སེར་བྱེས་མཁས་སྙན་གྲྭ་ཚང་གི་ལོ་རེའི་མཛད་རིམ་ཆེ་ཁག

ཟླ་གསུམ་ལྷག་གི་རིང་ལ་རིག་མཛོད་ལས་བྱེད་རྣམས་ལ་དྲ་རྒྱ་བཀོལ་སྤྱོད་དང་དྲ་ཚིགས་གསར་བཟོ་བརྙན་པར་སོགས་བཟོ་སྟངས་སྐོར་གྱི་ཟབ་སྦྱོང་སྤྲད།
          འདི་ག་རྩོམ་སྒྲིག་ཁང་གི་ལས་འཆར་གྱི་ཁྲོད་དུ་རྩིས་འཁོར་སོགས་ཀྱི་ཟབ་སྦྱོང་སྤྲོད་རྒྱུའི་ལས་འཆར་ཞིག་ཡོད་པ་ལྟར། འདི་ག་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་གིས་དྲ་རྒྱ་དང་རྩིས་འཁོར་ཆེད་མཁས་པ་རྒན་ཀརྨ་གདན་འདྲེན་ཞུས་ཏེ་རྩོམ་སྒྲིག་ཁང་གི་ལས་བྱེད་དང་གྲྭ་ཚང་གི་དབྱིན་ཡིག་གི་དྲ་རྒྱའི་དོ་དམ་པ་སོགས་ལ། ཕྱི་ཟླ་ ༥ ཚེས་ ༥ ནས་དབུ་བཙུགས་ཏེ་དྲ་རྒྱ་བཀོལ་སྤྱོད་དང་དྲ་ཚིགས་གསར་བཟོ་བྱེད་སྟངས་དང་བརྙན་པར་དང་དེབ་ཀྱི་རྒྱབ་ཤ་སྒྲིག་སྦྱོར་བྱེད་སྟངས། (Microsoft Word) སོགས་ཀྱི་སྐོར་ལ་ཟབ་སྦྱོང་ཞིག་བཀོད་སྒྲིག་བྱས་པ་ཕྱི་ཟླ་ ༨ ཚེས་ ༡ ཉིན་བདེ་བླག་ངང་མཇུག་ཡོངས་སུ་གྲུབ་ཅིང་། དེ་དང་ལྷན་དུ་རིག་མཛོད་ཆེན་མོའི་དྲ་ཚིགས་ཀྱི་སྒྲིག་བཀོད་ལའང་འགྱུར་བ་ཅུང་ཟད་བཏང་ཡོད་ལ། ལོ་རྗེས་མར་ཡང་རྩིས་འཁོར་སོགས་དང་དྲ་རྒྱ་དང་འབྲེལ་ཡོད་ཀྱི་ཤེས་བྱའི་སྐོར་ལ་ཟབ་སྦྱོང་དང་། དྲ་ཚིགས་ཀྱི་སྒྲིག་བཀོད་སོགས་ལའང་གཟིགས་པ་པོའི་མོས་ངོ་དང་འཚམ་པར་བསྒྱུར་བཅོས་གང་འཚམ་ཞིག་གཏོང་རྒྱུའི་འཆར་གཞི་སོགས་ཆེད་མཁས་པ་མཆོག་ལ་སྙན་སེང་ཕུལ།

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༨།༠༤ ལ།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།

གདན་ས་ཁག་ཏུ་ཨ་རིའི་ཨེ་མོ་རིའི་མཐོ་སློབ་དང་བོད་ཀྱི་ཚན་རིག་ལས་རིམ་གྱིས་སྣེ་ཁྲིད་བྱས་པའི་ཚན་རིག་གི་ཟབ་སྦྱོང་དབུ་འཛུགས་གནང་སོང།
          ལོ་རེར་གདན་ས་ཁག་ཏུ་ཨ་རིའི་ཨེ་མོ་རིའི་མཐོ་སློབ་དང་བོད་ཀྱི་ཚན་རིག་ལས་རིམ་གྱིས་སྣེ་ཁྲིད་བྱས་པའི་ཚན་རིག་གི་ཟབ་སྦྱོང་ཞིག་འཚོགས་མུས་ཡིན་པ་ལྟར། ལོ་འདིའི་ཟབ་སྦྱོང་ཡང་དབུ་འཛུགས་གནང་འདུག །འདི་ག་སེ་ར་ཐེག་པ་ཆེན་པོའི་གླིང་དུའང་གྲྭ་ཚང་བྱེས་སྨད་གཉིས་ཀྱི་ཚན་རིག་སྡེ་ཚན་གྱི་གོ་སྒྲིག་འོག་༢༠༡༦ལོའི་ཕྱི་ཟླ་༥ཚེས་༡༨ནས་ཕྱི་ཟླ་༦ཚེས་༢༣སྟེ་ཟླ་གཅིག་ལྷག་གི་ཟབ་སྦྱོང་དེ་སེར་བྱེས་ཡིད་དགའ་ཆོས་གླིང་དུ་དབུ་འཛུགས་གནང་། དེ་ཡང་གྲྭ་ཚང་གཉིས་ཀྱི་ཚན་རིག་འཛིན་གྲྭའི་སློབ་གཉེར་བ་རྣམས་ལ་སྔ་དྲོ་འཛིན་གྲྭ་གཉིས་དང་ཕྱི་དྲོ་འཛིན་གྲྭ་གཉིས་ཏེ་ཉིན་རེར་ཚོགས་ཐུན་བཞི་རེ་བྱས་ཏེ་ཚན་རིག་གི་ལྟ་གྲུབ་དང་། སྐྱེ་དངོས། དབང་རྩ། དངོས་ཁམས་སོགས་ཀྱི་འཆད་ཁྲིད་དང་དྲི་བ་དྲིས་ལན། ཚན་རིག་གི་སྐོར་བརྗོད་གཞིར་བཟུང་སྟེ་དམ་བཅའ་དང་རྩོད་པའི་བགྲོ་གླེང་ཡང་བྱེད་ཀྱིན་ཡོད་འདུག །

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༥།༢༣ ལ།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།