འདི་ག་རྩོམ་སྒྲིག་ཁང་གི་འགན་འཛིན་རྙིང་པས་རྩོམ་སྒྲིག་ཁང་གི་ཅ་དངོས་རྣམས་དང་དྲ་རྒྱའི་གསང་གྲངས་དང་ཡིག་ཆ་སོགས་འགན་འཛིན་གསར་པ་རྣམས་ལ་རྩིས་སྤྲོད་བྱས།
   འདི་ག་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་གི་འགན་འཛིན་བསམ་བྱ་གཞུང་ཀླུ་སྒྲུབ་པས་རྒྱུད་ཀྱི་ཆོས་ཐོག་འཁོར་དགོས་པ་སོགས་ཀྱིས་གྲྭ་ཚང་གི་ཕྱག་མཛོད་དང་རྒྱུན་ལས་རྣམས་ལ་རྩ་དགོངས་ཞུས་པར་བརྟེན། རྒྱུན་ལས་ནས་དགོངས་འཁྲོལ་བྱུང་བ་དང་། རྩོམ་སྒྲིག་ཁང་གི་ལས་བྱེད་རྙིང་པའི་གྲས། ལྷོ་སྐལ་བཟང་ཐར་འདོད་དང་། བྱ་གྲོལ་སྡེ་རྒྱ་མཚོ། མངའ་ཐུབ་བསྟན་ཚེ་རིང་གསུམ་ལ་རྒྱུན་ལས་རྣམས་དང་ཕྱག་མཛོད་བཅས་ཀྱིས་རེ་སྐུལ་བྱས་པ་ལྟར། རྣམ་པ་གསུམ་མཉམ་འབྲེལ་གྱིས་རྩོམ་སྒྲིག་གི་ལས་ཀ་བྱེད་རྒྱུའི་གྲོས་ཆོད་བྱུང་སྟེ་བོད་རྒྱལ་ལོ་ ༢༡༤༦ དང་རབ་གནས་ས་ཕག་ལོ། སྤྱི་ལོ་ ༢༠༢༠ ལོའི་ཟླ་ ༠༥ ཚེས་ ༠༩ ཉིན་གྲྭ་ཚང་གི་ཕྱག་མཛོད་སོགས་མཉམ་འཛོམས་ཀྱིས་རྩོམ་སྒྲིག་ཁང་གི་ཅ་དངོས་རྣམས་དང་། དྲ་རྒྱའི་གསང་གྲངས་ཁག །ཡིག་ཆ་གཞན་རྣམས་བཅས་འགན་འཛིན་གསར་པ་གསུམ་ལ་རྩིས་སྤྲོད་བྱས།
  དེ་ཡང་ཐོག་མར་སྤྱི་ལོ་ ༢༠༡༤ ལོར་འདི་ག་སེར་བྱེས་མཁས་སྙན་གྲྭ་ཚང་ནས་གྲྭ་ཚང་རང་གི་བོད་ཡིག་གི་དྲ་རྒྱའི་ངོ་བོའི་ཐོག་ནས་འཕྲུལ་དེབ་དང་དཔེ་ཁྲིད་སོགས་ཉར་ཚགས་དང་དོན་གཉེར་ཅན་རྣམས་ཀྱི་ཆེད་དྲ་ཚིགས་ཤིག་བཟོ་རྒྱུའི་དགོངས་འཆར་བྱུང་བ་ལྟར། སྐབས་དེའི་གྲྭ་ཚང་གི་ཕྱག་མཛོད་ནས་བསམ་བྱ་གཞུང་ཀླུ་སྒྲུབ་ལ་ནན་ཆེར་བསྐུལ་བ་ལ་བརྟེན་ནས་རྩོམ་སྒྲིག་གི་ལས་ཀ་བྱེད་རྒྱུའི་ཁས་ལེན་ཞུས་ཏེ། ལས་ཀ་བྱེད་སྟངས་སོགས་དང་དྲ་ཚིགས་དངོས་སུ་འཆར་འགོད། དྲ་ཚིགས་ཀྱི་མིང་གཏན་འབེབས། རྒྱུས་ཆ་དང་ཡིག་ཆ་འཚོལ་སྒྲུབ་སོགས་དང་། དྲ་ངོས་ཀྱི་ངོ་སྤྲོད་མི་འདྲ་བ་གང་མང་བཏུས་བསྒྲིགས་བྱས་ཤིང་། དྲ་ཚིགས་སྒྲིག་བཟོའི་ཆེད་མཁས་པ་གདན་ཞུས་ཀྱིས། དྲ་ཚིགས་གསར་བཟོ་སོགས། ལོ་དེའི་ཕྱི་ཟླ་༡༠ པའི་ཕྱི་ཚེས་ ༡༥ ཉིན་ལས་འགོ་དངོས་སུ་བཙུགས་ཤིང་། རིམ་གྱིས་ལས་བྱེད་དུ་ཐོ་འགོད་བྱུང་བ་དང་རེ་སྐུལ་བྱས་པ་བཅས། གཞུང་དང་རིག་གནས་སོགས་ལ་ཤེས་རྒྱ་ཡོད་པའི་རྒྱུས་ཡོད་ཀྱི་ལས་རོགས་ཁ་ཤས་འདེམས་སྒྲུག་བྱས་ཏེ། པར་རྩ་གང་མང་རྩིས་འཁོར་དུ་གསར་བཏགས་དང་གཤིབ་བསྡུར་བྱས་ཏེ་འཕྲུལ་དེབ་གསར་བཟོ་དང་། དྲ་ངོས་ཀྱི་དཀར་ཆག་རྣམས་ལས་ཚན་པ་ངོས་འཛིན་དང་གནོད་སྐྱོན་བརྟག་ཆེད་འཕྲུལ་དེབ་ཏུ་རྩོམ་སྒྲིག་བྱེད་མ་ཐུབ་པ་རྣམས་ལ་ཚབ་རེ་བཟོས་ཏེ་བཞག་པ་དང་། དཔེ་ཁྲིད་གང་མང་སློབ་གཉེར་བའི་ཁྲོད་ནས་འཚོལ་བསྡུ་བྱས་ཏེ་སྒྲིག་བཟོ་སོགས་ཀྱིས་སྒྲ་མཛོད་ཀྱི་དཀར་ཆག་གི་ཚན་པ་རྣམས་སུ་བཞག་པ་སོགས་ཀྱིས་ཟླ་ངོ་བཅུ་ལྷག་ལ་དཀའ་ངལ་གང་མང་ལ་གདོང་ལེན་བརྒྱུད། དྲ་ཚིགས་གསར་བཟོ་གྲུབ་སྟེ་ཕྱི་ལོ་ ༢༠༡༥ ལོའི་ཟླ་ ༨ པའི་ཚེས་ ༡༩ ཉིན་གྱི་སྔ་དྲོའི་ཆུ་ཚོད་དགུ་པའི་སྟེང་། སྐུ་མགྲོན་གཙོ་བོ་སེ་ར་བྱེས་སྨད་གཉིས་ཀྱི་མཁན་རིན་པོ་ཆེའི་གཙོས། ཆོས་རིག་བཀའ་ཟུར་མཆོག་དང་། ཆོས་བརྒྱུད་ཁག་གི་མཁན་པོ་དང་སྐུ་ཚབ་སོགས་སེར་བྱེས་གྲྭ་ཚང་གི་ཆོས་རར་འཛོམས་ཏེ། སེར་བྱེས་རིག་མཛོད་ཆེན་མོའི་དྲ་ཚིགས་དངོས་སུ་དབུ་འབྱེད་གནང་ཡོད། ཐོག་མར་དྲ་ཚིགས་གསར་བཟོའི་སྐབས་ཡིག་ཆ་སོགས་གྲ་སྒྲིག་གང་ཡང་མེད་ནའང་རིམ་གྱིས་ཡིག་ཆ་གསར་བསྒྲིགས་དང་དྲ་ངོས་བསྐྱར་བཅོས་ཐེངས་བཞི་ལ་བྱས་པ་ལས་ད་ལྟའི་དྲ་ཚིགས་དང་དྲ་ངོས་འདི་གྲུབ་པ་ཡིན་ཞིང་། ཉིན་རེར་དཔེ་ཁྲིད་དང་འཕྲུལ་དེབ་སོགས་གསན་གཟིགས་བྱེད་མཁན་སུམ་སྟོང་བཞི་སྟོང་ལྷག་དྲ་ཞུགས་ཀྱིས་སློབ་སྦྱོང་བྱེད་ཀྱིན་ཡོད།

 དྲ་ཚིགས་འདི་ཉིད་འཕྲུལ་དེབ་དང་དཔེ་ཁྲིད་ཙམ་ཁོ་ནའི་ཆེད་དུ་མ་ཡིན་པར་སྣ་འཛོམས་རང་བཞིན་ཅན་གྱི་དྲ་ཚིགས་ཤིག་བསྒྲུབ་རྒྱུར་འབད་རྩོལ་བྱེད་ཀྱིན་ཡོད་ལ། དྲ་ངོས་ཀྱི་སྡེ་ཚན་ལ་མཚོན་ནའང་སྡེ་ཚན་ཆེ་ཁག་མི་འདྲ་བ་བཅུ་ལྷག་འཆར་འགོད་དང་རྩོམ་སྒྲིག་བྱས་ཡོད།

འགན་འཛིན་རྙིང་པའི་སྐབས་ཀྱི་ལོ་ངོ་ལྔའི་རིང་གི་ལས་བསྡོམས།

༡ ] གཞུང་ཆེན་སོགས་སློབ་གཉེར་བའི་དགོས་མཁོར་དམིགས་ཏེ་འཕྲུལ་དེབ་ཁྱོན་བསྡོམས་ ༣༠༠ ལྷག་ཙམ་རྩོམ་སྒྲིག་བྱས་ཏེ་ལྟ་ཀློག་དང་མཉམ་དུ་དཔེ་ཁྲིད་ཡོད་པ་དག་ལ་དཔེ་ཁྲིད་ཀྱི་དྲ་སྣེ་དང་མཉམ་སྦྱར་གྱིས་དྲ་ཚིགས་སུ་བཞག་ཡོད།
༢ ] སྒྲ་མཛོད་ཀྱི་ནང་དུ་གཞུང་ཆེན་སོགས་ཀྱི་དཔེ་ཁྲིད་ ༦༠༠ ལྷག་ཙམ་འཚོལ་བསྡུ་བྱས་ཏེ་ mp3. བཟོ་བ་དང་ཕབ་ལེན་སོགས་ཀྱི་ཆེད་དུ་ལྗིད་ཚད་ཇེ་ཆུང་དུ་གཏོང་བ་དང་མི་གསལ་རྣམས་ཇེ་གསལ་དུ་གཏོང་བ་སོགས་ཀྱི་སྒྲིག་སྦྱོར་དང་ཁྲིད་གཞུང་གི་འཕྲུལ་དེབ་ཡོད་པ་དག་ལ་དྲ་ཚིགས་ཀྱི་སྦྲེལ་སྣེ་མཉམ་སྦྱར་བྱས་ཏེ་སེར་བྱེས་རིག་མཛོད་ཆེན་མོའི་དྲ་ཚིགས་དང་སྒྲ་རྐྱང་པ་ཉན་བྱེད་ཀྱི་མཉེན་ཆས་ SoundCloud གཉིས་སུ་བཞག་ཡོད།
༣ ] བརྙན་མཛོད་ཀྱི་ནང་དུ་མཛད་རྣམ་སོགས་བརྙན་མི་འདྲ་བ་བརྒྱ་ཕྲག་ལྷག་སྒྲིག་སྦྱོར་བྱས་ཏེ་བཞག་ཡོད་ལ། དཔེ་ཆ་རྩོམ་སྒྲིག་དང་པར་བཟོ་སྟངས། དྲ་ཚིགས་བཟོ་སྟངས་སོགས་ཀྱི་སྐོར་ལ་ཆེད་མཁས་པས་ཟབ་སྦྱོང་སྤྲད་པ་དག་བརྙན་དུ་ཕབ་ལེན་དང་བཅོས་སྒྲིག་བྱས་པའི་བརྙན་བརྒྱ་ཕྲག་ཁ་ཤས་དྲ་ངོས་སུ་འཇོག་རྒྱུར་གྲ་སྒྲིག་བྱས་ཡོད།
༤ ] གསར་འགྱུར་གྱི་སྡེ་ཚན་གྱི་ནང་དུ་གྲྭ་ཚང་གི་མཛད་རིམ་ཆེ་ཁག་གིས་མཚོན་གསར་འགྱུར་མི་འདྲ་བ་ ༨༡ བྲིས་ཏེ་དྲ་ཚིགས་སུ་བཞག་ཡོད།
༥ ] ཚོམས་ཀྱི་སྡེ་ཚན་ནང་དུ་དུས་ཆེན་ཁག་སོགས་ཀྱི་ངོ་སྤྲོད་མི་འདྲ་བ་ ༦༨ བྲིས་ཏེ་དྲ་ཚིགས་སུ་བཞག་ཡོད།
༦ ] ལོ་རྒྱུས་ཀྱི་སྡེ་ཚན་གྱི་ནང་དུ་སེ་རའི་ལོ་རྒྱུས་དང་གྲྭ་ཚང་གི་ལོ་རྒྱུས་དང་ཚོགས་པ་ཁག་སོགས་ཀྱི་ངོ་སྤྲོད། གྲྭ་ཚང་ཕྱག་བཏབ་པ་ནས་ད་ལྟའི་བར་གྱི་མཁན་རབས་རིམ་བྱོན་གྱི་མཚན་ཐོ་དང་མཁན་རབས་སུམ་ཅུ་ལྷག་གི་ལོ་རྒྱུས། གྲྭ་ཚང་རང་ནས་བྱོན་པའི་དགའ་ལྡན་ཁྲི་པ་རིམ་བྱོན་གྱི་མཚན་ཐོ་དང་ཁྲི་ཆེན་བཅོ་ལྔའི་ ༡༥ ལོ་རྒྱུས། གྲྭ་ཚང་རང་ནས་ཕེབས་པའི་བོད་ཀྱི་ལོ་རྒྱུས་ཐོག་གྲགས་ཆེ་བའི་མཁས་དབང་རིམ་བྱོན་གྱི་མཚན་ཐོ། གྲྭ་ཚང་རང་ནས་ཕེབས་པའི་རྒྱུད་སྟོད་སྨད་ཀྱི་མཁན་པོ་རིམ་བྱོན་གྱི་མཚན་ཐོ་དང་མཁན་པོ་རྣམས་ཀྱི་ལོ་རྒྱུས་སོགས་བྲིས་ཏེ་དྲ་ཚིགས་སུ་བཞག་ཡོད།
༧ ] པར་མཛོད་ཀྱི་ནང་དུ་གྲྭ་ཚང་གི་ལོ་རྒྱུས་ཐོག་ལ་གལ་ཆེ་བའི་པར་རྙིང་སོགས་པར་སྣ་མི་འདྲ་བ་ཉིས་བརྒྱ་ལྷག་འཚོལ་བསྡུ་བྱས་ཏེ་དྲ་ཚིགས་སུ་བཞག་ཡོད།
༨ ] གཞན་འཕྲུལ་དེབ་ཀྱི་གཞུང་མཛད་པ་པོའི་རྣམ་ཐར་མི་འདྲ་བ་བརྒྱ་ཕྲག་ལྷག་རྒྱས་བསྡུས་མི་འདྲ་བ་གཉིས་རེ་གསར་རྩོམ་བྱས་ཏེ་འཕྲུལ་དེབ་དང་དྲ་ངོས་སུ་བཞག་ཡོད།
༩ ] དཔེ་ཁྲིད་གནང་མཁན་གྱི་ལོ་རྒྱུས་མི་འདྲ་བ་བརྒྱ་ཕྲག་ལྷག་གསར་རྩོམ་བྱས་ཏེ་དྲ་ངོས་སུ་བཞག་ཡོད།
༡༠ ] དྲ་ཚིགས་ཀྱི་དཀར་ཆག་སྡེ་ཚན་ཆེ་བ་བཅུ་ལྷག་དང་། ཡན་ལག་གི་དཀར་ཆག་ཉིས་བརྒྱ་དང་ལྔ་བཅུ་ལྷག་འཆར་འགོད་དང་གསར་རྩོམ་བྱས་ཡོད།
༡༡ ] འཕྲུལ་དེབ་དང་སྒྲ་མཛོད་བརྙན་སོགས་ལ་དྲ་ངོས་སུ་ངོ་སྤྲོད་ཚན་པ་གཉིས་རེ་བཅས་ཁྱོན་བསྡོམས་ངོ་སྤྲོད་ཚན་པ་ཆིག་སྟོང་ལྔ་བརྒྱ་ལྷག་གསར་རྩོམ་དང་སྒྲིག་བཀོད་བྱས་ཡོད།
༡༢ ] བཀའ་བསྟན་སོགས་གསུང་རབ་ཀྱི་པར་རྩ་ pdf ནང་དུ་ཡོད་པ་ཁྲི་གཅིག་ལྷག་འཚོལ་བསྡུ་བྱས་ཡོད་ལ། (word) ནང་དུ་ཡོད་པ་གཤིབ་བསྡུར་བྱས་ཏེ་འཕྲུལ་དེབ་ཏུ་རྩོམ་སྒྲིག་བྱས་ཆོག་པའི་པར་རྩ་སྟོང་ཕྲག་ཁ་ཤས་དང་། ཞུས་དག་སོང་བའི་པར་རྩ་བརྒྱ་ཕྲག་གཅིག་ལྷག་འཚོལ་བསྡུ་བྱས་ཡོད།
༡༣ ] རིག་མཛོད་དཔེ་ཚོགས་ཀྱི་ངོ་བོར་དཔེ་ཆ་དྲུག་རྩོམ་སྒྲིག་བྱས་ཡོད།
༡༤ ] གཞན་དགེ་རྒན་གདན་འདྲེན་ཞུས་ཏེ་རྩོམ་སྒྲིག་ཁང་གི་ལས་བྱེད་རྣམས་ལ་ལོ་བཞི་ལ་དྲ་རྒྱ་སོགས་ཀྱི་སྐོར་ལ་ཟབ་སྦྱོང་ཟླ་གསུམ་རེར་སྤྲད་ཡོད།
༡༥ ] གཅེས་ཉར་ཡིག་ཚགས་སུ་འཇོག་རྒྱུར་དཔེ་ཆ་པར་བཤུས་བྱས་པ་བརྒྱ་ལྷག་ཡོད།
༡༦ ] གཞན་འཕྲུལ་དེབ་ཏུ་རྩོམ་སྒྲིག་བྱ་ཆོག་པ་བསྟན་འགྱུར་གྱི་པོ་ཏི་ཉི་ཤུ་དང་། རྒྱལ་ཚབ་རྗེ་དང་མཁས་གྲུབ་རྗེ་གཉིས་ཀྱི་གསུང་འབུམ་ལས་པོ་ཏི་རེ་གཉིས་མ་གཏོགས་ཆ་ཚང་དཔེ་བསྡུར་གྲུབ་སྟེ་འཕྲུལ་དེབ་ཏུ་རྩོམ་སྒྲིག་བྱེད་ཀྱིན་ཡོད།
༡༧ ] ཁྱོན་བསྡོམས་ལོ་རྒྱུས་སོགས་གསར་རྩོམ་བྱས་ཏེ་བྲིས་པ་ཤོག་གྲངས་ A4 ཅན་ ༢༢༥༦ ལྷག་དང་ཡིག་འབྲུ་འབུམ་ཕྲག་ཁ་ཤས་བྱུང་ཡོད།

༢༠༢༠།༠༥།༠༩ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།

སེར་སྨད་ཐོས་བསམ་ནོར་གླིང་གྲྭ་ཚང་གི་རྒྱལ་རོང་མཁན་ཟུར་ངག་དབང་ཐེག་མཆོག་རིན་པོ་ཆེ་མཆོག་ནི། སྤྱི་ལོ་ ༡༩༢༨ ལོར་བོད་ཤར་ཕྱོགས་རྒྱལ་རོང་ཅོག་ཙེ་ས་ཁུལ་དུ་འབྲོག་ཁྱིམ་ཞིག་ཏུ་ཡབ་དོན་གྲུབ་དང་ཡུམ་ཚེ་རིང་ལྷ་མོ་གཉིས་ཀྱི་སྲས་སུ་སྐུ་འཁྲུངས་ཡོད་པ་དང་།
   དགུང་གྲངས་བཅུ་གཅིག་ཙམ་ནས་རབ་ཏུ་བྱུང་བའི་འདུན་པ་ཤུགས་ཆེར་བྱུང་ཡང་། ནོར་ཕྱུགས་ལྟ་སྐྱོང་སོགས་ཀྱི་ལས་ལ་མཁོ་བས། ཡབ་དང་གཅེན་མོས་རེ་ཞིག་མ་གནང་། དགུང་ལོ་བཅུ་དྲུག་བར་གཅེན་མོ་དང་ཁོ་མོའི་ཟླ་བོའི་ཁྱིམ་དུ་འབྲོག་ལས་ལ་གཞོལ་བར་མཛད། གཅེན་མོའི་ཟླ་བོ་ལས་ཆོས་སྤྱོད་སོགས་ཀྱང་སྦྱངས། སྐུ་མཆེད་རྒན་པ་བྱམས་པ་བདེ་ལེགས་སེ་རར་ཐོས་བསམ་གྱིས་མཚན་སྙན་རྒྱས་པར་ཡི་རངས་ཏེ། བོད་དབུས་གདན་ས་སེ་རར་བསྐྱོད་འདོད་བྱུང་བར་སྲིང་མོ་རྣམ་གཉིས་ཀྱིས་གནང་བ་སྩལ།
   དགུང་ལོ་བཅུ་བདུན་པ་སྤྱི་ལོ་ ༡༩༤༥ ལོའི་བོད་ཟླ་ ༣ ཚེས་ ༡༣ ཉིན་གྱི་སྔ་དྲོར་རང་ཡུལ་རྒྱལ་མོ་རོང་ནས་བོད་དབུས་གདན་སར་ཟླ་བ་བཞིའི་རིང་འགྲུལ་བཞུད་གནང་སྟེ། བོད་ཟླ་ ༧ ཚེས་ ༡༢ ཉིན་གདན་ས་ཆེན་པོ་སེ་ར་ཐེག་ཆེན་གླིང་དུ་འབྱོར། དེར་རང་ཁོངས་སེར་སྨད་ཐོས་བསམ་ནོར་གླིང་གྲྭ་ཚང་དུ་སྒྲིག་ཞུགས་དང་རབ་བྱུང་དགེ་ཚུལ་སློང་གི་བསླབ་སྡོམ་རྣམས་ལེགས་པར་མནོས་ཏེ། ལོ་བཅོ་ལྔ་ཙམ་ལ་གཞུང་ཆེན་ཁག་ལ་ཐོས་བསམ་སློབ་གཉེར་གནང་། སྐབས་གཉིས་པའི་འཛིན་གྲྭར་ཕེབས་པ་ནས་སློབ་གཉེར་བ་གཞན་ལ་དཔེ་ཁྲིད་ཀྱང་གནང་།
   སྤྱི་ལོ་ ༡༩༥༩ ལོར་སློབ་གཉེར་མཐར་ཕྱིན་ཏེ་དགེ་བཤེས་ཀྱི་མཚན་རྟགས་བཞེས་ལ་ཉེ་སྐབས། བོད་ཡུལ་ཡོངས་རྫོགས་སུ་བསྟན་པ་ཉམས་སྨས་པར་གྱུར་པས་དགེ་བཤེས་དམ་འཇོག་ཕྱིར་འགྱངས་བྱེད་དགོས་བྱུང་ཡོད་པ་དང་། ༧ སྟོན་པ་འཇིག་རྟེན་དབང་ཕྱུག་འཕགས་ཡུལ་དུ་ཕེབས་པའི་རྗེས་སུ་འཕགས་ཡུལ་དུ་ཕེབས་ཡོད་ནའང་། ལམ་བར་ནས་སླར་ཡང་བོད་དུ་ཆོས་བྱེད་ཆོག་པའི་གནས་ཚུལ་གསན་འཕྲལ་ལྷ་སར་ཕྱིར་ལོག་མཛད།
   སྤྱི་ལོ་ ༡༩༥༩ ནས་ ༡༩༦༢ བར་ལོ་ཤས་རིང་རྒྱ་གཞུང་གི་བཅོས་བསྒྱུར་ལས་འགུལ་ཁྲོད་སྐུ་ངལ་བསྐྱོན་དགོས་བྱུང་ཡོད་ན་ཡང་། སྤྱི་ལོ་ ༡༩༦༢ ལོར་སླར་ཡང་སྐུ་རྐྱང་འབྲུག་ཡུལ་བརྒྱུད་འཕགས་ཡུལ་དུ་ཕེབས།
ཐོག་མར་བྱ་བྲལ་དུ་ཕེབས་འདུན་མཛད་ཀྱང་། ༧རྒྱལ་བའི་༧ཡོངས་འཛིན་རྣམ་གཉིས་ཀྱིས་བཀས་བསྐུལ་བ་ དང་། གྲྭ་ཚང་གིས་གསོལ་འདེབས་ནན་ཞུས་ངོར། སྦག་སར་གདན་གསུམ་རིས་མེད་ཆོས་གྲྭ་ཐར་འདོད་ཐོས་བསམ་གླིང་གསར་འཛུགས་བྱུང་ཡོད་པར་སེར་སྨད་གྲྭ་ཚང་དུ་བཞུགས་ཏེ། ཉིན་རེར་སློབ་གཉེར་བ་རྣམས་ལ་གཞུང་ཆེན་དཔེ་ཁྲིད་བསྐྱངས། སྤྱི་ལོ་ ༡༩༦༦ ལོར་སྦག་སར་འདུས་པ་རྒྱ་མཚོའི་དབུས་སུ་དགེ་བཤེས་དམ་འཇོག་སྐབས་ལྷ་རམས་ཨང་དང་པོའི་མཚན་རྟགས་བཞེས། ལོ་དེར་ ༧ སྟོན་པ་འཇིག་རྟེན་དབང་ཕྱུག་གིས་སེར་སྨད་ཐོས་བསམ་ནོར་གླིང་གྲྭ་ཚང་གི་མཁན་པོར་བསྐོ་བཞག་གནང་།
   མཁན་པོའི་མཛད་འགན་བཞེས་རིང་གདན་གསུམ་མཚན་ཐོར་མི་འགྲོ་བར་གནས་ཐུབ་པའི་གྲོས་འཆར་ཐག་གཅོད་སོགས་ལ་ཐུགས་འགན་ཆེར་བཞེས་དང་། སེར་སྨད་ཐོས་བསམ་ནོར་གླིང་གྲྭ་ཚང་གི་ཐུན་མོང་མིན་པའི་བློ་འཛིན་རྒྱུགས་ལེན་དང་། རྒྱུགས་ཚད་གཟེངས་རྟགས་འབུལ་སྲོལ་དང་། ཚོགས་ལངས་ལམ་སྲོལ་སོགས་སྤྱི་ལོ་ ༡༩༥༩ ཚུན་ནས་ཉམས་པ་རྣམས་སླར་གསོ་མཛད།
   ༡༩༧༠ ལོའི་ལོ་མཇུག་ནས་གདན་གསུམ་རྒྱ་གར་ལྷོ་ཕྱོགས་སུ་གནས་སྤོ་གནང་སྐབས། གདན་ས་སེ་ར་སྤྱི་དང་། སེར་སྨད་གྲྭ་ཚང་གནས་སྤོའི་ཐུགས་འགན་བཞེས་ཤིང་། ལྷོ་ཕྱོགས་སུ་འབྱོར་རྗེས་གདན་ས་སླར་ཡང་གསར་འཛུགས་ཀྱི་ལས་གཞི་རྣམས་ལ་ཐུགས་འགན་བཞེས།
   ༡༩༦༦ ནས་ ༡༩༧༦ བར་ཏེ་ལོ་ངོ་བཅུ་གཅིག་རིང་མཁན་པོའི་མཛད་འགན་བསྐྱངས་པ་དང་། ༡༩༨༣ ལོ་ནས་དབུ་བརྩམས་ཏེ་དཔལ་རྡོ་རྗེ་འཇིགས་བྱེད་ཀྱི་བསྙེན་ཆེན་གནང་། དེ་རྗེས་ཉིན་རེར་སློབ་གཉེར་བ་རྣམས་ལ་དཔེ་ཁྲིད་ཚོགས་ཐེངས་བཅུ་རེ་གནང་བ་དང་། སྐབས་སོ་སོར་གདན་སར་བྱང་ཆུབ་ལམ་རིམ་གྱི་ཁྲིད་དང་། འདུལ་བའི་བསླབ་བྱའི་ཁྲིད་རྒྱུན་སོགས་ཀྱང་གནང་།
   ༡༩༩༡ ནས་ལོ་སྔ་ཕྱིར་ཕ་ཡུལ་རྒྱལ་རོང་ནས་དགོན་སྡེ་རྣམས་དང་ཡུལ་མི་རྣམས་ཀྱིས་ཡང་ཡང་ཞུ་ངོར། རང་ཡུལ་དུ་ཕེབས་ཏེ་དགོན་སྡེ་རྣམས་སུ་གཞུང་ཆེན་མོའི་ཁྲིད་དང་ལུང་། དབང་སོགས་གནང་།
   ༡༩༩༨ ལོར་གྲྭ་ཚང་གིས་ཐུགས་རེ་ལྟར། ཐའི་ཝེན། སིངྒ་པུར། ཨོསི་ཊོ་ལི་ཨ་སོགས་ཡུལ་གྲུ་རྣམས་སུ་ཕྱོགས་བསྐྱོད་དང་། གྲྭ་ཚང་གི་འདུ་ཁང་ཆེན་མོ་གསར་རྒྱག་དང་། སློབ་གཉེར་བའི་འཚོ་རྟེན། དཔེ་མཛོད་དང་སློབ་གྲྭའི་མཐུན་རྐྱེན་སོགས་ལ་སྨན་པར་མཛད།
   ༡༩༩༩ ལོར་གྲྭ་ཚང་རང་གི་ཐུན་མོང་མ་ཡིན་པའི་མཛོད་འདུལ་གྱི་རྩོད་པ་སོགས་སླར་གསོ་གནང་བ་དང་།
   སྤྱི་ལོ་ ༢༠༡༣ ཟླ་ ༤ ཚེས་ ༨ ཉིན་གྱི་མཚན་མོའི་ཆུ་ཚོད་ ༡།༡༥ ཙམ་ལ་དགོངས་པ་ཆོས་དབྱིངས་སུ་ཐིམ་ཚུལ་མཛད།

༢༠༡༩.༡༠.༣༠.ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་དམ་འདྲེན་བཀོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་པ་ཡིན།]ཞེས་རྩོམ་ཁུངས་ཁ་གསལ་འགོད་དགོས།

སྒྲ་ཨང་།  KADLL2060467
མཁས་པ་གཞན། [ལམ་རིམ་བློ་སྦྱོང་།] སྤྱིའི་ཨང་། ༦༡༧
རྣམ་པ། MP3 རྣམ་གྲངས། 34 ཆེ་ཆུང་། 842.4 MB
ཁྲིད་གཞུང་། ཀུན་བཟང་བླ་མའི་ཞལ་ལུང་།
བརྗོད་བྱ། རྫོགས་པ་ཆེན་པོ་ཀློང་ཆེན་སྙིང་ཏིག་གི་སྔོན་འགྲོ།
མཛད་པ་པོ། རྫ་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ། [ ༡༨༠༨-༡༨༨༧]
འཁྲིད་མཁན། སངས་རྒྱས་མཉན་པ་རིན་པོ་ཆེ།
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༡༩ ལོའི་ཟླ་བཅུ་པའི་ཚེས་སོ་གཅིག་གི་ཉིན་སྒྲིག་སྦྱོར་བྱས།
ངོ་སྤྲོད་མདོར་བསྡུས།
སྐྱབས༌རྗེ༌གྲུབ༌དབང༌སངས༌རྒྱས༌མཉན་པ་རིན༌པོ༌ཆེ་སྐུ་ཕྲེང་བཅུ་པ་མཆོག་ནི། སྤྱི་ལོ་ ༡༩༦༤ ལོར་འབྲུག་ཡུལ་གྱི་ས་གནས་སྤ་གྲོ་སྟག་ཚང་ཞེས་པར་ཡབ་སངས་རྒྱས་ལེགས་པ་དང་། ཡུམ་ཀརྨ་ཚེ་དབང་ཆོས་སྒྲོན་གཉིས་ཀྱི་སྲས་སུ་སྐུ་འཁྲུངས། རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པ་མཆོག་གིས་མཉན་པ་རིན་པོ་ཆེ་སྐུ་གོང་མའི་ཡང་སྲིད་དུ་ངོས་འཛིན་གནང་། རྒྱལ་དབང་མཆོག་གིས་ཀརྨ་དཔལ་ལྡན་རང་བྱུང་འཕྲིན་ལས་ཀུན་ཁྱབ་བསྟན་པའི་རྒྱལ་མཚན་དཔལ་བཟང་པོ་ཞེས་མཚན་གསོལ། རུམ་བཏེག་དགོན་པར་གདན་ཞུས་ཀྱིས་དེ་གར་བཞུགས་ཁྲིར་མངའ་གསོལ་དང་གནང་ཏེ། དགུང་ལོ་ལྔ་ནས་ནང་ཆོས་སློབ་གཉེར་གྱི་དབུ་བཙུགས། རྒྱལ་དབང་ཀརྨ་པ་མཆོག་དང་། འབྲི་གུང་མཁྱེན་བརྩེ་རིན་པོ་ཆེ་སོགས་བསྟེན་ནས་དབང་བཀའ་ཕྱག་ཆེན་སོགས་ཟབ་ཆོས་མང་དུ་ཞུས་པ་དང་། དགེ་ཚུལ་གྱི་སྡོམ་པ་སོགས་ཀྱང་མནོས། རུམ་བཏེག་བཤད་སྒྲུབ་ཆོས་འཁོར་གླིང་གི་མཐོ་རིམ་བཤད་གྲྭ་ཆེན་མོ། ཀརྨ་ཤྲཱི་ནཱ་ལནྡཱ་ཆེས་མཐོའི་གཙུག་ལག་སློབ་གཉེར་ཁང་དུ་ལོ་ངོ་བཅུ་ལྷག་ལ་སློབ་གཉེར་གནང་སྟེ་ཨ་ཙ་རྱའི་མཚན་གནས་བཞེས་ཤིང་། མདོ་སྔགས་གཞུང་མན་ངག་དང་བཅས་པར་གསན་བསམ་གནང་། དེ་རྗེས་ལོ་གསུམ་ལྷག་ལ་སློབ་གཉེར་ཁང་དེར་ཁྲིད་སོགས་གནང་སྟེ་བཞུགས་པ་དང་། དེ་ནས་བལ་ཡུལ་གྱི་བན་ཆེན་གདན་སར་བཞུགས་ཏེ་བཤད་གྲྭའི་སློབ་གཉེར་བ་རྣམས་ལ་ཁྲིད་སོགས་གནང་བ་དང་། རྒྱུན་དུ་ཕྱི་ནང་གི་དོན་གཉེར་ཅན་གང་མང་ལ་ཟབ་ཆོས་མང་དུ་སྩོལ་མུར་བཞུགས་པ་ལགས་སོ། །[རྩོམ་སྒྲིག་པས་རྣམ་ཐར་དབྱིན་ཡིག་ལས་བསྒྱུར་བ་ཡིན་པས་སྐྱོན་དང་ནོར་འཁྲུལ་བྱུང་ཡོད་ཚེ་བཟོད་གསོལ་དང་ཡོ་བསྲང་བྱེད་ངེས།]

སྒྲ་ཨང་།KADLL2060465
མཁས་པ་གཞན། [ལམ་རིམ་བློ་སྦྱོང་།] སྤྱིའི་ཨང་། ༦༡༥
རྣམ་པ། MP3 རྣམ་གྲངས། 53 ཆེ་ཆུང་། 1.22 GB
ཁྲིད་གཞུང་། ཡིད་བཞིན་ནོར་བུ་ཐར་པ་རིན་པོ་ཆེའི་རྒྱན།
མཛད་པ་པོ། མཉམ་མེད་དྭགས་པོ་ལྷ་རྗེ། [༡༠༧༩-༡༡༥༣]
འཁྲིད་མཁན། སངས་རྒྱས་མཉན་པ་རིན་པོ་ཆེ།
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༡༩ ལོའི་ཟླ་བཅུ་པའི་ཚེས་སོ་གཅིག་གི་ཉིན་སྒྲིག་སྦྱོར་བྱས།
ངོ་སྤྲོད་མདོར་བསྡུས།
སྐྱབས༌རྗེ༌གྲུབ༌དབང༌སངས༌རྒྱས༌མཉན་པ་རིན༌པོ༌ཆེ་སྐུ་ཕྲེང་བཅུ་པ་མཆོག་ནི། སྤྱི་ལོ་ ༡༩༦༤ ལོར་འབྲུག་ཡུལ་གྱི་ས་གནས་སྤ་གྲོ་སྟག་ཚང་ཞེས་པར་ཡབ་སངས་རྒྱས་ལེགས་པ་དང་། ཡུམ་ཀརྨ་ཚེ་དབང་ཆོས་སྒྲོན་གཉིས་ཀྱི་སྲས་སུ་སྐུ་འཁྲུངས། རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པ་མཆོག་གིས་མཉན་པ་རིན་པོ་ཆེ་སྐུ་གོང་མའི་ཡང་སྲིད་དུ་ངོས་འཛིན་གནང་། རྒྱལ་དབང་མཆོག་གིས་ཀརྨ་དཔལ་ལྡན་རང་བྱུང་འཕྲིན་ལས་ཀུན་ཁྱབ་བསྟན་པའི་རྒྱལ་མཚན་དཔལ་བཟང་པོ་ཞེས་མཚན་གསོལ། རུམ་བཏེག་དགོན་པར་གདན་ཞུས་ཀྱིས་དེ་གར་བཞུགས་ཁྲིར་མངའ་གསོལ་དང་གནང་ཏེ། དགུང་ལོ་ལྔ་ནས་ནང་ཆོས་སློབ་གཉེར་གྱི་དབུ་བཙུགས། རྒྱལ་དབང་ཀརྨ་པ་མཆོག་དང་། འབྲི་གུང་མཁྱེན་བརྩེ་རིན་པོ་ཆེ་སོགས་བསྟེན་ནས་དབང་བཀའ་ཕྱག་ཆེན་སོགས་ཟབ་ཆོས་མང་དུ་ཞུས་པ་དང་། དགེ་ཚུལ་གྱི་སྡོམ་པ་སོགས་ཀྱང་མནོས། རུམ་བཏེག་བཤད་སྒྲུབ་ཆོས་འཁོར་གླིང་གི་མཐོ་རིམ་བཤད་གྲྭ་ཆེན་མོ། ཀརྨ་ཤྲཱི་ནཱ་ལནྡཱ་ཆེས་མཐོའི་གཙུག་ལག་སློབ་གཉེར་ཁང་དུ་ལོ་ངོ་བཅུ་ལྷག་ལ་སློབ་གཉེར་གནང་སྟེ་ཨ་ཙ་རྱའི་མཚན་གནས་བཞེས་ཤིང་། མདོ་སྔགས་གཞུང་མན་ངག་དང་བཅས་པར་གསན་བསམ་གནང་། དེ་རྗེས་ལོ་གསུམ་ལྷག་ལ་སློབ་གཉེར་ཁང་དེར་ཁྲིད་སོགས་གནང་སྟེ་བཞུགས་པ་དང་། དེ་ནས་བལ་ཡུལ་གྱི་བན་ཆེན་གདན་སར་བཞུགས་ཏེ་བཤད་གྲྭའི་སློབ་གཉེར་བ་རྣམས་ལ་ཁྲིད་སོགས་གནང་བ་དང་། རྒྱུན་དུ་ཕྱི་ནང་གི་དོན་གཉེར་ཅན་གང་མང་ལ་ཟབ་ཆོས་མང་དུ་སྩོལ་མུར་བཞུགས་པ་ལགས་སོ། །[རྩོམ་སྒྲིག་པས་རྣམ་ཐར་དབྱིན་ཡིག་ལས་བསྒྱུར་བ་ཡིན་པས་སྐྱོན་དང་ནོར་འཁྲུལ་བྱུང་ཡོད་ཚེ་བཟོད་གསོལ་དང་ཡོ་བསྲང་བྱེད་ངེས།]