-
མདུན་ངོས།
-
ཚོམས།
-
རྣམ་ཐར་གྱི་ཚོམས།
- སློབ་དཔོན་ཨཱརྱ་དེ་ཝའམ་སློབ་དཔོན་འཕགས་པ་ལྷ།
སློབ་དཔོན་ཨཱརྱ་དེ་ཝའམ་སློབ་དཔོན་འཕགས་པ་ལྷ།
དྲ་འཇུག་པ། སེར་བྱེས་རིག་མཛོད་ཆེན་མོ།སློབ་དཔོན་ཨཱརྱ་དེ་ཝའམ་སློབ་དཔོན་འཕགས་པ་ལྷ་ནི། མགོན་པོ་ཀླུ་སྒྲུབ་དངོས་དང་ཁྱད་མེད་དུ་བརྩིས་ཤིང་། བོད་དུ་ཡོངས་གྲགས་ལྟར་ན། སིངྒ་གླིང་གི་རྒྱལ་པོའི་སྐྱེད་མོས་ཚལ་དུ་པདྨ་ལས་བརྫུས་ཏེ་སྐྱེས་ཤིང༌། རྒྱལ་པོས་ཀྱང་སྲས་ཀྱི་དོད་དུ་བསྐྱངས། མཐར་མགོན་པོ་ཀླུ་སྒྲུབ་ཀྱི་སློབ་མར་གྱུར་པར་བཤད།
རྗེ་བཙུན་ཏཱ་ར་ནཱ་ཐའི་རྒྱ་གར་ཆོས་འབྱུང་དུ། སིངྒ་ལའི་གླིང་གི་རྒྱལ་པོ་པཉྩ་ཤྲི་གཾ་ཞེས་བྱ་བ་ཞིག་ལ་སྲས་མཚན་དང་ལྡན་པ་ཞིག་བྱུང༌། ཆེར་སྐྱེས་ནས་རྒྱལ་ཚབ་ཀྱི་ས་ལ་བཞག་ཀྱང་རབ་ཏུ་བྱུང་བ་ལ་ལྷག་པར་མོས་པར་གྱུར་ཏེ། མཁན་པོ་ཧེ་མ་དེ་ཝ་ཞེས་བྱ་བ་ལས་རབ་ཏུ་བྱུང་ཞིང་བསྙེན་པར་རྫོགས། སྡེ་སྣོད་གསུམ་པོ་མཐའ་དག་ལ་སྦྱང་བ་གནང་།
ཡུལ་སྣ་ཚོགས་ཀྱི་ལྷ་ཁང་དང་མཆོད་རྟེན་དག་བལྟ་བའི་ཕྱིར་རྒྱ་གར་དུ་བྱོན། མགོན་པོ་ཀླུ་སྒྲུབ་རྒྱལ་པོ་བདེ་བྱེད་ཀྱི་ས་ནས་ལྷོ་ཕྱོགས་དཔལ་གྱི་རིར་གཤེགས་པའི་ཚེ་མཇལ་ཏེ། དཔལ་གྱི་རིར་སློབ་དཔོན་གྱི་ཞབས་པད་བསྟེན་ཞིང་བཅུད་ལེན་ལ་སོགས་པའི་དངོས་གྲུབ་མང་པོ་ཐོབ།
ཁྱད་པར་དུ་མདོ་སྔགས་ཀྱི་གཞུང་མཐའ་དག་ལ་དཔྱིས་ཕྱིན་པར་སྦྱངས་ཤིང་། མགོན་པོ་ཀླུ་སྒྲུབ་སྐུ་འདའ་ཁར་བསྟན་པ་གཏད། ལྷོ་ཕྱོགས་ཀྱི་རྒྱུད་རྣམས་སུ་སློབ་མ་དང་ཉན་བཤད་ལ་སོགས་པས་སེམས་ཅན་གྱི་དོན་མཛད་ཅིང༌། གཙུག་ལག་ཁང་ཉི་ཤུ་རྩ་བཞི་བཞེངས་ཏེ་དེ་དག་ཏུ་ཐེག་པ་ཆེན་པོའི་ཆོས་གཞི་རེ་རེ་བཙུགས། བྲམ་ཟེ་ཐུབ་དཀའ་ནག་པོ་རྩོད་པས་ཕམ་པར་བྱས་ཏེ་སློབ་མར་གྱུར་པ་སློབ་དཔོན་དཔའ་བོ་ཡིན།
ན་ལེནྡྲར་ཡུན་རིང་དུ་བཞུགས་ཤིང༌། སྐུ་ཚེ་སྨད་ལ་ལྷོ་ཕྱོགས་ཀྱི་རྒྱུད་དུ་གཤེགས་ནས་སེམས་ཅན་གྱི་དོན་རྒྱ་ཆེན་པོ་མཛད་དེ་ཡུལ་ཀཉྩི་དང་ཉེ་བའི་རཾ་ག་ནཱ་ཐ་ཞེས་བྱ་བར་སྒྲ་གཅན་འཛིན་བཟང་པོ་ལ་བསྟན་པ་གཏད་ནས་སྐུ་འདས།
སློབ་མ་གྲགས་ཆེ་བ། སློབ་དཔོན་དཔའ་བོ་སོགས་མང་ངོ་། སློབ་དཔོན་འདིས་བསྟན་བཅོས་གང་མང་བརྩམས་པ་ལས། བོད་འགྱུར་ལ། དབུ་མའི་ལྟ་བ་རྒྱས་པར་བཤད་པ་[དབུ་མ་བཞི་བརྒྱ་པ།]དེ་མདོར་བསྡུས་ནས་བཤད་པ་[དབུ་མ་ལག་པའི་ཚད།]དེ་ལ་རྩོད་པ་སྤོང་བ་[འཁྲུལ་བ་བཟློག་པའི་གཏན་ཚིགས་གྲུབ་པ།]མཚན་ཉིད་དང་སྔགས་ཀྱི་གྲུབ་མཐའི་རྣམ་གཞག་སྟོན་པ་[ཡེ་ཤེས་སྙིང་པོ་ཀུན་ལས་བཏུས།]གསང་སྔགས་ཀྱི་ལྟ་སྤྱོད་གཏན་ལ་འབེབས་པ་[སྤྱོད་པ་བསྡུས་པའི་སྒྲོན་མ།]དེ་རིགས་པས་སྒྲུབ་པ་[སེམས་ཀྱི་སྒྲིབ་སྦྱོང་།]སྨིན་བྱེད་དབང་གི་ཆོ་ག་ལ་[རྡོ་རྗེ་གདན་བཞིའི་དཀྱིལ་ཆོག་སྙིང་པོ་མདོར་བསགས།]བསྐྱེད་རིམ་སྟོན་པ་[རྡོ་རྗེ་གདན་བཞིའིསྒྲུབ་ཐབས།]སོགས་སྣར་ཐང་བསྟན་འགྱུར་གྱི་སྔགས་ཕྱོགས་པོད[ཟ]པ་དང་། མདོ་ཕྱོགས་[ཙ]པའི་ནང་དུ་ཡོད། སློབ་དཔོན་འདིའི་ལོ་རྒྱུས་སྐོར། བུ་སྟོན་ཆོས་འབྱུང་དང་། རྗེ་བཙུན་ཏཱ་ར་ནཱ་ཐའི་རྒྱ་གར་ཆོས་འབྱུང་གཉིས་སུ་གསལ།
༢༠༡༦.༠༨.༡༡.ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་དམ་འདྲེན་བཀོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་པ་ཡིན།]ཞེས་རྩོམ་ཁུངས་ཁ་གསལ་འགོད་དགོས།
སེར་བྱེས་རིག་མཛོད་ཆེན་མོ།
དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་ (laptop, iPad, iPod iPhone & Android) སོགས་ཀྱི་ནང་དུ་ཐུགས་འདོད་ལྟར་ཕབ་ལེན་དང་གཟིགས་ཀློག་གནང་རོགས།
དྲ་ཚིགས།: www.serajeyrigzodchenmo.org གློག་འཕྲིན་ཁ་བྱང་། serajeyrigzodchenmo@gmail.com
