སེར་བྱེས་གྲྭ་ཚང་གིས་གོ་སྒྲིག་འོག་སྡེ་པ་ཐ་དད་པའི་འདུལ་འཛིན་དག་འཛོམས་ཏེ་དམ་ཆོས་འདུལ་བའི་སྐོར་ལ་བགྲོ་གླེང་བྱས།
༢༠༡༤ ལོའི་ཟླ་ ༡༢ ཕྱི་ཚེས་༩ ཉིན་འཕགས་ཡུལ་སེར་བྱེས་མཁས་སྙན་གྲྭ་ཚང་ནང་བསྟན་གཙུག་ལག་སློབ་གཉེར་ཁང་གིས་གོ་སྒྲིག་ཞུས་ཏེ། ཤྲི་ལངྐ་སོགས་ནས་གདན་འདྲེན་ཞུས་པའི་གནས་བརྟན་སྡེ་པའི་འདུལ་འཛིན་ཆེན་པོ་རྣམས་དང་། འཇམ་མགོན་བསྟན་པའི་སྲོག་ཤིང་༧དགའ་ལྡན་ཁྲི་རིན་པོ་ཆེ་རྗེ་བཙུན་རི་རྫོང་རིན་པོ་མཆོག །༧སྐྱབས་རྗེ་བྱང་རྩེ་ཆོས་རྗེ་རིན་པོ་ཆེ་བློ་བཟང་བསྟན་འཛིན་མཆོག་གི་དབུས་གྲྭ་ཚང་ཁག་གི་མཁན་རིན་པོ་ཆེ་དང་། ཆོས་རིག་བཀའ་ཟུར་མཆོག །གྲྭ་ཚང་བྱེས་སྨད་གཉིས་ཀྱི་དགེ་བསྐོས་དང་། བླ་སྤྲུལ་དགེ་བཤེས་རྣམ་པ། གྲྭ་ཚང་གི་འཛིན་གྲྭ་འདུལ་བ་ཡན་གྱི་སློབ་གཉེར་པ་རྣམས་དང་། ཕྱོགས་སོ་སོ་ནས་ཕེབས་པའི་འདུལ་འཛིན་དགེ་བའི་བཤེས་གཉེན་རྣམས་སེར་བྱེས་གྲྭ་ཚང་གི་ལྷུན་གྲུབ་ཁང་གསར་ཚོགས་ཁང་དུ་འཛོམས་ཏེ། སྔ་དྲོ་དང་ཕྱི་དྲོར་ཚོགས་ཐེངས་གཉིས་རེ་བྱས་ནས་ཉིན་གཉིས་ཀྱི་རིང་ལ་སྡེ་པ་སོ་སོའི་ལུགས་དང་། བཞེད་ཚུལ་ཐུན་མི་ཐུན་ཇི་ཡོད་སོགས་ཀྱི་སྐོར་ལ་བགྲོ་གླེང་གནང་སོང་།
དེ་ཡང་རེས་གཟའ་བཀྲ་ཤིས་ཀྱི་སྔ་དྲོ་ཆུ་ཚོད་བརྒྱད་དང་ཕྱེད་ཀའི་སྟེང་ཚོགས་གཅར་པ་ཡོངས་ཚོགས་ཁང་དུ་འཛོམས་ཏེ་སྐུ་མགྲོན་གཙོ་གྲས་རྣམས་ཀྱིས་མར་མེ་ཞལ་འབྱེད་སོགས་གྲུབ་རྗེས། གྲྭ་ཚང་གི་མཁན་རིན་པོ་ཆེ་བློ་བཟང་བདེ་ལེགས་མཆོག་གིས་བགྲོ་གླེང་གི་དགོས་པ་དང་འབྲེལ་བའི་གསུང་བཤད་དང་། ༧དགའ་ལྡན་ཁྲི་རིན་པོ་ཆེས་ལམ་སྟོན་བཀའ་སློབ། དེ་རྗེས་སེར་བྱེས་ཤེས་ཡོན་ལྷན་ཚོགས་ཀྱི་སྤྱི་ཁྱབ་འགན་འཛིན་དགེ་བཤེས་ཉི་མ་བཀྲ་ཤིས་ཀྱིས་ཐུགས་རྗེ་ཆེ་ཞུ་བ་དང་། བགྲོ་གླེང་དངོས་གཞི་དབུ་བཙུགས། དངོས་གཞིའི་སྐབས་སུ་ཚོགས་ཐེངས་རེ་རེར་འདུལ་འཛིན་མཁས་དབང་རྣམས་ཀྱིས་རེ་མོས་སུ་གསུང་བཤད་གནང་།
སྔ་དྲོའི་ཚོགས་ཐེངས་དང་པོའི་སྐབས་དབྱིན་ཡུལ་ནས་ཕེབས་པའི་འདུལ་འཛིན་དགེ་སློང་ཕརཱ་མ་ཧཱ་བྷ་ས་ཀོརྣ་པིཡོ་ཕ་སཱོ་མཆོག་གིས་ཐེ་ལན་ཊིའི་གནས་བརྟན་སྡེ་པ་གཞིར་བྱས་པའི་དགེ་ཚུལ་སློང་གི་སྡོམ་པ་འབོགས་ཆོག་གི་སྐོར་གསུངས་སོང་། སྔ་དྲོའི་ཚོགས་ཐེངས་གཉིས་པའི་སྐབས། ཤྲི་ལངྐའི་ཀེལཱནིཡཱ་གཙུག་ལག་སློབ་གཉེར་ཁང་ཆེན་མོའི་སློབ་དཔོན་ཆེན་མོ། ཀོལཱུ་པི་ཏིཡེ་མ་ཧིན་དྷ་ཐེརཱ་མཆོག་གིས་གནས་བརྟན་སྡེ་པའི་དགེ་ཚུལ་སློང་གི་སྡོམ་པའི་སྐོར་དང་། བྱང་རྩེ་ཆོས་རྗེ་རིན་པོ་ཆེས་གཞི་ཐམས་ཅད་ཡོད་པར་སྨྲ་བའི་ལུགས་ཀྱི་ལྟུང་བ་སྡེ་ལྔའི་སྐོར། ཝཱ་ཎ་སམ་པུར་ནཱནྣད་སཾསྐྲིཏའི་མཐོ་སློབ་ཀྱི་སློབ་དཔོན་ཌཀ་ཊཱར་རཱ་མེ་ཤཱ་པྲསད་མཆོག་གིས་གནས་བརྟན་སྡེ་པའི་སྡོམ་པའི་བརྒྱུད་རིམ་གྱི་སྐོར། བེང་གྷ་ལུརུ་བྱང་ཆུབ་ཆེན་པོའི་ཆོས་ཚོགས་ཀྱི་ཚོགས་གཙོ་འདུལ་འཛིན་ཀ་ཤ་པ་མ་ཧཱ་ཐཱེ་ར་མཆོག་གིས་དབྱར་གནས་ཀྱི་སྐོར་ལ་གསུང་བཤད་གནང་བ་དང་། དྲི་བ་དང་དྲི་ལན་གནང་བ་བཅས་ཉིན་གཉིས་ཀྱི་བགྲོ་གླེང་གི་རྗེས། སྐུ་མགྲོན་རྣམས་དབུ་བཞུགས་ཀྱིས་མ་འོངས་པར་བྱེད་ཕྱོགས་ཀྱི་དགོངས་ཚུལ་བསྡུ་ལེན་གནང་བ་དང་། སེར་བྱེས་གྲྭ་ཚང་གི་མཁན་རིན་པོ་དང་། སྐྱབས་རྗེ་བྱང་རྩེ་ཆོས་རྗེ་རིན་པོ་ཆེ་རྣམ་གཉིས་ཀྱི་བཀའ་སློབ། གྲྭ་ཚང་གིས་སྐུ་མགྲོན་རྣམས་ལ་ཐུགས་རྗེ་ལེགས་འབུལ་དང་མཇལ་དར་སྒྲོན་པ་དང་། སེར་བྱེས་གྲྭ་ཚང་གི་ཕྱག་མཛོད་དགེ་བཤེ་ཐུབ་བསྟན་སྨོན་ལམ་གྱིས་ཐུགས་རྗེ་ཞུས་ཏེ་བགྲོ་གླེང་ཡོངས་སུ་གྲུབ།

གྲྭ་ཚང་བྱེས་སྨད་གཉིས་ཀྱི་སློབ་གཉེར་པ་རྣམས་མཉམ་དུ་གཞུང་ཆེན་ཕར་ཕྱིན་གྱི་དམ་བཅའ་ཆེན་མོ་ཚོགས་སོང་།གྲྭ་ཚང་གཉིས་ཀྱི་ནང་དོན་རིག་པའི་གཞུང་ཆེན་ཁག་གི་སློབ་གཉེར་ཡར་རྒྱས་དང་ཚགས་ཚུད། སློབ་གཉེར་པ་རྣམས་ཕན་ཚུན་རྒྱུས་ལོན་དང་། རྩོད་རིགས་འཕེལ་ཐབས་སོགས་ལ་དམིགས་ཏེ། འཕགས་ཡུལ་ལྷོ་ཕྱོགས་ཀྱི་གདན་ས་སེར་སྨད་ཐོས་བསམ་ནོར་གླིང་གྲྭ་ཚང་གི་ཁྲིམས་བདག་དགེ་བསྐོས་མཆོག་དང་། སེར་བྱེས་མཁས་སྙན་གྲྭ་ཚང་གི་ཁྲིམས་བདག་དགེ་བསྐོས་མཆོག་རྣམ་གཉིས་ཀྱིས་དགོངས་པ་རྒྱ་ཆེར་བཞེས་ཤིང་། དབུ་འཛིན་གནང་སྟེ། ཟླ་འདིར་གཞུང་ཆེན་ཕར་ཕྱིན་གྱི་དམ་བཅའ་ཐེངས་གཉིས་ཚོགས། ཕྱི་ལོ་༢༠༡༥ ལོའི་ཟླ་ ༦ པའི་ཟླ་སྟོད་སེར་སྨད་ཐོས་བསམ་ནོར་གླིང་གྲྭ་ཚང་གི་ཆོས་རར་གྲྭ་ཚང་གཉིས་ཀྱི་སློབ་གཉེར་པ་ཡོངས་རྫོགས་མཉམ་དུ་འཛོམས་ཏེ། ཕར་ཕྱིན་སྐབས་བཞི་པའི་གནད་ཡོད་གཞུང་ཚན་ཁ་ཤས་ལ་བགྲོ་གླེང་དམ་བཅའ་དང་། ཕྱི་ཟླ་ ༦ པའི་ཚེས་ ༢༩ ཉིན་གྲྭ་ཚང་གཉིས་ཀྱི་སློབ་གཉེར་པ་ཚང་མ་སེར་བྱེས་གྲྭ་ཚང་གི་ཆོས་རར་མཉམ་དུ་འཚོགས་ཏེ། གཞུང་ཆེན་ཕར་ཕྱིན་གྱི་དཀའ་གནས་སྐོར་ཞིག་ལ་དམ་བཅའ་དང་བགྲོ་གླེང་གནང་སོང་། ཁྲིམས་བདག་དགེ་བསྐོས་མཆོག་གིས་གསུངས་པ་ལྟར་ན། དབུ་མའི་དཀའ་གནད་སྐོར་ཞིག་ལ་ཡང་འདི་ལྟར་དམ་བཅའ་འཚོགས་ཐུབ་རྒྱུའི་ཐུགས་བཞེད་ཡོད་པར་གསུངས།
གྲྭ་ཚང་འདི་གཉིས་ནི་སེ་ར་ཐེག་ཆེན་གླིང་གི་ཡ་གྱལ་གྱི་གྲྭ་ཚང་གཉིས་ཡིན་ཞིང་། སེ་ར་ཐེག་ཆེན་གླིང་ནི། ༡༤༡༩ལོར་བྱམས་ཆེན་ཆོས་རྗེ་ཤཱཀྱ་ཡེ་ཤེས་ཀྱིས་ཕྱག་བཏབ། དགོན་པ་ཐོག་མར་འདེབས་སྐབས་གནས་དེ་ཤིང་སེ་བས་ར་བ་བསྐོར་བ་ལྟར་ཡོད་པས་སེ་ར་ཞེས་བརྗོད། སེ་ར་དགོན་པ་མ་ཆགས་གོང་དུ་རྗེ་ཙོང་ཁ་པ་ཆེན་པོས་གནས་འདིར་ཟབ་རྒྱས་ཀྱི་ཆོས་འཁོར་མང་པོ་བསྐོར་ཞིང་། གནད་ཡོད་གཞུང་ཆེན་ཁ་ཤས་ཤིག་ཀྱང་གནས་འདིར་མཛད་ཡོད། ཕྱག་བཏབ་རྗེས་ཙམ་ལ། གྲྭ་ཚང་གསུམ། ཁམས་ཚན་སོ་གསུམ། རིམ་གྱིས་གྲྭ་ཚོགས་ཇེ་རྒྱས་སུ་སོང་ནས། རྒྱ། འབྲོང་སྟེང་། སྟོད་པ། སྨད་པ་བཅས་གྲྭ་ཚང་བཞིར་གྱེས་ཤིང་། ཡུན་རིང་མ་སོང་བར་རྒྱ་དང་འབྲོང་སྟེང་གཉིས་སྟོད་པ་གྲྭ་ཚང་དུ་ཟླ་སྒྲིལ་བཏང་ནས་རེ་ཞིག་གི་བར་སྟོད་སྨད་གྲྭ་ཚང་གཉིས་ལས་མེད། རྗེས་སུ་དུས་རབས་བཅོ་ལྔ་པའི་དུས་དཀྱིལ་དུ། ཀུན་མཁྱེན་མུས་སྲད་པ་བློ་གྲོས་རིན་ཆེན་སེང་གེ་དེ་ཉིད་འབྲས་སྤུངས་ནས་ཞལ་སློབ་མཁས་པ་བརྒྱ་ཕྲག་ལྷག་ཙམ་དང་ལྷན་ཅིག་ཏུ་ཕེབས་ཤིང་། སྟོད་པ་གྲྭ་ཚང་གི་ནང་གསེས་སྤོ་བོ་དང་གུང་རུ་ཁང་ཚན་གཉིས་མ་གཏོགས་ཡོངས་རྫོགས་དང་། རྒྱ་གྲྭ་ཚང་ཡོངས་རྫོགས། འབྲོམ་སྟེང་གྲྭ་ཚང་གི་ཁག་གཅིག་བཅས་ཚང་མ་སེར་བྱེས་གྲྭ་ཚང་དུ་འགྲིལ་ཞིང་། སྔགས་པ་གྲྭ་ཚང་གསར་དུ་བཙུགས་པས། སྟོད་པ། སྨད་པ། སེར་བྱེས། སྔགས་པ་གྲྭ་ཚང་བཅས་ད་ལྟའི་གྲྭ་ཚང་བཞི་བྱུང་ཞིང་། གྲྭ་རྒྱུན་ཡོང་ཁུངས་མི་འདྲ་བའི་དབང་གིས་ཁམས་ཚན་སོ་གསུམ་དུ་གྱེས། སྟོད་པ་གྲྭ་ཚང་རྗེ་ཙོང་ཁ་པའི་དངོས་སློབ་གུང་རུ་རྒྱལ་མཚན་བཟང་པོས་ཐོག་མར་བཏབ་ཅིང་། དེང་སང་ཁང་ཚན་སྤོ་བོ་དང་། གུང་རུ་གཉིས་ཙམ་མ་གཏོགས་གཞན་དག་མེད། སྨད་པ་གྲྭ་ཚང་རྗེ་ཙོང་ཁ་པའི་དངོས་སློབ་ཀུན་མཁྱེན་བྱང་ཆུབ་འབུམ་པས་ཕྱག་བཏབ་ཅིང་། གྲྭ་ཚོགས་ཇེ་རྒྱས་སུ་སོང་སྟེ། ༡ སྨར་ཉུང་། ༢ ཐེ་བོ། ༣ ཨ་ར། ༤ ཚ་རྡོར། ༥ གཞུང་པ་སྟེ་ཅོ་ནེ་ཁག་ལྔ་དང་། ༦ ཡེར་པ། ༧ རོང་པོ། ༨ སྤོ་བོ། ༩ གུང་རུ། ༡༠ ཚ་བ། ༡༡ སྤོ་འབོར། ༡༢ མི་ཉག །༡༣ ཏཱ་དབེན། ༡༤ རྒྱལ་རོང་། ༡༥ གཙང་པ། ༡༦ ཀོང་པོ་བཅས་ཁམས་ཚན་བཅུ་དྲུག་བྱུང་། བྱེས་གྲྭ་ཚང་ནི། ཀུན་མཁྱེན་མུས་སྲད་པ་བློ་གྲོས་རིན་ཆེན་སེང་གེས་ཕྱག་བཏབ་ཅིང་། དེ་ཡང་འབྲས་སྤུངས་ནས་བྱེས་སུ་གྱེས་ཏེ་གྲྭ་ཚང་ཆགས་པས་བྱེས་པ་གྲྭ་ཚང་ངམ། ཐོག་མར་བཞུགས་ཡུལ་གཏན་འཇགས་མེད་པར་ཚལ་གུང་ཐང་དང་དབུས་སྟོད་སོགས་སུ་ཆོས་ཐོག་ལ་ཕེབས་པས་བྱེས་པ་གྲྭ་ཚང་ཡང་ཟེར། ཕྱོགས་སོ་སོ་ནས་ཕེབས་པའི་སློབ་གཉེར་པ་རྣམས་ལ་ལྟ་སྐྱོང་སོགས་ཀྱི་ཆེད་དུ་གྲྭ་ཚང་འདི་ལ་ཁམས་ཚན་ཉེར་གཅིག་བྱུང་སྟེ། ༡ ཧར་གདོང་། ༢ བསམ་བློ། ༣ བྱ་བྲལ། ༤ ཏྲེ་ཧོར། ༥ པྲ་སྟི། ༦ ཚྭ་བ། ༧ ལྷོ་པ། ༨ སྒོམ་སྡེ། ༩ ལྭ་བ། ༡༠ ལྡན་མ། ༡༡ མངའ་རིས། ༡༢ སྟག་མོ། ༡༣ གཙང་པ། ༡༤ རྒྱལ་བྱེད། ༡༥ ཨེ་པ། ༡༦ གཉལ་པ། ༡༧ དྭགས་པོ། ༡༨ རྩེད་ཐང་། ༡༩ གུ་གེ ། ༢༠ སྤེ་ཐུབ། ༢༡ ཟངས་དཀར་བཅས་ཡིན། ༡༩༥༩ ལོར་སེ་ར་ཐེག་ཆེན་གླིང་དུ་གྲྭ་གྲངས་༩༩༠༠ཡོད་ན་ཡང་། ༦༩ལོའི་ཟླ་བ་༡༡པའི་ནང་སྦག་ས་ནས་རྒྱ་གར་ལྷོ་ཕྱོགས་ཀར་ཎ་ཊ་ཀའི་ཁོངས་སྦེབ་ཀོལ་གྱི་ད་ལྟའི་གནས་འདིར་གཞིས་སྤོ་བྱེད་སྐབས། སེར་སྨད་གྲྭ་ཚང་དུ་གྲྭ་གྲངས་༡༠༧ སེར་བྱེས་གྲྭ་ཚང་དུ་༡༩༣བཅས་ཁྱོན་བསྡོམས་༣༠༠ ཙམ་ལས་མེད། ད་ལྟ་འཕགས་ཡུལ་དུ་གྲྭ་ཚང་གཉིས་ལས་མེད་ཅིང་། སེ་ར་ཐེག་པ་ཆེན་པོའི་གླིང་དུ་རྒྱུན་དུ་ཆོས་རར་ཕེབས་བཞིན་པའི་སློབ་གཉེར་པའི་གྲངས་སྟོང་ཕྲག་བཞི་ལྷག་ཡོད།

སེར་བྱེས་སློབ་གཉེར་ཁང་གི་གོ་སྒྲིག་འོག་དབུ་རྙིང་འཛིན་གྲྭའི་སློབ་གཉེར་བ་ཁ་ཤས་འདེམས་སྒྲུག་གིས་དགེ་འདུན་འདུས་པའི་དབུས་སུ་རྗེའི་དགོངས་པ་རབ་གསལ་ལས་དཀའ་གནད་སྐོར་ཞིག་ལ་བགྲོ་གླེང་གནང་སོང་།
དེ་ཡང་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་བཀའ་དྲིན་རྗེས་དྲན་གྱི་ཆེད་དུ། སེར་བྱེས་གྲྭ་ཚང་གི་ཆོས་རའི་ཐོག་ཁའི་ལྷུན་གྲུབ་ཁང་གསར་དུ། སེར་བྱེས་སློབ་གཉེར་ཁང་ངམ་སེར་བྱེས་རྒྱུགས་ཞིབ་ལྷན་ཚོགས་ཀྱིས་བཀོད་སྒྲིག་བྱས་ཏེ། དབུ་རྙིང་འཛིན་གྲྭའི་སློབ་གཉེར་བའི་གྲས་ནས་སློབ་གཉེར་བ་ཁ་ཤས་འདེམས་སྒྲུག་གིས། གྲྭ་ཚང་གི་དབུ་མ་འཛིན་གྲྭ་བཞི་གཙོ་བྱས་པའི་དགེ་འདུན་འདུས་པ་རྒྱ་མཚོའི་དབུས་སུ། ཕྱི་ལོ་ ༢༠༡༥ ལོའི་ཟླ་ ༩ པའི་ཚེས་ ༩ ཡི་སྔ་ཕྱིའི་དྲོ་གཉིས་དང་། ཚེས་ ༡༠ ཡི་ཉིན་རྒྱབ། དགོང་དྲོའི་ཆུ་ཚོད་ ༦ པ་ནས་དགུ་པའི་བར་བཅས་ཚོགས་ཐུན་བཞི་ཡི་ཚོགས་ཐེངས་རེའི་ཆུ་ཚོད་གསུམ་རེར། རྗེ་བླ་མའི་དགོངས་པ་རབ་གསལ་ལས་བརྗོད་གཞི་དྲུག་ལ་དགག་སྒྲུབ་ཕྱོགས་གཉིས་ཀྱི་འཆད་མཁན་རྣམ་པས་སོ་སོའི་རྩོམ་ཤོག་སྒྲོགས་སྦྱང་དང་། ཕན་ཚུན་དྲི་བ་དྲི་ལན། འདུས་དམངས་ཀྱི་ནང་ནས་དྲི་བ་བཏོན་པར་ལན་འདེབས་གནང་བ་སོགས་དུས་བསྟུན་གྱི་བགྲོ་གླེང་གི་རྣམ་པ་གསར་པ་ཞིག་གི་སྟེང་ནས་ཚོགས་སོང་།
ལས་རིམ་གསལ་བསྒྲགས་སུ་བཀོད་པ་ལྟར་ན། བརྗོད་གཞི་དྲུག་ནི།
བདག་མེད་རྫོགས་པར་སྟོན་མི་སྟོན་དང་སྒོམ་མི་སྒོམ་གྱི་ཁྱད་པར།  ལྟ་བ་ངེས་པ་ལ་དགག་བྱ་ངོས་འཛིན་སྔོན་དུ་འགྲོ་དགོས་མིན་གྱི་ཁྱད་པར།  ཞིག་པ་དངོས་པོ་ཡིན་མིན་དང་ཀུན་གཞི་བཞེད་མི་བཞེད་ཀྱི་ཁྱད་པར།  ཐལ་རང་ལ་ལྟ་བ་མཐོ་དམན་དང་རང་བཞིན་ཡོད་མེད་ཀྱི་ཁྱད་པར།  ཕུང་པོ་གང་ཟག་གི་བདག་གཞིར་དང་ཐ་སྙད་ཚད་གྲུབ་འཐད་མིན་གྱི་ཁྱད་པར།  ཤེེས་པར་གྱུར་པའི་ཤེས་སྒྲིབ་ཡོད་མེད་དང་ཤེས་སྒྲིབ་སྐོར་དགུར་ཕྱེ་ནས་སྤོང་མིན་གྱི་ཁྱད་པར།  བཅས་ཡིན་འདུག

སེར་བྱེས་མཁས་སྙན་གྲྭ་ཚང་གིས་གོ་སྒྲིག་འོག་རྒྱལ་སྤྱིའི་འདུལ་བའི་བགྲོ་གླེང་ཐེངས་གཉིས་པ་ཚོགས་སོང་།
བོད་རྒྱལ་ལོ་ ༢༡༤༣ ལོའི་ཟླ་ ༡ ཚེས་ ༡༧ ནས་ ༡༩ དང་ཕྱི་ལོ་ ༢༠༡༦ ལོའི་ཟླ་ ༠༢ ཚེས་ ༢༤ ནས་ ༢༦ བར་ཏེ་ཉིན་གསུམ་ལ་འཕགས་ཡུལ་ལྷོ་ཕྱོགས་སེར་བྱེས་མཁས་སྙན་གྲྭ་ཚང་གི་གོ་སྒྲིག་འོག་ཐའི་ལེནྜི་དང་ཐེ་ཝན་སོགས་རྒྱལ་ཁབ་དྲུག་ནས་ནང་པའི་དགེ་སློང་འདུལ་བ་འཛིན་པ་དང་མཁས་དབང་དུ་མ་གདན་འདྲེན་དང་ལྷན་འཛོམས་ཐོག་རྒྱལ་སྤྱིའི་རང་བཞིན་ཅན་གྱི་དམ་ཆོས་འདུལ་བའི་སྐོར་གྱི་བགྲོ་གླེང་ཐེངས་གཉིས་པ་སེར་བྱེས་གྲྭ་ཚང་གི་ཆོས་རའི་ནང་དུ་ཚོགས། ཕྱི་ཚེས་ ༢༤ ཉིན་གྱི་སྔ་དྲོའི་ཆུ་ཚོད་ ༡༠:༤༠ སྟེང་སྐུ་མགྲོན་རྣམས་དང་ཟུར་ཉན་ཚོགས་གཅར་བ་རྣམས་སེར་བྱེས་གྲྭ་ཚང་གི་ཆོས་རའི་ནང་དུ་འཛོམས་ཏེ། མར་མེ་ཞལ་འབྱེད་སོགས་གྲུབ་རྗེས་གྲྭ་ཚང་གི་སྐྱབས་རྗེ་མཁན་རིན་པོ་ཆེ་བློ་བཟང་བདེ་ལེགས་མཆོག་གིས་བགྲོ་གླེང་གི་དགོས་པ་དང་འབྲེལ་བའི་གསུང་བཤད་གནང་སྟེ་བགྲོ་གླེང་དབུ་འཛུགས་ཞུ་ཡོད་ལ། སྐུ་མགྲོན་གྱི་གྲས་སུ། དབུས་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་མཆོག་དང་། སྐྱབས་རྗེ་ངོར་ཤར་ཆེན་ཀླུ་ལྡིང་མཁན་རིན་པོ་ཆེའི་སྐུ་ཚབ། ༼སྐུ་མགྲོན་གྱི་མཚན་སོགས་མཛད་རིམ་ངོ་སྤྲོད་ལས་གསལ་བ་ལྟར་ཇི་བཞིན་བཀོད་ཡོད། ༽གདན་ཞུའི་སྐུ་མགྲོན་གཙོ་བོའི་གྲས་ཐེ་ཝན་ཛེང་ཇུའི་ལྷ་ཁང་དང་ཡོན་ཏོང་དགོན་པའི་མཁན་པོ་ཤཱི་ཀའོ་ཆཱིང་མཆོག །སཱ་ར་ན་ཐའི་མཧཱ་བོ་དྷི་ཚོགས་པའི་དགེ་སློང་འདུལ་བ་འཛིན་པ་པཱི་ཤཱི་ཝ་ལཱི་ཐེ་རོ། ཐའི་ལན་ཌིའི་དགེ་སློང་འདུལ་བ་འཚིན་པ་ཕཱ་རཱ་མཧཱ། བྷཏྶཀྲོན། པིཡོ་བྷ་སོ། དགེ་སློང་འདུལ་བ་འཛིན་པ་བོ་དྷི་པཱ་ལཱ་ཐེ་རཱ། མ་དྷུ་རཡ། ཏཱ་མིལ་ན་ཌུ། ཅིཏྟཱ་གྷོང་མཐོ་སློབ་ཀྱི་པཱ་ལི་སྡེ་ཚན། སློབ་དཔོན་ཆེན་པོ་ཛྙ་ན་རཏ་ན། བེངྒ་ལ་རུ་མ་ཧཱ་བོ་དྷི་ཚོགས་པ། དགེ་སློང་འདུལ་བ་འཛིན་པ་ཨ་ནྣ་ད་བནྡེ། ཐེ་ཝན་ཡོན་ཏོང་དགོན་པའི་འགན་འཛིན་དགེ་སློང་འདུལ་བ་འཛིན་པ་ཡོ་ཡུན་ཤཱི། ཝཱ་ཎ་གཅུག་ལག་སློབ་གཉེར་ཁང་གི་ཉམས་ཞིབ་སྡེ་ཚན་གྱི་འབུམ་རམས་པ་བློ་བཟང་རྡོ་རྗེ་རབ་གླིང་། མཁས་དབང་བློ་བཟང་ནོར་བུ་ཤཱསྟྲི་སོགས་ཀྱིས་བརྗོད་གཞི། པཱ་ལིའི་གཞུང་ནང་གསལ་བའི་འདུལ་བའི་སྨན་གྱི་སྐོར། འཕགས་པ་གནས་བརྟན་སྡེ་པའི་ལུགས་ཀྱི་དགེ་འདུན་གྱི་ལས་དང་། སྲ་བརྐྱང་། མཚམས་པོ་ཆེ་ཆུང་བཅད་ཚུལ། འཕགས་པ་གནས་བརྟན་སྡེ་པའི་ལུགས་ཀྱི་གོས་ཀྱི་སྐོར། བྷང་གྷ་ལ་དེ་ཤའི་གནས་བརྟན་སྡེ་པའི་ལུགས་ཀྱི་འདུལ་བའི་གཞུང་དང་དེའི་ཕྱག་ལེན་སྐོར་གྱི་དཔྱད་ཞིབ། དགེ་བསྙེན་གྱི་སྡོམ་པའི་སྐོར། སྡོམ་པ་སྲུང་ཚུལ། རང་གི་ཕ་དང་མེས་པོ་སོགས་ལ་གུས་པ་བྱེད་པའི་ལུགས་ལྟར་གྱི་སྡོམ་པ་ཕར་ཕྱིན། བྱིན་ལེན་སྟོབ་པ་པོའི་ཁྱིམ་པ་མེད་དུས་བྱིན་ལེན་ཇི་ལྟར་བྱ་བའི་ཚུལ། གཞི་ཐམས་ཅད་ཡོད་སྨྲ་དང་ནང་པའི་སྡེ་པ་གཞན་གྱི་འདུལ་གཞུང་སྐོར། འདུལ་སྔགས་ཟུང་དུ་སྦྲེལ་བ་བཅས་ཀྱི་ཐོག་ལ་བགྲོ་གླེང་གཏམ་བཤད་དང་། དམངས་དང་དྲི་བ་དྲིས་ལན་གནང་ཞིང་། རྒྱལ་སྤྱིའི་འདུལ་བའི་བགྲོ་གླེང་ཐེངས་གསུམ་པའི་སྐོར་ལ་བགྲོ་གླེང་དང་གྲོས་བསྡུར་གནང་སྟེ་ཚེས་ ༢༦ ཉིན་བགྲོ་གླེང་གྲོལ།

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༢།༢༧ ལ།