མཛད་པ་པོ། པྲ་སྟི་རིན་ཆེན་དོན་འགྲུབ།
བརྗོད་བྱ། སུམ་ཅུ་པ།
འཁྲིད་མཁན། རོང་པོ་དགེ་བཤེས་བློ་བཟང་སྙན་གྲགས།
རིག་མཛོད་སྒྲ་སྤྱིའི་ཨང་། SJRA-0735
སྒྲའི་རྣམ་པ། MP3 གྲངས་ཀ 78 ལྗིད་ཚད། 687.3MB
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༢༢ ཟླ་ ༨ ཚེས་ ༢༩ ཉིན་སྒྲིག་སྦྱོར་བྱས།
ངོ་སྤྲོད་མདོར་བསྡུས།
སེར་བྱེས་དགེ་བཤེས་རོང་བོ་བློ་བཟང་སྙན་གྲགས་མཆོག་ནི། མདོ་སྨད་གཅན་ཚ་རྫོང་ལོ་ཁོག་གྲོང་སྡེར་ཕ་འབྲུག་རྒྱལ་དང། མ་ཆོས་མོ་སྐྱིད་གཉིས་ཀྱི་སྲས་སུ་ ༡༩༧༠ ལོར་སྐུ་འཁྲུངས། གཞི་རིམ་དང་སློབ་འབྲིང་ཕེབས་ནས་བོད་རྒྱ་ཡིག་རིགས་སོགས་ལ་སྦྱངས། རང་ལོ་བཅུ་དྲུག་པར་རེབ་གོང་རོང་བོ་དགོན་ཆེན་དུ་རྗེ་དགེ་འདུན་ཆོས་འཕེལ་གྱི་དྲུང་ལས་རབ་ཏུ་བྱུང་སྟེ། གཞུང་ཆེན་ཁག་ལ་ལ་སློབ་གཉེར་གནང་། དགུང་གྲངས་བཅུ་དགུ་པར་ྋསྐྱབས་རྗེ་རྫོང་ཆུང་མཁས་བཙུན་ལུང་རིགས་རྒྱ་མཚོ་ལས་བསྙེན་རྫོགས་ཀྱི་སྡོམ་པ་ཞུས། ༡༩༩༧ ལོར་རེབ་གོང་རོང་བོ་དཔལ་གྱི་དགོན་ཆེན་དུ་སྨོན་ལམ་ཆེན་མོར་གཞུང་ཆེན་ལ་རབ་འབྱམས་པའི་དམ་བཅའ་བཞག་སྟེ། ༢༠༠༠ ལོར་རྒྱ་གར་དུ་ཕེབས་ཏེ། འཕགས་མཆོག་ཕྱག་ན་པདྨོའི་གཟིམ་ཆུང་མཇལ་ཁའི་སྐལ་བཟང་མངོན་དུ་གྱུར་བའི་བཀའ་འབྲེལ་ལྟར། ྋགོང་ས་མཆོག་གི་བཀའ་འབུམ་སྡུད་སྒྲིག་གནང་། ༢༠༠༡ ལོར་ྋགོང་ས་ྋརྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་སྐབས་བཅུ་གསུམ་པའི་སྤྱི་འཐུས་སུ་ཐད་ཀར་བསྐོ་བཞག་གནང་བ་མ་ཟད། བྱམས་བརྩེའི་གཟིགས་པ་ཆེེན་པོས་བཀའ་མངགས་ལུང་བསྟན་བཞིན། རྒྱ་གར་ལྷོ་ཕྱོགས་སེར་བྱེས་བྱ་བྲལ་ཁམས་ཚན་དུ་སྒྲིག་ཞུགས་ཀྱིས་འཛིན་གྲྭ་དབུ་མར་ཐད་ཞུགས་ཀྱིས་སློབ་གཉེར་བྱས་མཐར་དགེ་ལུགས་རྒྱུགས་སྤྲོད་དུ་ཕེབས་ཏེ། ༢༠༡༡ ལོར་དགེ་བཤེས་ལྷ་རམས་པའི་དམ་འཇོག་གནང་། ༢༠༡༣ ལོར་དཔལ་ལྡན་སྨད་རྒྱུད་གྲྭ་ཚང་དུ་ལོ་གཅིག་རིང་གི་ཆོས་ཐོག་ཚུལ་བཞིན་འགྲིམ་པ་དང་། ༢༠༡༡ ལོ་ནས་སྐབས་བཅོ་ལྔ་པའི་དགེ་ལུགས་སྤྱི་འཐུས་ཀྱི་མཛད་འཁུར་ལོ་ལྔ་ལ་གནང་། ྋགོང་ས་ྋསྐྱབས་མགོན་ཆེན་པོ་མཆོག་དགུང་གྲངས་༨༠ ལ་ཕེབས་པར་དགེ་ལུགས་ཡོངས་ཀྱི་ྋརྒྱལ་བའི་བཀའ་དྲིན་རྗེས་དྲན་ལོ་གཅིག་འཁོར་མོར་ཞུ་སྐབས་བཀའ་དྲིན་རྗེས་དྲན་གྱི་རྒྱུན་ལས་ཚོགས་གཙོའི་ཐུགས་འགན་བཞེས་པ་སོགས་བོད་ཕྱི་ནང་གཉིས་སུ་མཛད་འཕྲིན་རྒྱ་ཆེར་སྐྱོང་བཞིན་པ་བཅས་ཡིན།
ཁོང་གི་བརྩམས་ཆོས། བྱམས་བརྩེ་དང་དྲང་བདེན་གྱི་བླ་སྲོག གདུང་སེལ་གསེར་གྱི་མཆོད་སྡོང་། དད་པའི་མཛེས་རྒྱན། དག་གཙང་དངུལ་གྱི་མཆོད་སྡོང་། དྲང་ངེས་བཤད་ཁྲིད་ཟིན་བྲིས་བློ་བཟང་རྒྱལ་བའི་དགོངས་རྒྱན་ལུང་རིགས་གསེར་གྱི་ཐང་མ། རྨ་འགྲམ་རྡོ་རྗེ་བྲག་གི་ལོ་རྒྱུས་ཟ་འོག་གོས་ཀྱི་རི་མོ། གཉན་ཐོག་བྱམས་པ་གླིང་གི་ལོ་རྒྱུས་མི་ཕམ་དགྱེས་པའི་རོལ་མོ། སེར་བྱེས་ངོ་སྤྲོད་གཏེར་གྱི་ཁ་བྱང་། གསེར་གྱི་ཕ་བོང། གསེར་ནག་གི་ཕྲེང་བ། གསེར་གྱི་ཐང་མ། གསེར་གྱི་མཆོད་སྡོང་། རིགས་ལམ་དང་ནང་ཆོས་ཀྱི་སློབ་དེབ་སོགས་ཁག་བཞི་བཅས་བཞུགས།

སྒྲ་ཨང་། KADRD2050307
མཁས་པ་གཞན། [རིག་གནས།] སྤྱིའི་ཨང་། ༤༣༥
རྣམ་པ། MP3 རྣམ་གྲངས། 6 ཆེ་ཆུང་། 150.7 MB
ཁྲིད་ཚན། ཡི་གེའི་སྐོར།
འཁྲིད་མཁན། འགོས་པདྨ་རྒྱལ་མཚན།
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༡༩ ལོའི་ཟླ་ ༠༣།༣༠ ལ་གསར་སྒྲིག་བྱས།
༢༠༡༩ ལོའི་ཟླ་བརྒྱད་པའི་ཚེས་ཉེར་དྲུག་ལ་བསྐྱར་སྒྲིག་བྱས།
ངོ་སྤྲོད་མདོར་བསྡུས།
འགོས་པདྨ་རྒྱལ་མཚན་མཆོག་ནི། ༡༩༥༦ བོད་དུ་སྐུ་འཁྲུངས། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱིས་མཚན་བསོད་ནམས་དབང་ཆེན་ཞེས་གསོལ། ཆུང་ངུའི་དུས་སུ་ཡབ་ཀྱི་དྲུང་སོགས་ནས་ཡི་གེ་འབྲི་ཀློག་སོགས་སྦྱངས། ༡༩༦༩ ལོར་འབྲས་ལྗོངས་སུ་བྲོས་ནས་ཡབ་ཡུམ་རྣམས་དང་ལྷན་འཛོམས་བྱུང་། རབ་བྱུང་བཅུ་དྲུག་པའི་ཆུ་བྱི་ལོར་རབ་ཏུ་བྱུང་སྟེ་མཚན་ལ་པདྨ་རྒྱལ་མཚན་ཞེས་གསོལ། ཇོ་ཁང་དགོན་པར་ཆོས་ཞུགས་བྱས། མཁན་ཆེན་ཐུབ་བསྟན་བརྩོན་འགྲུས་ཕུན་ཚོགས་ལས་སྒྲ་སོགས་དང་། ཀུན་བཟང་བླ་མའི་ཞལ་ལུང་གི་ཁྲིད་ལུང་སོགས་ཞུས། ༡༩༧༥ ལོར་ཝཱ་ཎ་མཐོ་སློབ་ཏུ་ཞུགས། ༡༩༨༢ ལོར་རིག་གནས་སློབ་དཔོན་གྱི་འགན་ཁུར་བསྐྱངས། ཝཱ་ཎ་སོགས་རིས་སུ་མ་ཆད་པའི་བཤད་གྲྭ་དང་དགོན་པ། སློབ་གྲྭ་དང་དགེ་རྒན་འོས་སྦྱོང་། ཟུར་སྦྱོང་སོགས་སུ་སྒྲ་སྙན་ངག་སྡེབ་སྦྱོར་སོགས་སློབ་ཁྲིད་གནང་། ༧སྐྱབས་རྗེ་གྲུབ་དབང་རིན་པོ་ཆེ་པདྨ་ནོར་བུ་མཆོག་ནས་རིག་གནས་སྨྲ་བའི་དབང་ཕྱུག་ཅེས་དང་། བར་གཞིས་སོགས་དགེ་བའི་བཤེས་གཉེན་རྣམས་ནས་འགོས་ལོ་བཞི་པ་དང་། ཐུ་མི་གཉིས་པ་སོགས་ཀྱི་ཆོ་ལོ་གནང་། དཔལ་སྔ་འགྱུར་བསྟན་པའི་དགོན་པ་པདྨ་བསམ་ཡས་ཆོས་འཁོར་གླིང་སོགས་ཀྱི་མཁན་པོ་དང་དགོན་པའི་འཛིན་སྐྱོང་ཡང་མཛད། ༢༠༠༡ ལོར་སྐུ་གཤེགས། གསུང་རྩོམ་ལ་གླེང་བརྗོད་འཛམ་གླིང་རྒྱན་གཅིག་སོགས་བཞུགས།

སྒྲ་ཨང་། KADRD3333305
མཁས་པ་གཞན། [རིག་གནས།] སྤྱིའི་ཨང་། ༤༣༣
རྣམ་པ། MP3 རྣམ་གྲངས། 18 ཆེ་ཆུང་། 752.7 MB
ཁྲིད་གཞུང་། སྨྲ་བའི་སྒོ་མཚོན་ཆ་ལྟ་བུ།
མཛད་པ་པོ། པཎྜི་ཏ་སྨྲྀ་ཏི་ཛྙ་ན་ཀིརྟི། [དུས་རབས་བཅུ་པ]
བརྗོད་བྱ། མིང་ཚིག་ཡི་གེའི་ཚོགས་གསུམ། 
འཁྲིད་མཁན། རྒན་ཐུབ་བསྟན་ཆོས་གྲུབ།
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༡༩ ལོའི་ཟླ་ ༠༣།༠༨ ལ་གསར་སྒྲིག་བྱས།
༢༠༡༩ ལོའི་ཟླ་བརྒྱད་པའི་ཚེས་ཉེར་དྲུག་ལ་བསྐྱར་སྒྲིག་བྱས།
ངོ་སྤྲོད་མདོར་བསྡུས།
རྒན་ཐུབ་བསྟན་ཆོས་གྲུབ་མཆོག་ནི། ལེགས་སྦྱར་སོགས་ལ་མཁས་ཤིང་ཝཱ་ཎ་སོགས་སུ་སློབ་དཔོན་གྱི་འགན་ཁུར་བསྐྱངས་ཏེ་འཆད་ཁྲིད་གནང་མྱོང་ལ། བརྡ་སྤྲོད་སྐོར་གྱི་གསུང་རྩོམ་དང་བསྒྱུར་རྩོམ་ཡང་ཡོད།

སྒྲ་ཨང་། KADRD2020397
མཁས་པ་གཞན། [རིག་གནས།] སྤྱིའི་ཨང་། ༤༩༧
ཁྲིརྣམ་པ། MP3 རྣམ་གྲངས། 28 ཆེ་ཆུང་། 387.8 MB
ཁྲིད་གཞུང་། སུམ་ཅུ་པའི་རྣམ་བཤད་གསལ་བའི་སྒྲོན་མེ།
མཛད་པ་པོ། ཉན་ཤུལ་མཁྱེན་རབ་འོད་གསལ། [༡༩༢༥-༡༩༩༨]
བརྗོད་བྱ། རྣམ་དབྱེ་དང་ཚིག་ཕྲད།
འཁྲིད་མཁན། བསྟན་བཅོས་མཛད་པ་པོ།
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༡༩ ལོའི་ཟླ་ ༠༣།༠༨ ལ་གསར་སྒྲིག་བྱས།
༢༠༡༩ ལོའི་ཟླ་བརྒྱད་པའི་ཚེས་ཉེར་དྲུག་ལ་བསྐྱར་སྒྲིག་བྱས།
ངོ་སྤྲོད་མདོར་བསྡུས།
ཉན་ཤུལ་མཁྱེན་རབ་འོད་གསལ་མཆོག་ནི། ཕྱི་ལོ་༡༩༢༥ལོར་མི་ཉག་རབ་སྒང་དུ་སྐུ་འཁྲུངས། དགུང་ལོ་ལྔའི་སྐབས་ནས་བོད་ཡིག་འབྲི་ཀློག་དང་། འདོན་རྟ་དབྱངས་སོགས་ལ་སྦྱངས། ཡུན་རིང་མ་འགོར་བར་མི་ཉག་དཔལ་རི་དགོན་པའི་ཁྲི་པ་འོད་གསལ་ཉི་མའི་སྤྲུལ་སྐུར་ངོས་འཛིན་མཛད། རྗེས་སུ་རྫོགས་ཆེན་ཤྲཱི་སིང་ཧའི་བཤད་གྲྭར་ཞུགས་ནས་གཞུང་ཆེན་བཅུ་གསུམ་དང་ཞོར་དུ་ཐ་སྙད་རིག་གནས་ལའང་ཐོས་བསམ་གནང་། ཀོང་སྤྲུལ་རིན་པོ་ཆེ་སོགས་ལས་དབང་ལུང་ཁྲིད་སོགས་གསན། དགུང་ལོ་ཉེར་གཉིས་པ་ཕྱི་ལོ་ ༡༩༤༦ ལོར་ལྷ་སར་གསར་དུ་བཙུགས་མ་ཐག་པའི་བོད་དམག་ཁུལ་ཁང་གི་ལས་བྱེད་སློབ་གྲྭའི་དགེ་རྒན་དུ་གདན་དྲངས་པ་ལྟར་སློབ་གྲྭ་དེ་དང་། ཟུར་བཙུགས་སྤྱི་ཚོགས་འཛིན་གྲྭ་སོགས་སུ་དགེ་རྒན་སོགས་གནང་སྟེ་ ༡༩༥༩ལོའི་བར་ལྷ་སར་བཞུགས། སྔ་རྗེས་སུ་ཀྲུང་དབྱངས་མི་རིགས་སློབ་གྲྭ་ཆེན་མོ་སོགས་སུ་བོད་ཀྱི་རིག་གནས་སོགས་སློབ་ཁྲིད་གནང་། ཕྱིས་བོད་རྒྱ་ཚིག་མཛོད་ཆེན་མོ་རྩོམ་སྒྲིག་གི་ལས་དོན་ལྷ་སར་ཚུགས་སྐབས་གཙོ་འགན་འཁུར་བའི་གྲས་སུ་ཞུགས་པ་དང༌། ༡༩༧༨ ལོར་ཁྲིན་ཏུའུ་རུ་བོད་རྒྱ་ཚིག་མཛོད་ཆེན་མོའི་ལས་དོན་ལེགས་འགྲུབ་མཇུག་སྐྱོང་བར་ཡང་ཞུགས། ༡༩༨༡ ལོར་བོད་ལྗོངས་སྤྱི་ཚོགས་ཚན་རིག་ཁང་གི་དབུ་འཛིན་གཞོན་པའི་འགན་སོགས་བཞེས། བོད་ཀྱི་ཤེས་རིག་ཞིབ་འཇུག་ལྟེ་གནས་ཀྱིས་བཀའ་བསྟན་དཔེ་སྡུར་རྩོམ་སྒྲིག་གི་དཀའ་གནད་བཀའ་འདྲི་ཞུ་ཡུལ་གྱི་སློབ་དཔོན་དུ་གདན་ཞུ་མཛད། སྐུ་ཚེ་ཧྲིལ་པོར་བོད་ཀྱི་རིག་གཞུང་དར་སྤེལ་དང༌། སློབ་མ་མང་པོ་སྐྱེད་སྲིང་མཛད། ཕྱི་ལོ་༡༩༩༨ ལོའི་ཟླ་ ༧ ཚེས་ ༤ ཉིན་སྐུ་གཤེགས། རྟགས་ཀྱི་འཇུག་པའི་དཀའ་འགྲེལ་གནད་ཀྱི་སྒྲོན་མེ་སོགས་གསུང་རྩོམ་མཛད།

སྒྲ་ཨང་། KADRD2010298
མཁས་པ་གཞན། [རིག་གནས།] སྤྱིའི་ཨང་། ༤༩༦
རྣམ་པ། MP3 རྣམ་གྲངས། 20 ཆེ་ཆུང་། 567 MB
ཁྲིད་གཞུང་། བརྡ་སྤྲོད་བློ་གསལ་དགའ་སྟོན།
མཛད་པ་པོ། དམུ་དགེ་བསམ་གཏན། [༡༩༡༤-༡༩༩༣]
བརྗོད་བྱ། བོད་ཀྱི་བརྡ་སྤྲོད་པའི་སྐོར།
འཁྲིད་མཁན། བསྟན་བཅོས་མཛད་པ་པོ།
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༡༩ ལོའི་ཟླ་ ༠༣།༣༠ ལ་གསར་སྒྲིག་བྱས།
༢༠༡༩ ལོའི་ཟླ་བརྒྱད་པའི་ཚེས་ཉེར་དྲུག་ལ་བསྐྱར་སྒྲིག་བྱས།
ངོ་སྤྲོད་མདོར་བསྡུས།
རྗེ་དམུ་དགེ་བསམ་གཏན་མཆོག་ནི། དམུ་དགེའི་དགོན་འོག་སོག་པོ་རུ་ཞེས་པར་༡༩༡༤ལོར་སྐུ་འཁྲུངས། དགུང་ལོ་བཅུ་གཅིག་ཐོག་རབ་ཏུ་བྱུང་སྟེ་དམུ་དགེ་དགོན་དུ་ཆོས་ཞུགས་བྱས། དགུང་ལོ་ཉི་ཤུའི་སྐབས་བླ་བྲང་བཀྲ་ཤིས་འཁྱིལ་དུ་ཆོས་ཞུགས་བྱས་ཏེ་གཞུང་ཆེན་ཐུགས་གཉེར་དང་རིག་གནས་ཀུན་ལ་སྦྱངས། ཁོང་གིས་རྡོ་རམས་པ་བཏང་ནས་ལོ་གཉིས་དང་ཟླ་བརྒྱད་སོང་བའི་མཚམས་ལ་བླ་བྲང་བརྒྱུད་དུ་རྒྱ་མིའི་བཙན་འཛུལ་སླེབས། དགུང་ལོ་སོ་བདུན་པར་དགེ་བཤེས་ཤེས་རབ་རྒྱ་མཚོ་དང་མཉམ་དུ་པེ་ཅིན་དུ་ཕྱག་ལས་གནང་། ༡༩༥༡ ལོར་ང་ཕོད་སོགས་བོད་རྒྱལ་ཁབ་ཀྱི་འཐུས་མི་རྣམས་པེ་ཅིན་དུ་འབྱོར་ཏེ་གྲོས་མཐུན་དོན་ཚན་བཅུ་བདུན་པ་འཇོག་སྐབས་གྲོས་མཐུན་པར་ཞུས་ཀྱི་ལས་དོན་ནང་དུ་ཞུགས། ༡༩༥༩ལོར་པེ་ཅིན་དུ་[རྒྱ་བོད་ཤན་སྦྱར་ཚིག་མཛོད་]སོགས་བསྒྱུར་ཞུས་མཛད། ༡༩༦༦ལོར་རིག་གནས་གསར་བརྗེའི་སྐབས་ངལ་རྩོལ་དུ་ཞུགས་དགོས་བྱུང་། ༡༩༧༣ལོར་དཀར་འདོན་བྱས། ༡༩༦༥ལོར་ཁྲིན་ཏུའུ་རུ་ཕེབས་ཏེ་[བོད་རྒྱ་ཚིག་མཛོད་ཆེན་མོའི་]པར་གཞི་བཏིང་། ༡༩༨༠ལོའི་ཕྱི་ཟླ་དང་པོར་པེ་ཅིན་དུ་གྲངས་ཉུང་མི་རིགས་སྐད་ཡིག་ཚན་རིག་གྲོས་བསྡུར་ལ་ཞུགས་ཏེ་ཉིན་བཅུ་གཉིས་རིང་རྩོད་གླེང་མཛད་མཐར་བོད་ཡིག་བཅོས་སྒྱུར་བྱེད་དགོས་ཞེས་བོད་ཀྱི་བརྡ་སྤྲོད་པའི་གཞུང་ལུགས་རྩ་བརླག་གཏོང་བའི་ཡིག་ཆ་[གནད་བསྡུས་]ཟེར་བ་དེ་རྩིས་མེད་གཏོང་ཐུབ་པ་བྱུང་བ་དང་སྦྲགས། “གནད་བསྡུས་”ཀྱི་དགག་ཡིག་མཐར་དཔྱད་ཟེར་པ་ཞིག་ཆེད་མངགས་རྩོམ་འབྲི་གནང་། སྔ་ཕྱིར་ཀྲུང་དབྱང་མི་རིགས་སློབ་གླིང་སོགས་སུ་སློབ་ཁྲིད་མཛད་དེ་སློབ་མ་མང་པོ་གསོ་སྐྱོང་གནང་། ༡༩༩༣ལོའི་ཟླ་༥པའི་ཚེས༦ཉིན་སྐུ་གཤེགས། ཁོང་གི་གསུམ་རྩོམ་སྐོར་གཅིག་ཏུ་བསྡུས་ནས་ཁྱོན་པོད་དྲུག་མཚོ་སྔོན་མི་རིགས་དཔེ་སྐྲུན་ཁང་ནས་པར་སྐྲུན་བྱས་ཡོད།