རོང་སྟོན་ཤཱཀྱ་རྒྱལ་མཚན། དཔལ་ས་སྐྱའི་བསྟན་འཛིན་ཀུན་མཁྱེན་གཡང་རོང་གཉིས་ཞེས་པའི་ནང་ཚན་ཡིན་ཞིང་། ཤར་རྒྱལ་མོ་རོང་དུ་རུས་ཆེན་རྒའི་རིགས་སུ་ཡབ་བོན་པོ་གེ་གོད་རྒྱལ་པོ་དང་། ཡུམ་རྒྱ་གར་སྨན་ཞེས་བྱ་བའི་སྲས་སུ་རབ་བྱུང་དྲུག་པའི་མེ་ལུག་ ༡༣༦༧ ལོར་སྐུ་འཁྲུངས། ཡབ་ཀྱི་ཆོས་ལུགས་ལ་སྦྱངས་ཤིང་དྲང་སྲོང་གི་བརྟུལ་ཞུགས་ལེན་དུ་བཅུག་སྟེ། མཚན་ཤེས་རབ་འོད་ཟེར་ཞེས་བཏགས་ཤིང་། ལུགས་དེ་ལ་བརྟེན་པའི་མཛད་པའང་དུ་མ་བསྐྱངས།
དགུང་ལོ་བཅོ་བརྒྱད་པ་ལ་དབུས་གཙང་དུ་བྱོན་ཏེ་གསང་ཕུ་ནེའུ་ཐོག་གི་ཆོས་གྲྭར་སྒྲིག་ཞུགས་གནང་ཞིང་། གླིང་སྟོད་ཀྱི་གདན་ས་བ་རིན་ཆེན་རྣམ་རྒྱལ་གྱི་དྲུང་ནས་བྱང་ས་ནས་གསུངས་པའི་ཆོ་གས་བྱང་ཆུབ་སེམས་དཔའི་ཚུལ་ཁྲིམས་ཡང་དག་པར་བཟུང་བ་དང་། རྔོག་ལོ་ནས་བརྒྱུད་པའི་རྒྱ་ཆེན་སྤྱོད་པའི་ཕྱོགས་ཀྱི་ཆོས་མང་པོ་གསན། ཀོང་སྟོན་བློ་གྲོས་དབང་ཕྱུག་གི་དྲུང་དུ། མངོན་པར་རྟོགས་པའི་རྒྱན་འགྲེལ་པ་དང་བཅས་པ་དང་། ཚད་མ་རྣམ་ངེས། རིགས་ཐིག་ལ་སོགས་རྔོག་ལོ་ནས་བརྒྱུད་པའི་ཕར་ཚད་བསྡུས་གསུམ་དང་། དབུ་མ་རང་རྒྱུད་ཀྱི་བཤད་སྲོལ་རྔོག་ལོ་ནས་བརྒྱུད་པ་མང་དུ་གསན།
དགུང་ལོ་ཉེར་གཉིས་པ་ལ་ཚད་མ་རྣམ་ངེས་ཀྱི་ཊཱི་ཀ་མཛད་ཅིང་། རྔོག་ལོ་ཆེན་པོའི་གདན་སར་སློབ་དཔོན་བློ་གྲོས་ཆོས་སྐྱོང་ལ་སོགས་པ་ཤེས་རབ་ཅན་ལྔ་ལ་ཚད་མ་རྣམ་ངེས་གསུངས་པ་ནས་བརྩམས་ཏེ་མྱ་ངན་ལས་འདས་པའི་བར་ཉིན་རེ་ལ་ཐ་ན་སློབ་མ་གཅིག་ཙམ་ལ་ཡང་གཙུག་ལག་གི་ཚིགས་སུ་བཅད་པ་གཅིག་ཡན་ཆད་ཀྱི་ཆོས་སྦྱིན་མཛད་པར་དམ་བཅས་ཏེ། ལོ་དྲུག་ཅུ་རེ་གཉིས་ཀྱི་བར་དུ་དམ་པའི་ཆོས་ཀྱི་ཉན་བཤད་རྒྱུན་མ་ཆད་པར་མཛད་པས། སློབ་དཔོན་རོང་སྟོན་ཞེས་གྲགས། སྐབས་དེར་འཕན་ཡུལ་མཐོང་སྨོན་གྱི་གཙུག་ལག་ཁང་དུ། གྲོ་སའི་མཁན་པོ་ཆེན་པོ། མཁས་བཙུན་ཀུན་དགའ་རྒྱལ་པོས་རབ་ཏུ་བྱུང་བ་དང་། བསྙེན་པར་རྫོགས་པའི་མཁན་པོ་མཛད། དམར་སྟོན་པས་ལས་ཀྱི་སློབ་དཔོན་མཛད། དད་པའི་དགེ་འདུན་བཅུའི་དབུས་སུ་བསྙེན་པར་རྫོགས་པ་མཛད། མཚན་ཤཱཀྱ་རྒྱལ་མཚན་དཔལ་བཟང་པོར་གསོལ།
སྐྱོར་མོ་ལུང་གི་མཁན་ཆེན་དཀའ་བཞི་པ་དང་། འཕན་ཡུལ་གྲོ་སའི་མཁན་པོ་དམར་སྟོན་པའི་དྲུང་ནས་བྱ་འདུལ་བ་འཛིན་པའི་བཤད་སྲོལ་ལྟར་དང་། འདུལ་འཛིན་ཐོག་མ་ཀ་ཆེན་པའི་བཤད་སྲོལ་བཞིན་འདུལ་བ་མདོ་ལུང་རྒྱ་ཆེར་འགྲེལ་དང་། མངོན་པ་མཛོད་མཆིམས་ལུགས་ཀྱི་བཤད་སྲོལ་ནེའུ་པཎ་ཆེན་ལས་བརྒྱུད་པ། ཐང་ཟག་པ་སྤྲུལ་སྐུ་གཞོན་ནུ་རྒྱལ་མཚན་གྱི་དྲུང་ནས་རྩ་འཇུག་བཞི་གསུམ་འགྲེལ་པ་དང་བཅས་པའི་བཤད་པ་པ་ཚབ་ལོ་ཙཱ་བའི་བཤད་སྲོལ། ལོ་བ་ཤཱཀྱ་རིན་ཆེན་གྱི་དྲུང་དུ་མངོན་པ་ཀུན་བཏུས་ཀྱི་བཤད་པ་བཅས་ལ་སྦྱངས།
དགུང་ལོ་ཉེར་བདུན་པ་ལ་མཁན་ཆེན་གཡག་སྡེ་པ་དང་མཇལ་ཏེ་དགོངས་འགྲེལ་གྱི་བསྟན་བཅོས་དུ་མ་དང་། ཚད་མ་མདོ་ལ་སོགས་པ་ས་ལུགས་ཀྱི་བཤད་སྲོལ་རྣམས་གསན། ཐེག་ཆེན་ཆོས་ཀྱི་རྒྱལ་པོའི་དྲུང་དུ་རྩ་རྒྱུད་བརྟག་གཉིས། གསུང་ངག་རིན་པོ་ཆེ་ལམ་འབྲས་སོགས་གསན། གཞན་ཡང་ཡར་ལུང་པ་སེང་གེ་རྒྱལ་མཚན་དང་། ལོ་ཆེན་སྐྱབས་མཆོག་དཔལ་བཟང་། ལོ་ཆེན་གྲགས་པ་རྒྱལ་མཚན། ཀུན་མཁྱེན་ཤེས་རབ་འོད་ཟེར། འཇམ་དབྱངས་ཁ་ཆེ། ཀརྨ་པ་དཀོན་མཆོག་གཞོན་ནུ། ཐང་པོ་ཆེ་པ་ཉི་མ་རྒྱལ་མཚན། སྣར་ཐང་མཁན་པོ་གྲུབ་པ་ཤེས་རབ་སོགས་རིས་མེད་ཀྱི་བླ་མ་མང་པོའི་དྲུང་ནས་མདོ་སྔགས་རིག་གནས་སོགས་ཀྱི་ལུང་ཁྲིད་དབང་བཀའ་མན་ངག་གི་རྒྱུན་མང་པོ་གསན།
གོང་མ་གྲགས་པ་རྒྱལ་མཚན་སོགས་ཀྱིས་བདག་རྐྱེན་མཛད་པ་ལ་བརྟེན་ནས་སྙེ་ཕུ་ཤུག་གསེབ་སོགས་དབེན་གནས་དང་གནས་ཆེན་རྣམས་སུ་བཞུགས་ཤིང་ཆོས་ཀྱི་འཁོར་ལོ་བསྐོར་བ་དང་བསྟན་བཅོས་མང་དུ་མཛད།
དགུང་ལོ་ལྔ་བཅུ་ཙམ་ལ་སྟོད་དིང་རི་དང་མུས་སོགས་སུ་སྔགས་ཀྱི་ཟབ་དོན་བཞེས་པ་དང་། མདོ་ཕྱོགས་ཀྱི་འཕྲིན་ལས་སྤེལ་བ་ཁོ་ན་མཛད།
དགུང་ལོ་བདུན་ཅུ་པ་མེ་ཕོ་འབྲུག་གི་ལོ་ལ་ཤྲཱི་ནཱ་ལེནྡྲའི་གཙུག་ལག་ཁང་གི་འགྲམ་བཏིངས་ནས་ནཱ་ལེནྡྲའི་དགོན་པ་བཏབ་མ་ཐག་ཏུ་དགེ་འདུན་སྟོང་ཕྲག་ཕྱེད་དང་གཉིས་ཙམ་ཚོགས་པར་གྱུར་ཏེ། བཤད་ཉན་གྱི་སྒྲིག་སོགས་ས་རྔོག་གཉིས་ཀའི་ལུགས་དང་མཐུན་པར་མཛད་ཅིང་གདན་ས་དེ་ཉིད་དུ་ལོ་བཅུ་བཞིའི་བར་དུ་འཕྲིན་ལས་བསྐྱངས།༼ཁ་ཤས་སུ། རེ་དགུ་པ་ ༡༤༣༥ ལོ་ཞེས་དང་། དུང་དཀར་ཚིག་མཛོད་དུ། དགུང་ལོ་བདུན་ཅུར་ཕེབས་པ་རབ་བྱུང་བདུན་པའི་མེ་འབྲུག་༡༤༣༦ ལོར་ཞེས་དང་། དེབ་སྔོན་དུ། ཤིང་མོ་ཡོས་ཀྱི་ལོ། ཞེས་འབྱུང་། པཎ་ཆེན་ཤཱཀྱ་མཆོག་ལྡན་གྱིས་མཛད་པའི་རྣམ་ཐར་དུ། དགུང་ལོ་བདུན་ཅུ་པ་བསྟན་བཅོས་པ་ལྟར་ན་མེ་ཕོ་འབྲུག་གི་ལོ་ཞེས་དང་། ས་སྐྱའི་དགེ་སློང་ནམ་མཁའ་དཔལ་བཟང་གིས་མཛད་པའིརྣམ་ཐར་དུ། ཡོས་ལོའི་མཇུག་དེ་ཉིད་ལ་གཟིམ་ཁང་གི་རྨང་བཏིང་། ཡོས་ལོའི་ནང་དེ་ཉིད་དུ་གཟིམ་ཁང་དང་། རྒྱལ་རོང་པ་པར་སྒོལ་བའི་སྤྱི་ཁང་གི་ཐད་འདིར་ཁང་ཆུང་གཅིག །རོང་པ་ཚ་འཕྲང་པའི་སྤྱི་ཁང་གི་ཐད་འདིར་ཁང་ཆུང་གཅིག་དང་གསུམ་གྱི་ཐོག་ཕུབ། གཞན་རྨང་མང་དུ་བཏིང་སོགས་དང་། འབྲུག་ལོ་ཟླ་བ་བཅུ་པའི་མགོ་ལ་གཟིམ་ཁང་ཀ་བརྒྱད་མའི་ཉིས་ཐོག་ལེགས་པར་གྲུབ། གཞན་ཡང་མང་དུ་གྲུབ། ཚེས་གསུམ་མཆོད་པ་ཞིག་དང་བསྟུན་ནས་གཟིམ་ཁང་ནས་མང་ཇ་དང་ཚ་ར་གཟབ་པ་ཞིག་གནང་། ཆོས་རྗེ་ས་སྐྱ་པཎྜི་ཏའི་སྐུ་ཞིག་དང་། དཔལ་གུར་གྱི་མགོན་པོའི་སྐུ་ཞིག་དང་གཉིས་ནང་སོ་ནས་བཞེངས་པ་ལ་རབ་གནས་མཛད། ཅེས་དང་། ཀུན་དགའ་ར་བ་ལ་སོགས་བརྩིགས་པའི་ཚུལ་ནི། ལོ་ནས་ཕེབས་པའི་མོད་དེ་ཉིད་ལ་བླ་མ་ཐུགས་རྗེ་ཆེ་བ་དང་གྲྭ་བུ་སློབ་རྒྱ་ཆེ་བའི་སྟོབས་ཀྱིས་ཆུང་ན་མི་ཤོང་དགོངས་ནས་ཀ་བ་བརྒྱ་ཉི་ཤུ་ཙམ་གྱི་རྨང་བཏིང་། བྱང་ཕྱོགས་ཉན་པོ་བས་བརྩིགས་སོགས་དང་། ལྷོ་ཕྱོགས་ཞོལ་ཆར་རྗེ་བས་བརྩིགས། གཙང་ཁང་བར་སྐོར་དང་བཅས་པ་རྒྱལ་མོ་རོང་པ་དགེ་བཤེས་ཤེས་རིན་ཞེས་བྱ་བ་བླ་མ་ལ་དད་པ་ཆེ་ཞིང་། སྤྱི་སེམས་ཆེ་བ་ཞིག་ཡོད་པ་དེས་དོ་དམ་བྱས་བླ་བྲང་ནས་ཞལ་བཞུགས་ཐོག་ཏུ་ལེགས་པར་གྲུབ་སོགས་ལས་ཡོས་ལོའི་ལོ་མཇུག་དང་འབྲུག་ལོར་གྲུབ་པ་གསལ་བ་ལྟར་ཚིག་མཛོད་ཀྱི་ལོ་ཚིགས་གྲུབ་ལོ་ནས་ཡིན་པར་ཤེས་སོ། །༽
དགུང་ལོ་བརྒྱད་ཅུ་གྱ་གསུམ་བཞེས་པའི་ཚེ་ཡང་གཞུང་ཆེན་པོ་དག་ཀྱང་ཐུགས་ནས་ཐོགས་པ་མེད་པར་གསུང་ཐུབ། དབུས་གཙང་གི་གྲྭ་ས་ཆེན་པོ་རྣམས་སུ་གཞུང་པོ་ཏི་བཅུ་ལ་གྲྭ་སྐོར་མཛད་པས་རྩོད་པའི་ཁྱུ་མཆོག་ཏུ་གྲགས་ཤིང་། རོང་སྟོན་སྨྲ་བའི་སེངྒེ་ཞེས་པའི་མཚན་སྙན་གསོལ། ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པར་མཛད་པ་སྟོང་ཕྲག་ཙམ་བྱུང་།
མཁན་ཆེན་སངས་རྒྱས་དཔལ་བའི་མཛད་སྲོལ་གཙོ་བོར་བཟུང་ནས་མངོན་པར་རྟོགས་པའི་རྒྱན་འགྲེལ་པ་དང་བཅས་པ་རྒྱུན་མི་ཆད་པར་གསུངས་ཤིང་། དེའི་མན་ངག་ཞི་བྱེད་བརྒྱུད་པ་ཕྱི་མ་ལ་གཙོ་བོར་མཛད།
གསུང་ལས་སྐྱེས་པའི་སློབ་མའི་གཙོ་བོ་ནི། སྔ་ཚར་གྱི་བུ་ཆེན་བསྟན་པ་འདེགས་པའི་ཀ་ཆེན་བཞི། བར་ཚར་གྱི་བུ་ཆེན་གངས་ཅན་མཛེས་པའི་རྒྱན་བརྒྱད་དང་མཆོག་གཉིས། གསུང་ཐུགས་ཀྱི་མཛད་སྤྱོད་མཚུངས་པའི་བུ་ཆེན་གསུམ། ཕྱི་ཚར་གྱི་བུ་ཆེན་བསྟན་པའི་གསལ་བྱེད་བཅུ་དྲུག །ཡང་ཚར་གྱི་བུ་ཆེན་གྲགས་པ་ཅན་བཞི་ལ་སོགས་པས་གཙོས་སྡེ་སྣོད་འཛིན་པ་སྟོང་ཕྲག་འགའ་བསྐྱངས། གདན་ས་འཛིན་པའི་སློབ་མ་གཙོ་བོ་ནི་ཆོས་རྗེ་བཀྲ་ཤིས་རྣམ་རྒྱལ་ཡིན།
དགུང་ལོ་བརྒྱད་ཅུ་གྱ་གསུམ་ལ་ཕེབས་པ་རབ་བྱུང་བརྒྱད་པའི་ས་སྦྲུལ་ ༡༤༤༩ ལོར་ཞི་བར་གཤེགས་སོ། །
རྗེ་འདིའི་རྣམ་ཐར་གྱི་སྐོར་ལ། རྗེ་དེ་ཉིད་ཀྱི་དངོས་སློབ་པཎ་ཆེན་ཤཱཀྱ་མཆོག་ལྡན་གྱིས་མཛད་པ་འཕྲུལ་དཔར་མ་དཔེ་འབྲིང་ཤོག་གྲངས་ང་བཞི་ཅན་ཞིག་དང་། རྗེ་དེ་ཉིད་ཀྱི་དངོས་སློབ་ས་སྐྱའི་དགེ་སློང་ནམ་མཁའ་དཔལ་བཟང་གིས་མཛད་པ་འཕྲུལ་དཔར་མ་དཔེ་རིང་ཤོག་གྲངས་བཅུ་གསུམ་ཅན་ཞིག །གཞན་དེབ་སྔོན་གྱི་ནཱ་ལེནྡྲའི་སྐབས་ཞེས་པའི་ཚན་པར་དམ་པ་འདིའི་རྣམ་ཐར་ཉིང་བསྡུས་ཤིག་བཅས་ཡོད།
གསུང་རྩོམ་ལ། འབུམ་གྱི་འགྲེལ་པ་རྒྱས་བསྡུས་གཉིས། བཤེས་སྤྲིངས་འགྲེལ་པ། མདོ་སྡུད་པའི་འགྲེལ་པ། བརྒྱད་སྟོང་དོན་བསྡུས་ཀྱི་འགྲེལ་པ། ཕར་ཕྱིན་མངོན་རྟོགས་རྒྱན་གྱི་འགྲེལ་པ། མདོ་སྡེ་རྒྱན་དང་། རྒྱུད་བླ་མ་དབུས་མཐའ་རྣམ་འབྱེད། ཆོས་ཉིད་རྣམ་འབྱེད་བཅས་ཀྱི་འགྲེལ་པ། དབུ་མ་འཇུག་པའི་འགྲེལ་པ། དབུ་མ་རྒྱན་གྱི་འགྲེལ་པ། དབུ་མ་བདེན་གཉིས་ཀྱི་འགྲེལ་པ། སྒོམ་རིམ་རྣམ་པ་གསུམ་གྱི་འགྲེལ་པ། མངོན་པ་མཛོད་ཀྱི་འགྲེལ་པ། འདུལ་བ་མེ་ཏོག་ཕྲེང་རྒྱུད་ཀྱི་རྣམ་བཤད། ཚད་མ་ཀུན་བཏུས་ཀྱི་འགྲེལ་པ། ཚད་མ་རྣམ་ངེས་ཀྱི་འགྲེལ་པ་རྟོག་གེའི་སྣང་བ་དང་། ཚད་མའི་སྤྱི་དོན་ཆེ་ཆུང་གཉིས། ཚད་མ་རིགས་གཏེར་གྱི་འགྲེལ་པ། གསང་བ་འདུས་པའི་རྩ་རྒྱུད་འགྲེལ་པ་སྒྲོན་གསལ་གྱི་རྣམ་བཤད་ལ་སོགས་པ་གཞུང་ཆེན་བཞི་བཅུ་ཞེ་གཅིག་གི་རྣམ་བཤད་ཀྱིས་གཙོས་ཆོས་ཚན་སུམ་བརྒྱ་ལྔ་བཅུའི་གྲངས་སུ་བརྩམས་པར་མཛད།
མཚན་གྱི་རྣམ་གྲངས། རོང་ཊཱིཀ་པ། རོང་སྟོན་ཤཱཀྱ་རྒྱལ་མཚན། རོང་སྟོན་ཤེས་བྱ་ཀུན་གཟིགས། རོང་སྟོན་ཤེས་བྱ་ཀུན་རིག །རོང་སྟོན་སྨྲ་བའི་སེངྒེ། རོང་སྟོན་ཤེས་བྱ་ཀུན་རིག་ཤཱཀྱ་རྒྱལ་མཚན། བཅས་སོ། །

༢༠༡༨.༠༡.༠༧ སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

ཟུར་བལྟའི་དཔེ་ཁག
༡༽ པཎ་ཆེན་ཤཱཀྱ་མཆོག་ལྡན་གྱིས་མཛད་པའི་རྗེ་བཙུན་ཐམས་ཅད་མཁྱེན་པའི་བཤེས་གཉེན་ཤཱཀྱ་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་རྣམ་པར་ཐར་པ་ངོ་མཚར་དད་པའི་རོལ་མཚོ་ཞེས་བྱ་བ།
༢༽ ས་སྐྱའི་དགེ་སློང་ནམ་མཁའ་དཔལ་བཟང་གིས་མཛད་པའི་བླ་མ་དམ་པ་རོང་སྟོན་ཆོས་རྗེའི་རྣམ་པར་ཐར་པ་ཕྲིན་ལས་རྒྱས་ཤིང་རྒྱུན་མི་འཆད་པའི་རྟེན་འབྲེལ་བཟང་པོ་ཞེས་བྱ་བ།
༣༽ དེབ་ཐེར་སྔོན་པོ།
༤༽ དུང་དཀར་ཚིག་མཛོད།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།

དགའ་ལྡན་ཁྲི་ཐོག་བརྒྱ་དང་བཞི་པ་རྗེ་བཙུན་བློ་བཟང་བསྟན་འཛིན་མཆོག་ནི། ༡༩༣༥ ལོར་གཙང་སྟོད་ལྷ་རྩེ་ཁུལ་དུ་སྐུ་འཁྲུངས། དགུང་ལོ་བཅུའི་སྐབས་༧གོང་ས་ལྔ་པ་ཆེན་པོས་ཕྱག་བཏབ་པའི་ལྷ་རྩེ་ཆོས་སྡེ་དགོན་དུ་སྒྲིག་ཞུགས་ཀྱིས་མཁན་ཆེན་བསྟན་འཛིན་རྒྱ་མཚོའི་དྲུང་ལས་ཚིགས་སྔ་མ་དགེ་ཚུལ་གྱི་སྡོམ་པ་བཞེས། དེ་ནས་དགོན་པའི་སྒྲིག་སྲོལ་ལྟར་ཆོས་སྤྱོད་རབ་གསལ་དང་རྒྱན་འཇུག་གཉིས་སོགས་ཐུགས་འཛིན་གནང་ནས་ཚོགས་རྒྱུགས་ཕུལ་ཏེ་སློབ་གཉེར་པའི་གྲལ་དུ་ཚུད། དེར་བློ་རྟགས་སོགས་ལ་སྦྱང་བརྩོན་གནང་བར་མ་ཟད། ༧གོང་ས་ལྔ་པ་ཆེན་པོས་མཛད་པའི་ཕར་ཕྱིན་དང་། དབུ་མ། འདུལ་མཛོད་བཅས་ཀྱི་རང་ལུགས་གང་ཡིན་ཐུགས་འཛིན་གནང་སྟེ་འདུས་མང་དབུས་སུ་ཚོགས་རྒྱུགས་ཕུལ། དགུང་ལོ་བཅུ་དྲུག་གི་སྐབས་སེར་བྱེས་གྲྭ་ཚང་དུ་སྒྲིག་ཞུགས་གནང་། སེར་བྱེས་མཁན་ཟུར་ལྷུན་གྲུབ་ཐབས་མཁས་མཆོག་དང་། དགེ་བཤེས་ངག་དབང་དགེ་འདུན། དགེ་བཤེས་ངག་དབང་རིག་གསལ། དགེ་བཤེས་ལྷུན་གྲུབ་བཟོད་པ། དགེ་རྒན་བློ་བཟང་ངག་དབང་སོགས་བསམ་སྦྱོར་གཉིས་ཀྱིས་བསྟེན་ཏེ། གཞུང་ཆེན་གསན་གཟིགས་དང་ཐུགས་གཉེར་གནང་། གཞུང་གསར་འཛིན་གྲྭའི་སྐབས་མཁས་མང་དབུས་སུ་རིགས་ཆུང་སྦྱོར་ལམ་ཕྱིར་རྒོལ་གྱི་ཚོགས་བཞེངས་གནང་བས་ཀུན་གྱིས་བསྟོད་བསྔགས་ཀྱི་མེ་ཏོག་གཏོར། དགུང་ལོ་ཉེར་གསུམ་སྟེང་ལྷ་ལྡན་ནོར་གླིང་གཟིམ་ཆུང་དུ། ༧སྐྱབས་རྗེ་ཁྲི་བྱང་རིན་པོ་ཆེའི་དྲུང་ནས་ཚིགས་ཕྱི་མ་དགེ་སློང་གི་སྡོམ་པ་བཞེས། དགུང་ལོ་ཉེར་ལྔའི་སྐབས་བོད་ཀྱི་ཡ་ང་བའི་སྐྱོ་གར་གྱི་དབང་གིས་ ༡༩༦༠ ལོར་འཕགས་ཡུལ་དུ་ཕེབས་ཏེ་སྦག་ས་ཆོས་སྒར་ཐོས་བསམ་ཐར་འདོད་གླིང་དུ་བཞུགས་ནས། སེར་བྱེས་མཁན་ཟུར་རིན་པོ་ཆེ་བློ་བཟང་དབང་ཕྱུག་མཆོག་དང་། ཟོང་རིན་པོ་ཆེ་རྣམ་གཉིས་ཀྱི་དྲུང་ནས་འདུལ་ཊཱིཀ་ཉི་མའི་འོད་ཟེར་དང་རིན་ཆེན་ཕྲེང་བ། མཆིམས་མཛོད་སོགས་འདུལ་མཛོད་ཀྱི་གཞུང་ཆེན་ལྷག་མ་རྣམས་ལ་སློབ་གཉེར་དང་། སྦག་ས་ཆོས་སྒར་སློབ་གྲྭའི་རྣམ་པར་བསྒྱུར་རྗེས་དཔེ་ཁྲིད་དགེ་རྒན་གནང་། སེ་ར་ཆོས་སྒར་འཕགས་ཡུལ་ལྷོ་ཕྱོགས་སྦེལ་ཀོབ་ས་གནས་སུ་སྤོར་རྗེས། དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་གཏན་འབེབས་བཞིན། སློབ་དཔོན་དང་ལྷ་རམས་པའི་རྒྱུགས་སྤྲོད་རིམ་འབུལ་གྱིས་ ༡༩༧༨ ལོར་དགེ་བཤེས་ལྷ་རམས་པའི་མཚན་རྟགས་བཞེས། དེ་ནས་༧གོང་ས་མཆོག་གི་བཀའ་བཞིན་དཔལ་ལྡན་སྨད་རྒྱུད་གྲྭ་ཚང་དུ་ཞུགས་ཏེ། ད་ལྟའི་དགའ་ལྡན་ཁྲི་རིན་པོ་ཆེ་རི་རྫོང་སྲས་རིན་པོ་ཆེའི་ཞལ་སྔ་ནས། འགྲེལ་པ་བཞི་སྦྲགས་དང་། སྦས་དོན་ཀུན་གསལ། བསྐྱེད་རིམ་དངོས་གྲུབ་རྒྱ་མཚོ། རྫོགས་རིམ་རིམ་ལྔ་གསལ་སྒྲོན་སོགས་གསང་སྔགས་རྡོ་རྗེ་ཐེག་པའི་ཟབ་ཆོས་དུ་མ་གསན། ཕྱི་ལོ་ ༡༩༧༩ ལོར་ཊཱིཀྐའི་སྐྱོར་དཔོན་གནང་ནས་ཊཱིཀྐ་ལེའུ་གཉིས་པ་ནས་བརྒྱད་པའི་མཚམས་སྦྱོར་བར་བརྩི་བཞག་སྐྱོར་རྒྱུས་མཚོན་སྒྲིག་ལམ་གྱི་རིམ་པ་རྣམས་མི་ཉམས་གོང་འཕེལ་གནང་། ཕྱི་ལོ་ ༡༩༨༡ ལོར་༧གོང་ས་མཆོག་གིས་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་བོར་ཕེབས་པ་དང་། ༧གོང་ས་མཆོག་གི་བཀའ་དགོངས་བཞིན་རྒྱུད་གྲྭ་པ་རྣམས་ཀྱི་ཆེད་དུ་སྔགས་དང་མཚན་ཉིད། རིག་གནས། སྐད་ཡིག་གཞན་སོགས་ཀྱི་སློབ་ཚན་གཏན་འབེབས་དང་། སློབ་གྲྭ་གསར་འཛུགས་གནང་། ཕྱི་ལོ་ ༡༩༨༤ ལོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཁྲིར་ཕེབས་ཤིང་། འགྲེལ་པ་བཞི་སྦྲགས་དང་དཔལ་གསང་བ་འདུས་པའི་བསྐྱེད་རིམ། རྗེ་བཙུན་ཤེས་རབ་སེང་གེས་མཛད་པའི་ཊཱིཀྐ་ལེའུ་དང་པོ་ནས་བརྒྱད་པའི་མཚམས་སྦྱོར་བརྩི་བཞག་གནང་། དམ་པ་ཁོང་གིས་༧གོང་ས་མཆོག་གཙོ་བྱས་པའི་དམ་པ་མང་པོ་བསྟེན་ཏེ་དབང་ཁྲིད་མན་ངག་སོགས་གསན་བསམ་ཉམས་བཞེས་མཛད་པར་མ་ཟད། ༢༠༡༠ ལོར་བྱང་རྩེ་ཆོས་རྗེར་ཕེབས་ཤིང་། ཕྱི་ལོ་༢༠༡༧ལོའི་ཟླ་༦ཚེས་༢༤ཉིན་སྤྱི་ནོར་༧གོང་ས་༧སྐྱབས་མགོན་རིན་པོ་ཆེ་མཆོག་གིས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་ཁྲི་ཐོག་བརྒྱ་དང་བཞི་པར་བསྐོ་བཞག་གི་བཀའ་ཡིག་རིན་པོ་ཆེ་སྩལ་གནང་མཛད་ཡོད་པ་དང་། ལོ་དེའི་ཕྱི་ཟླ་༨ཚེས་༤ཉིན་འཕགས་ཡུལ་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་དགའ་ལྡན་བླ་སྤྱི་དང་། དགའ་ལྡན་ཁྲི་ཐོག་ཁང་གཉིས་སུ་ཁྲི་འདོན་གྱི་མཛད་སྒོ་འཚོགས་ཏེ་དགའ་ལྡན་གསེར་ཁྲི་རིན་པོ་ཆེར་མངའ་གསོལ་ཏེ་དགའ་ལྡན་ཁྲི་རིན་པོ་ཆེའི་མཛད་ཁུར་དངོས་སུ་བཞེས་ཤིང་། རྒྱུན་དུ་ཕྱི་ནང་གི་དོན་གཉེར་ཅན་མང་པོར་ལུང་ཆོས་མན་ངག་དང་། གདན་ས་ཁག་ཏུ་སློབ་གཉེར་པ་རྣམས་ལ་གཞུང་ཆེན་བཀའ་པོད་ལྔ་སྔགས་དང་བཅས་པའི་བཀའ་ཁྲིད་རྒྱུན་ཆད་མེད་པར་གནང་བཞིན་བཞུགས་པ་ལགས་སོ། །

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༧།༠༨།༡༡ལ་བསྐྱར་བཅོས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།