ཁ་སང་ཕྱི་དྲོ་སེར་བྱེས་མཁན་ཟུར་རིན་པོ་ཆེ་༧རྗེ་བཙུན་བློ་བཟང་དཔལ་ལྡན་མཆོག་དགོངས་པ་གཞན་དུ་གཏད་པའི་ཡིད་སྐྱོ་བའི་གནས་ཚུལ་བྱུང་འདུག ཁ་སང་སྟེ་ཕྱི་ལོ་༢༠༡༦ལོའི་ཟླ་ ༥ ཚེས་ ༡ གི་ཕྱི་དྲོའི་༼ཐེ་པེའི་༽ཆུ་ཚོད་ ༨:༡༠ དང་རྒྱ་གར་གྱི་ཆུ་ཚོད་ ༥:༤༠ འི་སྟེང་སེར་བྱེས་གྲྭ་ཚང་གི་མཁན་ཟུར་རིན་པོ་ཆེ་༧སྐྱབས་རྗེ་བློ་བཟང་དཔལ་ལྡན་མཆོག་ཐེ་ཝན་དུ་དགོངས་པ་ཆོས་དབྱིངས་སུ་ཐིམ་ཚུལ་བསྟན་པའི་ཡིད་སྐྱོ་བའི་གནས་ཚུལ་བྱུང་བ་དང་། གྲྭ་ཚང་བྱེས་སྨད་གཉིས་ཀྱི་ཚོང་ཁང་སོགས་སྒོ་བརྒྱབ་སྟེ་མྱ་ངན་ཞུས་པ་དང་། དམ་པ་ཁོང་གི་སློབ་བུ་གཙོས་འདུས་པ་རྒྱ་མཚོས་བླ་བྲང་དུ་སྨོན་ལམ་དང་དྲང་ངེས་ལེགས་བཤད་སྙིང་པོ་མཚན་གང་ལ་འུར་འདོན་གནང་སོང་།
དེ་ཡང་༧སྐྱབས་རྗེ་མཁན་ཟུར་རིན་པོ་ཆེ་རྗེ་བཙུན་བློ་བཟང་དཔལ་ལྡན་མཆོག་ནི། ༡༩༣༦ ལོར་བོད་དུ་སྐུ་འཁྲུངས། དགུང་ལོ་བཅུ་གཉིས་ཀྱི་སྐབས་དར་རྒྱས་དགོན་གྱི་སློབ་གྲྭར་ཞུགས་ཏེ། དགེ་རྒན་བློ་བཟང་ཚེ་རིང་ཀློག་གི་སློབ་དཔོན་དུ་བསྟེན་ཏེ། ཡི་གེ་འབྲི་ཀློག་དང་ཆོས་སྤྱོད་སྣ་ཚོགས་བློ་འཛིན། བསྡུས་གྲྭ་སོགས་ལ་གསན་སྦྱོང་གནང་། དགུང་ལོ་བཅུ་གསུམ་གྱི་སྐབས་ཐུགས་རྗེ་ཆེན་པོའི་དབང་སོགས་དང་ལམ་རིམ་ཆེན་མོ་སོགས་གསན། དགུང་ལོ་བཅུ་བདུན་གྱི་སྐབས་དབུས་སུ་ཕེབས་ཏེ་སེར་བྱེས་གྲྭ་ཚང་དུ་ཆོས་ཞུགས་གནང་ཞིང་། ཆོས་རྗེ་དམ་པ་རྒྱུད་སྨད་མཁན་ཟུར་ཨོ་རྒྱན་ཚེ་བརྟན་མཆོག་དང་། མཁན་ཟུར་རིན་པོ་ཆེ་རྗེ་བཙུན་བློ་བཟང་ཐུབ་བསྟན་མཆོག་རྣམ་གཉིས་བསྟེན་ཏེ་གཞུང་ཆེན་སློབ་གཉེར་གནང་། ལོ་དེའི་ཟླ་བ་བཅུ་གཉིས་པར་བྲག་རི་རྡོ་རྗེ་འཆང་བློ་བཟང་ལུང་རིགས་རྒྱ་མཚོ་ལས་དགེ་ཚུལ་གྱི་སྡོམ་པ་ཞུས། གཞུང་གསར་སྐབས་རིགས་ཆུང་ཚོགས་བཞེངས་གནང་བ་དང་། ༥༩ ལོ་སྟེ་དགུང་ལོ་ཉེར་བཞིར་འཛིན་གྲྭ་དབུ་མ་གསར་པར་ཕེབས་པའི་སྐབས་བོད་དུ་དུས་འགྱུར་བྱུང་སྟེ། སྐྱབས་རྗེ་བླ་མ་རྣམ་པ་གཉིས་དང་ལྷན་དུ་ལྷོ་ཁ་དང་། འཚོ་སྣ། མོན་རྟ་དབང་སོགས་བརྒྱུད་འཕགས་ཡུལ་དུ་ཞབས་སོར་འཁོད། ལོ་དེའི་བོད་ཟླ་དྲུག་པར་སྦག་སར་སློབ་གཉེར་གྱི་འཕྲོ་བསྐྱངས་ཤིང་༧གོང་ས་མཆོག་སོགས་ལས་དབང་ཁྲིད་ལུང་སོགས་ཆོས་བཀའ་གང་མང་གསན། ༥༩ ལོའི་དགུན་ཁར་གནས་མཆོག་རྡོ་རྗེ་གདན་དུ་༧གོང་ས་༧སྐྱབས་མགོན་ཆེན་པོའི་དྲུང་ནས་དགེ་སློང་གི་སྡོམ་པ་བཞེས། ༦༥ ལོར་ཝཱ་ར་ཎ་སིའི་མཐོ་སློབ་ཐོག་མར་འཛུགས་སྐབས་སྦག་ས་ནས་སློབ་གཉེར་བཟང་གྲས་མི་གྲངས་ལྔ་བཅུ་ལྷག་ཕེབས་པའི་ཁོངས་སུ་དམ་པ་འདི་ཡང་ཕེབས་ཏེ། ལོ་དགུའི་རིང་རྒྱལ་རབས་ཆོས་འབྱུང་། གཞུང་ཆེན། ཧིན་དྷི་སོགས་སྦྱངས་ཏེ་ཨ་ཙཱརྱའི་སློབ་ཐོན་ལག་འཁྱེར་བཞེས། ཡོངས་འཛིན་རྣམ་གཉིས་སོགས་ལས་ཀྱང་དབང་དང་བཀའ་ཆོས་གང་མང་ཞུས་ཤིང་། རྒྱུན་དུ་ཐུགས་དམ་གྱི་གཙོ་བོ་དཔེ་གཟིགས་གཙོ་བོར་གནང་། དེ་ནས་རྒྱ་གར་ལྷོ་ཕྱོགས་སེ་རར་ཕེབས་ཏེ་ཚོགས་ཆོས་སློབ་གཉེར་གནང་མུར། སྐབས་དེའི་སྒྲིག་གཞི་ལྟར་ལོ་ངོ་གསུམ་གྱི་རིང་དགེ་ལུགས་རྒྱུགས་སྤྲོད་དུ་ཕེབས་ཤིང་། ༧༩ ལོར་དགེ་བཤེས་ལྷ་རམས་པའི་དམ་འཇོག་དང་། དཔལ་ལྡན་འབྲས་དཀར་སྤུངས་པའི་ཆོས་སྡེ་རུ་ ༧ གོང་ས་༧སྐྱབས་མགོན་ཆེན་པོ་མཆོག་དབུས་བཞུགས་ཀྱི་གཞུང་ས་རང་ནས་དམ་པ་འདི་ལ་ལྷ་རམས་ཨང་དང་པོའི་མཚན་གནས་དང་རྫོགས་རིམ་རིམ་ལྔ་གསལ་སྒྲོན་གྱི་གླེགས་བམ་བཅས་སྩལ། དེ་ནས་སེར་བྱེས་སློབ་གྲྭའི་དགེ་རྒན་དུ་བསྐོས་པ་ལྟར་སློབ་གྲྭའི་དགེ་རྒན་གནང་ཞིང་། ༧གོང་ས་༧སྐྱབས་མགོན་ཆེན་པོ་མཆོག་གཟིམ་ཆུང་མཇལ་བཅར་གྱི་སྐབས་སུ་རྒྱུད་སྨད་དང་གྲྭ་ཚང་གཉིས་ལས་གང་དུ་བསྡད་ན་འོས་ལུགས་དང་བཀའ་བཞིན་བསྒྲུབ་རྒྱུའི་བཀའ་འདྲི་ཞུས་པར། ༧གོང་ས་༧སྐྱབས་མགོན་ཆེན་པོ་མཆོག་གིས་ཕྱག་མོ་གཟིགས་ཏེ་སེ་རར་བསྡད་ན་དགེ་མཚན་ཆེ་བར་བཀའ་ཕེབས་པ་ལྟར། སེ་རར་བཞུགས་ཏེ་ཞལ་ལག་གི་དུས་མ་གཏོགས་སྔ་དྲོའི་ཆུ་ཚོད་བདུན་པ་ནས་ཕྱི་དྲོའི་ཆུ་ཚོད་བཞི་དང་ཕྱེད་ཀའི་བར་སློབ་གཉེར་བ་རྣམས་ལ་དཔེ་ཁྲིད་ཆད་མེད་དུ་གནང་ཞིང་། ༨༢ ལོར་གྲྭ་ཚང་གི་སློབ་གཉེར་དགེ་རྒན་དང་། ༩༠ ལོར་གྲྭ་ཚང་གི་དགེ་བསྐོས་གནང་། ༢༠༠༣ ལོར་སེར་སྐྱ་མང་པོར་སྨན་བླ་སོགས་ཀྱི་རྗེས་གནང་དང་། དཔལ་རྟ་མཆོག་རོལ་པ་ཡང་གསང་ལྷ་དགུའི་དབང་སོགས་ཀྱི་ཆོས་བཀའ་ཡང་མང་དུ་གནང་། ༢༠༠༥ ལོའི་ཕྱི་ཟླ་ ༣ པར་༧གོང་ས་༧སྐྱབས་མགོན་ཆེན་པོ་མཆོག་གིས་དམ་པ་འདི་ལ་སེར་བྱེས་མཁན་རིན་པོ་ཆེའི་ཕྱག་རྟགས་སྩལ་བ་ལྟར། ༢༠༠༥ ལོའི་ཕྱི་ཟླ་ ༣ ཚེས་ ༢༣ ཉིན་ཞོགས་ཀའི་ཆུ་ཚོད་ ༥ པའི་སྟེང་གྲྭ་ཚང་གི་མཁན་ཁྲིར་ཞབས་སོར་བཀོད་པ་ནས་ལོ་མང་རིང་གྲྭ་ཚང་འདི་ཉིད་ཆོས་སྲིད་གཉིས་ཆ་ནས་དྲིན་གྱིས་བསྐྱངས་ཤིང་། མཁན་རབས་དོན་བཞི་པ་ཡིན། ༢༠༡༢ ལོར་མཁན་པོ་ལས་དགོངས་ཞུས་གནང་སྟེ་དོན་གཉེར་ཅན་མང་པོར་དཔེ་ཁྲིད་དང་ལུང་ཆོས་མན་ངག་གིས་སྐྱོང་བཞིན་བཞུགས་ཤིང། སྐུའི་སྙུང་གཞི་བཅོས་ཕྱིར་ཐེ་ཝན་དུ་སྨན་ཁང་ལ་བཞུགས་ཡོད་ན་ཡང་། ཕྱི་ལོ་༢༠༡༦ལོའི་ཟླ་ ༥ ཚེས་ ༡ གི་ཕྱི་དྲོ་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་ལགས་སོ། །

སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་གིས། ༢༠༡༦།༠༥།༠༢ ལ།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་སྦྲེལ་སྣེ་མཉམ་སྦྱར་བྱེད་དགོས།