རིག་མཛོད་རྩོམ་སྒྲིག་པ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་(Laptop, iPad, iPod iPhone & Android) གང་ཡིན་ཐོག་ཏུ་རང་རང་གི་ཐུགས་འདོད་ལྟར་ཕབ་ལེན་དང་གསན་གཟིགས་གནང་རོགས།
དྲ་ཚིགས།: www.serajeyrigzodchenmo.org ཡིག་འབྲེལ་དྲ་བྱང་། serajeyrigzodchenmo@gmail.com
སེར་བྱེས་ལྷོ་པའི་དགེ་བཤེས་བྱམས་པ་རྒྱ་མཚོ་མཆོག་ཉིན་གྲངས་ ༢༨ རིང་ཐུགས་དམ་ལ་བཞུགས།
སེར་བྱེས་ལྷོ་པའི་དགེ་བཤེས་བྱམས་པ་རྒྱ་མཚོ་མཆོག་དགོངས་པ་རྫོགས་ནས་ཉིན་གྲངས་ ༢༨ རིང་ཐུགས་དམ་ལ་བཞུགས།
སེར་བྱེས་ལྷོ་པའི་དགེ་བཤེས་བྱམས་པ་རྒྱ་མཚོ་མཆོག་ཕྱི་ལོ་ ༢༠༢༠ ཟླ་ ༧ ཚེས་ ༡༤ ཉིན་ཐའེ་ཝན་དུ་དགོངས་པ་རྫོགས་འདུག་པ་དང་། དེ་ཡང་དགོངས་པ་རྫོགས་ནས་ཉིན་གསུམ་ཕྱིན་ཡང་སྐུ་ཕུང་གི་མདོག་འགྱུར་བ་མེད་པ་དང་། དྲི་མ་གང་ཡང་མེད་པར་བཞུགས་པར་བརྟེན་ཐུགས་དམ་ལ་བཞུགས་ཡོད་པ་ཤེས་རྟོགས་བྱུང་། སྐབས་དེ་ཐའེ་ཝན་དབྱར་དུས་གནམ་གཤིས་ཚ་དྲོད་ཆེ་བའི་སྐབས་ཡིན་ཡང་སྐུ་ཕུང་གི་ཤ་མདོག་ལ་འགྱུར་བ་མེད་པ་མ་ཟད་དྲི་མ་ཡང་མེད་སྟབས། སྐུ་ཕུང་འཁྲིས་སུ་བཞུགས་མཁན་དང་། སྨན་ཞབས་པ་ཚོས་དེ་སྔོན་གནས་སྟངས་དེ་ལྟ་བུ་མཐོང་མྱོང་རྩ་བ་ནས་མེད་པའི་སྐོར་སོགས་གནས་ཚུལ་ཞིབ་ཕྲ་དགའ་ལྡན་ཕོ་བྲང་ཡིག་ཚང་ལ་སྙན་སེང་ཞུས་པར། བྱང་སེམས་དཀར་དམར་འབབ་པ་དང་། སྐུ་ལུས་ཀྱི་མདོག་འགྱུར་བ་སོགས་ཀྱི་མཚན་མ་མ་བྱུང་བར་དུ་ཞུགས་འབུལ་མི་བྱེད་པ་དང་། བྱུང་ན་སྨན་པ་དང་ཚན་རིག་པར་བརྟག་དཔྱད་བྱེད་འཇུག་རྒྱུའི་ལམ་སྟོན་བྱུང་པ་ལྟར། ཐའེ་ཝན་དབུས་ཞིབ་འཇུག་ཁང་ (Academia Sinica) གི་དངོས་ཁམས་རིག་པའི་ཚན་རིག་པར་འབྲེལ་བ་ཞུས་དོན་ལྟར་ཉིན་གྲངས་བཅུ་པ་ཕྱི་ཚེས་ ༢༤ ཉིན་ཚན་རིག་འཕྲུལ་ཆས་བརྒྱུད་ནས་སྐུ་ཕུང་ལ་བརྟག་དཔྱད་གནང་ཞིང་། བརྟག་དཔྱག་གནང་མཁན་ནས་ཕུང་པོའི་ཁྲག་ནང་གི་རླུང་གི་ནུས་པ་མི་གསོན་པོའི་གནས་སྟངས་དང་ཐག་ཉེ་པོ་ཡིན་པ་དང་། ད་དུང་ཡང་ཕུང་པོའི་ཤ་པགས་ལ་ལྡེམ་ཤུགས་ལྡན་པ་མ་ཟད། ཁང་པའི་ནང་གི་དྲོད་ཚད་དང་ཕུང་པོའི་དྲོད་ཚད་མཉམ་པ། ལུས་པོའི་ནང་ཆ་རུལ་གྱི་མེད་པ་གསལ་པོ་ཡིན་སྐོར་འགྲེལ་བརྗོད་གནང་ཞིང་། ཚན་རིག་པས་འཕྲུལ་ཆས་ཀྱིས་བརྟག་དཔྱད་བྱས་པའི་གྲངས་ཚད་སོགས་སྟོན་ཐུབ་པ་ལས་དེའི་ཐོག་འགྲེལ་བཤད་གང་ཡང་བྱེད་ཐུབ་ཀྱི་མེད་པའི་སྐོར་ཡང་གསུངས་འདུག
ཡང་། ཉིན་གྲངས་ ༡༤ པ་ཚེས་ ༢༨ དང་། ཉིན་གྲངས་ ༡༨ པ་ཕྱི་ཟླ་ ༨ ཚེས་ ༡ ཉིན་བཅས་སྔ་རྗེས་ཐེངས་གཉིས་ལ་ཐའེ་ཝན་གཙུག་ལག་སློབ་ཆེན་གྱི་སེམས་ཁམས་རིག་པ་བས་འཕྲུལ་ཆས་བརྒྱུད་ཀླད་པའི་དབང་རྩར་བརྟག་དཔྱད་གནང་བར། ཀླད་པའི་འཕར་ཚད་འགུལ་ཤུགས་ཡོད་པ་ངོ་སྤྲོད་གནང་འདུག
མཐར་སྐུ་ཕུང་གི་ཤ་མདོག་ལ་ཕྲན་བུའི་གྱུར་བ་ཕྱིན་པ་སོགས་ཐུགས་དམ་གྲོལ་བའི་མཚན་མ་བྱུང་བ་བཅས་ཁྱོན་ཉིན་གྲངས་ ༢༨ རིང་ཐུགས་དམ་ལ་བཞུགས་འདུག
དམ་པ་ཁོང་གི་མཛད་རྣམ་སྙིང་བསྡུས་སུ་ཞུ་ན།
དགེ་བཤེས་བྱམས་པ་རྒྱ་མཚོ་མཆོག་ནི། ཕྱི་ལོ་ ༡༩༣༥ ལོར་བོད་ཀྱི་རྒྱལ་ས་ལྷ་སར་སྐུ་འཁྲུངས་ཤིང་། དགུང་ལོ་ ༧ གྱི་ཐོག་སེར་བྱེས་མཁས་སྙན་གྲྭ་ཚང་གི་ཆོས་སྒོར་ཞུགས་ཤིང་གཞུང་ཆེན་ཁག་ལ་ཐོས་བསམ་སློབ་གཉེར་གནང་། ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བོད་ས་ཡོངས་རྫོགས་བཙན་བཟུང་བྱས་སྐབས། དགེ་བཤེས་བྱམས་པ་རྒྱ་མཚོ་ལགས་ཀྱང་འཛིན་བཟུང་བྱས་ཏེ་མི་ལོ་ཧྲིལ་པོ་ ༢༠ རིང་བཙོན་འཇུག་གིས་མནར་གཅོད་ཚད་མེད་བཏང་། ཕྱིས་སུ་བཙོན་ཁང་ནས་ཀློད་གྲོལ་ཐོབ་རྗེས། ཕྱི་ལོ་ ༡༩༧༩ ལོར་ཕོ་བྲང་པོ་ཏ་ལ་དང་། ནོར་བུ་གླིང་ཁ་གཉིས་སུ་བོད་ཀྱི་གནའ་བོའི་རིག་གནས་ཞིབ་འཇུག་ཚན་པའི་ཁོངས་སུ་བསྐོ་བཞག་བྱས་པ་ལྟར། ལོ་ངོ་ ༡༥ རིང་ཕྱག་ལས་གནང་། ཕྱི་ལོ་ ༡༩༩༤ ཟླ་ ༡༢ པའི་ནང་བོད་ནས་རྒྱ་གར་ལ་བཙན་བྱོལ་དུ་ཕེབས་ཏེ། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ལམ་སྟོན་བཞིན། སྐུ་སྒེར་གྱི་བཞུགས་གནས་སུ་ནང་པའི་གཞུང་ཆེན་ཁག་གི་དཀར་ཆག་ཕྱོགས་སྒྲིག་དང་། སྐུ་བཅར་རྣམ་རྒྱལ་གྲྭ་ཚང་གི་སློབ་དགེ་བཅས་གནང་། ཕྱི་ལོ་ ༡༩༩༧ ལོར་༧གོང་ས་མཆོག་ནས་ཐའེ་ཝན་སྐུ་ཚབ་དོན་གཅོད་ཁང་གི་ཆོས་དགེ་ཐེངས་དང་པོར་ཐད་ཀར་བསྐོ་བཞག་གནང་བ་ལྟར་ཐའེ་ཝན་དད་ལྡན་མང་ཚོགས་དང་སློབ་མ་སྟོང་ཕྲག་མང་པོར་ནང་ཆོས་འཆད་ཁྲིད་ཀྱི་ཕྱག་ལས་རླབས་ཆེན་གནང་། ཕྱི་ལོ་ ༢༠༢༠ ཟླ་ ༧ ཚེས་ ༡༤ ཉིན་ཐའེ་ཝན་དུ་དགུང་གྲངས་ ༨༥ ཐོག་དགོངས་པ་རྫོགས་པ་བཅས་དམ་པ་ཁོང་གི་མཛད་རྣམ་སྙིང་བསྡུས་སུ།
ཕྱི་ལོ་ ༢༠༢༠ ཟླ་ ༨ ཚེས་ ༢༠ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།
