རིག་མཛོད་རྩོམ་སྒྲིག་པ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་(Laptop, iPad, iPod iPhone & Android) གང་ཡིན་ཐོག་ཏུ་རང་རང་གི་ཐུགས་འདོད་ལྟར་ཕབ་ལེན་དང་གསན་གཟིགས་གནང་རོགས།
དྲ་ཚིགས།: www.serajeyrigzodchenmo.org ཡིག་འབྲེལ་དྲ་བྱང་། serajeyrigzodchenmo@gmail.com
འགན་འཛིན་གསར་པར་རྩིས་སྤྲོད་བྱས།
འདི་ག་རྩོམ་སྒྲིག་ཁང་གི་འགན་འཛིན་རྙིང་པས་རྩོམ་སྒྲིག་ཁང་གི་ཅ་དངོས་རྣམས་དང་དྲ་རྒྱའི་གསང་གྲངས་དང་ཡིག་ཆ་སོགས་འགན་འཛིན་གསར་པ་རྣམས་ལ་རྩིས་སྤྲོད་བྱས།
འདི་ག་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་གི་འགན་འཛིན་བསམ་བྱ་གཞུང་ཀླུ་སྒྲུབ་པས་རྒྱུད་ཀྱི་ཆོས་ཐོག་འཁོར་དགོས་པ་སོགས་ཀྱིས་གྲྭ་ཚང་གི་ཕྱག་མཛོད་དང་རྒྱུན་ལས་རྣམས་ལ་རྩ་དགོངས་ཞུས་པར་བརྟེན། རྒྱུན་ལས་ནས་དགོངས་འཁྲོལ་བྱུང་བ་དང་། རྩོམ་སྒྲིག་ཁང་གི་ལས་བྱེད་རྙིང་པའི་གྲས། ལྷོ་སྐལ་བཟང་ཐར་འདོད་དང་། བྱ་གྲོལ་སྡེ་རྒྱ་མཚོ། མངའ་ཐུབ་བསྟན་ཚེ་རིང་གསུམ་ལ་རྒྱུན་ལས་རྣམས་དང་ཕྱག་མཛོད་བཅས་ཀྱིས་རེ་སྐུལ་བྱས་པ་ལྟར། རྣམ་པ་གསུམ་མཉམ་འབྲེལ་གྱིས་རྩོམ་སྒྲིག་གི་ལས་ཀ་བྱེད་རྒྱུའི་གྲོས་ཆོད་བྱུང་སྟེ་བོད་རྒྱལ་ལོ་ ༢༡༤༦ དང་རབ་གནས་ས་ཕག་ལོ། སྤྱི་ལོ་ ༢༠༢༠ ལོའི་ཟླ་ ༠༥ ཚེས་ ༠༩ ཉིན་གྲྭ་ཚང་གི་ཕྱག་མཛོད་སོགས་མཉམ་འཛོམས་ཀྱིས་རྩོམ་སྒྲིག་ཁང་གི་ཅ་དངོས་རྣམས་དང་། དྲ་རྒྱའི་གསང་གྲངས་ཁག །ཡིག་ཆ་གཞན་རྣམས་བཅས་འགན་འཛིན་གསར་པ་གསུམ་ལ་རྩིས་སྤྲོད་བྱས།
དེ་ཡང་ཐོག་མར་སྤྱི་ལོ་ ༢༠༡༤ ལོར་འདི་ག་སེར་བྱེས་མཁས་སྙན་གྲྭ་ཚང་ནས་གྲྭ་ཚང་རང་གི་བོད་ཡིག་གི་དྲ་རྒྱའི་ངོ་བོའི་ཐོག་ནས་འཕྲུལ་དེབ་དང་དཔེ་ཁྲིད་སོགས་ཉར་ཚགས་དང་དོན་གཉེར་ཅན་རྣམས་ཀྱི་ཆེད་དྲ་ཚིགས་ཤིག་བཟོ་རྒྱུའི་དགོངས་འཆར་བྱུང་བ་ལྟར། སྐབས་དེའི་གྲྭ་ཚང་གི་ཕྱག་མཛོད་ནས་བསམ་བྱ་གཞུང་ཀླུ་སྒྲུབ་ལ་ནན་ཆེར་བསྐུལ་བ་ལ་བརྟེན་ནས་རྩོམ་སྒྲིག་གི་ལས་ཀ་བྱེད་རྒྱུའི་ཁས་ལེན་ཞུས་ཏེ། ལས་ཀ་བྱེད་སྟངས་སོགས་དང་དྲ་ཚིགས་དངོས་སུ་འཆར་འགོད། དྲ་ཚིགས་ཀྱི་མིང་གཏན་འབེབས། རྒྱུས་ཆ་དང་ཡིག་ཆ་འཚོལ་སྒྲུབ་སོགས་དང་། དྲ་ངོས་ཀྱི་ངོ་སྤྲོད་མི་འདྲ་བ་གང་མང་བཏུས་བསྒྲིགས་བྱས་ཤིང་། དྲ་ཚིགས་སྒྲིག་བཟོའི་ཆེད་མཁས་པ་གདན་ཞུས་ཀྱིས། དྲ་ཚིགས་གསར་བཟོ་སོགས། ལོ་དེའི་ཕྱི་ཟླ་༡༠ པའི་ཕྱི་ཚེས་ ༡༥ ཉིན་ལས་འགོ་དངོས་སུ་བཙུགས་ཤིང་། རིམ་གྱིས་ལས་བྱེད་དུ་ཐོ་འགོད་བྱུང་བ་དང་རེ་སྐུལ་བྱས་པ་བཅས། གཞུང་དང་རིག་གནས་སོགས་ལ་ཤེས་རྒྱ་ཡོད་པའི་རྒྱུས་ཡོད་ཀྱི་ལས་རོགས་ཁ་ཤས་འདེམས་སྒྲུག་བྱས་ཏེ། པར་རྩ་གང་མང་རྩིས་འཁོར་དུ་གསར་བཏགས་དང་གཤིབ་བསྡུར་བྱས་ཏེ་འཕྲུལ་དེབ་གསར་བཟོ་དང་། དྲ་ངོས་ཀྱི་དཀར་ཆག་རྣམས་ལས་ཚན་པ་ངོས་འཛིན་དང་གནོད་སྐྱོན་བརྟག་ཆེད་འཕྲུལ་དེབ་ཏུ་རྩོམ་སྒྲིག་བྱེད་མ་ཐུབ་པ་རྣམས་ལ་ཚབ་རེ་བཟོས་ཏེ་བཞག་པ་དང་། དཔེ་ཁྲིད་གང་མང་སློབ་གཉེར་བའི་ཁྲོད་ནས་འཚོལ་བསྡུ་བྱས་ཏེ་སྒྲིག་བཟོ་སོགས་ཀྱིས་སྒྲ་མཛོད་ཀྱི་དཀར་ཆག་གི་ཚན་པ་རྣམས་སུ་བཞག་པ་སོགས་ཀྱིས་ཟླ་ངོ་བཅུ་ལྷག་ལ་དཀའ་ངལ་གང་མང་ལ་གདོང་ལེན་བརྒྱུད། དྲ་ཚིགས་གསར་བཟོ་གྲུབ་སྟེ་ཕྱི་ལོ་ ༢༠༡༥ ལོའི་ཟླ་ ༨ པའི་ཚེས་ ༡༩ ཉིན་གྱི་སྔ་དྲོའི་ཆུ་ཚོད་དགུ་པའི་སྟེང་། སྐུ་མགྲོན་གཙོ་བོ་སེ་ར་བྱེས་སྨད་གཉིས་ཀྱི་མཁན་རིན་པོ་ཆེའི་གཙོས། ཆོས་རིག་བཀའ་ཟུར་མཆོག་དང་། ཆོས་བརྒྱུད་ཁག་གི་མཁན་པོ་དང་སྐུ་ཚབ་སོགས་སེར་བྱེས་གྲྭ་ཚང་གི་ཆོས་རར་འཛོམས་ཏེ། སེར་བྱེས་རིག་མཛོད་ཆེན་མོའི་དྲ་ཚིགས་དངོས་སུ་དབུ་འབྱེད་གནང་ཡོད། ཐོག་མར་དྲ་ཚིགས་གསར་བཟོའི་སྐབས་ཡིག་ཆ་སོགས་གྲ་སྒྲིག་གང་ཡང་མེད་ནའང་རིམ་གྱིས་ཡིག་ཆ་གསར་བསྒྲིགས་དང་དྲ་ངོས་བསྐྱར་བཅོས་ཐེངས་བཞི་ལ་བྱས་པ་ལས་ད་ལྟའི་དྲ་ཚིགས་དང་དྲ་ངོས་འདི་གྲུབ་པ་ཡིན་ཞིང་། ཉིན་རེར་དཔེ་ཁྲིད་དང་འཕྲུལ་དེབ་སོགས་གསན་གཟིགས་བྱེད་མཁན་སུམ་སྟོང་བཞི་སྟོང་ལྷག་དྲ་ཞུགས་ཀྱིས་སློབ་སྦྱོང་བྱེད་ཀྱིན་ཡོད།
| ༢༠༡༤།༢།༢༤ ནས་ ༢༠༡༩།༩།༤ བར་དུ་དཔེ་ཁྲིད་གསན་མཁན་གྱི་གྲངས་ཐོ་དང་རྒྱལ་ཁབ་ཀྱི་མིང་། འདིའི་ནང་དུ་བོད་དང་རྒྱ་ནག་སོགས་འཚུད་མེད། | |||||
|---|---|---|---|---|---|
| SL | ས་གནས། | གསན་ཐོ། | 26 | Malaysia | 865 |
| 1 | India | 1579484 | 27 | United Arab Emirates | 451 |
| 2 | Nepal | 139236 | 28 | Vietnam | 1580 |
| 3 | United States | 128541 | 29 | Mongolia | 89477 |
| 4 | Brazil | 11644 | 30 | Hong Kong | 2482 |
| 5 | Australia | 9752 | 31 | Slovakia | 1668 |
| 6 | Bhutan | 26078 | 32 | Colombia | 1293 |
| 7 | Japan | 12268 | 33 | Sweden | 642 |
| 8 | Taiwan, Province of China | 19547 | 34 | Thailand | 8901 |
| 9 | United Kingdom | 9684 | 35 | Austria | 1149 |
| 10 | Canada | 77606 | 36 | South Africa | 503 |
| 11 | Switzerland | 8248 | 37 | Hungary | 405 |
| 12 | Dominican Republic | 1852 | 38 | indonesia | 2652 |
| 13 | France | 19602 | 39 | Poland | 1118 |
| 14 | Republic of Korea | 5717 | 40 | Czech Republic | 473 |
| 15 | Italy | 9564 | 41 | Russian Federation | 2620 |
| 16 | Germany | 9164 | 42 | Chile | 508 |
| 17 | Netherland | 13160 | 43 | Ukraine | 771 |
| 18 | New Zealands | 7056 | 44 | Israel | 451 |
| 19 | Argentina | 1624 | 45 | Ecuador | 353 |
| 20 | Mexico | 6197 | 46 | Egypt | 751 |
| 21 | Peru | 922 | 47 | Ireland | 897 |
| 22 | Belgium | 9833 | 48 | Greece | 389 |
| 23 | Singapore | 5792 | 49 | Philippines | 614 |
| 24 | Spain | 3028 | 50 | Turkey | 3004 |
| 25 | Norway | 966 | Total Visitors | 2240582 | |
དྲ་ཚིགས་འདི་ཉིད་འཕྲུལ་དེབ་དང་དཔེ་ཁྲིད་ཙམ་ཁོ་ནའི་ཆེད་དུ་མ་ཡིན་པར་སྣ་འཛོམས་རང་བཞིན་ཅན་གྱི་དྲ་ཚིགས་ཤིག་བསྒྲུབ་རྒྱུར་འབད་རྩོལ་བྱེད་ཀྱིན་ཡོད་ལ། དྲ་ངོས་ཀྱི་སྡེ་ཚན་ལ་མཚོན་ནའང་སྡེ་ཚན་ཆེ་ཁག་མི་འདྲ་བ་བཅུ་ལྷག་འཆར་འགོད་དང་རྩོམ་སྒྲིག་བྱས་ཡོད།
འགན་འཛིན་རྙིང་པའི་སྐབས་ཀྱི་ལོ་ངོ་ལྔའི་རིང་གི་ལས་བསྡོམས།
༡ ] གཞུང་ཆེན་སོགས་སློབ་གཉེར་བའི་དགོས་མཁོར་དམིགས་ཏེ་འཕྲུལ་དེབ་ཁྱོན་བསྡོམས་ ༣༠༠ ལྷག་ཙམ་རྩོམ་སྒྲིག་བྱས་ཏེ་ལྟ་ཀློག་དང་མཉམ་དུ་དཔེ་ཁྲིད་ཡོད་པ་དག་ལ་དཔེ་ཁྲིད་ཀྱི་དྲ་སྣེ་དང་མཉམ་སྦྱར་གྱིས་དྲ་ཚིགས་སུ་བཞག་ཡོད།
༢ ] སྒྲ་མཛོད་ཀྱི་ནང་དུ་གཞུང་ཆེན་སོགས་ཀྱི་དཔེ་ཁྲིད་ ༦༠༠ ལྷག་ཙམ་འཚོལ་བསྡུ་བྱས་ཏེ་ mp3. བཟོ་བ་དང་ཕབ་ལེན་སོགས་ཀྱི་ཆེད་དུ་ལྗིད་ཚད་ཇེ་ཆུང་དུ་གཏོང་བ་དང་མི་གསལ་རྣམས་ཇེ་གསལ་དུ་གཏོང་བ་སོགས་ཀྱི་སྒྲིག་སྦྱོར་དང་ཁྲིད་གཞུང་གི་འཕྲུལ་དེབ་ཡོད་པ་དག་ལ་དྲ་ཚིགས་ཀྱི་སྦྲེལ་སྣེ་མཉམ་སྦྱར་བྱས་ཏེ་སེར་བྱེས་རིག་མཛོད་ཆེན་མོའི་དྲ་ཚིགས་དང་སྒྲ་རྐྱང་པ་ཉན་བྱེད་ཀྱི་མཉེན་ཆས་ SoundCloud གཉིས་སུ་བཞག་ཡོད།
༣ ] བརྙན་མཛོད་ཀྱི་ནང་དུ་མཛད་རྣམ་སོགས་བརྙན་མི་འདྲ་བ་བརྒྱ་ཕྲག་ལྷག་སྒྲིག་སྦྱོར་བྱས་ཏེ་བཞག་ཡོད་ལ། དཔེ་ཆ་རྩོམ་སྒྲིག་དང་པར་བཟོ་སྟངས། དྲ་ཚིགས་བཟོ་སྟངས་སོགས་ཀྱི་སྐོར་ལ་ཆེད་མཁས་པས་ཟབ་སྦྱོང་སྤྲད་པ་དག་བརྙན་དུ་ཕབ་ལེན་དང་བཅོས་སྒྲིག་བྱས་པའི་བརྙན་བརྒྱ་ཕྲག་ཁ་ཤས་དྲ་ངོས་སུ་འཇོག་རྒྱུར་གྲ་སྒྲིག་བྱས་ཡོད།
༤ ] གསར་འགྱུར་གྱི་སྡེ་ཚན་གྱི་ནང་དུ་གྲྭ་ཚང་གི་མཛད་རིམ་ཆེ་ཁག་གིས་མཚོན་གསར་འགྱུར་མི་འདྲ་བ་ ༨༡ བྲིས་ཏེ་དྲ་ཚིགས་སུ་བཞག་ཡོད།
༥ ] ཚོམས་ཀྱི་སྡེ་ཚན་ནང་དུ་དུས་ཆེན་ཁག་སོགས་ཀྱི་ངོ་སྤྲོད་མི་འདྲ་བ་ ༦༨ བྲིས་ཏེ་དྲ་ཚིགས་སུ་བཞག་ཡོད།
༦ ] ལོ་རྒྱུས་ཀྱི་སྡེ་ཚན་གྱི་ནང་དུ་སེ་རའི་ལོ་རྒྱུས་དང་གྲྭ་ཚང་གི་ལོ་རྒྱུས་དང་ཚོགས་པ་ཁག་སོགས་ཀྱི་ངོ་སྤྲོད། གྲྭ་ཚང་ཕྱག་བཏབ་པ་ནས་ད་ལྟའི་བར་གྱི་མཁན་རབས་རིམ་བྱོན་གྱི་མཚན་ཐོ་དང་མཁན་རབས་སུམ་ཅུ་ལྷག་གི་ལོ་རྒྱུས། གྲྭ་ཚང་རང་ནས་བྱོན་པའི་དགའ་ལྡན་ཁྲི་པ་རིམ་བྱོན་གྱི་མཚན་ཐོ་དང་ཁྲི་ཆེན་བཅོ་ལྔའི་ ༡༥ ལོ་རྒྱུས། གྲྭ་ཚང་རང་ནས་ཕེབས་པའི་བོད་ཀྱི་ལོ་རྒྱུས་ཐོག་གྲགས་ཆེ་བའི་མཁས་དབང་རིམ་བྱོན་གྱི་མཚན་ཐོ། གྲྭ་ཚང་རང་ནས་ཕེབས་པའི་རྒྱུད་སྟོད་སྨད་ཀྱི་མཁན་པོ་རིམ་བྱོན་གྱི་མཚན་ཐོ་དང་མཁན་པོ་རྣམས་ཀྱི་ལོ་རྒྱུས་སོགས་བྲིས་ཏེ་དྲ་ཚིགས་སུ་བཞག་ཡོད།
༧ ] པར་མཛོད་ཀྱི་ནང་དུ་གྲྭ་ཚང་གི་ལོ་རྒྱུས་ཐོག་ལ་གལ་ཆེ་བའི་པར་རྙིང་སོགས་པར་སྣ་མི་འདྲ་བ་ཉིས་བརྒྱ་ལྷག་འཚོལ་བསྡུ་བྱས་ཏེ་དྲ་ཚིགས་སུ་བཞག་ཡོད།
༨ ] གཞན་འཕྲུལ་དེབ་ཀྱི་གཞུང་མཛད་པ་པོའི་རྣམ་ཐར་མི་འདྲ་བ་བརྒྱ་ཕྲག་ལྷག་རྒྱས་བསྡུས་མི་འདྲ་བ་གཉིས་རེ་གསར་རྩོམ་བྱས་ཏེ་འཕྲུལ་དེབ་དང་དྲ་ངོས་སུ་བཞག་ཡོད།
༩ ] དཔེ་ཁྲིད་གནང་མཁན་གྱི་ལོ་རྒྱུས་མི་འདྲ་བ་བརྒྱ་ཕྲག་ལྷག་གསར་རྩོམ་བྱས་ཏེ་དྲ་ངོས་སུ་བཞག་ཡོད།
༡༠ ] དྲ་ཚིགས་ཀྱི་དཀར་ཆག་སྡེ་ཚན་ཆེ་བ་བཅུ་ལྷག་དང་། ཡན་ལག་གི་དཀར་ཆག་ཉིས་བརྒྱ་དང་ལྔ་བཅུ་ལྷག་འཆར་འགོད་དང་གསར་རྩོམ་བྱས་ཡོད།
༡༡ ] འཕྲུལ་དེབ་དང་སྒྲ་མཛོད་བརྙན་སོགས་ལ་དྲ་ངོས་སུ་ངོ་སྤྲོད་ཚན་པ་གཉིས་རེ་བཅས་ཁྱོན་བསྡོམས་ངོ་སྤྲོད་ཚན་པ་ཆིག་སྟོང་ལྔ་བརྒྱ་ལྷག་གསར་རྩོམ་དང་སྒྲིག་བཀོད་བྱས་ཡོད།
༡༢ ] བཀའ་བསྟན་སོགས་གསུང་རབ་ཀྱི་པར་རྩ་ pdf ནང་དུ་ཡོད་པ་ཁྲི་གཅིག་ལྷག་འཚོལ་བསྡུ་བྱས་ཡོད་ལ། (word) ནང་དུ་ཡོད་པ་གཤིབ་བསྡུར་བྱས་ཏེ་འཕྲུལ་དེབ་ཏུ་རྩོམ་སྒྲིག་བྱས་ཆོག་པའི་པར་རྩ་སྟོང་ཕྲག་ཁ་ཤས་དང་། ཞུས་དག་སོང་བའི་པར་རྩ་བརྒྱ་ཕྲག་གཅིག་ལྷག་འཚོལ་བསྡུ་བྱས་ཡོད།
༡༣ ] རིག་མཛོད་དཔེ་ཚོགས་ཀྱི་ངོ་བོར་དཔེ་ཆ་དྲུག་རྩོམ་སྒྲིག་བྱས་ཡོད།
༡༤ ] གཞན་དགེ་རྒན་གདན་འདྲེན་ཞུས་ཏེ་རྩོམ་སྒྲིག་ཁང་གི་ལས་བྱེད་རྣམས་ལ་ལོ་བཞི་ལ་དྲ་རྒྱ་སོགས་ཀྱི་སྐོར་ལ་ཟབ་སྦྱོང་ཟླ་གསུམ་རེར་སྤྲད་ཡོད།
༡༥ ] གཅེས་ཉར་ཡིག་ཚགས་སུ་འཇོག་རྒྱུར་དཔེ་ཆ་པར་བཤུས་བྱས་པ་བརྒྱ་ལྷག་ཡོད།
༡༦ ] གཞན་འཕྲུལ་དེབ་ཏུ་རྩོམ་སྒྲིག་བྱ་ཆོག་པ་བསྟན་འགྱུར་གྱི་པོ་ཏི་ཉི་ཤུ་དང་། རྒྱལ་ཚབ་རྗེ་དང་མཁས་གྲུབ་རྗེ་གཉིས་ཀྱི་གསུང་འབུམ་ལས་པོ་ཏི་རེ་གཉིས་མ་གཏོགས་ཆ་ཚང་དཔེ་བསྡུར་གྲུབ་སྟེ་འཕྲུལ་དེབ་ཏུ་རྩོམ་སྒྲིག་བྱེད་ཀྱིན་ཡོད།
༡༧ ] ཁྱོན་བསྡོམས་ལོ་རྒྱུས་སོགས་གསར་རྩོམ་བྱས་ཏེ་བྲིས་པ་ཤོག་གྲངས་ A4 ཅན་ ༢༢༥༦ ལྷག་དང་ཡིག་འབྲུ་འབུམ་ཕྲག་ཁ་ཤས་བྱུང་ཡོད།
༢༠༢༠།༠༥།༠༩ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།
