ཨ་རིའི་ཨེ་མོ་རིའི་མཐོ་སློབ་དང་བོད་ཀྱི་ཚན་རིག་ལས་རིམ་གྱི་གོ་སྒྲིག་འོག་དེ་རིང་ནས་བཟུང་གདན་ས་ཁག་ཏུ་ཟླ་གཅིག་གི་ཚན་རིག་ཟབ་སྦྱོང་ཐེངས་གཉིས་པ་དངོས་སུ་འགོ་ཚུགས།
འདི་ག་སེ་ར་བྱེས་སྨད་གཉིས་ཀྱི་གྲྭ་ཚང་གི་ཚན་རིག་འཛིན་གྲྭར་ཕེབས་དགོས་པའི་སློབ་གཉེར་བ་རྣམས་ལ་ཟླ་གཅིག་གི་རིང་ལ། སྔ་དྲོ་དང་ཕྱི་དྲོར་འཛིན་གྲྭ་རེ་སྟེ། ཉིན་གཅིག་ལ་འཛིན་གྲྭ་གཉིས་རེ་བྱས་ནས། སེར་བྱེས་ཡིད་དགའ་ཆོས་གླིང་གི་ཚོགས་ཁང་དང་། སེར་བྱེས་ཚན་རིག་སྡེ་ཚན་གྱི་འཛིན་ཁང་དུ་ཚན་རིག་ཟབ་སྦྱོང་དངོས་སུ་འགོ་འཛུགས་གནང་ཡོད། ཚན་རིག་ཟབ་སྦྱོང་གནང་མཁན་གྱི་དགེ་རྒན་རྣམ་པ་ནི་ཨ་རིའི་ཨེ་མོ་རིའི་མཐོ་སློབ་ནས་ཕེབས་པའི་ཚན་རིག་ལྟ་གྲུབ་དང་། དངོས་ཁམས་ཚན་རིག། སྐྱེ་དངོས་ཚན་རིག །དབང་རྩ་ཚན་རིག་སོགས་ལ་མཁྱེན་རྒྱ་ཤིན་ཏུ་ཆེ་བའི་མཁས་དབང་རྐྱང་ཆེད་ཕེབས་གནང་ཡོད་འདུག །ཉིན་དང་པོའི་མཛད་སྒོའི་སྐབས་ཁོང་རྣམ་པས་གསུངས་སྲོལ་ལྟར་ན། ༧གོང་ས་རྒྱལ་བའི་དབང་པོ་མཆོག་གི་རླབས་ཆེན་གྱི་དགོངས་གཞི་སྒྲུབ་ཆེད་དུ་ཁོ་ཚོ་འདིར་ཡོང་བ་ཡིན་འདུག་ཅིང་། ང་ཚོ་ཚང་མས་ལྷག་བསམ་རྣམ་དག་དང་འབད་རྩོལ་ཞུམ་མེད། མཉམ་རུབ་ཀྱིས་ཆོས་ཚན་ཟུང་འབྲེལ་དང་། ལེགས་ཆ་དང་གོ་རྟོགས་སྤེལ་རེ་བཅས་བྱས་ཏེ་འཛམ་གླིང་འདིར་ཞི་བདེ་དང་མཉམ་གནས། ང་ཚོ་ཐུན་མོང་གིས་སོ་སོའི་རིག་གཞུང་གོང་འཕེལ་སོགས་ལ་ཤུགས་རྒྱག་དགོས་སྐོར་སོགས་ཀྱི་བཀའ་སློབ་ཀྱང་གནང་སོང་། སློབ་གཉེར་བ་དབྱིན་སྐད་མི་མཁྱེན་པ་རྣམས་ཀྱི་ཆེད་དུ་དགེ་འདུན་པའི་གྲས་ནས་དབྱིན་སྐད་དང་ཚན་རིག་འཛིན་གྲྭ་སྔོན་སོང་གི་འཛིན་གྲྭ་རྒན་པའི་ནང་ནས་བཀོད་སྒྲིག་བྱས་ཡོད་ཅིང་། ལོ་ཤས་གོང་ནས་ཨ་རིའི་ཨེ་མོ་རིའི་མཐོ་སློབ་ཏུ་སེར་བྱེས་གྲྭ་ཚང་གི་སློབ་གཉེར་བའི་ཁྲོད་ནས་རྩེ་བཏོག་གིས་སློབ་སྦྱོང་བྱེད་དུ་སོང་སྟེ་མཐར་ཕྱིན་པའི་གྲྭ་པ་གསུམ་ཡོད་པ་དག་གིས་བཀོད་སྒྲིག་དང་། སྐད་བསྒྱུར་སོགས་གཙོ་འགན་འཁུར་གྱིན་ཡོད།