ཁྲི་ཆེན་ང་བརྒྱད་པ་ངག་དབང་ཆོས་གྲགས་མཆོག་ནི། ཕྱི་ལོ་ ༡༧༠༧ ལོར་བྱ་ཁྱུང་ཉེ་འདབས་མཚམས་རིང་བར་སྐུུ་འཁྲུངས། སྐུུ་ན་ཆུང་དུས་བྱ་ཁྱུང་དགོན་དུ་ཆོས་སྒོར་ཞུགས། བདེ་ཡངས་ངག་དབང་ནོར་བུ་ལས་རབ་ཏུ་བྱུང༌། དགུང་ལོ་ཉེར་གཅིག་པ་ ༡༧༢༧ ལོར་དབུས་སུ་ཕེབས་ཏེ་སེར་བྱེས་གྲྭ་ཚང་དུ་ཆོས་ཞུགས་མཛད། རྗེ་བློ་བཟང་ཆོས་འཕེལ་དང༌། བྲག་རི་ངག་དབང་དོན་གྲུབ་སོགས་ཀྱི་ཞབས་ལ་གཏུགས་ནས་གཞུང་ཆེན་ལ་ཐོས་བསམ་གནང་། པཎ་ཆེན་བློ་བཟང་ཡེ་ཤེས་ལས་བསྙེན་རྫོགས་ཀྱི་སྡོམ་པ་མནོས། ྋརྒྱལ་མཆོག་བདུན་པ་བསྐལ་བཟང་རྒྱ་མཚོ་དང༌། ཁྲི་ངག་དབང་མཆོག་ལྡན། རྗེ་ཕུར་ལྕོག་པ། ཁྲི་རྒྱལ་མཚན་སེང་གེ། ཨ་ཀ་བསོད་ནམས་བཟང་པོ་སོགས་ཀྱི་ཞབས་ལ་གཏུགས་ནས་མདོ་སྔགས་ཀྱི་ཟབ་ཆོས་དང༌། བཀའ་འགྱུར་གྱི་ལུང་སོགས་གསན། ལྷ་རམས་དམ་བཅའ་མཛད་དེ་རྒྱུད་སྨད་ལ་ཞུགས། དེ་ནས་བླ་མ་དབུ་མཛད་དང་རྒྱུད་པའི་མཁན་ཁྲི། བྱང་རྩེ་མཁན་ཁྲི་སོགས་ལ་རིམ་པར་ཕེབས། རྒྱུད་ཁང་ཞིག་གསོ་མཛད། ྋརྒྱལ་བ་འཇམ་དཔལ་རྒྱ་མཚོའི་ཡོངས་འཛིན་གནང་། དགུང་ལོ་ང་བརྒྱད་པ་ ༡༧༦༤ ལོར་དགའ་ལྡན་གྱི་ཁྲིར་ཕེབས། སྐུུ་གསུང་ཐུགས་རྟེན་མང་དུ་བཞེངས། རྗེའི་དངུལ་སྐུུ་མི་ཚད་མ་ཁྲི་རྒྱབ་ཡོལ་བཅས་བཞེངས་ནས་ལྷ་ལྡན་དཀྱིལ་འཁོར་སྡིངས་སུ་བཞུགས་སུ་གསོལ། གསེར་ཟངས་ལས་ཇོ་བོའི་སྐུུ་མི་ཚད་མ་ཕྲ་རྒྱན་ཕུན་སུམ་ཚོགས་པ་བཞེངས་ནས་བྱ་ཁྱུང་དགོན་དུ་ཕུལ། དགའ་ལྡན་ཁྲི་ཐོག་ཏུ་ལོ་བདུན་བཞུགས། ཁྲི་ལས་ཟུར་བཞུགས་མཛད་པའི་རྗེས་ ༡༧༧༡ ལོར་པཎ་ཆེན་དཔལ་ལྡན་ཡེ་ཤེས་དྲུང་ནས་ྋརྒྱལ་བ་འཇམ་དཔལ་རྒྱ་མཚོས་ཚིགས་སྔ་མ་དགེ་ཚུལ་གྱི་སྡོམ་པ་བཞེས་སྐབས་ཀྱི་ལས་སློབ་མཛད། དགུང་ལོ་དོན་གཅིག་པ་ ༡༧༧༧ ལོའི་ས་ག་ཟླ་བའི་ཚེས་བཅོ་ལྔར་ལྷ་ལྡན་སྤྲུལ་པའི་ཕོ་བྲང་དུ་༧པཎ་ཆེན་དཔལ་ལྡན་ཡེ་ཤེས་ལས་ྋརྒྱལ་དབང་འཇམ་དཔལ་རྒྱ་མཚོ་མཆོག་གིས་བསྙེན་རྫོགས་ཀྱི་སྡོམ་པ་བཞེས་སྐབས་སུ་ཡང༌ཁྲི་ཟུར་འདི་ཉིད་ཀྱིས་ལས་སློབ་གནང་། དགུང་ལོ་དོན་གཉིས་ལ་ཕེབས་པ་ ༡༧༧༨ ལོར་ལྷ་ལྡན་ཁྲི་ཐོག་ཁང་དུ་དགོངས་པ་ཆོས་དབྱིངས་སུ་ཐིམ། སྐུུ་གདུང་ཞུགས་ལ་འབུལ་སྐབས་ཐུགས་ལྗགས་སྤྱན་གསུམ་བབས་པར་མཆོད་རྟེན་བཞེངས་པ་སེར་བྱེས་གྲྭ་ཚང་དུ་བཞུགས།