-
མདུན་ངོས།
- ཚོམས།
ཚོམས། (80)
དབྱངས་ཅན་གྲུབ་པའི་རྡོ་རྗེ།
དྲ་འཇུག་པ། རིག་མཛོད་རྩོམ་སྒྲིག་པ།དབྱངས་ཅན་གྲུབ་པའི་རྡོ་རྗེའམ་དངུལ་ཆུ་དབྱངས་ཅན་གྲུབ་པའི་རྡོ་རྗེ་ནི། ཕྱི་ལོ་༡༨༠༩ལོར་གཙང་གཡས་རུའི་བྱེ་བྲག་བཀྲ་ཤིས་དགེ་འཕེལ་གླིང་གི་ཉེ་འདབས་སྔོན་དུས་འཇད་ཅེས་གྲགས་ཀྱང་། ཕྱིས་སུ་སློབ་དཔོན་རིན་པོ་ཆེས་ཡུལ་དེའི་ཆེ་བའི་དགེ་མཚན་ལ་ཞལ་འཛུམ་ལན་གསུམ་གྲོལ་བས་བཞད་ཅེས་ཐོགས་པའི་ཡུལ་དུ་ཡབ་བཀྲ་ཤིས་ཀྱི་སྲས་སུ་སྐུ་འཁྲུངས། མཚན་འཇམ་དབྱངས་རྡོ་རྗེར་གསོལ། དགུང་ལོ་ལྔའི་སྟེང་ནས་ཁུ་བོ་དངུལ་ཆུ་དྷརྨ་བྷ་དྲའི་དྲུང་ནས་ཡི་གེའི་འབྲི་ཀློག་སྦྱངས། དགུང་ལོ་བཅུ་པར་ཐོབ་རྒྱལ་བླ་མ་ངག་དབང་སྙན་གྲགས་ཀྱི་དྲུང་ནས་རྩིས་ཀྱི་ས་རིས་དང་སྙན་ངག་བཅས་ལ་སྦྱངས་ཏེ་ཞོར་དུ་མངོན་བརྗོད་སྣ་ཚོགས་བློ་ལ་བཟུང་། དགུང་ལོ་བཅུ་གཅིག་པར་བཀྲ་ཤིས་དགེ་འཕེལ་དགོན་པར་དཀའ་ཆེན་དཀོན་མཆོག་ཆོས་འཕེལ་གྱི་མདུན་དུ་དབུ་སྐྲའི་གཙུག་ཕུད་ཕུལ། མཚན་ལ་བློ་བཟང་ཆོས་འཕེལ་གསོལ། དགུང་ལོ་བཅུ་གཉིས་པར་དཀའ་ཆེན་དཀོན་མཆོག་ཆོས་འཕེལ་གྱི་དྲུང་ནས་དགེ་བསྙེན་དང་དགེ་ཚུལ་གྱི་སྡོམ་པ་མནོས། དེ་ནས་བཟུང་རྗེ་མི་ལའི་རྣམ་མགུར་དང་། ཐིག་ཚད་བློས་བཀོད། འདོན་རྟ་དབྱངས་རོལ་མོ་བཅས་ལ་སྦྱངས་པ་མཛད། དབང་ལུང་སོགས་ཀྱང་མང་པོ་ཐོབ། དགུང་ལོ་བཅུ་དགུ་པ་ནས་དངུལ་ཆུ་དྷརྨ་བྷ་དྲའི་ཞབས་ཞུ་བ་མཛད་དེ། སྒྲ་དང་། རྩིས་དང་། སྙན་ངག་སུམ་རྟགས་སོགས་ཐུན་མོང་གི་རིག་གནས་དང་མདོ་སྔགས་ཀྱི་གཞུང་ལ་སྦྱངས་པ་གནང་། དགུང་ལོ་སོ་བཞི་པར་བླ་མའི་མདུན་དུ་སྙན་ངག་དང་སྒྲ་ཀཱ་ལ་པའི་རྒྱུགས་ཕུལ་སྐབས་སློབ་འབྲས་བཟང་བས་བླ་མ་དགྱེས་ནས་ཀུན་བཤད་ཀྱི་མཚན་དབྱངས་ཅན་གྲུབ་པའི་རྡོ་རྗེ་ཞེས་གནང་། ལོ་དེའི་ཟླ་བཞི་པར་བླ་མ་དེ་ཉིད་ཀྱི་མདུན་ནས་དགེ་སློང་གི་སྡོམ་པ་མནོས། དེ་ནས་བཟུང་དགེ་སློང་གི་བསླབ་བྱ་སོགས་འདུལ་བའི་སྐོར་རྒྱ་ཆེར་གསན། བླ་མ་དེ་ཉིད་ལ་མངའ་བའི་ཟབ་ཆོས་ཀུན་ཞུས་ཤིང་བླ་མའི་གསུང་རྩོམ་རེ་འགའི་ཡི་གེ་པའང་མཛད། དགུང་ལོ་ཞེ་གསུམ་པར་བླ་མ་སྐུ་གཤེགས་པས་དགོངས་རྫོགས་ཀྱི་བྱ་བ་ལེགས་པར་བསྒྲུབས། དེ་ནས་གདན་ས་རྒྱ་བསྐྱེད་དང་སྐུ་གསུང་ཐུགས་རྟེན་གསར་བཞེངས་གནང་ཞིང་། བླ་མའི་གསུང་འབུམ་པར་དུ་བརྐོས། དགུང་ལོ་རེ་གཅིག་པར་ས་སྐྱ་དང་། བཀྲ་ཤིས་ལྷུན་པོ། གདན་ས་གསུམ་སོགས་སུ་ཕེབས་ཏེ། དགོན་གནས་དང་རྟེན་ལ་མཆོད་འབུལ། བླ་ཆེན་སོགས་ལ་ཟབ་ཆོས་གང་མང་ཕུལ། དགུང་གྲངས་རེ་གཉིས་པར་ཕྱིར་གདན་སར་ཕེབས། སློབ་མ་གྲགས་ཆེ་བ། ངག་དབང་ཚུལ་ཁྲིམས་དང་། སྒོ་མང་ལྷ་རམས་པ་དགེ་འདུན་རྒྱ་མཚོ། བླ་མ་ཡེ་ཤེས་ཆོས་འཕེལ། སྨིན་གྲོལ་ནོ་མོན་ཧན། ཆབ་མདོ་འཕགས་པ་ལྷ་སོགས་མང་དུ་བྱོན། དགུང་ལོ་དོན་དགུ་པ་༡༨༨༧ ལོར་སྐུ་གཤེགས། གསུང་རྩོམ་ལ་པོ་ཏི་གསུམ་བཞུགས། འཇམ་དབྱངས་རྡོ་རྗེ་དང་། བློ་བཟང་ཆོས་འཕེལ་ནི་ཁོང་གི་མཚན་གྱི་རྣམ་གྲངས་ཡིན་ཞིང་། དངུལ་ཆུ་དྷརྨ་བྷ་དྲའི་ཚ་བོ་ཡིན་པས་དངུལ་ཆུའི་དབོན་པོ་ཞེས་ཀྱང་འབྱུང་།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས་ཕྱོགས་བཏུས་བྱས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
དེ་ལས་མང་བ།...
སི་ཏུ་པཎ་ཆེན་གཙུག་ལག་ཆོས་ཀྱི་སྣང་བ།
དྲ་འཇུག་པ། རིག་མཛོད་རྩོམ་སྒྲིག་པ།སི་ཏུ་བསྟན་པའི་ཉིན་བྱེད་གཙུག་ལག་ཆོས་ཀྱི་སྣང་བ་ནི། ཨ་ཏ་རོང་དུ་གྲགས་པ་ཨ་ལོའི་ཡུལ་གྱི་བྱེ་བྲག་དིང་རིང་སྒང་དུ་འབོད་པར་ཡབ་ངག་དབང་ཚེ་རིང་དང་ཡུམ་གད་བཟའ་ཁྲ་འགུ་མ་གཉིས་ལ་སྲས་སྐུ་མཆེད་བཞི་འཁྲུངས་པའི་ཐོག་མ་སྟེ་ཕྱི་ལོ་ ༡༦༩༩ ལོ་སྟེ་ [རང་རྣམ་དུ། ༤ན༤ན།] ས་ཡོས་ལོའི་ཧོར་ཟླ་བཅུ་གཅིག་པའི་ཚེས་བཅུ་བདུན་། [ཀརྨ་ཚེ་དབང་ཀུན་ཁྱབ་ཀྱིས་མཛད་པའི་ཀཾ་ཚང་བརྒྱུད་པ་རིན་པོ་ཆེའི་རྣམ་ཐར་དུ། ༢༢༤ན༦ན། ས་ཡོས་མགོ་ཟླའི་ཚེས་བཅུ་དྲུག་ཉིན། ཞེས་འབྱུང་།] རེས་གཟའ་ཕུར་བུ། སྐར་མ་ནམ་སོ་སྟེ་གཙུག་ལག་ཕྲེང་བ་སོགས་བཞེད་པའི་རྒྱལ་ཕུར་གྱི་འགྲུབ་སྦྱོར་དངོས་དང་། གཞན་ལྟར་ན་བདུད་རྒྱལ་གྱི་སྦྱོར་བ་ཡོད་པའི་དུས་ཀྱི་སྔ་དྲོ་ཉི་མ་ཤར་བ་དང་དུས་མཚུངས་སུ་སྐྱེས་པར་འདུག །ཅེས་དང་། ཞྭ་ནག་བཅུ་གཅིག་པ། ཡེ་ཤེས་རྡོ་རྗེའི་བསྟན་རྩིས་སུ། འབྲུག་ལོར་སི་ཏུ་སྤྲུལ་སྐུ་སྐུ་འཁྲུངས་ཞེས་འབྱུང་བ་དེར་རང་རྣམ་དུ། [༤ན༦ན།] འདི་ལྟར་གྱི་ཚེ་ལོ་བདག་ཡོས་སུ་འགྲོ་བར་འདུག་ཀྱང་རྒྱལ་བའི་དབང་པོས་འབྲུག་ཏུ་བཀའ་སྩལ་བ་ནི་ཡུལ་ལྷ་ལྡན་གྱི་བདག་པོ་དགེ་ལྡན་ཕོ་བྲང་གི་བཞེད་པ་ཕུག་ཁྱུང་གི་ལུགས་དང་བསྟུན་པར་སྣང་ངོ་། །ཞེས་གསལ་བཤད་གནང་ཡོད་ལ། ཀཾ་ཚང་གི་རྣམ་ཐར་ལས་ཀྱང་། ༢༢༤ན༧ན། ཡེ་ཤེས་རྡོ་རྗེས་མཛད་པའི་བསྟན་རྩིས་ཀྱི་རེའུ་མིག་ཏུ་འབྲུག་ལོར་སི་ཏུ་སྤྲུལ་སྐུ་སྐུ་འཁྲུངས་ཞེས་གནང་བ་ནི་ཡུལ་དབུས་ཀྱི་རྒྱལ་པོ་དགེ་ལྡན་ཕོ་བྲང་གི་ལོ་མགོའི་བཞེད་པ་དང་བསྟུན་པ་དང་། རིག་འཛིན་སྟག་ཤམ་རྡོ་རྗེས་རྗེ་རོལ་པའི་རྡོ་རྗེར་ལུང་བསྟན་གནང་བར། རབ་བྱུང་འབྲུག་གི་མགོ་བོ་ཅན། །དེ་ཡིས་འགྲོ་དོན་སྣ་ཁྲིད་བྱེད། །ཅེས་ལུང་བསྟན་པ་དང་ཡང་འགྲིགས་དགོས་པར་ཡང་མངོན་ནོ། །ཞེས་འབྱུང་བ་ལྟར། རྣམ་ཐར་ཁ་ཤས་སུ་འཁྲུངས་ལོ་ཕྱི་ལོ་ ༡༧༠༠ ལ་བཞེད་པ་གསལ་བར་འགྱུར་རོ། །ཁུ་བོ་བླ་མ་ཀུན་མཁྱེན་གྱིས་མཚན་མགོན་པོ་སྲུང་དུ་བཏགས།
ཡང་སྲིད་ངོས་འཛིན་སོགས་ཀྱི་སྐོར་ལ་དུང་དཀར་ཚིག་མཛོད་དང་གངས་ཅན་མཁས་གྲུབ་རིམ་བྱོན་གྱི་མིང་མཛོད་སོགས་སུ། དགུང་ལོ་གསུམ་པར་སི་ཏུ་སྐུ་ཐོག་བཞི་པའི་ཡང་སྲིད་དུ་ངོས་འཛིན་མཛད་ཅེས་དང་། མིང་མཛོད་སོགས་སུ་སྐུ་ཐོག་བདུན་པའི་ཡང་སྲིད་ཅེས་འབྱུང་བ་དང་། གཞན་དུ་སི་ཏུ་ཆོས་རྒྱལ་མི་ཕམ་ཕྲིན་ལས་རབ་བརྟན་གྱི་ཡང་སྲིད་ཅེས་འབྱུང་བ་དག་ལ། རང་རྣམ་དུ། ༣བ༦ན། མཐར་རྒྱ་ཡུལ་རི་བོ་བྱ་རྐང་ནས་ལྷོ་ཕྱོགས་སུ་ཞག་བཅུ་ཙམ་བགྲོད་པའི་ས། ཚུ་ཤྷོང་སྥུ་ཟེར་བར་ཕེབས་ཏེ་མྱ་ངན་ལས་འདས་པའི་སྐུ་གདུང་གི་མཆོད་རྟེན་ཆུང་ངུ་ཞིག་ཀྱང་ཡོད། དེའི་སྐུ་སྐྱེ་ཕྱི་མ་གླིང་བར་ཚང་གི་དཔོན་མགོན་པོ་ལྷུན་གྲུབ་ཀྱི་སྲས་སུ་འཁྲུངས་ཤིང་། རྒྱལ་དབང་བཅུ་གཅིག་པས་ངོས་འཛིན་དང་མཚན་ལེགས་བཤད་སྨྲ་བའི་ཉི་མ་ཞེས་འདོགས་པར་མཛད་ཀྱང་གླིང་ཚང་བ་རང་གི་འདོད་ཕྱོགས་ཀྱིས་ས་སྐྱའི་ཆོས་སྒོར་བཅུག་པས་སྐུ་ན་ཕྲ་མོ་ཉིད་ནས་གྲོངས། རྒྱུ་མཚན་དེས་བརྒྱུད་པ་རིན་པོ་ཆེ་འདིའི་གྲལ་དུ་མ་ཆུད་ཅིང་། སི་ཏུའི་གོ་སར་ཡང་མ་འབྱོར་བས་སི་ཏུ་ན་རིམ་གྱི་གྲལ་དུ་བགྲང་མི་ཆོག་པ་འདྲ་སྙམ་མོ། །དེའི་སྐྱེ་བ་ཁོ་བོ་ཡིན་པར་གྲགས། ཞེས་འབྱུང་བ་དང་།
ཡང་རང་རྣམ་དུ། ༤བ༡ན། དེ་ནས་བདག་ལོ་གསུམ་དུ་སླེབ་པའི་ཚེ། བླ་མ་ཀུན་མཁྱེན་གྱིས་རྨི་ལྟས་སོགས་ལ་དཔག་ནས་སི་ཏུའི་སྐྱེ་བ་ཡིན་ནམ་སྙམ་པའི་ཐེ་ཚོམ་བྱུང་བས། ཁམས་སྨྱོན་སྐུ་སྐྱེ་དབུས་སུ་འབུལ་སྐྱེལ་ལ་འབྱོན་པར་ཡབ་སྲས་ལ་སྙན་སྒྲོན་ཞུས་ཤིག་པར་བསྐུལ། ཁམས་སྨྱོན་པས་ཀྱང་མཚུར་ཕུར་རྒྱལ་དབང་བཅུ་གཅིག་པ་ཡེ་ཤེས་རྡོ་རྗེ་དེ་ཉིད་གཟིམ་ཆུང་ཆོས་དབྱིངས་ཕོ་བྲང་དུ་བཞུགས་པའི་སྐབས་ཤིག་སྙན་དབང་དུ་ཕུལ་སྐབས། སྐུ་དཔང་དུ་ཉི་མ་ཤར་བ་དང་འགྲིགས་པས། བཀའ་ལས། ད་ལན་རྟེན་འབྲེལ་ཤིན་ཏུ་ལེགས། སི་ཏུ་རིན་པོ་ཆེ་སྡེ་དགེར་འཁྲུངས་ཞེས་ཏྲེ་བོ་ཆོས་རྗེ་ཡང་གསུང་གི་ཡོད་ཚོད་འདུག་ཅེས་ཕེབས། ཞེས་འབྱུང་། དགུང་ལོ་ལྔའི་སྐབས་ཡབ་ཀྱིས་ཡི་གེ་བསླབས་པས་ཞག་བདུན་ནས་སྦྱོར་ཀློག་ཐུབ་པ་བྱུང་།
ཤིང་སྤྲེལ་ལོར་རྒྱལ་དབང་ཀརྨ་པ་བཅུ་གཅིག་པའི་ཡང་སྲིད་འཚོལ་དུ་འོང་བ་རྣམས་ཀྱིས་ཞར་ལ་ཁྲུམས་ཟླའི་ཚེས་ལྔར་སི་ཏུ་གོང་མའི་ཕྱག་ཐམ་ངོས་འཛིན་སོགས་ཀྱིས་བརྟག་དཔྱད་གནང་བ་དང་། ཡང་སྲིད་དུ་ངེས་རྙེད་ཀྱིས་སྔར་རྒྱལ་དབང་ཀརྨ་པ་བཅུ་གཅིག་པས་གནང་བའི་ཕྱག་རྫས་སོགས་ཀྱང་གནང་། དགུང་ལོ་བདུན་ངོ་མཐོང་ཙམ་ནས་དགོན་པར་ཆོས་སྤྱོད་སོགས་བློ་འཛིན་གནང་བ་དང་། བླ་མ་ཀུན་མཁྱེན་གྱི་མདུན་ནས་དབང་ཁྲིད་སོགས་གང་མང་ཞིག་ཀྱང་གསན།
མེ་ཁྱི་ལོར་ཞྭ་དམར་བརྒྱད་པས་བརྟན་བཞུགས་སྨོན་ཚིག་དང་སི་ཏུ་ཆོས་ཀྱི་འབྱུང་གནས་ཕྲིན་ལས་ཀུན་ཁྱབ་ཡེ་ཤེས་དཔལལ་བཟང་པོ་ཞེས་པའི་མཚན་སོགས་གནང་། མེ་ཕག་ལོར་ཀརྨ་པ་བྱང་ཆུབ་རྡོ་རྗེ་དང་ཐོག་མར་མཇལ། དྲུང་པ་བསྟན་པ་རྣམ་རྒྱལ་ལས་མི་བསྐྱོད་ཞབས་ཀྱི་ཁྲིད་ཐུང་པོ་ཏི་གཉིས་ཀྱི་ལུང་སོགས་ཞུས།
ཆུ་འབྲུག་གནམ་ལོ་གསར་ཚེས་ནས་དབུས་སུ་ཕེབས་པར་གྲ་སྒྲིག་བྱས། དབུས་ནས་རྒྱལ་བ་[ཞྭ་དམར་ནག]ཡབ་སྲས་ཀྱི་བཀའ་ཤོག་ལེ་ཚན་རྣམས་དང་། མཆོག་གི་སྤྲུལ་སྐུའི་སྐུ་ཞབས་ཀྱི་དཀའ་ཤོག་བཅས་ཕེབས་པ་འབྱོར། སྨིན་ཟླའི་ཚེས་བཅུ་གཉིས་ལ་ཞྭ་དམར་བརྒྱད་པ་ཐོག་མར་མཇལ། མཚུར་ཕུར་ཕེབས། ཆུ་སྦྲུལ་ལོའི་ཆོ་འཕྲུལ་ཟླ་བའི་ཚེས་བཅོ་ལྔར་ཞྭ་དམར་བརྒྱད་པའི་དྲུང་ནས་ཡོངས་རྫོགས་དགེ་བསྙེན་གྱི་སྡོམ་པ་དང་བར་མ་རབ་བྱུང་གི་སྡོམ་པ་མནོས། མཚན་ཀརྨ་བསྟན་པའི་ཉིན་བྱེད་གཙུག་ལག་ཆོས་ཀྱི་སྣང་བར་གསོལ། ནག་པའི་ཉར་རྒྱལ་དབང་བྱང་ཆུབ་རྡོ་རྗེ་གསེར་ཁྲིར་མངའ་གསོལ་དང་བསྟུན་རྗེ་འདི་ཡང་གསེར་ཁྲིར་མངའ་གསོལ་དང་སྐུ་གོང་མའི་གསེར་ཐམ་དང་སྐུ་ཆས་སོགས་སྩལ། ཉི་སྡེ་སྤྲུལ་སྐུ་ལས་རྗེ་མཁའ་སྤྱོད་པ་སོགས་ཀྱི་བཀའ་འབུམ་གྱི་ལུང་སོགས་གསན། ཞྭ་དམར་དྲུང་ནས་ལྔ་བསྡུས་གཟའ་སྒྲ་ཞག་གསུམ་རྣམ་དབྱེ་སོགས་ཀྱི་རི་མོ་ཞུས། སྐྱེད་ཚལ་གྱི་དྲུང་རམ་བསོད་ནམས་རྣམ་རྒྱལ་ལས་བསྡུས་གྲྭ་བསླབས། གར་དབང་ཐམས་མཁྱེན་པའི་དྲུང་ནས་བཀའ་འགྱུར་གྱི་ལུང་སོགས་ཆོས་བཀའ་མང་དུ་ཞུས། ཀོང་པོ་སྤྲུལ་སྐུ་ལས་ལྷ་བྲིས་དང་། ལན་ཝར་སོགས་སྦྱངས།
ཁྱད་པར་དུ་ཀརྨ་པ་ཞྭ་དམར་ནག་གཉིས་ཀྱི་མདུན་ནས་བཀའ་བརྒྱུད་པའི་ཆོས་ཀྱི་སྐོར་དང་། ཏྲེ་ཧོར་རིན་པོ་ཆེའི་མདུན་ནས་རྙིང་མའི་ཆོས་སྐོར་གསན། དགུང་ལོ་ཉེར་གསུམ་གྱི་སྐབས་དབུས་སུ་ཐེངས་གཉིས་པ་ཕེབས་པ་དང་། ཀརྨ་ཞྭ་དམར་ནག་དང་ལྷན་དུ་བལ་ཡུལ་དུ་ཕེབས། དེར་རྒྱ་གར་དང་བལ་ཡུལ་གྱི་མཁས་དབང་ཀ་ལ་ནྭ་ཡ་ཛ་ཡ་མང་ག་སོགས་དང་བགྲོ་གླེང་ཡུན་རིང་མཛད། བོད་དུ་ཚུར་ཕེབས་རྗེས་ཞྭ་དམར་བརྒྱད་པའི་མདུན་ནས་དགེ་སློང་གི་སྡོམ་པ་མནོས། རྒྱལ་མཆོག་བདུན་པ་བསྐལ་བཟང་རྒྱ་མཚོའི་མདུན་ནས་ལམ་རིམ་གྱི་ཁྲིད་སོགས་གསན་པ་སོགས། ཀརྨ་པ་ཞྭ་དམར་ནག།། ཏྲེ་ཧོར་རིན་པོ་ཆེ། རྒྱལ་བ་བསྐལ་བཟང་རྒྱ་མཚོ་སོགས་བོད་ཀྱི་ཆོས་བརྒྱུད་རིས་མེད་ཀྱི་མཁས་པ་མང་པོ་བླ་མར་བསྟེན་ནས་རིས་མེད་ཀྱི་གྲུབ་མཐའ་ཁག་ལ་སྦྱངས། སྒྲ་དང་སྙན་ངག །རྩིས་དཀར་ནག །གསོ་རིག །བྲིས་འབུར་གྱི་ཆ་ཚད། ཡི་གེ་དཀར་ནག་གི་ཡིག་གཟུགས་ཚད་ལྡན་འབྲི་བ་སོགས་ཐུན་མོང་གི་རིག་གནས་ཀུན་ལ་མཁས་པའི་ཡང་རྩེར་སོན། སྔར་བསྒྱུར་ལ་འགྱུར་བཅོས་དང་། སྒྲ་དང་སྙན་ངག་མངོན་བརྗོད་སོགས་སྔོན་མེད་རྣམས་གསར་བསྒྱུར་མཛད་དེ་བོད་ཀྱི་རིག་གནས་ཆ་ཚང་ཞིང་ཁུངས་ཐུབ་ཚད་ལྡན་དུ་མཛད།
དགུང་ལོ་སོ་དྲུག་པར་དབུས་སུ་ཐེངས་གསུམ་པ་ཕེབས། དགུང་ལོ་ཞེ་བརྒྱད་པར་དབུས་སུ་ཐེངས་བཞི་པ་ཕེབས། དགུང་ལོ་ང་གཅིག་པར་དབུས་སུ་ཕེབས་ཤིང་རིས་མེད་བླ་སྤྲུལ་སོགས་གདུལ་བྱ་མང་པོར་ཆོས་སྦྱིན་གནང་། ཕྱི་ལོ ༡༧༢༧ ལོར་དཔལ་སྤུངས་དགོན་པ་གསར་འདེབས་མཛད་ཅིང་རྟེན་དང་བརྟེན་པ་གསར་བཞེངས་མཛད། ཁོང་ནི་སི་ཏུའི་སྐུ་ཕྲེང་བརྒྱད་པ་ཡིན། ཁོང་གི་སློབ་མ་གྲགས་ཆེ་བ་ནི་ཞྭ་དམར་ཆོས་གྲུབ་རྒྱ་མཚོ་དང་། ཁམས་སྤྲུལ་བསྟན་འཛིན་ཆོས་ཀྱི་ཉི་མ། དཔའ་བོ་གཙུག་ལག་དགའ་བ། ཏྲེ་ཧོར་ཆོས་ཀྱི་དབང་པོ། རིག་འཛིན་ཚེ་དབང་ནོར་བུ་སོགས་བྱུང་། ཁོང་གི་མཚན་གྱི་རྣམ་གྲངས་ནི་མགོན་པོ་སྲུང་། ཆོས་ཀྱི་འབྱུང་གནས་འཕྲིན་ལས་ཀུན་ཁྱབ་ཡེ་ཤེས། ཀརྨ་བསྟན་པའི་ཉིན་བྱེད་གཙུག་ལག་ཆོས་ཀྱི་སྣང་བ་བཅས་སོ། །དགོངས་ལོ་དོན་དྲུག་པར་ཆིང་གོང་མས་གདན་ཞུས་ལྟར་ཤར་རྒྱལ་མོ་ཚ་བ་རོང་དུ་ཕེབས་པའི་ལམ་བར་དུ་ཕྱི་ལོ་ ༡༧༧༤ ལོར་སྙུན་བཞེས་ནས་གཤེགས་སོ། །
ཁོང་གི་གསུང་རབ་ནི་བསྟན་བཅོས་བརྒྱད་ཅུ་གྱ་གསུམ་གཅིག་ཏུ་བསྡུས་ཏེ། ཀ་ནས་ཨ་བར་པོ་ཏི་བཅུ་བཞིར་བྱས་ནས་ཁོང་གིས་གསར་དུ་བཏབ་པའི་དཔལ་སྤུངས་དགོན་དུ་པར་བརྐོས་ཡོད། མཚན་ལ་<<ཆོས་འབྱུང་བཀའ་འབུམ>>ཟེར་ཞིང་། ཤོག་སྡེབས་མདའ་ཚད་མ་ལྔ་སྟོང་ཉིས་བརྒྱ་བཅོ་བརྒྱད་ཡོད། དེ་དག་གི་ཁྲོད་ནས་བརྒྱ་ཆ་བརྒྱད་ཅུ་ལྷག་ནི་ཐུན་མོང་གི་རིག་གནས་ཀྱི་སྐོར་ཡིན།
༢༠༡༧.༡༠.༢༨ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་ཕྱོགས་བཏུས་བྱས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
པྲ་ཏི་རིན་ཆེན་དོན་འགྲུབ།
དྲ་འཇུག་པ། རིག་མཛོད་རྩོམ་སྒྲིག་པ།པྲ་ཏི་རིན་ཆེན་དོན་འགྲུབ་ནི། དུས་རབས་བཅུ་བདུན་པའི་སྨད་ཙམ་ལ་དཔའ་རིས་ཡུལ་དུ་སྐུ་འཁྲུངས། གཞོན་དུས་ནས་སེར་བྱེས་གྲྭ་ཚང་དུ་ཆོས་ཞུགས་གནང་ཞིང་གཞུང་ཆེན་ལ་སློབ་གཉེར་དཔྱིས་ཕྱིན་པར་མཛད་དེ་དགེ་བཤེས་ཀྱི་མཚན་རྟགས་བཞེས། ཞོགས་དོན་ཡོད་མཁས་གྲུབ་དང་། རྒྱལ་བ་བདུན་པ་མཆོག །ཕུར་ལྕོག་ངག་དབང་བྱམས་པ། སྒྲུབ་ཁང་དགེ་ལེགས་རྒྱ་མཚོ། སེ་ར་པཎྜིཏ་མཛོ་མོ་མཁར་བ་སོགས་བཤེས་གཉེན་མང་དུ་བསྟེན་ནས་མདོ་སྔགས་ཀྱི་ཟབ་ཆོས་གང་མང་ལ་གསན་བསམ་གནང་ཞིང་། ཁོང་གིས་ཞོགས་དོན་ཡོད་མཁས་གྲུབ་ལ་ལྟ་བའི་སྐོར་གྱི་དྲི་བ་གནང་བའི་དྲིས་ལན་དམ་པ་དེ་ཉིད་ཀྱི་གསུང་འབུམ་དུ་བཞུགས། སློབ་གཉེར་གྱི་སྐབས་སུ། ཆོས་མིན་གྱི་བྱ་བའི་ཆེད་དུ་ཁམས་ཚན་གྱི་ཐེམ་པའི་ཕྱི་རུ་མི་འབྱོན་པའི་ཐུགས་དམ་བཅས་ཏེ་དཔེ་གཟིགས་གནང་བར་ཡང་གྲགས། གཞན་ཕུར་ལྕོག་བྱམས་པ་རིན་པོ་ཆེ་ལས་འཇམ་དབྱངས་དཀར་པོའི་སྒྲུབ་ཐབས་ཀྱི་མན་ངག་ཞུས་ཏེ་བྲག་ཡེར་པར་བསྒྲུབས་པས། འཇམ་དབྱངས་དཀར་པོའི་ཞལ་གཟིགས་བྱུང་བས་པྲ་ཏི་འཇམ་དབྱངས་དཀར་པོ་ཞེས་ཀྱང་གྲགས་པར་བཤད། ཡང་སྐབས་དེར། སེར་བྱེས་གྲྭ་ཚང་གི་མཁས་པའི་ཁྲོད་དུ། གནས་སྨྲ་བུ་བས་གང་ཟག་རང་རྐྱ་ཐུབ་པའི་རྫས་ཡོད་ཀྱི་བདག་གིས་སྟོང་པ་ཁས་ལེན་མི་ལེན་གྱི་རྩོད་པ་ཞིག་བྱུང་བར། རྗེ་ངག་དབང་བྱམས་པ་དང་པྲ་ཏི་རིན་པོ་ཆེ་རྣམ་པ་གཉིས་ཀྱི་དགོངས་ཚུལ་ཅུང་ཟད་མ་མཐུན་པ་བྱུང་རྐྱེན། སྐབས་དེར་ལྕང་སྐྱ་རོལ་བའི་རྡོ་རྗེ་ལ་ཞུས་པས། ལྕང་སྐྱ་རོལ་བའི་རྡོ་རྗེས་ཁོང་རྣམ་པ་གཉིས་ལ་ཁ་ཐུག་དེར་ལན་མ་གནང་བར། ཁོང་རྒྱ་ནག་ཏུ་ཕེབས་ནས་དཔེ་ཀློག་བརྒྱབ་སྟེ་ལན་གནང་ཆོག་ཅེས་བཀའ་གནང་སྟེ། ཕྱིས་སུ་རྒྱ་ནག་ནས་ལྕང་སྐྱ་རིན་པོ་ཆེས་༼གྲུབ་མཐའ་ཐུབ་བསྟན་ལྷུན་པོའི་མཛེས་རྒྱན།༽བརྩམས་ཏེ་ལན་གནང་བར་བཤད་ལ། བསྟན་བཅོས་དེར་པྲ་ཏི་རིན་ཆེན་དོན་གྲུབ་ཀྱི་དགོངས་ཚུལ་དང་མཐུན་པར་གསུངས་པ་དང་། རྗེ་ངག་དབང་བྱམས་པས་ཐད་ཀར་ལྕང་སྐྱ་རིན་པོ་ཆེར་དགག་པ་གནང་བར་སྟབས་མ་བདེ་བར། ༼ལྟ་བ་དཀར་བཏགས་ཀྱི་ཕྱག་རྒྱ་བཞིའི་ནང་གི་བདག་མེད་པའི་དོན་གཏན་ལ་འབེབས་པ་ཡིད་ཀྱི་གདུང་སེལ།༽ ཞེས་པ་དེ་བརྩམས་པར་ཡང་གྲགས། ཁོང་གི་གསུང་རྩོམ་ལ། བླང་དོར་རྣམ་པར་ཕྱེ་བའི་གཏམ་ཀུན་བཟང་ལམ་སྲོལ་ཞེས་པ་དང་། ཏིང་ངེ་འཛིན་སྒྲུབ་ཐབས་ཏིང་འཛིན་རྒྱན་གྱི་སྣང་བ། བྱང་ཆུབ་ལམ་རིམ་གྱི་ཉམས་ཁྲིད་བྱང་ཆུབ་རྒྱན་ཕྲེང་། བྱ་དཀའ་བའི་སྙན་ཚིག་དབྱངས་ཅན་ངག་གི་རོལ་མཚོ། དྲང་ངེས་ཀྱི་ཟིན་བྲིས། བསྟན་འབར་མའི་ཚིག་དོན་གསལ་བར་བྱེད་པའི་རྣམ་བཤད་ཐེག་མཆོག་རྒྱན་གྱི་ཕྲེང་བ། བོད་ཀྱི་བརྡའི་བསྟན་བཅོས་སུམ་ཅུ་པའི་འགྲེལ་པ་ཀུན་ཏུ་བཟང་པོའི་དགོངས་རྒྱན། རྟགས་འཇུག་བཤད་སྦྱར་ཚིགས་བཅད་མ། དག་ཡིག་སྨྲ་བའི་སྒྲོན་མེ། སྒྲའི་ང་རོ་འདྲེན་ཚུལ་རྨད་བྱུང་དོན་གྱི་བདུད་རྩིའི་རོ་འཛིན་བཅས་པོད་གཅིག་བཞུགས་སོ། །མཚན་ཟུར་གྱི་ཡི་གེ་ལ་འབྲི་ཚུལ་མི་མཐུན་པ་ཁ་ཤས་ཡོད་པ། པྲ་ཏི། པྲ་སྟི། བྲ་ཏི་སོགས་དང་། རིན་ཆེན་དོན་འགྲུབ་དང་། རིན་ཆེན་དོན་གྲུབ། མཚན་ཟུར་ཕྱི་མའི་དོན་འགྲུབ་དང་དོན་གྲུབ་གཉིས་ནི་ཁ་ཤས་ཀྱིས་སྟོན་པ་ཐུགས་རྗེ་ཅན་ཁྱིམ་ན་བཞུགས་པའི་གནས་སྐབས་ཀྱི་མཚན་རྒྱལ་བུ་དོན་གྲུབ་ཅེས་པ་དང་འབྲེལ་ཏེ་དེ་གཉིས་གདམ་ང་ཡིན་པར་བཤད་ན་ཡང་། སྟོན་པའི་མཚན་ལ་ངེས་པར་དུ་དོན་གྲུབ་ཅེས་འབྲི་དགོས་པ་ནི་མཚན་དེའི་བྱུང་རིམ་ལས་གསལ་བོར་ཤེས་ཐུབ། དེ་ཡང་རྒྱལ་བུ་འཁྲུངས་པས་དོན་ཐམས་ཅད་གྲུབ་པས་ན་ཡབ་ཟས་གཙང་མ་ཐུགས་མཉེས་ཏེ་དོན་གྲུབ་ཅེས་བཏགས་པ་ཡིན། པྲ་ཏིའི་མཚན་ཟུར་དེ་ནི་སྤྱིར་བཏང་ང་ཚོས་མིང་འདོགས་སྟངས་ལྟར་སྨོན་འདུན་ཞིག་དང་འབྲེལ་བ་ཤུགས་ཆེ་བས་དོན་འགྲུབ་ཅེས་པ་བདེ་ལ། མཚན་ཟུར་དང་པོ་དེ་ཡང་མཁས་པའི་དབང་པོ་དམུ་དགེ་བསམ་གཏན་མཆོག་གིས་མཛད་པའི་བོད་ཀྱི་ལོ་རྒྱུས་སུ་གསལ་བ་ལྟར་པྲ་ཏིའམ་པྲ་སྟི་ཞེས་པར་ཁུངས་འདུག་སྙམ་མོ། །ཁོང་གི་འཁྲུངས་འདས་ཀྱི་ལོ་ཚིགས་སོགས་ལོ་རྒྱུས་རྣམས་སུ་ཁ་གསལ་མེད་རྐྱེན་འདི་ཙམ་ལས་འགོད་ཐབས་མ་བྱུང་།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
སློབ་དཔོན་ཐོན་མི།
དྲ་འཇུག་པ། རིག་མཛོད་རྩོམ་སྒྲིག་པ།ཕྱི་ལོ་༦༡༩ ལོར་གཡོར་བོ་ཡུལ་དགུའི་ནང་ཚན་ཐུ་ཞེས་པའི་ས་ཆར་བློན་པོ་ཐོན་མི་ཨ་ནུ་ར་ག་ཏའི་སྲས་སུ་སྐུ་འཁྲུངས། ཁོང་ཤེས་རབ་རྣོ་བས་དགུང་ལོ་བཅོ་ལྔ་པར་རྒྱལ་པོ་སྲོང་བཙན་སྒམ་པོས་རྒྱ་གར་དུ་མངགས་ནས་ལོ་ངོ་བདུན་གྱི་རིང་དུ་བྲམ་ཟེ་ལི་བྱིན་ཀ་ར་དང་ལྷ་རིག་པའི་སེང་གེ་སོགས་བསྟེན་ནས་ཐུན་མོང་དང་ཐུན་མོང་མ་ཡིན་པའི་རིག་གནས་ལ་སྦྱངས་པ་དཔྱིས་ཕྱིན་པ་མཛད་ནས་བོད་དུ་ཕེབས། སྐུ་མཁར་མ་རུར་མཚམས་ལ་བཞུགས་ནས་རྒྱ་ཡིག་ལྔ་བཅུ་ཐམ་པ་ལས་བོད་ཡིག་སུམ་ཅུ་གཏན་ལ་ཕབ་སྟེ་དབྱངས་བཞི་དང་གསལ་བྱེད་སུམ་ཅུའི་བདག་ཉིད་ཅན་གྱི་བོད་ཀྱི་ཡིག་གཟུགས་གསར་བཟོ་ལེགས་པར་མཛད་དེ། ཐོག་མར་རྒྱལ་པོ་སྲོང་བཙན་སྒམ་པོར་ཡི་གེ་བསླབས་ཤིང་། ཕྱིས་སུ་རྒྱལ་པོས་མ་ཎི་བཀའ་འབུམ་ཞེས་པའང་མཛད་ཡོད། རྒྱལ་བློན་ཐམས་ཅད་ཞལ་འཛོམས་ཏེ་དགྱེས་སྟོན་ལ་རོལ་སྐབས་རྒྱལ་པོ་སྲོང་བཙན་སྒམ་པོ་ལ་བྱ་དཀའ་བའི་ལམ་ནས་དྲངས་པའི་ཡིག་ཕུད་ཐོག་མར་ཕུལ་ཞིང་། བློན་པོ་གཞན་གྱི་ཕྲག་དོག་གཞོམ་ཕྱིར་མགུར་བཞེངས་པའང་ཡོད། བློན་པོ་མགར་གྱི་རོགས་སུ་བལ་ཡུལ་དུ་ཕེབས་ནས་བལ་བཟའ་ཁྲི་བཙུན་བོད་དུ་གདན་འདྲེན་ཞུས། ཁོང་ནི་རྒྱལ་པོ་སྲོང་བཙན་སྒམ་པོའི་བློན་པོ་གཙོ་བོ་ཞིག་ཡིན་ལ་མཛངས་མི་བདུན་གྱི་བཞི་པ་ཡིན། ཁོང་གི་གསུང་རྩོམ་ནི། སུམ་ཅུ་པ། རྟགས་འཇུག །སྡེབ་སྦྱོར་སྒྲིག་པའི་གཞི་མ། ཐོན་མིའི་མདོ་རྫིའི་སྒྲ་མདོ་བཅས་བརྡ་སྤྲོད་ཀྱི་གཞུང་བརྒྱད་མཛད་པར་གྲགས་ལ། བསྒྱུར་རྩོམ་ནི་སྤྱན་རས་གཟིགས་ཀྱི་མདོ་རྒྱུད་ཉེར་གཅིག་དང་། འདུས་པ་རིན་པོ་ཏོག་གི་གཟུངས། ཟླ་བ་སྒྲོན་མེའི་མདོ་སྟེ་མདོ་ཏིང་ངེ་འཛིན་རྒྱལ་པོ། མདོ་སྡེ་དཀོན་མཆོག་སྤྲིན། དམ་པ་ཏོག་དཀར་གྱི་མདོ། དགེ་བ་བཅུའི་མདོ། ཤེར་ཕྱིན་སྟོང་ཕྲག་བརྒྱ་བ། པང་ཀོང་ཕྱག་བརྒྱ་པ། ཙིནྟ་མ་ཎིའི་གཟུངས་བཅས་ཡོད། འདས་ལོ་མི་གསལ་ཞིང་འཁྲུངས་ལོ་ལའང་དཔྱད་རྒྱུ་ཡོད་ལ། བོད་ཡིག་གསར་དུ་བཟོས་མིན་སོགས་ཀྱི་སྐོར་ལའང་མཁས་པ་སོ་སོའི་བཞེད་པ་མི་མཐུན་པ་མང་ན་ཡང་འདིར་ཡོངས་གྲགས་ཀྱི་ལོ་རྒྱུས་མདོར་བསྡུས་ཤིག་ལས་བཀོད་མེད་ལ། སློབ་དཔོན་འདིའི་རྣམ་ཐར་སྐོར་ལོ་རྒྱུས་དང་བརྡ་སྤྲོད་ཀྱི་གཞུང་མང་པོར་ཡོད་ན་ཡང་ཆ་ཚང་ཞིང་རྒྱས་པར་ནི། གནས་ལྔ་རིག་པའི་དབང་ཕྱུག་ཆེན་པོ་ཚེ་ཏན་ཞབས་དྲུང་རིན་པོ་ཆེའི་ཐོན་མིའི་ཞལ་ལུང་དུ་གསུངས་འདུག་པས་དེར་གཟིགས་པར་ཞུ།
༢༠༡༧.༡༡.༠༣.ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
སློབ་དཔོན་ཤཱཀྱ་འོད།
དྲ་འཇུག་པ། རིག་མཛོད་རྩོམ་སྒྲིག་པ།སློབ་དཔོན་ཤཱཀྱ་འོད་ནི། རྒྱན་དྲུག་མཆོག་གཉིས་ཀྱི་ཡ་གྱལ་དང་། འདུལ་བ་ལ་ཤིན་ཏུ་མཁས་ཤིང་འདུལ་བའི་བསྟན་པ་ལ་ཧ་ཅང་བཀའ་དྲིན་ཆེ་བ་ཞིག་ཡིན།
ལོ་རྒྱུས་ཁ་ཤས་སུ་རྒྱ་གར་འཕགས་པའི་ཡུལ་གྱི་ནུབ་ཕྱོགས་སུ་སྐུ་འཁྲུངས་པར་བཤད། སློབ་དཔོན་འདིའི་ལོ་རྒྱུས་སམ་ཁོང་གི་སྐོར་ཆོས་འབྱུང་སོགས་སུ་གསལ་པོ་མེད་པ་དང་། དུས་སྐབས་གང་དུ་བྱུང་མིན་ཡང་མི་གསལ་ཞིང་། ཇོ་ནང་ཀུན་མཁྱེན་གྱི་ཆོས་འབྱུང་དུ། རྒྱལ་པོ་གཽ་པཱ་ལས་རྒྱལ་སྲིད་ལོ་བཞི་བཅུ་ཞེ་ལྔ་བྱས། རྒྱལ་པོ་འདིའི་སྐུ་ཚེའི་རིང་ལ་ཞི་བ་འོད་དང༌། བསོད་ནམས་གྲགས་ཀྱི་སློབ་མ། སློབ་དཔོན་ཤཱཀྱ་འོད་ནུབ་ཕྱོགས་སུ་འཁྲུངས་ནས་ཁ་ཆེའི་ཡུལ་དུ་འགྲོ་དོན་མཛད། ཅེས་དང་། རྒྱལ་པོ་འདིའི་རིང་ལ་ནག་པོ་སྤྱོད་པ་ཆུང་བ་བྱོན། སྐུ་ཚེ་རིང་བས་རྒྱལ་པོ་དྷརྨ་པཱ་ལའི་རྗེས་སུའང་ཅུང་ཟད་བཞུགས་སོ། །སྐབས་འདིར་སློབ་དཔོན་ཤཱཀྱ་འོད་ཀྱི་སློབ་མ་ཤཱཀྱ་བཤེས་གཉེན་ཞེས་བྱ་བ་ཡང་བྱུང༌། ཅེས་ཀྱང་འབྱུང་ངོ་། །
དཔེ་ཆ་མང་པོའི་ནང་དུ་མཆོག་གཉིས་ཀྱི་ཡ་གྱལ་སློབ་དཔོན་ཤཱཀྱ་འོད་སློབ་དཔོན་ཡོན་ཏན་འོད་ཀྱི་སློབ་མར་བཤད་ཀྱང་། བུ་སྟོན་ཆོས་འབྱུང་དུ། ཡོན་ཏན་འོད་ཀྱི་སློབ་མ་ཤཱཀྱ་འོད་ཡིན་ཟེར་བ། མི་བདེན་ཏེ། འོད་ལྡན་ལས། བདག་གི་མཁན་པོ་མ་ག་དྷར་གནས་རྒྱན་དུ་གྱུར་པ་གྲགས་ཐོབ་པ། །བསོད་ནམས་གྲགས་པ་ལས་ནི་བདག་གིས་མཉན་ནས་རང་གི་འདུལ་བའི་ཆོ་ག་ཡི། །རྣམ་པར་བཤད་འདི་གསུམ་རིག་རྣམས་ཀྱིས་བཤད་པའི་ཕྱོགས་ཀྱི་གཞི་མཛད་བསྟན་པ་ཡིན། །ཞེས་པ་དང་། གཞན་ཡང་། བླ་མ་དག་ནི་རིང་ན་བཞུགས་པ་གྲགས་པས་རྣམ་པར་ཁྱབ་པ་ཞི་བའི་འོད་ཀྱིས་བདག །དྲན་པས་དགོངས་པ་མཛད་པར་གྱུར་ཅིག་སྙམ་ནས་བདག་གིས་འགྲེལ་པ་དོན་གསལ་བྱས་པ་ཡིན། །ཞེས་བསོད་ནམས་གྲགས་དང་། ཞི་བ་འོད་ཀྱི་སློབ་མར་བཤད་དོ། །དེའི་སློབ་མ་ཤཱཀྱ་བཤེས་གཉེན་ཡིན་པར་སུམ་བརྒྱ་པར་བཤད་དོ། །ཤཱཀྱ་འོད་ཀྱིས་སུམ་བརྒྱ་པ་དང་དེའི་འགྲེལ་པ་འོད་ལྡན་མཛད་དོ། །འདུལ་བའི་མདོ་ལ་ཆོས་ཀྱི་བཤེས་གཉེན་གྱིས་རྒྱ་ཆེར་འགྲེལ་མཛད་ཅིང་། དེ་ཡོན་ཏན་འོད་ཀྱི་སློབ་མར་ཁ་ཅིག་འདོད་དོ། །ཤཱཀྱ་འོད་ཀྱི་སློབ་མ་སེང་གེའི་གདོང་ཅན། དེའི་སློབ་མ་ཛི་ན་མི་ཏྲ་ཡིན་ཟེར་བའང་བརྟག་པར་བྱའོ། །ཞེས་འབྱུང་ངོ་། །
ཡང་ཁ་ཤས་ཀྱིས་སློབ་དཔོན་དབྱིག་གཉེན་གྱི་སློབ་མ་འདུལ་བ་རང་ལས་མཁས་པ་ལ་སློབ་དཔོན་ཡོན་ཏན་འོད་ཀྱི་ཚབ་ཏུ་ཤཱཀྱ་འོད་བགྲངས་པ་ཡོད་ཀྱང་དེ་མིན་པར་གོང་དུ་འོད་ལྡན་གྱི་ལུང་ཉིད་ཀྱིས་གྲུབ་ཅིང་། ཆོས་འབྱུང་མཁས་པའི་དགའ་སྟོན་སོགས་སུ། འདུལ་བ་རང་ལས་མཁས་པ་ཡོན་ཏན་འོད་ཅེས་འབྱུང་བས་ཀྱང་ཤེས་སོ། །ཡང་ཆོས་འབྱུང་དེར་། འདུལ་བའི་བཤད་རྒྱུད་ནི། བསྟན་པའི་གཏད་རབས་བདུན་གྱི་འོག་ཏུ་ཕྱིར་མི་འོང་། གློས་མི་འབེབས། ཡོན་ཏན་འོད། ཤཱཀྱ་འོད། ཆོས་ཀྱི་བཤེས་གཉེན་གཉིས། སེང་གེ་གདོང་ཅན། དེས་དཱ་ན་ཤཱི་ལ་དང་ཛི་ན་མི་ཏྲ་གཉིས་ཞེས་སྟོད་འདུལ་སྨད་འདུལ་གཉིས་མཐུན་པར་ཁས་ལེན་པར་སྣང་ལ་སྟོན་པ་འདས་ནས་ལོ་དགུ་བརྒྱ་ན་ཐོགས་མེད་བྱོན་པའི་ལོ་ཚིགས་དང་སྦྱར་ན་གློས་མི་འབེབས་དང་ཡོན་ཏན་འོད་ཀྱི་བར་དུ་འགའ་ཞིག་ཆད་པར་དོགས་སོ། །ཞེས་དང་། བོད་གཞན་རྣམས་ཡོན་ཤཱཀ་གཉིས་མཆོག་གཉིས་དང་གཞན་དྲུག་རྒྱན་དྲུག་དུ་འདོད་ཀྱང་ཤེས་བྱེད་མེད་ལ། ཀླུ་སྒྲུབ་ཐོགས་མེད་གཉིས་མཆོག་དང་གཞན་དྲུག་རྒྱན་དྲུག་དུ་རྗེ་ཆོས་གྲགས་རྒྱ་མཚོ་བཞེད་པ་ཉིད་ལེགས་ལ། ཀླུ་སྒྲུབ་ཐོགས་མེད་ནི་ལུང་བསྟན་མང་ཞིང་ཤིང་རྟའི་སྲོལ་འབྱེད་ཡིན་པས་མཆོག་དུ་གྲུབ་ཅིང་མགོན་པོ་མངོན་བྱུང་གི་རྒྱུད་ཀྱི་ལུང་བསྟན། པཎྜི་ཏ་རྣམས་ཀྱི་གཙོ་བོར་གྱུར་པ་ཆོས་ཀྱི་གྲགས་པ་ཞེས་གྲགས་པ་འདི་དང་སྐྱེས་བུ་དྲུག་བསྟན་པ་ལ་ཕན་པ་ཚངས་པར་སྤྱོད་པ་ལ་གནས་པ་རྣམས་ཀྱིས་གྲུབ་བོ། །ཞེས་པ་འདིས་རྒྱན་དྲུག་ཐོན་ནོ། །དེས་ན་ཨཱḈḴ་དེ་ཝ་དང་དབྱིག་གཉེན་ཕྱོགས་གླང་ཆོས་གྲགས་ཡོན་ཤཱཀ་གཉིས་སྟེ་དྲུག །ཀླུ་སྒྲུབ་ཐོགས་མེད་སྟེ་མཆོག་གཉིས་སོ། །ཞེས་ཀྱང་འབྱུང་ངོ་། །
གསུང་རྒྱུན་རྣམས་སུ་ཡོན་ཤཱཀ་གཉིས་མཆོག་གཉིས་ལ་བགྲངས་པ་ནི། འདུལ་བའི་བསྟན་པ་ལ་ཕྱག་རྗེས་ཆེ་ཞིང་ཆོས་འདུལ་བ་ནི་ཀུན་གྱི་མཆོག་ཡིན་པས་སོ། །ཞེས་གྲགས་སོ། །
སློབ་དཔོན་འདིས་མཛད་པའི་བསྟན་བཅོས་ལས་བོད་དུ་བསྒྱུར་ཞིང་གྲགས་ཆེ་བ་ནི། དགེ་ཚུལ་གྱི་ཚིག་ལེའུར་བྱས་པ་སུམ་བརྒྱ་པ་དང་། དེའི་རང་འགྲེལ་འོད་ལྡན་བམ་པོ་བརྒྱད་པ་གཉིས་དུས་རབས་བརྒྱད་པའི་མཇུག་ཏུ་རྒྱལ་པོ་ཁྲི་སྲོང་ལྡེའུ་བཙན་གྱི་དུས་སུ་ལོ་ཙཱ་བ་རྩངས་དེ་ཝནྡྲ་རཀྵི་ཏ་སྟེ་ལྷའི་དབང་པོ་བསྲུང་བས་བོད་སྐད་དུ་བསྒྱུར་བ། བསྟན་འགྱུར་མདོ་ཕྱོགས་པོད་[ཧུ]པར་ཡོད།
༢༠༡༧.༡༡.༢༠ སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
སློབ་དཔོན་ཡོན་ཏན་འོད་ནི།
དྲ་འཇུག་པ། རིག་མཛོད་རྩོམ་སྒྲིག་པ།དེ་ཡང་རྒྱ་ཆེར་འགྲེལ་ལས། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཆེན་པོ། བྲམ་ཟེའི་སློབ་དཔོན་བཙུན་པ་ཡོན་ཏན་འོད། བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ། བདེ་བར་གཤེགས་པའི་ཆོས་འདུལ་བ་བདུད་རྩིའི་ཉིང་ཁུས་ཤེས་རབ་ཀྱི་དབང་པོ་རྒྱས་པ་དེ་བཞིན་གཤེགས་པའི་བཀའ་དམ་པ་ནན་ཏན་སྙིང་པོར་བསྒྲུབ་པ། ཞེས་ཆེ་བརྗོད་འབྱུང་བའི་སློབ་དཔོན་དེ་ཉིད་ནི། ཡུལ་བཅོམ་བརླག་ཏུ་བྲམ་ཟེའི་རིགས་སུ་འཁྲུངས།
ཆུང་དུས་མུ་སྟེགས་ཀྱི་གྲུབ་མཐའ་དང་རིག་གནས་རྣམས་ལ་མཁས་པར་སྦྱངས། ཕྱིས་སུ་ཡུལ་དེར་རབ་ཏུ་བྱུང་ཞིང་བསྙེན་པར་རྫོགས་ནས་མཁས་མཆོག་དབྱིག་གཉེན་གྱི་དྲུང་དུ་ཕེབས་ཏེ་སྡེ་སྣོད་གསུམ་ལ་སྦྱངས་ཤིང་ཐེག་པ་ཆེན་པོའི་ལམ་གྱི་རིམ་པ་གསན་ནས་ཐེག་ཆེན་གྱི་མདོ་སྡེ་མཐའ་དག་ལ་སྦྱངས། ཉན་ཐོས་སྡེ་པ་བཅོ་བརྒྱད་པོ་སོ་སོའི་ལུགས་མ་འདྲེས་པར་མཁྱེན་ཅིང་འདུལ་བ་འབུམ་སྡེ་ཐུགས་ལ་བཟུང་སྟེ་རྒྱུན་དུ་ཁ་ཏོན་དུ་མཛད། དེ་ལྟར་ཀློག་པ་ཐོས་བསམ་དང་སྤོང་བ་བསམ་གཏན་ལ་བརྩོན་པར་མཛད་པས་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་ཞིང་གཟུངས་དང༌། སྤོབས་པ་དང༌། མངོན་པར་ཤེས་པ་སོགས་ཐུགས་ལ་འཁྲུངས་པར་བཤད།
ཡུལ་བཅོམ་བརླག་གི་གཙུག་ལག་ཁང་ཨ་གྲ་པུ་རི་ཞེས་བྱ་བར་བཞུགས་ཏེ། ལྷན་ཅིག་གནས་པའི་སློབ་མ་དགེ་སློང་སྟོང་ཕྲག་ལྔ་རེ་ཙམ་ཡོད་ཅིང་། ཐམས་ཅད་ཀྱང་བསྡམ་བྱའི་ཉེས་བྱས་ཕྲ་མོ་ཚུན་ཆད་སོ་སོའི་ཕྱིར་བཅོས་ཀྱིས་འཕྲལ་འཕྲལ་དུ་བཅོས་པས་ཚུལ་ཁྲིམས་རྣམ་པར་དག་པ་ནི་སྔོན་དགྲ་བཅོམ་པ་རྣམས་ཀྱིས་བསྟན་པ་སྐྱོང་བའི་དུས་བཞིན་ཡོད་པར་མཁས་པ་རྣམས་ལ་གྲགས་སོ། །མདོ་སྡེ་འཛིན་པ་དང༌། མ་མོ་འཛིན་པའང་མང་དུ་ཡོད་ཅིང༌། འདུལ་བ་འབུམ་སྡེ་ཐོན་པའང་ལྔ་བརྒྱ་ཙམ་མོ་ཞེས་ཀྱང་གྲགས།
ཚུལ་ཁྲིམས་རྣམ་པར་དག་པའི་སྟོབས་ཀྱིས་རྒྱལ་པོ་ཤྲཱི་ཧརྴའི་བློན་པོ་མ་ཏངྒ་རཱ་ཛ་ཞེས་བྱ་བ་ལན་ཅིག་རྒྱལ་པོའི་ཆད་པས་མིག་ཕྱུང་བ་ཡང་སློབ་དཔོན་གྱི་སྨོན་ལམ་གྱི་སྟོབས་ཀྱིས་སོར་ཆུད། རྒྱལ་པོའི་བླ་མར་གྱུར་པས་ཉིན་རེ་བཞིན་ཡོ་བྱད་དཔག་ཏུ་མེད་པའི་འདུ་བ་བྱུང་ན་ཡང་དེ་མ་ཐག་ཐམས་ཅད་དགེ་བར་བསྒྱུར་ཏེ། རང་ཉིད་སྦྱངས་པའི་ཡོན་ཏན་ལས་ཉམས་པ་མི་མངའ་བ་ཞིག་གོ །
ཇོ་ནང་ཀུན་མཁྱེན་གྱི་རྒྱ་གར་ཆོས་འབྱུང་དུ། སློབ་དཔོན་ཆེན་པོ་དབྱིག་གཉེན་གྱི་སྐུ་ཚེའི་སྨད་ཙམ་གྱི་དུས་ན། རྒྱལ་པོ་ཟབ་མོའི་ཕྱོགས་འདས་པའི་འོག་ཏུ་ནུབ་ཕྱོགས་མ་རུའི་ཡུལ་དུ་སྐྱེས་པ་རྒྱལ་པོ་ཤྲཱི་ཧརྴ་ཞེས་བྱ་བ་ལས་ཀྱི་སྟོབས་ཤིན་ཏུ་ཆེ་བ་བྱུང་སྟེ་ནུབ་ཕྱོགས་ཀྱི་རྒྱལ་ཁམས་ཐམས་ཅད་ལ་དབང་བསྒྱུར། ཕྱིས་སངས་རྒྱས་ཀྱི་བསྟན་པ་ལ་དད་པ་ཐོབ་སྟེ་སློབ་དཔོན་ཡོན་ཏན་འོད་བླ་མར་བཀུར་བ་ཞིག་བྱུང༌། ཞེས་དང་། དེའི་ཚེ་ཤར་ཕྱོགས་སུ་སློབ་དཔོན་བློ་གྲོས་བརྟན་པ་དང༌། ཕྱོགས་ཀྱི་གླང་པོས་འགྲོ་དོན་མཛད། ནུབ་ཕྱོགས་སུ་འཕགས་པ་ཐོགས་མེད་ཀྱི་སློབ་མ་སངས་རྒྱས་འབངས་ཀྱི་སྐུ་ཚེའི་སྨད་ཀྱི་འགྲོ་དོན་དང༌། ཡོན་ཏན་འོད་ཀྱི་འགྲོ་དོན་དར་བའི་དུས་སོ། །ཞེས་དང་། ཆོས་ཀྱི་བཤེས་གཉེན་གྱི་ལོ་རྒྱུས་ཅུང་ཟད་ཙམ་ནི་གཞན་དུ་ཤེས་ལ། ཆོས་བཤེས་འདི་དང༌། འགྲེལ་ཆུང་དོན་གསལ་གྱི་འགྲེལ་བཤད་མཛད་མཁན་གྱི་ཆོས་བཤེས་གཅིག་པར་སྨྲ་ཞིང༌། དེ་ཉིད་ཡོན་ཏན་འོད་ཀྱི་དངོས་སློབ་ཏུ་འདོད་པ་ནི་འཁྱམས་པ་ལས་ཀྱང་ཆེས་འཁྱམས་པ་སྟེ། དེ་འདྲའི་ལུགས་ལྟར་ན། འཕགས་པ་རྣམ་གྲོལ་སྡེ་དང་སེང་གེ་བཟང་པོ་དུས་མཉམ་པར་བྱེད་དགོས་སོ། །ཞེས་དང་། ཡོན་ཏན་འོད་ཀྱི་སྐུ་ཚེའི་གཞུག་ཙམ་ན་རྒྱལ་པོ་ཤྲཱི་ཧརྴའི་བུ་རྒྱལ་པོ་ངང་ཚུལ་ཞེས་བྱ་བ་རྒྱལ་སར་ཐོན། ཤར་དུ་རྒྱལ་པོ་ལི་ཙ་བཱིའི་རིགས་ལས་བྱུང་བ་སེང་གེ་ཞེས་བྱ་བ་མངའ་ཐང་ཆེན་པོ་ཞིག་བྱུང༌། དེའི་དུས་སློབ་དཔོན་ཙནྡྲ་གོ་མཱི་འཁྲུངས། ཞེས་དང་། འདི་སྐབས་ལེགས་ལྡན་དང༌། འཕགས་པ་གྲོལ་སྡེའི་སྐུ་ཚེའི་སྨད་ཀྱི་དུས་ཡིན། སློབ་དཔོན་ཉི་མ་སྦས་པ་དང༌། གྲོལ་སྡེའི་སློབ་མ་མཆོག་སྡེ་དང༌། སངས་རྒྱས་བསྐྱངས་ཀྱི་སློབ་མ་ཀ་མ་ལ་བུདྡྷིའི་སྐུ་ཚེའི་སྨད་དང༌། ཡོན་ཏན་འོད་ཀྱི་སློབ་མ་འཕགས་པ་ཟླ་བའི་ནོར་བུ་དང༌། ན་ལེནྡྲའི་མཁན་པོ་རྒྱལ་བའི་ལྷ་རྣམས་དུས་མཚུངས་སུ་བྱུང་ཞིང༌། ལྷོ་ཕྱོགས་སུ་སློབ་དཔོན་ཟླ་བ་གྲགས་པའང་བྱོན། སློབ་དཔོན་ཆོས་སྐྱོང་དང༌། སློབ་དཔོན་ཞི་བ་ལྷ་དང༌། གྲུབ་ཐོབ་བི་རཱུ་པའི་སྐུ་ཚེའི་སྟོད་ཀྱི་དུས་ཙམ་མོ། །ཞེས་ཀྱང་འབྱུང་ངོ་། །
རྒྱའི་བཙུན་པ་ཐང་སན་གྱི་ལམ་ཡིག་ཏུ། པ་བྷ་ཏའི་གྲོང་ཁྱེར་གྱི་མཐའ་ལོགས་སུ་གཙུག་ལག་ཁང་ཆེན་པོ་ཞིག་ཡོད་པ་ནི། ཚད་མ་མཁན་པོ་ཛི་ན་སུ་ཏྲ་སྟེ་རྒྱལ་བའི་བུ་ཞེས་བྱ་བས་ས་སྡེའི་འགྲེལ་པ་མཛད་པའི་གནས་དང་། ཚད་མ་མཁས་པ་བཟང་འོད་དང་ཡོན་ཏན་འོད་རབ་ཏུ་བྱུང་བའི་གནས་སོ། །ཞེས་འབྱུང་ཞིང་། ལམ་ཡིག་དེར་ལོ་རྒྱུས་གཞན་ཞིག་འབྱུང་བ་ནི། གྲོང་ཁྱེར་དེའི་ལྷོ་ཕྱོགས་སུ་རྒྱང་གྲགས་བཞི་ལྔ་ཙམ་གྱི་སར་གཙུག་ལག་ཁང་ཆུང་ངུ་ཞིག་ཡོད་པར་དགེ་འདུན་ལྔ་བཅུ་ལྷག་ཙམ་གནས་སོ། །འདི་ནི་སྔོན་སློབ་དཔོན་གུ་ན་པྲ་བྷ་སྟེ་ཡོན་ཏན་འོད་ཅེས་བྱ་བས་ཡང་དག་པའི་རྣམ་དབྱེ་ཟེར་བའི་བསྟན་བཅོས་པོ་ཏི་བརྒྱ་ལྷག་མཛད་པའི་གནས་སོ། །སློབ་དཔོན་དེ་ནི་ཆུང་ངུ་ནས་རིག་པ་གསལ་ཞིང་དབང་པོ་རྣོ་བ་ཞིག་སྟེ། སྐུ་ན་སྨིན་པ་དང་བསླབ་སྦྱང་ལ་རྩལ་ཐོན་པ་ཞིག་ཡིན་ཀྱང་། རྣམ་དཔྱོད་ཚད་དུ་མ་འཁྱོལ་བས་ལྷག་མཐོག་གི་སྐོར་ལ་ཐེ་ཚོམ་ཟ་སྟེ་སླར་ཐེག་དམན་དུ་ལོག་པ། དེས་ཐེག་ཆེན་སུན་འབྱིན་པའི་བསྟན་བཅོས་གླེགས་བམ་བཅུ་ཕྲག་དུ་མ་དང་། འཇིག་རྟེན་པའི་ལུགས་ཀྱི་བསྟན་བཅོས་ཀྱང་བཅུ་ཕྲག་དུ་མ་མཛད་ཀྱང་མ་ཚིམས་པར་ཐེ་ཚོམ་ཟོས་པས། དེ་དུས་དེ་བ་སེ་ན་སྟེ་ལྷའི་སྡེ་ཞེས་བྱ་བའི་སློབ་དཔོན་གྱིས་རྗེ་བཙུན་བྱམས་པ་བསྒྲུབས་པས་འགྲུབ་སྟེ། དགའ་ལྡན་དུ་འགྲོ་འོང་བྱེད་པ། དགོས་པ་ཞིག་ལ་ཡོན་ཏན་འོད་གྲོགས་སུ་སྦྲན་ཏེ་ལྷན་དུ་དགའ་ལྡན་དུ་ཕྱིན་ཏེ་ཡོན་ཏན་འོད་བྱམས་མགོན་ལ་ཕྱག་མ་འཚལ་བར་འདུད་ཙམ་བྱས་པས། ལྷའི་སྡེས་སྨྲས་པ། མ་ཕམ་པ་འདི་ནི་སྟོན་པའི་རྗེས་སུ་རྒྱལ་ཚབ་མཛད་པས་ཕྱག་འཚལ་བར་འོས་ཤིང་འདུད་ཙམ་མི་འོས་ཞེས་སྨྲས་པ་ལ། ཚུར་ལན་དུ་སྨྲས་པ། བཞིན་བཟང་འཁྲུལ་ལམ། ཁོ་བོ་རབ་ཏུ་བྱུང་བ་ཆོས་གོས་གསུམ་ལྡན་ལགས་ཏེ། མ་ཕམ་པ་འདོད་ལྷའི་ཆ་ལུགས་ཅན་ལ་ཕྱག་ཇི་ལྟར་འཚལ་ཟེར་བས། ལྷའི་སྡེས་དེའི་ང་རྒྱལ་ཞེ་ལོག་དེ་ལྟར་ལན་གསུམ་བསྐྱར་ཏེ་དགའ་ལྡན་དུ་འགྲོ་འོང་བྱས་ཐེ་ཚོམ་སེལ་མ་ནུས་པས་ཚེ་དེ་ལ་གྲོལ་བ་མ་ཐོབ་ཟེར་རོ། །ཞེས་པ་འདི་ཁ་ཤས་ཀྱིས་སློབ་དཔོན་འདིའི་ལོ་རྒྱུས་ལ་བཤད་ཀྱང་དཔྱད་དོ། །
ཡང་ལམ་ཡིག་དེར་སྟོན་པ་ཀུ་ཤའི་གྲོང་ཁྱེར་དུ་གཤེགས་ཁར་འཛེགས་ཏེ་ཡུལ་མ་ག་དྷ་ལ་ཕྱི་སྤྱན་གཟིགས་པའི་གནས་རི་དེའི་གཡས་ལོགས་ན་ཡོན་ཏན་འོད་རང་གིས་བཞེངས་པའི་གཙུག་ལག་ཁང་ཡོད་པར་ཡང་བཤད་དོ། །
གཞན་ཡང་སློབ་དཔོན་འདིས་འདུལ་བའི་ལས་བརྒྱ་རྩ་གཅིག་གི་ཆོ་ག་ཀརྨ་ཤ་ཏམ་དུ་གྲགས་པ་མཛད་དེ། ད་ལྟ་རྒྱལ་བའི་བསྟན་པ་ལ་ཞུགས་ནས་དགེ་བསྙེན་དང༌། བར་མ་རབ་བྱུང་དང༌། ཚིགས་སྔ་མ་དགེ་ཚུལ་གྱི་སྡོམ་པ་དང༌། བསླབ་གཞི་ཡོངས་སུ་རྫོགས་པ་དགེ་སློང་གི་སྡོམ་པ་ལེན་པའི་ཆོ་ག་དང་གཞི་གསུམ་གྱི་ཆོ་ག་སོགས་འདུལ་བའི་ལས་ཀྱི་ཆོ་ག་རྣམས་བདག་ཉིད་ཆེན་པོ་འདི་ཁོ་ནའི་བཀའ་དྲིན་ལས་བྱུང་བས་བསྟན་པ་འདི་ལ་བཀའ་དྲིན་མཚུངས་པ་མེད་པ་ཞིག་གོ །སྐབས་དེར་སློབ་དཔོན་ཡོན་ཏན་འོད་ཀྱི་སྦྱིན་བདག །རྒྱལ་པོ་ཤྲཱི་ཧར་ཤས་ཆོས་ཀྱི་གྲགས་པ་ལ་ད་ལྟ་སུ་མཁས་དྲིས་པས། མཁས་པར་རྒྱལ་པོས་བྱས་པ་ཡི། །བཙུན་པ་ཡོན་ཏན་འོད་ཀྱང་སྟེ། །ཅེས་སོགས་ཀྱང་གསུངས་སྐད་དོ། །བུ་སྟོན་ཆོས་འབྱུང་དུ། སློབ་དཔོན་དེ་ཁ་ཅིག་ཉེར་སྦས་ཀྱི་སློབ་མར་འདོད། ཁ་ཅིག་ལེགས་མཐོང་གི་སློབ་མར་འདོད་དེ། དུས་མི་གཅིག་པས་ནོར་བར་རིག་པར་བྱའོ། །སྟོད་འདུལ་བ་དག་ལེགས་མཐོང་གིས་ཕྱིར་མི་འོང་ལ། དེས་གློས་མི་འབེབས་ལ། དེས་ཡོན་ཏན་འོད་ལ་བཤད་ཟེར་ཏེ། བརྟག་དགོས་སོ། །ཞེས་ཀྱང་འབྱུང་།
མཐར་སློབ་དཔོན་རང་ཉིད་ཀྱི་འཁྲུངས་ཡུལ་དུ་མྱ་ངན་ལས་འདས་ཤིང་། དགུང་ལོ་བཞི་བརྒྱ་བཞུགས་པར་གྲགས་སོ། །སློབ་དཔོན་འདིས་མཛད་པའི་བསྟན་བཅོས་མང་དུ་ཡོད་པར་བཤད་ཀྱང་བོད་འགྱུར་གྱི་ནང་ནས་གྲགས་ཆེ་བ་ནི་བྱང་སའི་སྦྱིན་པའི་རིམ་པར་ཕྱེ་བ་དགུ་པ་ཡན་གྱི་འགྲེལ་པ་དང་། བྱང་སའི་ཚུལ་ཁྲིམས་ལེའུའི་འགྲེལ་པ་འདི་གཉིས་ནག་ཚོ་ལོ་ཙཱ་བ་དང་། ཞང་ཡེ་ཤེས་སྡེ་གཉིས་སོ་སོས་བསྒྱུར་བ་བསྟན་འགྱུར་མདོ་ཕྱོགས་པོད་[ཡི]པར་ཡོད། འདུལ་མདོ་རྩ་བ་བམ་པོ་དགུ་པ་དང་། འདུལ་བའི་ལག་ལེན་ལས་བརྒྱ་རྩ་གཅིག་གི་ཆོ་ག་ཀརྨ་ཤ་ཏམ་དུ་གྲགས་པ་ཤླཽ་ཀ་སུམ་སྟོང་དྲུག་བརྒྱ་བམ་པོ་བཅུ་གཉིས་པ་བཅས་དུས་རབས་བརྒྱད་པའི་མཇུག་ཏུ་རྒྱལ་པོ་ཁྲི་སྲོང་ལྡེ་བཙན་གྱི་དུས་ཅོག་རོ་ཀླུའི་རྒྱལ་མཚན་གྱིས་བསྒྱུར་བ་དང་། འདུལ་བའི་མདོའི་འགྲེལ་པ་ཉིད་ཀྱི་རྣམ་བཤད་ག་རོང་ཚུལ་ཁྲིམས་འབྱུང་གནས་ཀྱིས་བསྒྱུར་བ་དག །བསྟན་འགྱུར་མདོ་ཕྱོགས་པོད་[ཟུ][འུ][ཡུ]གསུམ་དུ་ཡོད། ༼ཁ་ཅིག་ལས་བརྒྱ་རྩ་གཅིག་དུལ་བ་ལྷས་བྱས་པར་འདོད་དོ།།༽ འདུལ་བའི་མདོའི་འགྲེལ་ཆུང་སློབ་དཔོན་ཡོན་ཏན་འོད་ཀྱིས་མཛད་པར་གྲགས་པ་དེ་ཐེ་ཚོམ་གྱི་གཞི་ཡིན་ཞེས་བུ་སྟོན་ཆོས་འབྱུང་དུ་གསལ།
སློབ་དཔོན་གྱི་སྦྱིན་བདག་རྒྱལ་པོ་ཧརྴའི་སྐོར་ལ། ཇོ་ནང་ཀུན་མཁྱེན་གྱི་རྒྱ་གར་ཆོས་འབྱུང་ལས་ཅུང་ཟད་འབྱུང་ལ། དགེ་ཆོས་ཀྱི་གཏམ་རྒྱུད་གསེར་ཐང་དུ། ཧརྴའི་ཁྲི་ལོ་ཉེར་ལྔ་པ་ལ་དགོངས་འགྲེལ་འགྲེལ་ཆེན་རྩོམ་པ་པོ་རྒྱའི་བཙུན་པ་ཝེན་ཚག་རྒྱ་གར་དུ་བྱོན་པ་དང་རྒྱལ་པོ་འདིས་སྤྱན་དྲངས་པར་བཤད་ལ། རྒྱལ་པོ་ཧརྴའི་ཁྲི་ལོ་ཉེར་གཉིས་པའི་སྐབས་རྒྱལ་པོ་སྲོང་བཙན་སྒམ་པོ་འཁྲུངས་པ་དང་། རྒྱལ་པོ་འདི་སྲོང་བཙན་དང་དུས་མཉམ་པར་བཤད་ཅིང་། དེར་རྒྱ་རྒྱལ་ཐང་ཐེ་ཙུང་གིས་འབུལ་རྟེན་བཅས་ཕོ་ཉ་མངགས་ཀྱང་ཧརྴ་ཁྲི་བཟུང་སྟེ་ལོ་བཞི་བཅུ་སོང་ཙམ་ལ་གྲོངས་ཟིན་ཞིང་། ཧརྴའི་ཤུལ་འཛིན་མེད་པའི་རྐྱེན་གྱིས་བློན་པོ་སྲིད་སྒྲུབ་བྱ་བ་ཞིག་གིས་རྒྱལ་སྲིད་བཟུང་བར་བཤད་ནའང་། ཇོ་ནང་ཀུན་མཁྱེན་གྱི་ཆོས་འབྱུང་དུ་རྒྱལ་པོ་ཤྲཱི་ཧརྴའི་བུ་རྒྱལ་པོ་ངང་ཚུལ་ཞེས་བྱ་བ་རྒྱལ་སར་ཐོན། ཞེས་འབྱུང་ན་དཔྱད་དོ། །རྒྱ་རྒྱལ་གྱི་ཕོ་ཉ་རྣམས་བཅོམ་པ་དང་དེ་དག་གིས་བོད་རྒྱལ་ལ་སྐྱབས་བཅོལ་བ་ལས་སྲོང་བཙན་སྒམ་པོས་རྒྱ་གར་དུ་དམག་བརྒྱབ་པ་སོགས་ཀྱི་ལོ་རྒྱུས་ཀྱང་སྣང་ངོ་། །རྒྱལ་པོ་འདིའི་སྐོར་གཏམ་རྒྱུད་གསེར་ཐང་དུ་མང་དུ་འབྱུང་ངོ་། །
སློབ་དཔོན་འདིའི་འཁྲུངས་འདས་ཀྱི་ལོ་ཚིགས་གསལ་པོ་ཞིག་མ་རྙེད་མོད། འདིས་སློབ་དཔོན་དབྱིག་གཉེན་གྱི་ཞབས་ལ་གཏུགས་ཤིང་དབྱིག་གཉེན་དུས་རབས་ལྔ་པ་ཙམ་ན་བྱུང་བར་བཤད་པ་དང་། ལོ་རྒྱུས་རྣམས་སུ་སློབ་དཔོན་འདིའི་སྦྱིན་བདག་རྒྱལ་པོ་ཤྲཱི་ཧར་ཤ་ཕྱི་ལོ་ལྔ་བརྒྱ་དགུ་བཅུར་འཁྲུངས་ཤིང་དྲུག་བརྒྱ་དྲུག་ལོར་སྲིད་བཟུང་བ་དང་། དྲུག་བརྒྱ་ཞེ་བརྒྱད་ལོར་འདས་པར་བཤད་པ་དང་། སློབ་དཔོན་གྱི་སྐུ་ཚེའི་གཞུག་ཙམ་ན་རྒྱལ་པོ་ཤྲཱི་ཧརྴའི་བུ་རྒྱལ་པོ་ངང་ཚུལ་ཞེས་བྱ་བ་རྒྱལ་སར་ཐོན་པར་བཤད་པ་ལྟར་ན། དུས་རབས་དྲུག་བདུན་ནང་ལ་བྱོན་པར་གསལ་ལོ། །
དཔེ་ཆ་མང་པོའི་ནང་དུ་མཆོག་གཉིས་ཀྱི་ཡ་གྱལ་སློབ་དཔོན་ཤཱཀྱ་འོད་སློབ་དཔོན་ཡོན་ཏན་འོད་ཀྱི་སློབ་མར་བཤད་ཀྱང་། བུ་སྟོན་ཆོས་འབྱུང་དུ། དེའི་སློབ་མ་ཤཱཀྱ་འོད་ཡིན་ཟེར་བ། མི་བདེན་ཏེ། འོད་ལྡན་ལས། བདག་གི་མཁན་པོ་མ་ག་དྷར་གནས་རྒྱན་དུ་གྱུར་པ་གྲགས་ཐོབ་པ། །བསོད་ནམས་གྲགས་པ་ལས་ནི་བདག་གིས་མཉན་ནས་རང་གི་འདུལ་བའི་ཆོ་ག་ཡི། །རྣམ་པར་བཤད་འདི་གསུམ་རིག་རྣམས་ཀྱིས་བཤད་པའི་ཕྱོགས་ཀྱི་གཞི་མཛད་བསྟན་པ་ཡིན། །ཞེས་པ་དང་། གཞན་ཡང་། བླ་མ་དག་ནི་རིང་ན་བཞུགས་པ་གྲགས་པས་རྣམ་པར་ཁྱབ་པ་ཞི་བའི་འོད་ཀྱིས་བདག །དྲན་པས་དགོངས་པ་མཛད་པར་གྱུར་ཅིག་སྙམ་ནས་བདག་གིས་འགྲེལ་པ་དོན་གསལ་བྱས་པ་ཡིན། །ཞེས་བསོད་ནམས་གྲགས་དང་། ཞི་བ་འོད་ཀྱི་སློབ་མར་བཤད་དོ། །དེའི་སློབ་མ་ཤཱཀྱ་བཤེས་གཉེན་ཡིན་པར་སུམ་བརྒྱ་པར་བཤད་དོ། །ཤཱཀྱ་འོད་ཀྱིས་སུམ་བརྒྱ་པ་དང་དེའི་འགྲེལ་པ་འོད་ལྡན་མཛད་དོ། །འདུལ་བའི་མདོ་ལ་ཆོས་ཀྱི་བཤེས་གཉེན་གྱིས་རྒྱ་ཆེར་འགྲེལ་མཛད་ཅིང་། དེ་ཡོན་ཏན་འོད་ཀྱི་སློབ་མར་ཁ་ཅིག་འདོད་དོ། །ཞེས་འབྱུང་ངོ་། །ཡང་ཁ་ཤས་ཀྱིས་སློབ་དཔོན་དབྱིག་གཉེན་གྱི་སློབ་མ་འདུལ་བ་རང་ལས་མཁས་པ་ལ་སློབ་དཔོན་ཤཱཀྱ་འོད་བགྲངས་པའང་ཡོད་དོ། །ཡོན་ཏན་འོད་ཀྱི་སློབ་མ་ལ་མངོན་པ་བ་ཡོན་ཏན་བློ་གྲོས་ཞེས་པ་ཞིག་ཀྱང་བྱུང་ངོ་། །
༢༠༡༧.༡༡.༡༧ སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
