-
མདུན་ངོས།
-
ཕར་ཕྱིན།
-
རྟེན་འབྲེལ།
- རིག་མཛོད་རྩོམ་སྒྲིག་པ།
རིག་མཛོད་རྩོམ་སྒྲིག་པ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་(Laptop, iPad, iPod iPhone & Android) གང་ཡིན་ཐོག་ཏུ་རང་རང་གི་ཐུགས་འདོད་ལྟར་ཕབ་ལེན་དང་གསན་གཟིགས་གནང་རོགས།
དྲ་ཚིགས།: www.serajeyrigzodchenmo.org ཡིག་འབྲེལ་དྲ་བྱང་། serajeyrigzodchenmo@gmail.com
དྲ་རྒྱ་སོགས་ཀྱི་ཟབ་སྦྱོང་སྤྲད།
ཟླ་གསུམ་ལྷག་གི་རིང་ལ་རིག་མཛོད་ལས་བྱེད་རྣམས་ལ་དྲ་རྒྱ་བཀོལ་སྤྱོད་དང་དྲ་ཚིགས་གསར་བཟོ་བརྙན་པར་སོགས་བཟོ་སྟངས་སྐོར་གྱི་ཟབ་སྦྱོང་སྤྲད།
འདི་ག་རྩོམ་སྒྲིག་ཁང་གི་ལས་འཆར་གྱི་ཁྲོད་དུ་རྩིས་འཁོར་སོགས་ཀྱི་ཟབ་སྦྱོང་སྤྲོད་རྒྱུའི་ལས་འཆར་ཞིག་ཡོད་པ་ལྟར། འདི་ག་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་གིས་དྲ་རྒྱ་དང་རྩིས་འཁོར་ཆེད་མཁས་པ་རྒན་ཀརྨ་གདན་འདྲེན་ཞུས་ཏེ་རྩོམ་སྒྲིག་ཁང་གི་ལས་བྱེད་དང་གྲྭ་ཚང་གི་དབྱིན་ཡིག་གི་དྲ་རྒྱའི་དོ་དམ་པ་སོགས་ལ། ཕྱི་ཟླ་ ༥ ཚེས་ ༥ ནས་དབུ་བཙུགས་ཏེ་དྲ་རྒྱ་བཀོལ་སྤྱོད་དང་དྲ་ཚིགས་གསར་བཟོ་བྱེད་སྟངས་དང་བརྙན་པར་དང་དེབ་ཀྱི་རྒྱབ་ཤ་སྒྲིག་སྦྱོར་བྱེད་སྟངས། (Microsoft Word) སོགས་ཀྱི་སྐོར་ལ་ཟབ་སྦྱོང་ཞིག་བཀོད་སྒྲིག་བྱས་པ་ཕྱི་ཟླ་ ༨ ཚེས་ ༡ ཉིན་བདེ་བླག་ངང་མཇུག་ཡོངས་སུ་གྲུབ་ཅིང་། དེ་དང་ལྷན་དུ་རིག་མཛོད་ཆེན་མོའི་དྲ་ཚིགས་ཀྱི་སྒྲིག་བཀོད་ལའང་འགྱུར་བ་ཅུང་ཟད་བཏང་ཡོད་ལ། ལོ་རྗེས་མར་ཡང་རྩིས་འཁོར་སོགས་དང་དྲ་རྒྱ་དང་འབྲེལ་ཡོད་ཀྱི་ཤེས་བྱའི་སྐོར་ལ་ཟབ་སྦྱོང་དང་། དྲ་ཚིགས་ཀྱི་སྒྲིག་བཀོད་སོགས་ལའང་གཟིགས་པ་པོའི་མོས་ངོ་དང་འཚམ་པར་བསྒྱུར་བཅོས་གང་འཚམ་ཞིག་གཏོང་རྒྱུའི་འཆར་གཞི་སོགས་ཆེད་མཁས་པ་མཆོག་ལ་སྙན་སེང་ཕུལ།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༨།༠༤ ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།
