚན་སྔགས་ཀྱི་ལྗགས་ལུང། བླང་དོར་བཀའ་སློབ་བཅས་གནང་།
༧ / ༡༥ ཉིན་སེར་བྱེས་དགེ་རྩ་ཚོགས་པས་གསོལ་འདེབས་ཞུ་དོན་བཞིན་ཨ་རིའི་བྱང་ཀེལ་ཕཱོར་ནི་ཡར་གྲྭ་ཚང་རིན་པོ་ཆེའི་ཡན་ལག་སེར་བྱེས་དགེ་རྩ་ཚོགས་པའི་གཙུག་ལག་ཁང་གསར་པའི་དབུ་འབྱེད་གནང་བ་དང་། རྟེན་འབྲེལ་གྱི་ཆེད་རྩ་བ་ལྔའི་མཆོད་བརྗོད་ཀྱི་ལྗགས་ལུང་བཤད་པ་དང་བཅས་གནང་།
༧/ ༡༦ ཉིན་ཨ་རིའི་བྱང་ཀེལ་ཕཱོར་ཡར་སེར་བྱེས་དགེ་རྩ་ཚོགས་པ་དང་ཀུན་དགའ་བོ་ཆོས་ཚོགས་གཉིས་ཀྱིས་ཐུན་མོང་དུ་གསོལ་འདེབས་ཞུ་དོན་བཞིན་ཡི་དམ་རྟ་མགྲིན་ཡང་གསང་གི་རྗེས་གནང་གནང་།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༧།༠༧།༢༠ ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།