སེར་བྱེས་རིག་མཛོད་ཆེན་མོ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་ (laptop, iPad, iPod iPhone & Android) སོགས་ཀྱི་ནང་དུ་ཐུགས་འདོད་ལྟར་ཕབ་ལེན་དང་གཟིགས་ཀློག་གནང་རོགས།
དྲ་ཚིགས།: www.serajeyrigzodchenmo.org གློག་འཕྲིན་ཁ་བྱང་། serajeyrigzodchenmo@gmail.com
སྐད་ཡིག་གི་ཁྱད་ཆོས་དང་ཡར་རྒྱས་སུ་གཏོང་ཐབས།
ང་རང་ཚོར་ཤར་ཕྱོགས་རྒྱ་ནག་དང་རྩ་བ་ནས་ཐ་དད་ཡིན་པའི་སྐད་དང་ཡི་གེ་ཞིག་ཡོད། དེ་དག་གི་དབྱངས་གསལ་ལྷོ་ཕྱོགས་རྒྱ་གར་དང་མཐུན་པོ་ཡོད་ཀྱང་གཞི་རྩའི་ཐོག་ང་རང་ཚོའི་སྐད་ཡིག་ཟུར་གསལ་ཞིག་ཡིན་པ་མ་ཟད། བེད་སྤྱོད་ཀྱང་ལོ་སྟོང་ཕྲག་བཏང་བ་ཞིག་ཡིན་པ་ལས། བར་ལམ་འཛམ་གླིང་གི་ཡར་ཐོན་རྒྱལ་ཁབ་དང་འབྲེལ་བ་བྱུང་ནས་ཡི་གེ་གསར་པ་བཟོས་པ་དེ་འདྲ་མ་རེད། ཐོན་མིས་བོད་ཡིག་གསར་བཟོ་འམ་ཡང་ན་ལེགས་བཅོས་གནང་བ་གང་ཞིག་ཡིན་རུང་ང་ཚོའི་ཡི་གེ་འདི་རྙིང་ཤོས་ཀྱི་གྲས་ཤིག་ཆགས་ཡོད་པ་དང༌། བརྗོད་བྱ་སྟོན་ནུས་ཀྱི་ཆ་ལ། དཔེར་ན། ནང་པ་སངས་རྒྱས་པའི་ཆོས་འདི་རྣམ་གྲངས་མང་ལ་བརྗོད་བྱ་ཤིན་ཏུ་རྒྱ་ཆེ་ཞིང༌། དེའི་ལྟ་གྲུབ་ཀྱི་རྣམ་གཞག་ཡོངས་རྫོགས་ཇི་མ་ཇི་བཞིན་སྐད་ཡིག་ཕལ་པ་ཞིག་གིས་བརྗོད་ཐུབ་རྒྱུ་ཁག་པོ་ཡིན། འོན་ཀྱང་བོད་ཀྱི་སྐད་ཡིག་གིས་རྒྱ་གར་གྱི་ལེགས་སྦྱར་དང༌། པ་ལིའི་སྐད་ཡིག་ནང་ཡོད་པའི་གཞི་ལམ་འབྲས་གསུམ་གྱི་རྣམ་གཞག་ཕྱིན་ཅི་མ་ལོག་པར་བསྒྱུར་སྤེལ་བྱེད་ཐུབ་ཀྱི་ཡོད། བོད་པའི་སྐད་ཡིག་འདི་སོ་སོའི་ཟུར་གསལ་གྱི་སྐད་ཡིག་ཅིག་ཡིན་པ་མ་ཟད་དེ་ཡང་ཕྱུག་པོ་ཡོད་པ་ཞིག་ཏན་ཏན་ཡིན།
བོད་སྐད་འདི་སྐྱོ་པོ་གཏན་ནས་མིན། དཔེར་ན། ནང་པ་སངས་རྒྱས་པའི་ཆོས་ཀྱི་ཐོག་ལ་ལེགས་སྦྱར་གྱི་སྐད་དེ་གནའ་བོའི་སྐད་ཡིག་རྙིང་ཤོས་ཤིག་དང༌། སྐད་ཡིག་ཕྱུག་པོ་ཞིག་ཏུ་བརྩི་བཞིན་ཡོད། སྐད་ཡིག་ཕྱུག་པོར་བརྩིས་པ་དེའི་ཐོག་ནས་བཤད་པའི་ནང་པའི་ལྟ་བ་དང༌། གྲུབ་མཐའི་སྐོར་ཡོངས་སུ་རྫོགས་པ་བོད་སྐད་ཀྱི་ནང་ནས་ཤོད་ཐུབ་ཀྱི་ཡོད། འཛམ་བུ་གླིང་འདིའི་སྒང་ལ་ཡི་གེ་རྙིང་ཤོས་ཀྱི་གྲས་བཅུ་གྲངས་ཤིག་ཡོད་པའི་ནང་ལ་བོད་པའི་ཡི་གེ་འདི་ཡང་བགྲང་གི་འདུག །རྩ་བའི་ཆ་ནས་ང་རང་ཚོ་བོད་པའི་སྐད་ཡིག་ཕྱུག་པོ་ཡིན་པ་གསལ་པོ་རེད།
ཕྱིས་སུ་དར་རྒྱས་ཕྱིན་པའི་ཚན་རིག་དང༌། ལམ་ལུགས་གསར་པའི་ཆབ་སྲིད་ཀྱི་མིང་ཚིག་དེ་དག་བོད་སྐད་ནང་བེད་སྤྱོད་དང་སྦྱོང་བརྡར་བྱེད་པའི་གོ་སྐབས་མ་བྱུང་བར་བརྟེན་སྐབས་གཅིག་རིང་ཡར་རྒྱས་འགྲོ་མ་ཐུབ་པ་ཙམ་ལས། གོ་སྐབས་བྱུང་ཕྱིན་ལས་རིགས་སྡེ་ཚན་གང་གི་ནང་དུའང་བོད་པའི་སྐད་ཡིག་འདིས་མ་འདང་བ་ཕལ་ཆེར་མེད། ང་རང་ཚོར་དངོས་གནས་སྐད་ཡིག་ཕྱུག་པོ་ཞིག་དང༌། མི་ལ་སྨོན་མི་དགོས་པའི་རིག་གཞུང་ཞིག་ཡོད།
ཨིན་ཇི། ཧིན་དྷི། དེ་མིན་གྱི་སྐད་ཡིག་འདྲ་མིན་དེ་རིགས་སྐད་ཡིག་དེ་ག་སློབ་སྦྱོང་བྱེད་པ་ལས། སློབ་ཚན་གཞན་དག་ཚང་མ་སོ་སོའི་བོད་ཀྱི་སྐད་ཡིག་ཐོག་ནས་སློབ་སྦྱོང་བྱེད་ཐུབ་པ་ཞིག་ངེས་པར་དུ་དགོས་ཀྱི་འདུག །དེ་བྱུང་ན་བོད་པའི་སྐད་ཡིག་ཡར་རྒྱས་འགྲོ་གི་རེད། དེས་བོད་པའི་རིག་གཞུང་ལ་ཕན་གྱི་རེད། བོད་པའི་རྣམ་པ་ཟིན་རྒྱུ་ལ་དེས་ཕན་གྱི་རེད། བོད་པའི་སྐད་ཡིག་ཡར་རྒྱས་མ་བཏང་བར་ཟ་སྐད་འཐུང་སྐད་ཙམ་མ་གཏོགས་གཞན་དག་ལས་དོན་འགངས་ཆེ་བ་ཚོ་སྐད་ཡིག་གཞན་དག་བེད་སྤྱོད་བྱས་ན་མ་གཏོགས་བོད་པའི་སྐད་ཡིག་གིས་མ་འདང་བར་བསྡད་ན་ཧ་ཅང་ངོ་ཚ་པོ་རེད་ལ། བོད་པའི་སྐད་ཡིག་རང་ཤུགས་ཀྱིས་འཐུས་ཤོར་འགྲོ་གི་རེད། དངོས་ཡོད་གནས་ཚུལ་ལ་བོད་སྐད་མ་འདང་བ་ཞིག་གི་གནས་ཚུལ་མུ་མཐུད་བསྡད་པ་ཡིན་ན་བོད་པའི་རིག་གཞུང་རྩ་བ་ཆེན་པོ་རེད། ཅེས་ང་ཚོས་ག་ཚོད་བཤད་ན་ཡང་དེ་ཙམ་གྱིས་ནུས་པ་ཐོན་ཐུབ་ཀྱི་མ་རེད། དེ་འདྲའི་རྒྱུ་མཚན་གྱི་ཐོག་ནས་ང་ཚོ་བོད་པའི་དགེ་རྒན་ཚོར་དམིགས་བསལ་གྱི་ལས་འགན་ཆེན་པོ་སླེབས་ཡོང་གི་ཡོད་པ་རེད། སློབ་ཚན་ཚང་མ་བོད་པའི་སྐད་ཡིག་གི་ནང་ནས་སློབ་དགོས་པར་བརྟེན་བོད་པའི་དགེ་རྒན་རྣམས་ནས་དམིགས་བསལ་གྱི་དོ་ཁུར་ཆེར་བསྐྱེད་བྱ་རྒྱུ་དེ་གལ་ཆེན་པོ་འདུག
དུས་ཀྱི་སྟོན་པ་མཆོག
