རྩ་བ་མཛད་པ་པོ།  རྗེ་བཙུན་བྱམས་པ་མགོན་པོ།
འགྲེལ་བ་མཛད་པ་པོ།  རྒྱལ་ཚབ་དར་མ་རིན་ཆེན།
བརྗོད་བྱ། དངོས་བརྒྱད་དོན་བདུན་ཅུ།
རིག་མཛོད་འཕྲུལ་དེབ་ཨང་། SJRB-0413
རྣམ་པ། PDF པར་གཞི། བཀྲས་ལྷུན་ཤིང་པར།
ཤོག་གྲངས། 761 ལྗིད་ཚད། 3.5MB
རྩོམ་སྒྲིག་པ། རིག་མཛོད་ཆེན་མོའི་རྩོམ་སྒྲིག་པ།
༢༠༢༣ ཟླ་ལྔ་པར་གསར་དུ་རྩོམ་སྒྲིག་བྱས།
རྩ་འགྲེལ་མཛད་པ་པོའི་ངོ་སྤྲོད་མདོར་བསྡུས།
རྗེ་བཙུན་བྱམས་པ་མགོན་པོ་མཆོག་ནི། སྟོན་པ་ཐུབ་པའི་དབང་པོ་དགའ་ལྡན་དུ་སྐྱེ་བ་སྤྲུལ་སྐུའི་ཚུལ་བཟུང་སྟེ། འཛམ་བུའི་གླིང་དུ་འབྱོན་པ་ལ་ཉེ་བར་ཕྱོགས་པའི་ཚེ། རྗེ་བཙུན་བྱམས་པ་མགོན་པོ་ལ་པྲོག་ཞུ་བསྐོན་ནས་རྒྱལ་ཚབ་ཏུ་དབང་བསྐུར་བས། དེ་ནས་བཟུང་རྒྱལ་ཚབ་བྱམས་པ་མགོན་པོ་ཞེས་གྲགས་པ་ཡིན་ནོ། །རྩོད་ལྡན་ཚེ་ལོ་བརྒྱ་པའི་དུས་དང་། མ་འོངས་པའི་ཚེ་ལོ་བརྒྱད་ཁྲི་པའི་དུས་གཉིས་ལུས་པར། རྗེ་བཙུན་བྱམས་པ་མགོན་པོས་ཐུགས་རྗེས་མ་བཟོད་ནས་ཐུགས་བསྐྱེད་དེ་ཚེ་ལོ་བརྒྱད་ཁྲི་པའི་དུས་ཀྱི་འགྲོ་བ་དེ་དག་ཡོངས་སུ་བཟུང་ངོ་། །བསྐལ་པ་ཡ་ཐོག་རིང་མོ་རྫོགས་ནས་བར་གྱི་ཁུག་པ་བཅོ་བརྒྱད་ཀྱི་འགོར་རྗེ་བཙུན་འབྱོན་པར་གསུངས་སོ། །འབྱོན་པའི་ཡུལ་ནི་གྲོང་ཁྱེར་རྩྭ་ཅན་ཞེས་པ་ཡིན་ཞིང་། ཡུལ་དེའི་རྒྱལ་པོ་དུང་ཞེས་བྱ་བའི་མདུན་ན་འདོན་བྲམ་ཟེ་ཚངས་རབ་ཅེས་བྱ་བའི་སྲས་སུ་འབྱོན་པར་འགྱུར་རོ། །རྗེ་བཙུན་གྱི་གདམས་ངག་གི་གཞུང་རྩ་བ་མངོན་རྟོགས་རྒྱན་སོགས་བྱམས་ཆོས་སྡེ་ལྔ་གསུངས་ཤིང་། ཤེར་ཕྱིན་གྱི་མདོའི་སྦས་དོན་མངོན་རྟོགས་ཀྱི་རིམ་པ་སྟོན་པའི་མངོན་རྟོགས་རྒྱན་གཙོ་བྱས་པའི་གཞུང་འདི་དག་ནི་འཕགས་པ་ཐོགས་མེད་དགའ་ལྡན་དུ་ཕེབས་ནས་རྗེ་བཙུན་གྱི་དྲུང་དུ་གསན་ཏེ། འཛམ་བུའི་གླིང་འདིར་གདན་དྲངས་པ་ཡིན་ནོ། །
རྒྱལ་ཚབ་དར་མ་རིན་ཆེན་མཆོག་ནི་ཕྱི་ལོ་༡༣༦༤ ལོར་གཙང་ཉང་སྟོད་དུ་ཡབ་རྟ་དཔོན་པ་དང་། ཡུམ་ཇོ་མོ་ཤེས་རབ་མ་གཉིས་ཀྱི་སྲས་སུ་འཁྲུངས།
དགུང་ལོ་བཅུ་པར་མཁན་པོ་རིན་ཆེན་རྒྱལ་མཚན་ལས་རབ་ཏུ་བྱུང་། དགུང་ལོ་ཉེར་ལྔ་པར་ཉ་དབོན་ཀུན་དགའ་དཔལ་གྱི་དྲུང་ནས་བསྙེན་པར་རྫོགས། ས་སྐྱ་དང་། གསང་ཕུ། རྩེད་ཐང་སོགས་སུ་དཀའ་བཅུའི་གྲྭ་སྐོར་མཛད།
དགུང་ལོ་ང་དྲུག་ཐོག་དགའ་ལྡན་ཁྲིར་ཕེབས་ཏེ་ལོ་བཅུ་གསུམ་བསྐྱངས། དགུང་ལོ་རེ་དགུ་སྟེ་ཕྱི་ལོ་༡༤༣༢ལོར་རྩེ་པོ་ཏ་ལར་དགོངས་པ་ཞི་དབྱིངས་སུ་གཤེགས་པའི་ཚུལ་བསྟན།
སློབ་མ་ཡང་མཁས་གྲུབ་དགེ་ལེགས་དཔལ་བཟང་སོགས་རྗེའི་དངོས་སློབ་ཕལ་ཆེ་བ་འདི་བའི་སློབ་མར་ཡང་གྱུར། གསུང་རྩོམ་ཁྱོན་བསྡོམས་པོད་ཆེན་པོ་བརྒྱད་བཞུགས།

མཛད་པ་པོ། རྗེ་བློ་བཟང་གྲགས་པ།
བརྗོད་བྱ། བྱང་སེམས་དང་གསང་སྔགས་ཀྱི་སྡོམ་པའི་སྐོར།
རིག་མཛོད་འཕྲུལ་དེབ་ཨང་། SJRB-0186
ཡིག་ཆའི་རྣམ་པ། PDF
ཤོག་གྲངས། 424 ལྗིད་ཚད། 2.2MB
བསྐྱར་སྒྲིག་པ། རིག་མཛོད་ཆེན་མོའི་རྩོམ་སྒྲིག་པ།
༢༠༢༣ ཟླ་བ་ལྔ་པར་གསར་དུ་བསྒྲིགས།
ངོ་སྤྲོད་མདོར་བསྡུས། རྗེ་ཙོང་ཁ་པ་བློ་བཟང་གྲགས་པ། ཕྱི་ལོ་༡༣༥༧ ལོར་མདོ་སྨད་ཙོང་ཁའི་ཡུལ་དུ་འཁྲུངས། དགུང་ལོ་གསུམ་པར་རྗེ་ཀརྨ་པ་རོལ་བའི་རྡོ་རྗེ་ལས་དགེ་བསྙེན་གྱི་སྡོམ་པ་བཞེས་ཏེ་མཚན་ལ་ཀུན་དགའ་སྙིང་པོ་དང་། དགུང་ལོ་བདུན་པར་ཆོས་རྗེ་དོན་གྲུབ་རིན་ཆེན་ལས་དགེ་ཚུལ་གྱི་སྡོམ་པ་བཞེས་ཏེ་མཚན་ལ་བློ་བཟང་གྲགས་པ་གསོལ། དགུང་ལོ་བཅུ་བདུན་པར་སློབ་གཉེར་གྱི་ཆེད་དུ་དབུས་སུ་ཕེབས། དགུང་ལོ་སོ་དྲུག་གི་སྐབས་འཁོར་དག་པ་རྣམ་བརྒྱད་དང་བཅས་འོལ་ཁར་སྒྲུབ་པ་གཙོ་བོར་མཛད། དགུང་ལོ་སོ་བདུན་པར་རྫིང་ཕྱིའི་བྱམས་པ་ཞིག་གསོ་མཛད། དགུང་ལོ་སོ་དགུ་པར་གཉལ་གྱི་ལུང་རར་ཆོས་འཁོར་བསྐོར། དགུང་ལོ་ང་གཉིས་ཀྱི་སྐབས་ཆོ་འཕྲུལ་སྨོན་ལམ་ཆེན་མོ་བཙུགས། དགུང་ལོ་ང་གསུམ་གྱི་སྐབས་དགའ་ལྡན་དགོན་པ་བཏབ། དགུང་ལོ་ང་དགུའི་སྐབས། དགའ་ལྡན་དུ་སྟག་རྩེའི་སྒྲུབ་མཆོད་སྤེལ། སློབ་མ་གྲགས་ཆེ་བ། རྒྱལ་ཚབ་དར་མ་རིན་ཆེན་སོགས་མང་དུ་བྱུང་། ༡༤༡༩ ལོར་སྐུ་གཤེགས། གསུང་རྩོམ་ལ། བྱང་ཆུབ་ལམ་རིམ་སོགས་པོ་ཏི་བཅུ་དགུ་བཞུགས།

མཛད་པ་པོ། རྒྱལ་མཆོག་ལྔ་པ་ཆེན་པོ་སོགས།
བརྗོད་བྱ། རྟ་མགྲིན་ཡང་གསང་ལྷ་དགུའི་སྒྲུབ་ཐབས་སྐོར།
རིག་མཛོད་དེབ་ཨང་། SJRB-0412
ཡིག་ཆའི་རྣམ་པ། PDF
ཤོག་གྲངས། 268 ལྗིད་ཚད། 1.7MB
རྩོམ་སྒྲིག་ཁང་། སེར་བྱེས་རིག་མཛོད་ཆེན་མོ།
༢༠༢༣ ཟླ་བ་ལྔ་པར་གསར་དུ་ཞུ་སྒྲིག་བྱས།
ངོ་སྤྲོད་མདོར་བསྡུས།
ལྷག་པའི་ལྷ་མཆོག་འཕགས་པ་སྤྱན་རས་གཟིགས་དྲག་པོའི་སྐུར་བཞེངས་པ་ཡི་དམ་པདྨ་དབང་ཆེན་ཡང་གསང་ལྷ་དགུའི་ཆོས་སྐོར་འདོན་ཆོག་སྐོར་ཕྱོགས་བསྒྲིགས་བྱས་པ་དེ་ནི་རང་རེའི་གྲྭ་ཚང་དུ་ལོ་ལྟར་བཞིན་ལས་བྱང་སྙིང་པོ་བཅུད་བསྡུས་ཀྱི་སྒོ་ནས་བསྙེན་སྒྲུབ་འཚོགས་ནས་སྦྱིན་སྲེག་བྱ་བ་དང་བདག་འཇུག་ལེན་པ། ཚོགས་མཆོད་དང་འབྲེལ་བའི་སྐོང་བཤགས་བཅས་ཡང་ཡང་གསུང་དགོས་པར་བརྟེན་སྟབས་བདེའི་ཞལ་འདོན་དུ་ཆེད་དམིགས་ཀྱིས་ཞུ་སྒྲིག་བྱས་པ་ཞིག་ཡིན། དེ་ཡང་དཔྱད་བསྡུར་གྱི་མ་ཕྱིའི་པར་རྩ། རྒྱལ་མཆོག་ལྔ་པ་ཆེན་པོའི་གསུང་འབུམ་དང་། ལྕང་ལུང་པཎྜི་ཏའི་གསུང་འབུམ། གྲྭ་ཚང་གི་རྟ་མགྲིན་ཆོས་སྐོར་ཡིག་ཆ་བཅས་ལ་ཞིབ་བསྡུར་དང་བཅས་ཞུ་སྒྲིག་བྱས་པ་ཡིན།

མཛད་པ་པོ། སྟག་ཚང་ལོ་ཙཱ་བ་ཤེས་རབ་རིན་ཆེན།
བརྗོད་བྱ། ནང་པའི་ལྟ་གྲུབ་སྐོར།
རིག་མཛོད་འཕྲུལ་དེབ་ཨང་། SJRB-0219
ཡིག་ཆའི་རྣམ་པ། PDF
ཤོག་གྲངས། 36 ལྗིད་ཚད། 885KB
རྩོམ་སྒྲིག་ཁང་། སེར་བྱེས་རིག་མཛོད་ཆེན་མོ།
༢༠༡༥ ལོའི་ཟླ་བརྒྱད་པར་གསར་དུ་རྩོམ་སྒྲིག་བྱས།
༢༠༢༣ ཟླ་བཞི་པར་བསྐྱར་སྒྲིག་བྱས།
ངོ་སྤྲོད་མདོར་བསྡུས།
སྟག་ཚང་ལོ་ཙཱ་བ་ཤེས་རབ་རིན་ཆེན་ནི། ཕྱི་ལོ་ ༡༤༠༥ ལོར་ཡར་འབྲོག་སྟག་ལུང་དུ་སྐུ་འཁྲུངས། མཚན་དཀོན་མཆོག་སྐྱབས་སུ་གསོལ། སེང་གེ་རྒྱལ་མཚན་ལས་རབ་ཏུ་བྱུང་། ཆོས་འཁོར་བ་ཡབ་སྲས་ཀྱི་དྲུང་དུ་མདོ་ཕྱོགས་ཀྱི་ཆོས་གང་མང་གསན། འབྲས་སྤུངས་དགོན་དུ་འཇམ་དབྱངས་བཀྲ་ཤིས་དཔལ་ལྡན་དང་བོ་དོང་པཎ་ཆེན་ལས་ཆོས་མང་དུ་གསན། སྟག་ལུང་དུ་ས་སྐྱའི་དགོན་ལག་ཏུ་གྱུར་པ་ཐར་གླིང་ཆོས་སྡེ་གསར་དུ་བཏབ་སྟེ་དགེ་འདུན་སྟོང་ཕྲག་ལྷག་གི་ཚོགས་པ་བསྐྱངས། མདོ་སྔགས་སོགས་ཀྱི་བསྟན་བཅོས་མང་དུ་མཛད། ཕྱི་ལོ་༡༤༧༧ལོར་འདས། སློབ་མ་ལ། ཞ་ལུ་ལོ་ཆེན་དང་། འུག་ཚང་རིན་པོ་ཆེ་སོགས་མང་དུ་བྱུང་།

མཛད་པ་པོ། སེར་བྱེས་ལྷ་རམས་པ་འཇམ་དཔལ་བློ་ཤེས།
བརྗོད་བྱ། ཐར་ལམ་གསལ་བྱེད་ཀྱི་ས་བཅད་དང་དོགས་གནས།
རིག་མཛོད་འཕྲུལ་དེབ་ཨང་། SJRB-0323
ཡིག་ཆའི་རྣམ་པ། PDF
ཤོག་གྲངས། 177 ལྗིད་ཚད། 1.6MB
རྩོམ་སྒྲིག་ཁང་། སེར་བྱེས་རིག་མཛོད་ཆེན་མོ།
༢༠༡༥ ལོའི་ཟླ་བདུན་པར་རྩོམ་སྒྲིག་བྱས།
༢༠༢༣ ཟླ་བཞི་པར་བསྐྱར་སྒྲིག་བྱས།
ངོ་སྤྲོད་མདོར་བསྡུས།
སེར་བྱེས་ལྷ་རམས་པ་དགེ་བཤེས་འཇམ་དཔལ་བློ་ཤེས་ནི་ཁམས་ཀློང་ཐང་སྒྲོལ་མ་ལྷ་ཁང་དང་ཉེ་བའི་སར་ཡབ་མགོན་པོ་རྡོ་རྗེ་དང་ཡུམ་དགེ་རྩེ་གཉིས་ཀྱི་སྲས་སུ་ཕྱི་ལོ་༡༩༦༨ ལོར་སྐུ་འཁྲུངས། སྒྲོལ་མ་ལྷ་ཁང་དུ་ཚོགས་ཞུགས་མཛད། རྫ་སེར་ཤུལ་དགོན་དུ་ཕེབས་ནས་སློབ་གཉེར་གྱི་དབུ་བཙུགས། རྒྱ་གར་དུ་ཕེབས་ཤིང་སེར་བྱེས་མཁས་སྙན་གྲྭ་ཚང་དུ་གཞུང་ཆེན་པོད་ལྔའི་སློབ་གཉེར་ལ་མི་ལོ་ཉི་ཤུ་ལྷག་གི་རིང་ལྟོ་སྐྱ་གོས་ཧྲུལ་གྱིས་སློབ་གཉེར་རྡོ་རུས་ཐུག་པ་གནང་། རིགས་པ་སྨྲ་བའི་ཁྱུ་མཆོག་ཏུ་གྱུར་ཅིང་སྙན་པའི་གྲགས་པ་ཕྱོགས་ཀུན་ཏུ་རྒྱས། སླར་བོད་དུ་ཕེབས་ཏེ་སེར་ཤུལ་དགོན་མཐོ་རིམ་ནང་བསྟན་སློབ་གླིང་དུ་དགེ་རྒན་ཆེན་མོའི་ཕྱག་ལས་གནང་། སློབ་གླིང་གི་སྒྲིག་འཛུགས་ཚགས་ཆུད་དང་། སློབ་གཉེར་བ་དགེ་འདུན་བརྒྱ་ཕྲག་དུ་མར་གཞུང་ཆེན་ཁག་གི་དཔེ་ཁྲིད་གནང་། ཁོང་རང་གིས་གཞུང་ཆེན་དཔེ་ཁྲིད་གནང་བ་སྒྲ་འཇུག་ཉར་ཚགས་བྱས་པ་ཆུ་ཚོད་ལྔ་བརྒྱ་དང་ལྔ་བཅུ་ལྷག་ཡོད་པ་ཕྱི་རབས་པ་རྣམས་ལ་ཆོས་ཀྱི་སྐྱེས་སུ་འཇོག་པར་མཛད། ནང་ཆོས་ངོ་སྤྲོད་དང་སྤྱི་ཚོགས་བསླབ་བྱ་སོགས་གནད་ལ་ཁེལ་ཞིང་རུས་ལ་ཟུག་པའི་བཀའ་སློབ་ལམ་སྟོན་སྔ་ན་མེད་པ་གནང་། མདོ་ཁམས་འཇང་དགུན་ཆོས་དང་གངས་ལྗོངས་མཁས་པའི་ལྷན་ཚོགས་གཉིས་ཀྱི་ཚོགས་གཙོའི་འགན་བཞེས་པ་སོགས་ཆོས་དང་རིག་གཞུང་ལ་སྨན་པའི་ཕྱག་ལས་གནང་བཞིན་དུ་ཕྱི་ལོ་༢༠༡༩ ལོར་དགུང་ལོ་ལྔ་བཅུ་རྩ་གྲངས་ལ་དགོངས་པ་ཞི་དབྱིངས་སུ་གཏད།