-
མདུན་ངོས།
-
འཕྲིན་གསར།
- འཚམས་འདྲི་སོགས།
འཚམས་འདྲི་སོགས། (32)
ྋགོང་ས་མཆོག་དགུང་གྲངས་༨༩ལ་ཕེབས་པའི་སྐུའི་འཁྲུངས་སྐར་འཚམས་འདྲི།
དྲ་འཇུག་པ། རིག་མཛོད་རྩོམ་སྒྲིག་པ།
ཚན་རྩལ་རིག་པའི་འཕེལ་རྒྱས་ཆེན་པོར་གཞན་ཕན་ཞི་བདེའི་ཁ་ཕྱོགས་སྟོན། །
སྣ་ཚོགས་ཆོས་ལུགས་གྲུབ་མཐའ་སྟོང་ལ་འཆམ་མཐུན་བྱམས་བརྩེའི་སྲོག་ཟུངས་བྱིན། །
གཞིས་བྱེས་བོད་མིའི་ཆོས་དང་རིག་གཞུང་ཐབས་མཁས་འཕྲུལ་གྱིས་སྲུང་བར་མཛད། །
རྨད་བྱུང་ལེགས་མཛད་སྟོང་གི་བྱེད་པོ་འཇིག་རྟེན་མིག་འབྱེད་ཁྱེད་ལས་སུ། །
འཛམ་གླིང་ཞི་བདེའི་ལམ་སྟོན་པ་ཆེན་པོ། ཆོས་ལུགས་ཀྱི་བླ་ན་མེད་པའི་དབུ་ཁྲིད། གངས་ཅན་བོད་ཀྱི་སྐྱབས་དང་མགོན་དུ་གྱུར་པ། ྋསྤྱི་ནོར་ྋགོང་ས་ྋསྐྱབས་མགོན་ྋརྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ཕྱི་ལུགས་ལྟར་གྱི་དགུང་གྲངས་ ༨༩ ལ་ཕེབས་པའི་སྐུའི་འཁྲུངས་སྐར་གྱི་དུས་ཚེས་བཟང་པོར་དགའ་དད་སྤྲོ་གསུམ་གྱིས་འཚམས་འདྲིའི་བཀྲ་ཤིས་བདེ་ལེགས་གྲངས་མེད་ཞུ།
སེར་བྱེས་མཁས་སྙན་གྲྭ་ཚང་གིས་ྋརྒྱལ་དབང་དགུང་གྲངས་གྱ་དགུ་ལ་ཕེབས་པའི་འཁྲུངས་སྐར་སྲུང་བརྩི།
ཕྱི་ལོ་༢༠༢༤ ཟླ་བ་༧ ཚེས་༦ ཉིན་ལྷར་བཅས་སྲིད་ཞིའི་གཙུག་རྒྱན་ཁམས་གསུམ་ཆོས་ཀྱི་རྒྱལ་པོ་ས་སྟེང་ྋརྒྱལ་བསྟན་ཡོངས་རྫོགས་ཀྱི་མངའ་བདག་རང་ཅག་ཁ་བ་རི་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ། ྋརྒྱལ་མཆོག་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་༨༩ ཕེབས་པའི་སྐུ་ཡི་འཁྲུངས་སྐར་གྱི་དུས་བཟང་ཉིན། རྒྱལ་བའི་སྐུ་པར་མཐོང་གྲོལ་རིན་པོ་ཆེ་སྤོས་སྣེས་བསུས་ཏེ་གྲྭ་ཚང་གི་གཙུག་ལག་ཁང་དུ་གདན་ཞུ་དང་བཅས། རྒྱལ་སྲས་བླ་སྤྲུལ་བཀའ་རབ་འབྱམས་དགེ་བའི་བཤེས་གཉེན་དང་། འདུས་ཚོགས་དམངས་དང་བཅས་པ་ལྷན་འཛོམས་ཐོག་ྋརྒྱལ་བའི་འཁྲུངས་སྐར་ཟབ་རྒྱས་ངང་སྲུང་བརྩི་ཞུས། དེ་དང་ཆབས་ཅིག་སློབ་གཉེར་ཁང་ནས་ཀྱང་དབུ་ཕར་ཚད་གསུམ་སློབ་མཐར་ཕྱིན་པ་རྣམས་ལ་རབ་འབྱངས་པའི་ཕྱག་ཁྱེར་གསོལ་སྩལ་གནང་ཞིང་མཛད་སྒོའི་མཇུག་གྲུབ།
དེའི་རྗེས་རྒྱལ་བའི་ཕོ་བྲང་དུ་ྋསྐུ་ཡི་འཁྲུངས་སྐར་གྱི་གཞུང་འབྲེལ་མཛད་སྒོའི་སྐབས་རྒྱལ་བའི་བཀའ་དྲིན་རྗེས་དྲན་གྱི་སློབ་ཡོན་ལོ་ལྟར་འབུལ་བཞིན་ཡོད་པ་ལྟར། འདི་ལོར་ཡང་ཐེངས་བཅུ་པའི་སློབ་ཡོན་དུ། སྦེལ་ཀོབ་ལུགས་བདེ་གཉིས་ནས་སློབ་མ་གྲངས་༢༩ ལ་གནང་བ་དང་། དེ་བཞིན་སྲོག་སླུ་ཚེ་ཐར་སོགས་ཀྱི་མཛད་རིམ་ཁག་ཀྱང་གནང་ཡོད། ཉེ་ཆར་ྋརྒྱལ་དབང་མཆོག་ཨེ་ཤི་ཡ་ནང་པ་ཡོངས་ཀྱི་བླ་ན་མེད་པའི་དབུ་ཁྲིད་ཆེན་པོ་(ASIAN SUPREME LEADER OF BUDDHIST WORLD) ཞེས་པའི་མཚན་བསྟོད་ཕུལ་བར་བརྟེན། ཕྱི་ཟླ་༧ ཚེས་༦ སྐུའི་འཁྲུངས་སྐར་གྱི་ཉིན་འདིར་འཛམ་གླིང་སྙིང་རྗེའི་ཉིན་མོར་(UNIVERSAL DAY OF COMPASSION) ཞེས་པ་སྲུང་བརྩི་ཞུ་རྒྱུའི་སྐལ་བཟང་གི་ཉིན་མོར་སེར་བྱེས་མཁས་སྙན་གྲྭ་ཚང་གི་ངོས་ནས་ཚང་མར་མཛའ་བརྩེའི་འཚམས་འདྲི་ཞུ་གནང་མཛད།
༢༠༢༤ལོའི་ཟླ་༠༧ཚེས་༠༦ལ།
སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས།
དེ་ལས་མང་བ།...
༢༠༢༤ ལོ་གསར་འཚམས་འདྲི།
དྲ་འཇུག་པ། རིག་མཛོད་རྩོམ་སྒྲིག་པ།༄༅། །བོད་རྒྱལ་ལོ་༢༡༥༡ཤིང་ཕོ་འབྲུག་ལོའི་གནམ་ལོ་གསར་ཚེས་ལ་བཀྲ་ཤིས་བདེ་ལེགས་ཞུ། །
ཤེས་རིག་བྱམས་བརྩེས་འཇིག་རྟེན་ཁྱབ་པའི་བཀྲ་ཤིས་ཤོག །
སྐྱེ་བོ་མཐའ་དག་ཞི་བདེས་འཚོ་བའི་བཀྲ་ཤིས་ཤོག །
ས་ཆུ་མེ་རླུང་གཡོ་འཁྲུག་ཞི་བའི་བཀྲ་ཤིས་ཤོག །
ཤིང་ཕོ་འབྲུག་ལོར་ཕུན་ཚོགས་དཔལ་གྱི་བཀྲ་ཤིས་ཤོག །
བོད་རྒྱལ་ལོ་༢༡༥༡རབ་གནས་ཤིང་འབྲུག་ལོའི་གནམ་ལོ་གསར་ཚེས་ཀྱི་བཀྲ་ཤིས་དུས་བཟང་ལ། རིགས་རུས་གདུང་བརྒྱུད་གཅིག་ལས་མཆེད་ཅིང་སྐད་ཡིག་རིག་གནས་གཅིག་གིས་བསྡུས་པའི་སྤུན་ཟླ་ཡོངས་དང་། བོད་མི་རིགས་རིག་གནས་དང་བཅས་པར་དངོས་ཤུགས་བརྒྱུད་གསུམ་ནས་རྒྱབ་སྐྱོར་དང་རོགས་རམས་གནང་མཁན་འཛམ་གླིང་གང་སར་གནས་པའི་གྲོགས་ཕོ་མོ་ཡོངས་ལ་འཚམ་འདྲིའི་བཀྲ་ཤིས་བདེ་ལེགས་གྲངས་མེད་ཞུ། །
སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས། ༢༠༢༤ཟླ་༠༢ཚེས་༡༠ལ།
ཁང་སེར་རིན་པོ་ཆེ་རྒྱུད་སྟོད་བླ་མ་དབུ་མཛད་དུ་བསྐོ་བཞག་མཛད་པ།
དྲ་འཇུག་པ། རིག་མཛོད་རྩོམ་སྒྲིག་པ།ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་སེར་བྱེས་ཧར་གདོང་སྐྱབས་རྗེ་ཁང་སེར་རིན་པོ་ཆེ་མཆོག་དཔལ་ལྡན་རྒྱུད་སྟོད་གྲྭ་ཚང་གི་བླ་མ་དབུ་མཛད་དུ་བསྐོ་བཞག་མཛད་པར་དགའ་དད་སྤྲོ་གསུམ་གྱིས་བཀྲ་ཤིས་བདེ་ལེགས་གྲངས་མེད་ཞུ།
བསྟན་པའི་སྒྲོན་མེ་སྐྱབས་རྗེ་ཁང་སེར་སྐུ་ཕྲེང་བརྒྱད་པ་ྋརྗེ་བཙུན་བསྟན་འཛིན་ཚུལ་ཁྲིམས་དཔལ་ལྡན་དཔལ་བཟང་པོ་མཆོག་ནི། ཕྱི་ལོ་༡༩༧༥ལོར་བལ་ཡུལ་དུ་སྐུ་བལྟམས། ཕྱི་ལོ་༡༩༨༠ལོར་གདན་ས་ཆེན་པོ་སེར་བྱེས་མཁས་སྙན་གྲྭ་ཚང་དུ་ཆོས་ཞུགས་དང་ཁྲི་འདོན་མཛད། དེ་ནས་སེར་བྱེས་གྲྭ་ཚང་དུ་གཞུང་ཆེན་ཁག་ལ་ཐོས་བསམ་སློབ་གཉེར་ཚད་ལྡན་མཛད་པའི་ཞོར་ལ་སུམ་རྟགས་དང་སྙན་ངག་སོགས་བོད་ཀྱི་ཐུན་མིན་རིག་གནས་དང་། དབྱིན་ཇི་དང་རྒྱ་གར། བལ་བོ་སོགས་ཀྱི་སྐད་ཡིག་ཀྱང་བྱང་ཆུབ་པར་སྦྱངས།
༢༠༠༢ལོར་གཞུང་ཆེན་བཀའ་པོད་ལྔའི་ཐོས་བསམ་སློབ་གཉེར་མཐར་ཕྱིན་པར་མཛད་དེ། དགེ་བཤེས་ལྷ་རམས་པ་ཨང་རིམ་དང་པོའི་དང་པོའི་མཚན་གནས་བཞེས། དེ་ནས་དཔལ་ལྡན་སྟོད་རྒྱུད་གྲྭ་ཚང་དུ་གསང་སྔགས་ཀྱི་གཞུང་ལ་ཐོས་བསམ་སློབ་གཉེར་མཐར་ཕྱིན་ནས་ཕྱི་ལོ་༢༠༠༥ལོར་སྔགས་རམས་པ་ཨང་དང་པོའི་དང་པོའི་མཚན་གནས་ཀྱང་བཞེས།
ལོ་མང་པོར་སེར་བྱེས་མཁས་སྙན་གྲྭ་ཚང་དུ་སློབ་གཉེར་བ་བརྒྱ་ཕྲག་ལ་གཞུང་ཆེན་ཁག་གི་དཔེ་ཁྲིད་རྒྱུན་རིང་གནང་བ་དང་། ཞོར་ལ་དོན་གཉེར་ཅན་མང་པོ་ལ་ནང་ཆོས་ངོ་སྤྲོད་དང་། ནང་ཆོས་དང་འབྲེལ་བའི་སེམས་ཁམས་རིག་པ་སོགས་ངོ་སྤྲོད་མཛད།
རྒྱ་གར་མ་རྡ་ར་སི་མཐོ་སློབ་ཀྱིས་གདན་ཞུས་དགེ་རྒན་ཆེན་མོའི་མཚན་གནས་ཕུལ་བ་དང་། བྷེང་ལོར་དང་མ་རྡ་ར་སི་སོགས་ཀྱི་མཐོ་སློབ་ཁག་ཅིག་ཏུ་ནང་ཆོས་དང་འབྲེལ་བའི་སློབ་ཁྲིད་རྒྱུན་རིང་མཛད། སྐབས་སྐབས་སུ་ཤར་ནུབ་ཀྱི་ཚན་རིག་པ་དང་སློབ་དཔོན། ཞིབ་འཇུག་པ་སོགས་མང་པོ་དང་ལྷན་ནང་ཆོས་དང་འབྲེལ་པའི་གོ་བསྡུར་བགྲོ་གླེང་ཡང་ཡང་གནང་།
༢༠༠༡ལོར་བལ་ཡུལ་ཏི་རི་བ་བན་མཐོ་རིམ་སློབ་གྲྭ་ཆེན་མོའི་གཙུག་ལག་སློབ་དཔོན་ཆེན་མོའི་མཚན་གསོལ། ༢༠༠༧ལོར་བལ་ཡུལ་Himalayan Buddist Foundationགཙོ་འཛིན་གྱི་མཚན་གནས་ཐོབ། ཕྱི་ལོ་༢༠༡༣ལོར་སོག་པོ་རྒྱལ་གཞུང་གིས་ཆེ་བསྟོད་གཟེངས་རྟགས་ཕུལ་བ་སོགས་མཛད་འཕྲིན་ཡར་ངོའི་ཟླ་བ་ལྟར་རྒྱས་བཞིན་པ་ལགས་སོ།།
