-
མདུན་ངོས།
-
འཕྲིན་གསར།
-
ཆོས་ཕྱོགས་ཀྱི་གནས་འཕྲིན་གཞན།
- དགའ་ལྡན་ཁྲི་ཐོག་བརྒྱ་དང་ལྔ་པའི་ཕྱག་རྟགས་ཕེབས་པ།
དགའ་ལྡན་ཁྲི་ཐོག་བརྒྱ་དང་ལྔ་པའི་ཕྱག་རྟགས་ཕེབས་པ།
དྲ་འཇུག་པ། རིག་མཛོད་རྩོམ་སྒྲིག་པ།
ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་དགའ་ལྡན་ཁྲི་ཐོག་བརྒྱ་དང་ལྔ་པའི་ཕྱག་རྟགས་རིན་པོ་ཆེ་ཕྱི་ལོ་༢༠༢༤ཟླ་༡༡ཚེས་༩བཟའ་སྐར་འབྱུང་འཕྲོད་དགེ་བའི་ཉིན་དགའ་ལྡན་ཁྲི་ཐོག་བརྒྱ་དང་ལྔ་པ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་ལ་དངོས་སུ་ཕེབས།
དགའ་ལྡན་ཁྲི་ཐོག་བརྒྱ་དང་ལྔ་པ་ྋརྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་ནི། ཚ་ལྷོ་རྫོང་དུ་ཡབ་ཚེ་འཕེལ་དང་ཡུམ་ཚེ་ལྷ་གཉིས་ཀྱི་སྲས་སུ་སྐུ་འཁྲུངས་ཡོད་པ་དང་། དགུང་ལོ་ལྔ་དྲུག་ཙམ་བར་སྐྱེད་མས་གཅེས་སྐྱོང་གནང་བ་དང་ཆུང་དུས་ཁྱིམ་གྱི་བྱིས་པའི་ནང་ནས་ཡི་གེ་སྦྱོར་ཀློག་ཐོག་བཟང་ཤོས་དེ་ཡིན་འདུག །
ཡབ་ཡུམ་གཉིས་ཀྱིས་ཐོག་མར་ཁྱིམ་ཐབས་སུ་སྦྱར་འདོད་གནང་ཡང་རབ་ཏུ་བྱུང་འདོད་ཁོ་ན་གནང་བར་བརྟེན་དགུང་ལོ་ ༡༦ ཐོག་ཁྱིམ་ནས་བྲོས་ཏེ་ཟླ་བ་གཉིས་ཙམ་རིང་བོད་ཀྱི་རྒྱལ་ས་ལྷ་ས་བར་སློང་མོ་རྒྱག་བཞིན་དུ་ཞབས་ཐང་ལ་ཕེབས་པ་དང་། དེ་རྗེས་གདན་ས་ཆེན་པོ་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་དུ་སྒྲིག་ཞུགས་གནང་ནས་དགེ་བའི་བཤེས་གཉེན་དུ་མའི་དྲུང་ནས་གཞུང་ཆེན་བཀའ་པོད་ལྔར་ཐུགས་གཉེར་གནང་འདུག །
ཕྱི་ལོ་ ༡༩༨༥ ལོར་དགེ་བཤེས་ལྷ་རམས་པ་ཨང་དང་པོའི་མཚན་རྟགས་བཞེས་ཡོད་པ་དང་། དེ་རྗེས་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གི་བཀའ་དགོངས་ལྟར་དཔལ་ལྡན་རྒྱུད་སྟོད་གྲྭ་ཚང་དུ་སྒྲིག་ཞུགས་དང་འབྲེལ་སྔགས་ཀྱི་དམ་འཇོག་གནང་བར་མ་ཟད། སྔ་རྗེས་སུ་རྒྱུད་སྟོད་གྲྭ་ཚང་གི་དགེ་བསྐོས་དང་བླ་མ་དབུ་མཛད། མཁན་པོ་བཅས་གནང་ཡོད་འདུག །
གཞན་༧གོང་ས་མཆོག་གི་བཀའ་དགོངས་བཞིན་འཇིགས་བྱེད་ཀྱི་བསྙེན་ཆེན་དང་ཡི་དམ་མང་པོའི་བསྙེན་པ་བཏང་ཡོད་པ་དང་། གདན་སའི་དགེ་བཤེས་རྣམས་ལ་སྔགས་གཞུང་གི་འཆད་ཁྲིད་ཀྱང་གནང་ཡོད་འདུག །
སླར་འབྲས་སྤུངས་ལ་ཕེབས་ནས་གདན་སའི་སློབ་སློབ་གཉེར་བ་མང་པོར་གཞུང་ཆེན་བཀའ་པོད་ལྔའི་རྩ་བ་ཁག་གི་བཤད་ལུང་དང་། བཤད་ཁྲིད། གསང་སྔགས་ཀྱི་གཞུང་གི་ཟབ་ཁྲིད་སོགས་གནང་ནས་སྐུ་ཚེ་གང་པོར་རྒྱལ་བསྟན་འཛིན་སྐྱོང་སྤེལ་གསུམ་ལ་ཞབས་འདེགས་ཞུས་དང་ཞུ་མུས་ཡིན་པ་དང་། དགུང་གྲངས་བརྒྱད་ཅུ་ལ་ཕེབས་པ་ཕྱི་ལོ་ ༢༠༡༦ ལོའི་ཟླ་ ༡༢ ཚེས་ ༡༧ ཉིན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་ཤར་པ་ཆོས་རྗེར་བསྐོ་གཞག་མཛད་པའི་བཀའ་ཡིག་སྩལ་དོན་ལྟར། ྋགོང་ས་ྋསྐྱབས་མགོན་ཆེན་པོས་རྡོར་གདན་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་གནང་གྲུབ་རྗེས་དངོས་སུ་ཤར་པ་ཆོས་རྗེའི་ཁྲི་སྟོན་མངའ་གསོལ་གྱི་མཛད་སྒོ་གནང་། ཕྱི་ལོ་༢༠༢༤ཟླ་༡༡ཚེས་༩བཟའ་སྐར་འབྱུང་འཕྲོད་དགེ་བའི་ཉིན་དགའ་ལྡན་ཁྲི་ཐོག་བརྒྱ་དང་ལྔ་པའི་ཕྱག་རྟགས་དངོས་སུ་ཕེབས་པ་བཅས་མཛད་རྣམ་སྙིང་བསྡུས་སུ།
༢༠༢༤.༡༡.༩ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་དམ་འདྲེན་བཀོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་པ་ཡིན།]ཞེས་རྩོམ་ཁུངས་ཁ་གསལ་འགོད་དགོས།
རིག་མཛོད་རྩོམ་སྒྲིག་པ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་(Laptop, iPad, iPod iPhone & Android) གང་ཡིན་ཐོག་ཏུ་རང་རང་གི་ཐུགས་འདོད་ལྟར་ཕབ་ལེན་དང་གསན་གཟིགས་གནང་རོགས།
དྲ་ཚིགས།: www.serajeyrigzodchenmo.org ཡིག་འབྲེལ་དྲ་བྱང་། serajeyrigzodchenmo@gmail.com
