སེར་བྱེས་མཁས་སྙན་གྲྭ་ཚང་གི་ལོ་རེའི་མཛད་རིམ་ཆེ་ཁག

སེར་བྱེས་གྲྭ་ཚང་གི་ཆོས་རར་༧སྐྱབས་རྗེ་མཁན་རིན་པོ་ཆེས་བྱང་ཆུབ་ལམ་རིམ་ཆེན་མོའི་བཀའ་ཁྲིད་གནང་སོང་།
 སེར་བྱེས་མཁས་སྙན་གྲྭ་ཚང་གི་ཆོས་རར་ཆོས་ཐོག་གི་སྐབས་རྣམས་སུ་རྗེའི་བྱང་ཆུབ་ལམ་རིམ་ཆེན་མོའི་འཆད་ཉན་གནང་སྲོལ་ཡོད་པ་ལྟར། ལོ་གཅིག་གི་ཆོས་ཐོག་གི་དང་པོ་དཔྱིད་ཆོས་ཆེན་མོར་གྲགས་པ་དེའི་ཉིན་གཉིས་ཀྱི་རིང་སྟེ། ཕྱི་ལོ་༢༠༡༨ ཟླ་བ་༣ ཚེས་༢༤ ཉིན་སྔ་དྲོའི་ཆོས་རའི་སྐབས་དང་བསྟུན། མཁན་པོ་གོང་མ་དག་གི་ཕྱག་སྲོལ་དེ་ཉིད་རྒྱུད་འཛིན་གནང་སྟེ། ༧སྐྱབས་རྗེ་མཁན་རིན་པོ་ཆེ་ལོ་དགོན་སྤྲུལ་སྐུ་བསྟན་འཛིན་བྱམས་པ་ཆོས་བཟང་རིན་པོ་ཆེ་མཆོག་གིས་འདི་ག་གྲྭ་ཚང་གི་སློབ་གཉེར་བ་རྣམས་ལ་༧རྗེ་ཙོང་ཁ་པ་ཆེན་པོས་མཛད་པའི་བྱང་ཆུབ་ལམ་རིམ་ཆེན་མོའི་བཀའ་ཁྲིད་གནང་སོང་།

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༨།༠༣།༢༧ལ།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།

 

ལོ་གསར་གྱི་ཤིས་ཚིག

བཀྲ་ཤིས་གང་ཞིག་ཁ་བའི་ཡུལ་དུ་རང་དབང་ཉི་མ་མྱུར་དུ་འཆར་ཞིང་སྡེ་བཞིའི་དཔལ་ཡོན་དར་བར་ཤོག །
བཀྲ་ཤིས་གང་ཞིག་འགྲོ་བའི་བདེ་དགའ་དབྱར་གྱི་མཚོ་མོའི་དཔལ་ལ་བསྙེགས་ཤིང་ལུས་སེམས་སྐྱིད་པས་བརྟས་པར་ཤོག །
བཀྲ་ཤིས་གང་ཞིག་དམ་པའི་སྐུ་ཚེ་རྡོ་རྗེའི་ཁམས་སུ་ལེགས་པར་བརྟན་ཅིང་མཛད་བཟང་ཀུན་ལ་ཁྱབ་པར་ཤོག །
བཀྲ་ཤིས་གང་ཞིག་ཡངས་པའི་འཇིག་རྟེན་ཞི་བདེ་དཔལ་གྱིས་ཀུན་ནས་བསྐྱོར་ཞིང་འཚེ་མེད་གཡང་གིས་བསྐྱང་བར་ཤོག །
ཅེས་བོད་རྒྱལ་ལོ་ ༢༡༤༥ རབ་གནས་ས་ཁྱི་ལོའི་གནམ་ལོ་གསར་ཚེས་ལ་ཤ་རུས་གདུང་རྒྱུད་གཅིག་པའི་རང་རིགས་སྤུན་ཟླ་རྣམས་གཙོ་བྱས་པའི་དུས་དང་རྣམ་པ་ཀུན་ཏུ་འདི་ག་རྩོམ་སྒྲིག་ཁང་ལ་རྒྱབ་སྐྱོར་དང་ཐུགས་ཁུར་གནང་མཁན་ཡོངས་ལ་བཀྲ་ཤིས་བདེ་ལེགས་གྲངས་མེད་ཞུ་བ་དང་ཆབས་ཅིག་ལོ་གསར་པའི་ནང་ལ་ཁྱེད་རྣམས་ཀྱི་སྐུ་ལུས་བདེ་ཞིང་བསམ་དོན་ལྷུན་གྱིས་འགྲུབ་པའི་སྨོན་འདུན་ཕུལ་བ་ཡིན།

སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས། ༢༠༡༨།༠༢།༠༢ ལ།