ཨ་ཁུ་ཤེས་རབ་རྒྱ་མཚོ་ནི། ཕྱི་ལོ ༡༨༠༣ ལོར་རྩེ་གཞུང་བྲག་དམར་མདོ་ཞེས་པའི་ཡུལ་དུ་ཡབ་ནོའི་ཁོ་དང་ཡུམ་ཙིན་ཐར་ཞེས་པ་གཉིས་ཀྱི་སྲས་སུ་སྐུ་འཁྲུངས།
   དགུང་ལོ་དྲུག་གི་སྐབས་ཁུ་བོ་ཇེ་སང་བླ་མ་ལས་ལོ་གཅིག་གི་རིང་ཡི་གེ་འབྲི་ཀློག་སྦྱངས། ལོ་དེར་དགེ་བསྙེན་དང་རབ་བྱུང་གི་སྡོམ་པ་ཞུས།
   དགུང་ལོ་བཅུ་དྲུག་པར་དབེན་གནས་ཡིད་དགའ་ཆོས་འཛིན་བསམ་གཏན་འཕེལ་རྒྱས་གླིང་དུ་གནས་བརྟན་དཀོན་མཆོག་དགེ་འདུན་ལས་ཚངས་སྦྱོད་དགེ་བསྙེན་གྱི་སྡོམ་པ་དང་རབ་བྱུང་གི་སྡོམ་པ་མནོས། ལོ་དེའི་ལྔ་མཆོད་ཆེན་མོའི་ཆོས་ཐོག་གི་ཡར་འཚོགས་ལ་བླ་བྲང་བཀྲ་ཤིས་འཁྱིལ་གྱི་ཐོས་བསམ་གླིང་གྲྭ་ཚང་དུ་ཞུགས་ཏེ། བཀྲ་ཤིས་འཁྱིལ་གྱི་ཁྲི་ཐོག་ཉེར་བརྒྱད་པ་གླིང་སྤྲུལ་པའི་སྐུ་དཀོན་མཆོག་དགྱེས་པའི་བློ་གྲོས་ལས་བརྩི་བཞག་ཐོག་མར་གསན་པ་དང་། བཤེས་གཉེན་དཀོན་མཆོག་དོན་ཡོད་སློབ་དཔོན་དུ་བསྟེན་ནས་བསྡུས་གྲྭ་གསན་པ་དང་སྐྱོར་སྦྱང་དང་རྩོད་པ་གནང་ཞིང་། ར་སྟོད་བསྡུས་གྲྭ་སོགས་བསྡུས་གྲྭའི་སྐོར་དང་། བློ་རྟགས་དང་རྣམ་འགྲེལ་སོགས་ཚད་མའི་སྐོར་གྱི་གཞུང་མང་པོར་གཟིགས་རྟོག་གནང་།
   དཀོན་མཆོག་བསྟན་པའི་སྒྲོན་མེ་ལས་དྲིལ་བུ་ལྷ་ལྔ་སོགས་ཀྱི་དབང་དང་། བྱང་ཆུབ་བདེ་ལམ་གྱི་ཁྲིད་སོགས་དང་། རྡོ་རམས་པ་དཀོན་མཆོག་དགེ་འདུན་དང་། རྒྱ་རོང་དགེ་བཤེས་ཚུལ་ཁྲིམས་ཉི་མ་ལས་ཀྱང་སྤྱོད་འཇུག་དང་། བཀའ་གདམས་གཞུང་དྲུག་སྦྱོར་ཚུལ་སོགས་ལུང་ཁྲིད་ཀྱི་རྒྱུན་གང་མང་གསན་པར་མཛད།
   དགུང་ལོ་བཅུ་བདུན་པ་ ༡༨༡༩ ལོར་དཀོན་མཆོག་བསྟན་པའི་སྒྲོན་མེ་ལས་རབ་བྱུང་བསྐྱར་མ་དང་ཚིགས་སྔ་མ་དགེ་ཚུལ་གྱི་སྡོམ་པ་བཞེས་ཤིང་མཚན་ལ་དཀོན་མཆོག་བསྟན་འཛིན་གསོལ།
   དགུང་ལོ་ཉི་ཤུ་ ༡༨༢༢ ལོ་ནས་ཁྲི་ཐོག་ཉེར་དགུ་པ་དཔལ་མང་ཆུང་བ་དཀོན་མཆོག་ཆོས་འཕེལ་དང་། སུམ་ཅུ་པ་སྡེ་ཁྲི་རིན་པོ་ཆེ། སོ་གཅིག་པ་རྡོ་རམས་པ་དཀོན་མཆོག་དབང་ཕྱུག་རྣམས་ལས་ཕར་ཕྱིན་གྱི་བརྩི་བཞག་གསན་པ་དང་། སྦྱོར་བ་བརྩི་བ་སོགས་འགྲེལ་པ་དོན་གསལ་དང་། ཡིག་ཆ་གཙོ་བྱས་པའི་ཕར་ཕྱིན་གྱི་གཞུང་ལ་སྦྱངས་པ་གནང་།
   དགུང་ལོ་ཉེར་བཞི་ ༡༨༢༦ ལོར་ཕར་ཕྱིན་གྱི་སློབ་གཉེར་མཐར་ཕྱིན་ནས་ཕར་ཕྱིན་གྱི་གྲྭ་སྐོར་གནང་ཞིང་། དེའི་ཕྱི་ལོར་དབུ་མའི་གཞུང་ལ་སློབ་གཉེར་དབུ་འཛུགས་གནང་བ་དང་། གུང་ཐང་འཇམ་པའི་དབྱངས་དང་། དཔལ་མང་རིན་པོ་ཆེ་ལས། དབུ་མ་འཇུག་པ་དང་། འཇུག་ཊཱིཀ་གསལ་བའི་མེ་ལོང་། ལུང་རིགས་སྒྲོན་མེ་སོགས་དབུ་མའི་གཞུང་རྣམས་ཀྱི་རྩལ་བཤད་དང་མཛུབ་ཁྲིད། བཤད་ལུང་སོགས་ཀྱང་གསན། ཁྲི་ཟུར་དགེ་འདུན་དར་རྒྱས་ལས་སྟོང་ཐུན་གྱི་བཤད་རྒྱུན་དང་། ལམ་རིམ་བློ་སྦྱོང་། བསྐྱེད་རྫོགས་སོགས་གསན་སྐབས་ཟིན་བྲིས་སུ་མཛད་པ་དང་། སྡེ་ཁྲི་རིན་པོ་ཆེ་ལས་ལྟ་བའི་གནད་གང་མང་ཞུས་ཤིང་ཟིན་བྲིས་ཀྱང་མཛད།
   དགུང་ལོ་ཉེར་དྲུག་པ་ ༡༨༢༨ ལོར་འཛིན་གྲྭ་མཛོད་དུ་ཕེབས་པ་དང་མཛོད་རྩ་དང་སྡོམ་ཚིག་ཐུགས་འཛིན་དང་རྒྱུན་སྐྱོར། ཡིག་ཆའི་མཐའ་དཔྱོད། མངོན་པའི་རྒྱན། མཛོད་ཊཱིཀ་ཐར་ལམ་གསལ་བྱེད། མཛོད་རང་འགྲེལ་སོགས་རྒྱ་བོད་ཀྱི་ལེགས་བཤད་གུང་བསྒྲིགས་པའི་སྟེང་ནས་ཆོས་མངོན་པའི་རྩོད་པ་ལོ་གཉིས་ཀྱི་རིང་ལ་རྫོགས་པར་མཛད། སྐབས་དེར། ཆོས་མངོན་རྒྱ་མཚོའི་མཐར་སོན་མོན་གྲ་བ། ཞེས་གྲགས་པ་མོན་གྲ་བ་ཚུལ་ཁྲིམས་བཀྲ་ཤིས་ཀྱི་མཛད་པའི་མཛོད་འགྲེལ་དེ་སྐུ་འབུམ་གྱི་དཔེ་ཁང་གོག་པོ་ཞིག་རལ་དུ་སོང་བ་ཞིག་ལས་རྙེད་པ་ལའང་གཟིགས་ཞིབ་མཛད།
   དགུང་ལོ་ཉེར་བརྒྱད་པ་ ༡༨༣༠ ལོར་འཇམ་བཞད་བློ་བཟང་ཐུབ་བསྟན་འཇིགས་མེད་རྒྱ་མཚོས་མཁན་སློབ་སྦྲགས་མ་དང་། སྒོ་མེ་ལྷ་རམས་པ་བློ་བཟང་ཆོས་འཛིན་གྱིས་གསང་སྟོན། རྡོ་རམས་པ་དཀོན་མཆོག་སངས་རྒྱས་ཀྱིས་དུས་གོ་བ། ཀླུ་ཤོད་པ་བློ་བཟང་དཀོན་མཆོག་དང་། སྔགས་རམས་པ་དཀོན་མཆོག་བསྟན་དར་གཉིས་ཀྱིས་ལས་ཀྱི་ཁ་སྐོང་བ་མཛད་པའི་དད་པའི་དགེ་འདུན་གྲངས་ཚང་བའི་དབུས་སུ་རབ་བྱུང་དགེ་ཚུལ་བསྐྱར་སྒྲུབ་ཐོག་དགེ་སློང་གི་སྡོམ་པ་མནོས། མཚན་ལ་ཤེས་རབ་རྒྱ་མཚོ་གསོལ།
དེ་ནས་བློ་བཟང་ལུང་རྟོགས་ཉི་མ་རིན་པོ་ཆེ་ལས་འདུལ་ཊཱིཀ་རིན་ཆེ་ཕྲེང་བའི་ལུང་རྒྱུན་གསན་ཞིང་། དཔལ་མང་རིན་པོ་ཆེ་དང་། སྡེ་ཁྲི་རིན་པོ་ཆེ་ལས། འདུལ་སྡོམ་དང་། འདུལ་བ་རྒྱ་མཚོའི་སྙིང་པོའི་བཤད་ལུང་། འདུལ་ཊཱིཀ་གི་ས་བཅད་གཞིར་བཞག་བསྡུས་དོན་ནོར་བུའི་དོ་ཤལ་དང་སྦྲགས་པའི་མདོ་རྩའི་བཤད་པ་གསན་པ་སོགས་རྒྱ་བོད་ཀྱི་འདུལ་བའི་གཞུང་རྣམས་ལ་ཐུགས་གཉེར་གནང་།
   སྔ་ཕྱིར་གསང་འདུས་རྩ་བཤད་ཀྱི་རྒྱུད་དང་། གཤེད་སྐོར་སོགས་ཕ་རྒྱུད། བདེ་དགྱེས་དུས་གསུམ། སྒྱུ་ཐོད་གདན་གསུམ་སོགས་མ་རྒྱུད། དེ་ཉིད་བསྡུས་པ་དུམ་བུ་བཞི་སོགས་སྔགས་ཕྱོགས་ཀྱི་རྒྱ་བོད་དགོངས་འགྲེལ་རྣམས་ལའང་གསན་བསམ་མཛད།
   གཞན་འཇམ་བཞད་ཐུབ་བསྟན་འཇིགས་མེད་རྒྱ་མཚོ་དང་། མཁན་ཆེན་གྲགས་པ་རྒྱལ་མཚན། སྡེ་ཁྲི་འཇམ་དབྱངས་ཐུབ་བསྟན་ཉི་མ། དཀོན་མཆོག་རྒྱལ་མཚན་སོགས་རིས་མེད་ཀྱི་བཤེས་གཉེན་མང་པོའི་དྲུང་ནས་དབང་རྗེས་གནང་ལུང་ཁྲིད་མན་ངག་སོགས་གང་མང་གསན་པ་དང་། གཏོར་བཟོ། བཅའ་གཤོམ། དབུ་ཅན་དབུ་མེད་ལཉྫ་སོགས་ཡིག་རིགས་སྣ་ཚོགས་པའི་བྲིས་ལའང་སྦྱངས་པ་མཛད་ཅིང་། ཕྱག་བྲིས་སོགས་ལ་བྱང་བས་འཇམ་བཞད་སྐུ་ཕྲེང་གསུམ་པའི་དྲུང་ཡིག་དང་། དབང་རྗེས་གནང་གི་མཆོད་གཡོག་ཀྱང་གནང་། ཞོར་དུ་ཆོས་འབྱུང་། རྣམ་ཐར། ལོ་རྒྱུས། དེབ་ཐེར་སོགས་ལའང་གཟིགས་རྟོག་མཛད།
   དཔལ་མང་དཀོན་མཆོག་རྒྱལ་མཚན་ལས། སྒྲ་མདོ་ཀ་ལཱ་པ་དུརྒ་སིང་ཧའི་ཨུཎ་གྱི་མདོ་རྐང་པ་བཞི་དང་བཅས་པ་དང་། ཞ་ལུ་ལོ་ཙཱ་བའི་བཤད་སྦྱར་གཞུང་དོན་གསལ་བ་རྣམས་ཀྱི་ལུང་ཁྲིད་ཀྱི་སྟེང་ནས་མཚམས་སྦྱོར་དང་། མིང་དང་། ཀུན་བཤད་སོགས་གསན་པ་དང་། རིག་སྨྲ་བློ་བཟང་ཆོས་འཕེལ་ལས་དབྱངས་ཅན་སྒྲ་མདོ་འགྲེལ་པ་གསལ་ལྡན་རི་མོ་དང་བཅས་པ། རིག་སྨྲ་འཇམ་དཔལ་དགྱེས་པའི་བློ་གྲོས་ལས་ཙནྡྲ་བ་དང་། དེའི་བསྡུས་དོན་སྒྲ་རིག་རྒྱ་མཚོར་བགྲོད་པའི་གྲུ་གཟིངས་དང་སྦྱར་བའི་བཤད་རྒྱུན་གསན་ཏེ་སྒྲའི་སྐོར་གྱི་ཟིན་བྲིས་ཀྱང་མཛད། བཤེས་གཉེན་དེ་དག་དང་། རྒྱལ་མཁན་ཆེན། དགེ་བཤེས་དཀོན་མཆོག་ཐོགས་མེད་སོགས་ལས་པཎྜི་ཏ་རཏྣ་ཨ་ཀ་ར་ཤནྟིས་མཛད་པའི་སྡེབ་སྦྱོར་རིན་ཆེན་འབྱུང་གནས་དང་། ལོ་ཆེན་དྷརྨ་ཤྲིའི་སྡེབ་སྦྱོར་འགྲེལ་པ་དོན་གསལ་མེ་ལོང་སོགས་སྡེབ་སྦྱོར་གྱི་གཞུང་རྣམས་དང་། མངོན་བརྗོད་འཆི་མེད་མཛོད་དང་། དེའི་འགྲེལ་པ་འདོད་འཇོའི་བ་མོ་སོགས་མངོན་བརྗོད་ཀྱི་གཞུང་། སྔགས་ཀྱི་ཀློག་ཐབས། བོད་ཀྱི་བརྡའི་བསྟན་བཅོས་སུམ་རྟགས་རྣམས་ཀྱི་ལུང་ཁྲིད། སྙན་ངག་དབྱངས་ཅན་དགྱེས་གླུ་དང་། དཎྜིའི་དགོངས་རྒྱན་སོགས་ཀྱི་ལུང་ཁྲིད་སོགས་གསན་པ་དང་། ཨ་མཆོག་སྤྲུལ་སྐུ་འཇམ་དཔལ་རྒྱ་མཚོ་དང་། གཅུ་འཁོར་སྔགས་རམས་པ་སོགས་ལས། བུ་སྟོན་ཐམས་ཅད་མཁྱེན་པ་སོགས་ཀྱི་མཆོད་རྟེན་གྱི་བཤད་པ་དང་། ལྷོ་བྲག་པ་སྨན་ཐང་ཡབ་སྲས་སོགས་ཀྱི་ཐིག་རྩའི་སྟེང་ནས་ལྷ་ཐིག་དང་། མཆོད་རྟེན་བརྒྱད་ཀྱི་ཐིག་ཁྲིད། རྣལ་འབྱོར་རོལ་པའི་དགའ་སྟོན་ལྟར་རྡོར་དྲིལ་ཅང་ཏེའུ་རྒྱན་དྲུག་བཟོ་ཚུལ་སོགས་ཞིབ་སློབ། རིན་པོ་ཆེ་བརྟག་པའི་གཏམ་ཙིནྡ་མ་ཎིའི་མཛོད་ཁང་གི་ལུང་སོགས་གསན་པ་དང་། འདུལ་འཛིན་བློ་བཟང་རྒྱལ་མཚན་ལས་རིགས་ལྡན་མཆོད་པའི་འོད་སྣང་སོགས་དང་། རྒྱ་རྩིས་འཇམ་དབྱངས་མཆོད་པའི་མེ་ཏོག་དང་ཟུར་འདེབས། འཇམ་དབྱངས་འཛུམ་ཟེར། དབྱངས་འཆར་གྱི་རྒྱུད། དེའི་འགྲེལ་པ་རྣམས་ཀྱི་ལུང་རྒྱུན་སོགས་གསན་པ་དང་། རྒྱུད་བཞི་གཙོ་བྱས་པའི་སྨན་གཞུང་རྣམས་ཀྱི་ལུང་ཁྲིད་རྣམས་ཀྱང་གསན་པ་སོགས་དམ་པ་སུམ་ཅུ་ལྷག་བསྟེན་ནས་མདོ་སྔགས་རིག་གནས་དབང་ཁྲིད་སོགས་ལ་གསན་བསམ་གནང་།
   ཐུན་དྲུག་རྣལ་འབྱོར་དང་། རྡོར་སེམས་སྒོམ་བཟླས། བདག་འཇུག་སོགས་རྒྱུན་དུ་མཛད་པ་དང་། བཀའ་ཆོས་སོགས་ཀྱི་སེང་བར་རྣམས་སུ་ཡན་ལག་བདུན་པ་དང་འབྲེལ་བར་མཎྜལ་དང་ཕྱག་སྦྱང་ལ་གཞོལ་བར་མཛད།
   དུས་འཁོར་གྲྭ་ཚང་དུ་རྣམ་སྣང་མངོན་བྱང་གི་སྒྲུབ་མཆོད་ཆ་ལག་དང་བཅས་པ་གསར་དུ་བཙུགས་པ་སོགས་སྐུ་གསུང་ཐུགས་རྟེན་ཡང་མང་དུ་བཞེངས།
   སྔ་ཕྱིར་བསྒྲུབ་བྱ་མང་པོ་སོ་སོར་ཐར་པའི་གཞི་ལ་བཀོད་པ་དང་། བྲག་རི་དགོན་དང་། སྨར་ལུང་བཀྲ་ཤིས་ཆོས་འཕེལ་གླིང་། བྲག་དཀར་བྱང་ཆུབ་གླིང་སོགས་དགོན་སྡེ་མང་པོར་ཕེབས་ཏེ་དབང་ལུང་མན་ངག་གི་ཟབ་ཆོས་མང་དུ་གནང་བ་སོགས་སྐུ་ཚེ་གང་ཐོས་བསམ་སྒོམ་གསུམ་དང་། འཆད་རྩོད་རྩོམ་གསུམ་གྱིས་དུས་འདའ་བར་མཛད།
   སློབ་མ་ལ། འཇམ་བཞད་སྤུལ་སྐུ་དང་། བཀྲ་ཤིས་འཁྱིལ་གྱི་གསེར་ཁྲི་རྣམ་གསུམ། མཁན་པོ་རྣམས་དང་། བླ་སྤྲུལ་ཆེ་ཆུང་གང་མང་བྱུང་ངོ་། །
   ཕྱི་ལོ་ ༡༨༧༥ ལོར་སྐུ་གཤེགས། གསུང་རྩོམ་ལ། བདེ་གསང་འཇིགས་གསུམ་གྱི་རིམ་གཉིས། ཕྲེང་ཀྲི་མི་ཏྲའི་དབང་བཤད། དུས་འཁོར་བསྐྱེད་རིམ། ཚེ་དཔག་མེད་དང་སྒྲོལ་དཀར་གྱི་ཚེ་ཁྲིད་སྐོར་སོགས་ཆོས་ཚན་བཅུ་ཕྲག་ཁ་ཤས་དང་གསུང་རྒྱུན་ཕྱག་ལེན་དོགས་གཅོད་ལོ་རྒྱུས་སོགས་ཀྱི་ཟིན་བྲིས་དང་། བརྗེད་བྱང་གང་ཡོད་པར་དུ་བཀོད་ན་པོ་ཏི་ཉི་ཤུར་ལོངས་པ་ཡོད་ཅིང་། ལྕགས་མཁར་འཁྲུལ་འཁོར་སོགས་ཀྱི་ཕྱག་ཁྲིད་ཟིན་བྲིས་པར་དུ་བཀོད་མི་ཆོག་པའང་མང་ལ། ད་སྔ་པར་ཕུད་ཟིན་པ་པོ་ཏི་བདུན་བཞུགས།
འདིའི་རྣམ་ཐར་ལ། སྡེ་ཁྲི་འཇམ་དབྱངས་ཐུབ་བསྟན་ཉི་མས་བརྩམས་པའི་དམ་པ་འདིའི་སྐུ་ཆེ་བའི་ཡོན་ཏན་ལས་བརྩམས་པའི་གསོལ་འདེབས་ཚིགས་བཅད་དང་། དེའི་འགྲེལ་པ་དམ་པ་དེའི་སློབ་མའི་གྲས་ངག་དབང་ཐུབ་བསྟན་རྒྱ་མཚོས་མཛད་པ་སོགས་བཞུགས།
   མཚན་གྱི་རྣམ་གྲངས། ཨ་ཁུ་ཆིང་ཤེས་རབ་རྒྱ་མཚོ། དྲུང་ཆེན་ཤེས་རབ་རྒྱ་མཚོ། དྲུང་པ་ཤེས་རབ་རྒྱ་མཚོ། ཤེས་རབ་རྒྱ་མཚོ། བླ་བྲང་ཨ་ཁུ་ཤེས་རབ་རྒྱ་མཚོ། ཨ་ཁུ་ཤེས་རབ་རྒྱ་མཚོ། ཨ་ཁུ་ཚང་།

༢༠༡༩.༠༥.༡༩ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་ཕྱོགས་བཏུས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་དམ་འདྲེན་བཀོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་པ་ཡིན།]ཞེས་རྩོམ་ཁུངས་ཁ་གསལ་འགོད་དགོས།

འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོ་ནི། ཕྱི་ལོ་ ༡༨༤༦ ལོར་སྡེ་དགེའི་ཕྱོགས་ཀྱི་གནས་ཡ་ཆུའི་དིང་ཆུང་གི་ས་ཆར་ཡབ་འཇུ་མགོན་པོ་དར་རྒྱས་དང་ཡུམ་སྲིང་ཆུང་གཉིས་ཀྱི་སྲས་སུ་སྐུ་འཁྲུངས། ཁུ་བོ་དཔོན་བླ་མ་སྒྲུབ་མཆོག་པདྨ་དར་རྒྱས་ཀྱིས་མི་ཕམ་རྒྱ་མཚོ་ཞེས་མཚན་གསོལ།
   དགུང་ལོ་དྲུག་བདུན་ནས་ཡབ་དང་ཞང་པོའི་དྲུང་ནས་ཡི་གེའི་འབྲི་ཀློག་དང་། སྡོམ་གསུམ་རྣམ་ངེས་ཐུགས་འཛིན་གནང་བ་དང་། རྩིས་དཀར་ནག་གི་སྔོན་འགྲོ་གསན། དགུང་གྲངས་བཅུ་སྐོར་ནས་ལྗགས་རྩོམ་ཡང་ཅི་རིགས་གནང༌།
   དགུང་ལོ་བཅུ་གཉིས་ཀྱི་སྐབས་ཡུལ་དེའི་སྤྱི་ལུགས་ལྟར། འོག་མིན་ཨོ་རྒྱན་སྨིན་གྲོལ་གླིང་པའི་ཆོས་བརྒྱུད། ཟེ་ཆེན་བསྟན་གཉིས་དར་རྒྱས་གླིང་གི་དགོན་ལག་ཏུ་གྱུར་པ་འཇུ་མོ་ཧོར་གསང་སྔགས་ཆོས་གླིང་དགོན་དུ་ཆོས་ཞུགས་མཛད་ཅིང་རབ་ཏུ་བྱུང་།
   དགུང་གྲངས་བཅོ་ལྔ་བཅུ་དྲུག་གི་སྐབས་དབྱངས་འཆར་གྱི་དཔེ་རྙིང་ཞིག་ལ་ཞག་ཤས་གཟིགས་རྟོག་གནང་སྟེ་མཁྱེན་པར་མཛད། འཇུ་ཉུང་རི་ཁྲོད་དུ་ཟླ་བ་བཅོ་བརྒྱད་དུ་འཇམ་དཔལ་སྨྲ་སེང་སྒྲུབ་ཅིང་རིལ་བུའི་ལས་སྦྱོར་སོགས་མཛད།
   དགུང་ལོ་བཅུ་བདུན་སྐབས་ཉོག་ཟིང་གིས་འབྲོག་སྡེ་མཐའ་དག་མགོ་ལོག་ཏུ་སོང་བས་རྗེ་ཉིད་ཀྱང་དེར་བྱོན།
   དགུང་གྲངས་བཅོ་བརྒྱད་དང་བཅུ་དགུའི་དུས་སྐུ་ཞང་འགྱུར་བཟང་དང་ལྷན་དུ་ཡུལ་དབུས་ལྷ་ལྡན་དུ་གནས་སྐོར་ལ་བྱོན། དེ་སྐབས་ཟླ་བ་གཅིག་ཙམ་དགའ་ལྡན་དུ་བཞུགས། དེ་ནས་ལྷོ་གནས་རྒྱས་པར་བྱོན་ཞོར་ལྷོ་བྲག་མཁར་ཆུར་ཕེབས།
   ཕྱིར་རང་ཡུལ་དུ་ལོག་རྗེས་ལབ་སྐྱབས་མགོན་དབང་ཆེན་དགྱེས་རབ་རྡོ་རྗེའི་མདུན་ནས་མ་ཏིའི་འཇམ་དཀར་གྱི་རྗེས་གནང་དང་ཆོས་སྐྱོང་གེ་སར་གྱི་སྲོག་གཏད་སོགས་གསན། དཔལ་སྤྲུལ་རིན་པོ་ཆེ་ཨོ་རྒྱན་འཇིགས་མེད་ཆོས་ཀྱི་དབང་པོ་ལས། སྤྱོད་འཇུག་ཤེས་རབ་ལེའུ་གསན་པ་དང་ཕྱིས་འགྲེལ་ཊཱིཀ་སོགས་ཀྱང་མཛད། གཞན་ཡང་རྒྱུད་ལུང་མན་ངག་གི་བཤགས་པའི་བཤད་པ་གནང་ནས་འགྲེལ་པ་རྩོམ་པར་གསུང་བསྐུལ་དང༌། འོད་མདོ་མཚན་བརྗོད་སོགས་ཀྱང་གསན། འཇམ་དབྱངས་མཁྱེན་བརྩེ་དབང་པོ་ལས་མ་ཏིའི་འཇམ་དཀར་གྱི་རྗེས་གནང་དང༌། སྔ་རྗེས་ཅི་རིགས་པར། ཐུན་མོང་དང་ཐུན་མོང་མ་ཡིན་པའི་གཙུག་ལག་གི་སྒོ་དུ་མ་དང༌། ཉེ་བརྒྱུད་དུ་བྱོན་པའི་མདོ་སྔགས་ཀྱི་གཞུང་ཁྱད་འཕགས་རིགས་དང༌། གསང་ཆེན་རྡོ་རྗེ་ཐེག་པའི་སྨིན་བྱེད་ཀྱི་དབང༌། གྲོལ་བྱེད་ཀྱི་ཁྲིད། རྒྱབ་རྟེན་གྱི་བཤད་པ། མན་ངག་ཕྱག་བཞེས་ཀྱི་དམར་ཁྲིད་སོགས་གསན།
པདྨ་གར་གྱི་དབང་ཕྱུག་བློ་གྲོས་མཐའ་ཡས་ལས། སྒྲ་ཙནྡྲ་པ་དང་དངུལ་ཆུའི་བཙོ་བཀྲུའི་ལག་ལེན་སོགས་ཐུན་མོང་རིག་གནས་དང༌། འཇམ་དཔལ་ཚེ་བདག་སོགས་ཐུན་མོང་མ་ཡིན་པའི་སྨིན་གྲོལ་རིགས་དང༌། འཇུ་དབོན་འཇིགས་མེད་རྡོ་རྗེ་ལས་མདོ་སྡུད་པའི་བཤད་པ། འབུམ་གསར་དགེ་བཤེས་ངག་དབང་འབྱུང་གནས་ལས་དབུ་མ་འཇུག་པ། འཇམ་དབྱངས་བློ་གཏེར་དབང་པོ་ལས་ཚད་མ་རིགས་གཏེར། སེར་ཤུལ་དགེ་བཤེས་ལྷ་རམས་པའི་མདུན་ནས་མཛོད་ཀྱི་བཤད་ལུང་སོགས་རིས་མེད་ཀྱི་མཁས་གྲུབ་དུ་མའི་མདུན་ནས་མདོ་སྔགས་རིག་གནས་དང་བཅས་པ་ཐུགས་གཉེར་གནང་། རྫོགས་ཆེན་ཤྲཱི་སེང་དུ་སྔ་འགྱུར་རྙིང་མའི་ཆོས་སྐོར་དང༌། དཔལ་སྤུངས་ལྔ་རིག་སློབ་གླིང་ནས་གསོ་བ་རིག་པ་དང༌། རྩིས་དཀར་ནག་སོགས་རིག་གནས་ཀྱི་སྐོར་རྣམས་གསན། གཞན་རྫོགས་ཆེན་མཁན་རིན་པོ་ཆེ་པདྨ་བཛྲ་གཙོ་བོར་གྱུར་པའི་དགེ་བའི་བཤེས་གཉེན་དུ་མ་ལས་ཀྱང་མདོ་སྔགས་རིག་གནས་དང་བཅས་པའི་སྐོར་གསན་པར་མཛད།
   གཞན་དཔའ་རིས་བློ་བཟང་རབ་གསལ་དང༌། དམ་པ་འདི་གཉིས་ཕན་ཚུན་ལེགས་བཤད་ཀྱི་འབེལ་གཏམ་བསྐུར་རེས་གནང་ཡོད་པ་དང་། དཔའ་རིས་བློ་བཟང་རབ་གསལ་གྱིས། ཆོས་འབྱོར་སྤྲིན་གྱི་ཕུང་པོ་འཁྲིགས་པའི་ཀློང༌། །ཁམས་ཞེས་གྲགས་པའི་གསེར་ལྡན་དཀྱིལ་འཁོར་དུ། །གྲགས་སྙན་ལྷ་ཡི་རྔ་ཆེན་ལྡིར་བ་ཅན། །ངེས་དོན་ཆོས་ཀྱི་རྒྱལ་པོར་ཡིད་རེ་དགའ། །ཀུན་རྟོག་རྩྭ་སྦུར་མཆེད་པའི་མེ་སྟག་གིས། །རེག་པའི་ཉེས་ལྟུང་སྙིང་ནས་འཆག་པའི་ཕྱིར། །དྲི་མེད་ལྷ་རྫས་སྤྲིན་དཀར་བླ་རེས་འདི། །གང་སྐུ་ས་འཛིན་ཡངས་པའི་མཁའ་ལ་བྲེས། ཞེས་དང་། ཁྱད་པར་རྣམ་དཔྱོད་བརྩོན་པའི་མཐུ་ལྡན་ཞིང༌། །མང་ཐོས་ཉམས་སུ་ལེན་པའི་ཀུ་སཱ་ལི། །ཟབ་དོན་འཚོལ་བའི་ངལ་བ་མང་བསྟེན་པ། །ང་ཡི་མཛའ་ཆེན་མི་ཕམ་བཤེས་གཉེན་བཞུགས། ཞེས་སོགས་གསུངས་ཡོད།
   སྐུ་ཚེ་ཕལ་ཆེར་དབེན་གནས་རྣམས་སུ་སྒྲུབ་པ་ཉམས་ལེན་མཛད་ཅིང་རྨེ་ཤོད་དཀར་མོ་སྟག་ཚང་དུའང་ལོ་བཅུ་གསུམ་དུ་བཞུགས་ནས་བསྙེན་སྒྲུབ་མཛད།
   དགུང་ལོ་ང་གཅིག་པར་རྒྱལ་པོ་ལུགས་ཀྱི་བསྟན་བཅོས་མཛད། དགུང་ལོ་རེ་གཉིས་པ་ས་སྤྲེལ་ལོར་དུས་འཁོར་འགྲེལ་ཆེན་བརྩམས། དེའི་ཕྱི་ལོར་སྙན་འགྲེལ་དབྱངས་ཅན་དགྱེས་པའི་རོལ་མཚོ་སོགས་བརྩམས།
   སྐུ་ཚེ་ཧྲིལ་པོར་འཆད་རྩོད་རྩོམ་གསུམ་གྱི་བྱ་བས་བསྟན་འགྲོ་ལ་ཕན་པའི་དོན་བསྒྲུབས་པར་མཛད། ཁྱད་པར་དུ་བཟོ་དང་། གསོ་བ། རྩིས་རིག་བཅས་ལ་ཕྱག་རྗེས་ཆེ།
   སློབ་མ་ལ། རྡོ་སྤྲུལ་རྡོ་རྗེ་དང་། གཏེར་སྟོན་བསོད་རྒྱལ། ཀ་ཐོག་སི་ཏུ་ཆོས་ཀྱི་རྒྱ་མཚོ། རྫོགས་སྤྲུལ་ལྔ་པ། དཔལ་སྤུངས་སི་ཏུ་སོགས་མང་དུ་བྱུང་།
   དགུང་ལོ་དྲུག་ཅུ་རེ་བདུན་པ་ ༡༩༡༢ ལོར་འཇུ་རི་ཁྲོད་དུ་སྐུ་གཤེགས། ཁོང་གི་གསུང་རྩོམ་ལ། པར་དུ་བརྐོས་པ་པོ་ཏི་སུམ་ཅུ་ལྷག་བཞུགས།

༢༠༡༩.༠༥.༠༥ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་ཕྱོགས་བཏུས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་དམ་འདྲེན་བཀོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་པ་ཡིན།]ཞེས་རྩོམ་ཁུངས་ཁ་གསལ་འགོད་དགོས།

བུ་སྟོན་རིན་ཆེན་གྲུབ་ནི། ཕྱི་ལོ་ ༡༢༩༠ ལོར་གཙང་སྟོད་ཁྲོ་ཕུའི་ཕྱོགས་ཀྱི་ཤབ་སྨད་སྒོམ་གནས་ཞེས་བྱ་བའི་ཡུལ་དུ་ཡབ་བླ་མ་བྲག་སྟོན་རྒྱལ་མཚན་དཔལ་བཟང་དང༌། ཡུམ་སློབ་དཔོན་མ་བསོད་ནམས་འབུམ་གཉིས་ཀྱི་སྲས་སུ་སྐུ་འཁྲུངས།
   དགུང་ལོ་ལྔ་པ་ནས་མ་ཡུམ་ལས་ཡི་གེའི་སྦྱོར་ཀློག་དང་། དཔོན་རྒྱམ་སེང་ལས་རྩིས་དང་ཡི་གེའི་རིག་པ་ལ་སྦྱངས། དགུང་ལོ་བདུན་པར་ཁྲོ་ཕུ་བསོད་ནམས་སེང་གེའི་དྲུང་དུ་ཐེག་ཆེན་སེམས་བསྐྱེད་ཞུས།
   དགུང་ལོ་བརྒྱད་པར་ཁྲོ་ཕུ་བ་དེ་ཉིད་ལས་ས་ལུགས་ཀྱི་བདེ་མཆོག་དྲིལ་བུ་བའི་དབང་བཞི་རྫོགས་པར་ཞུས་པ་དང་། གཞན་མན་ངག་ཟབ་ཆོས་ཀྱང་གསན། ཉིད་ཀྱི་མེས་པོ་བླ་ཆེན་ཚུལ་ཁྲིམས་དཔལ་བཟང་གི་སྤྱན་སྔར་གསང་བ་སྙིང་པོ་དང་། དགོངས་འདུས་ལ་སོགས་པའི་རྒྱུད། སྤར་ཁབ་ལ་སོགས་པའི་འགྲེལ་པ། མདོར་ན་གསང་སྔགས་རྙིང་མའི་རྒྱུད་འགྲེལ་པ་འགྲེལ་བཤད་གནུབས་པ་ནས་བརྒྱུད་པ་ཆ་ཚང་དང་། རྫོགས་པ་ཆེན་པོ་ཀུན་བྱེད་སྔ་འགྱུར་ལྔ། ཕྱིས་འགྱུར་བཅུ་གསུམ། སེམས་སྡེ་མ་བུ་བཅོ་བརྒྱད། ཀློང་སྡེའི་སྐོར་ལ་སོགས་པ། ཞི་བྱེད་རྒྱུད་ཕྱི་མ་ལ་སོགས་པ་དང་། གུ་རུའི་གཏེར་མ་ལ་སོགས་པའི་ཆོས་སྐོར་རྣམས་གསན། གཞན་ཡང་སྨན་དཔྱད། བཟོ་རིག །བཅུད་ལེན། མཁྱུད་སྤྱད་ལ་སོགས་པ་མང་པོ་གསན།
   དགུང་ལོ་བཅོ་བརྒྱད་པ་ ༡༣༠༧ ལ་ལོ་ཙཱའི་མཁན་བརྒྱུད་འཛིན་པའི་ཁྲོ་ཕུའི་མཁན་ཆེན་རིན་ཆེན་སེང་གེ་དཔལ་བཟང་དང་། མཁས་མཆོག་ཚད་མའི་སྐྱེས་བུའམ་སློབ་དཔོན་རིགས་ཐིགས་པའི་དྲུང་ནས་རབ་བྱུང་དང་དགེ་ཚུལ་དུ་བསྒྲུབས། མཁན་པོ་དེ་ཉིད་ལས་སེམས་བསྐྱེད་དང་ཕར་ཕྱིན་སོགས་ཞོར་ཉན་དུ་མཛད། སློབ་དཔོན་ཚད་མའི་སྐྱེས་བུའམ་བསོད་ནམས་མགོན་གྱི་དྲུང་དུ་ཐོག་མར་ཕར་ཕྱིན་འགྲེལ་ཆུང་ལ་ཐུགས་སྦྱོང་མཛད། དེ་ནས་ཕར་ཕྱིན་དང་འདུལ་བ་ཚད་མའི་གཞུང་སོགས་གསན་ཏེ་ལོ་གཉིས་ཙམ་གྱི་རིང་ཉིན་མོ་གསོལ་བ་དལ་ལྷོད་ཀྱིས་བཞེས་ལོང་དང༌ན་བཟའ་རལ་པའང་འཚེམ་ལོང་མེད་ལ། མཚན་མོ་དཀར་མེའི་འོད་ལ་དཔེ་གཟིགས་མཛད་པ་སོགས་བརྩོན་པ་ཆེན་པོ་མཛད། གཞན་ཕར་ཕྱིན་རྔོག་ལུགས། འབྲོམ་ལུགས། ཁུ་ལུགས། དེ་དག་གི་རྒྱབ་ཆོས་ཉི་ཁྲི་སྣང་བ་སོགས་ཕར་ཕྱིན་དང་། སྤྱོད་འཇུག་ལ་སོགས་པའི་མདོ་སྡེའི་སྐོར། མདོ་རྩ་དང་མེ་ཏོག་ཕྲེང་རྒྱུད་ལ་སོགས་འདུལ་སྐོར་རྣམས་ཀྱང་ཞོར་ཉན་དུ་མཛད་པ་དང་། གཞན་སློབ་དཔོན་ཚད་མའི་སྐྱེས་བུ་དེ་ཉིད་ལས་ཕྱག་ཆེན་བརྡའི་སྐོར། སེམས་ཉིད་ངལ་གསོའི་སྐོར། མན་ངག་བརྒྱ་རྩའི་སྐོར་སོགས་མན་ངག་གི་སྐོར་མང་པོའང་ཞོར་ཉན་དུ་གསན། ཉིད་ཀྱི་བླ་མ་ཡང་རྩེ་བ་རིན་ཆེན་སེང་གེ་ལས་དྲིལ་བ་པའི་དབང་དང་རྩ་རྒྱུད་ལ་སོགས་པའི་བདེ་མཆོག་གི་སྐོར། བདེ་ཆེན་གྱི་དབང་བཀའ་དང་རྒྱུད་ཀྱི་བཤད་བཀའ་སོགས་བདེ་རལ་གཅིག་གི་སྐོར། དགྲ་ནག་ཞང་ལུགས་དང་འཇིགས་བྱེད་སྐྱོ་ལུགས་ཀྱི་དབང་བཀའ་སོགས་གཤིན་རྗེའི་གཤེད་ཀྱི་སྐོར། འཁོར་ཆེན་གྱི་དབང་བཀའ་སོགས་གསན། གཞན་སློབ་དཔོན་དོན་གྲུབ་དཔལ་དང་། ཉིད་ཀྱི་ཡབ་བླ་མ་བྲག་སྟོན་རྒྱལ་མཚན་དཔལ་བཟང་པོ་སོགས་ལས་ཀྱང་ཟབ་ཆོས་མང་པོ་གསན།
   དགུང་ལོ་ཉེར་གཅིག་པར་ཡབ་བླ་མ་བྲག་སྟོན་པ་དང་ལྷན་ཅིག་ཏུ་དབུས་གཙང་གི་ཆོས་སྡེ་ཆེན་པོ་རྣམས་སུ་གྲྭ་སྐོར་མཛད། དབུས་ནས་མཁས་པ་ཤཱཀྱ་གཞོན་ནུ་དང་། ཁ་རག་བྱང་གཞོན། གཙང་ནས་མཁས་པ་དཔལ་ལྡན་སེང་གེ་དང༌། འཇམ་སྐྱ་སོགས་དང་ལུང་རིགས་ཀྱིས་བརྒལ་བརྟག་གནང་བས། མཁས་པའི་ཁྲོད་དུ་ཕ་སྟོན་པ་ལ་བུའང་སྟོན་པ་བྱུང་འདུག་ཅེས་བུ་སྟོན་ཞེས་པའི་མཚན་ཡང་དེ་ནས་ཐོགས་པར་བཤད།
   དགུང་ལོ་ཉེར་གསུམ་པ་ ༡༣༡༢ ལོར་པཎ་ཆེན་གྱི་མཁན་བརྒྱུད་བཞི་པ་མཁན་ཆེན་གྲགས་པ་གཞོན་ནུ་དང༌། སློབ་དཔོན་ལས་བྱེད་པ་བསོད་ནམས་གྲགས་པ། སློབ་དཔོན་གསང་སྟེ་སྟོན་པ་འདུལ་འཛིན་བསོད་ནམས་བཟང་པོ། དད་པའི་དགེ་འདུན་དཀོན་མཆོག་བཟང་པོས་ཐོག་དྲངས་པ་ཉི་ཤུ་རྩ་གཉིས་ཀྱི་དབུས་སུ་བསྙེན་པར་རྫོགས་པ་མཛད། མཁན་པོ་དེ་ལ་སོ་ཐར་གྱི་མདོ་སོགས་གསན་པ་དང་ཤེར་སྙིང་མདོ་སྒྲུབ་སོགས་ཞོར་ཉན་དུ་མཛད། སློབ་དཔོན་བསོད་ནམས་གྲགས་པ་ལས་འདུལ་བ་མདོ་རྩ་ལ་བྱ་ཊཱིཀ་བཏབ་པའི་བཤད་བཀའ་སོགས་གསན།
   ཁྲོ་ཕུར་ཕར་ཕྱིན་དང༌། འདུལ་བ། མངོན་པ་བཅས་ཀྱི་འཆད་ཉན་ལེགས་པར་མཛད། ཆོས་སྒང་ལ་ཕར་ཚད་བསྡུས་གསུམ་དང་། མངོན་པ་ཀུན་བཏུས་ལ་སོགས་པ་ལ་བཤད་པའི་རྐང་མཛད། ཆོས་བར་ལ་འཁྲེན་བྲག་ལུང་། ཉང་རོ་ཤུག་པ་རི། ཁྲོ་ཟངས་ཁ་སོགས་སུ་ཕར་ཚད་མངོན་པ་ལ་སོགས་པའི་བཤད་པ་དང་ཞར་ཆོས་གང་མང་གནང་བ་དང་། དགེ་སློང་དགེ་ཚུལ་རབ་བྱུང་དགེ་བསྙེན་ལ་སོགས་ཁྲི་ཕྲག་ཏུ་ལོངས་པའི་མཁན་སློབ་མཛད།
   དེ་ནས་ཐར་པ་གླིང་དུ་ཕེབས་ནས་ལོ་ཙཱ་བ་ཆེན་པོ་ཐར་ལོ་ཉི་མ་རྒྱལ་མཚན་སློབ་དཔོན་དུ་བསྟེན་ནས་ལོ་བཞི་ལྷག་ལ་སྒྲ་ཙནྡྲ་པ་དང་ཀ་ལཱ་པའི་མདོ་འགྲེལ་དང་བཅས་པར་སྦྱངས་པ་དང་ཆབས་ཅིག་སྙན་ངག །སྡེབ་སྦྱོར། ཟློས་གར། མངོན་བརྗོད་སོགས་ལའང་སྦྱངས། རྒྱ་གར་སོགས་སུ་ཕེབས་མ་མྱོང་ནའང་རྒྱ་གར་ཤར་ནུབ་དང༌། ཁ་ཆེ། སིངྒ་གླིང་ལ་སོགས་པའི་ཡི་གེའི་རིགས་མི་འདྲ་བ་མཁྱེན་པའི་ལོ་ཙཱ་བར་གྱུར། བཀའ་དང་བསྟན་བཅོས་མང་དག་ཅིག་བོད་བསྒྱུར་མཛད།
   གསུང་ངག་རིན་པོ་ཆེ་ལས་དུས་འཁོར་གྱི་དབང་གོང་མ་སོགས་ཞུས་ཏེ། འདག་སྦྱར་གྱིས་སྐུ་མཚམས་ལ་རྩེ་གཅིག་ཏུ་སྒོམ་པའང་མཛད། གཞན་ཡང་སྦྱོར་བ་དྲུག་དང་རྒྱུད་ཕྱི་མ་སོགས་དུས་འཁོར། རྡོ་རྗེ་སྙིང་འགྲེལ་ལ་སོགས་པ་ཐུན་མོང་དང་ཐུན་མོང་མིན་པའི་ཆོས་དུ་མ་གསན་པ་དང་། བླ་མ་དམ་པ་དཔལ་ལྡན་སེང་གེ་ལས་དུས་འཁོར་གྱི་དབང་བཀའ་རྭ་འབྲོའི་དགོངས་པ་གཅིག་ཏུ་དྲིལ་བ་སོགས་དབང་བཀའ་མང་དུ་ཞུས།
   གཞན་དུས་འཁོར་ལ་ཐུགས་སྦྱོང་མཛད་ཕྱིར་དབོན་པོ་རྡོ་རྗེ་རྒྱལ་མཚན་གྱི་དྲུང་ནས་དུས་འཁོར་གྱི་བཤད་བཀའ་རྭ་འབྲོའི་དགོངས་པ་གཅིག་ཏུ་དྲིལ་བ་ལ་སོ་སོའི་བཞེད་ཚུལ་དང་བཅས་པ། མན་ངག་ལག་ལེན་གྱི་གནད། དུས་འཁོར་ཆ་ལག་མ་ཚང་བ་མེད་པར་གསན་པས་དུས་འཁོར་ལ་མཁས་པར་གྱུར་པས་ཕྱིས་བྱོན་བོད་ཀྱི་མཁས་པ་རྣམས་ཀྱི་ནང་ནས་དུས་འཁོར་ལ་མཁས་པ་བུ་དོལ་གཉིས་ཞེས་གྲགས་པ་བྱུང་། བླ་མ་དེ་ཉིད་ལ་འཇམ་དཔལ་རྩ་རྒྱུད་སོགས་རྒྱུད་དང་སྒྲུབ་ཐབས་གང་མང་ཡང་གསན། བླ་མ་བི་བྷཱུ་ཏི་དཱ་པ་ལས་གཏུམ་མོ་འབར་འཛག་གི་གདམས་པ་སོགས་མན་ངག་མང་པོ་གསན། གཞན་བླ་མ་ཀུ་མཱ་ར་སི་ངྡྷི་ལས་བཀའ་གདམས་པའི་ལུགས་ཀྱི་མན་ངག་མང་དུ་གསན།
   དགུང་ལོ་སོ་གཅིག་པར་སྐུ་ཞང་གྲགས་པ་རྒྱལ་མཚན་གྱིས་གདན་དྲངས་པ་ལྟར་ཞ་ལུ་ཆོས་སྡེའི་གདན་ས་བཟུང་། སྔགས་དང་མཚན་ཉིད་ཀྱི་བཤད་གྲྭ་བཙུགས་ནས་ལོ་ངོ་སོ་དྲུག་ལ་ཆོས་འཆད་གནང་། ཆོས་སྡེ་ཆེན་པོར་དགེ་འདུན་ཚོགས་པ་སུམ་སྟོང་བརྒྱད་བརྒྱ་རེ་ཙམ་གྱི་ཚོགས་དཔོན་མཛད།
   ཇོ་བོ་རྗེས་བྱིན་གྱིས་བརླབས་པའི་གནས་ཞ་ལུ་རི་ཕུག་ཏུ་སྤེ་ཆུང་གཅིག་ཡོད་པ་ལ་གཞི་བྱས་ནས་གཙུག་ལག་ཁང་དགེ་འདུན་གྱི་སྡེ་དང་བཅས་པ་གསར་དུ་བཞེངས་ཏེ། མདོ་སྔགས་ཀྱི་བཤད་གྲྭ་བཙུགས། སྣར་ཐང་གི་བསྟན་འགྱུར་ལ་ཞུས་དག་གནང་ཞིང་། དཀར་ཆག་ཡིད་བཞིན་ནོར་བུ་དབང་གི་རྒྱལ་པོའི་ཕྲེང་བ་ཞེས་པ་བསྒྲིགས། རི་ཕུག་ཏུ་སྒྲུབ་པ་ཉམས་ལེན་གནང་མཁན་ཚོགས་པ་ལྔ་བརྒྱ་ཙམ་འདུས་ཐོག་སློབ་མ་མཁས་བཙུན་བཟང་གསུམ་འཛོམས་ཤིང་བསྟན་པ་འཛིན་པའི་སྐྱེས་ཆེན་དང་། འཆད་ཉན་གྱི་སློབ་དཔོན། བྱ་བྲལ་བ་སོགས་མང་དུ་བྱུང་། རྗེ་འདིས་བུ་ལུགས་གྲུབ་མཐའི་སྲོལ་བཏོད་པས་དེའི་རྒྱུད་འཛིན་རྣམས་ལ་ཞ་ལུ་བའི་གྲུབ་མཐའམ་བུ་ལུགས་ཞེས་གྲགས།
   དགུང་ལོ་སོ་གསུམ་པ་ ༡༣༢༢ ལོར་[བདེ་བར་གཤེགས་པའི་བསྟན་པའི་གསལ་བྱེད་ཆོས་ཀྱི་འབྱུང་གནས་གསུང་རབ་རིན་པོ་ཆེའི་མཛོད་]ཅེས་བྱ་བའམ་ཡོངས་གྲགས་སུ་[བུ་སྟོན་ཆོས་འབྱུང་]ཞེས་པ་མཛད།
   དགུང་ལོ་ང་ལྔ་པ་ ༡༣༤༤ ལོར་སོག་པོའི་གོང་མས་རྒྱ་ནག་ཏུ་གདན་ཞུའི་ཕོ་ཉ་འབྱོར་ཡང་མ་ཕེབས་པར་དབེན་པར་སྒྲ་དང་གསང་སྔགས་ཀྱི་གཞུང་མང་པོ་འཕྲོ་བསྒྱུར་དང་གཞི་བསྒྱུར་མཛད། དམ་པ་འདི་བསྟན་འགྲོ་སྤྱི་ལ་ཕྱག་རྗེས་ཆེ་ལ་ལྷག་པར་དུས་འཁོར་དང་སྐར་རྩིས་ཀྱི་སྐོར་ལ་ཕྱག་རྗེས་ཧ་ཅང་ཆེ་ཞིང་། མཛད་འཕྲིན་རྒྱས་པས་རྒྱ་གར་གྱི་རྒྱལ་པོ་པུ་ནྱ་མ་ལ་སོགས་ཀྱིས་ཀྱང་དད་གུས་ཞུས་པར་མ་ཟད། ཧོར་གྱི་མི་དཔོན་བརྒྱ་ཕྲག་དམག་འབུམ་ཚོ་གསུམ་དང་ཁྲི་ཕྲག་གཉིས་ཀྱི་འཁོར་དང་བཅས་དྲུང་དུ་ལྷགས་ནས་དཔལ་དུས་ཀྱི་འཁོར་ལོའི་དབང་སོགས་གསང་སྔགས་ཀྱི་ཆོས་ཞུས། གཞན་རིས་སུ་མ་ཆད་པའི་སྐལ་ལྡན་མང་པོར་མདོ་སྔགས་ཀྱི་ཆོས་ཚུལ་གང་མང་གནང་། 
   རེ་གཉིས་པ་ ༡༣༥༡ ལོར་གཡའ་ཕག་གི་ཟིང་འཁྲུག་བསྡུམ་ཆེད་དབུས་ཕྱོགས་སུ་ཕེབས། ༡༣༥༣ ལོར་ས་སྐྱར་བྱོན། ས་སྐྱའི་ལྷ་ཁང་ཆེན་མོར་དཔལ་རྡོ་རྗེ་དབྱིངས་ཀྱི་དཀྱིལ་འཁོར་ཁྲུ་བཅུ་གཅིག་ཅན་རིན་པོ་ཆེ་སྣ་ཚོགས་ལས་གྲུབ་པ་བཞེངས། གཞལ་ཡས་ཁང་གི་རྣམ་གཞག་དེ་ཉིད་གསལ་བ་ཞེས་པ་ལྗགས་རྩོམ་མཛད། ཤེར་ཕྱིན་གྱི་མདོ་སྡེ་རིན་པོ་ཆེ་རྒྱས་འབྲིང་བསྡུས་གསུམ་དང་། རིན་ཆེན་གསེར་ལས་བཞེངས་པའི་བཀའ་འགྱུར་དང་བསྟན་འགྱུར་ཆ་ཚང་། བོད་ཀྱི་ལོ་པཎ་རྣམས་ཀྱིས་མཛད་པའི་བསྟན་བཅོས་སོགས་གསུང་རྟེན་དུ་མ་བཞེངས་པར་མཛད། 
   དགུང་ལོ་རེ་བདུན་པ་ལ་སྒྲ་ཚད་པ་རིན་ཆེན་རྣམ་རྒྱལ་ལ་ཞ་ལུའི་གདན་ས་གཏད་ནས་རི་ཕུག་ཏུ་གཏན་བཞུགས་མཛད།
   སློབ་མ་གྲགས་ཆེ་བ། སྒྲ་ཚད་པ་རིན་ཆེན་རྣམ་རྒྱལ། བྱང་པ་དཀོན་མཆོག་གྲགས། གོང་གསུམ་བདེ་ཆེན་པ་ཆོས་ཀྱི་མགོན་པོ། ཁྱུང་པོ་ལྷས་པ་སོགས་མང་དུ་བྱུང་ངོ་། །
   བུ་སྟོན་ཐམས་ཅད་མཁྱེན་པ་ཁོང་རྒྱུན་རིང་བཞུགས་སའི་གནས་ཁྲོ་ཕུ་དང་། ཞ་ལུ། རི་ཕུག་གཙོ་བོར་མཛད་ཡོད་པ་དང་། དགུང་གྲངས་དོན་བཞི་པའི་མཇུག་ནས་སྐུ་མཚམས་བཅད་དེ་ཉིན་མཚན་ཁོར་མོ་ཡུག་ཏུ་ཙོག་པུར་བཞུགས་པ་ལས་དབུ་སྔས་ལ་མི་རེག་པར་ཉམས་བཞེས་ལ་གཅིག་ཏུ་གཞོལ་མུར་དགུང་གྲངས་དོན་ལྔ་ལ་ཕེབས་པ་ ༡༣༦༤ ལོར་ཞ་ལུ་རི་ཕུག་ཏུ་སྐུ་གཤེགས། གསུང་རྩོམ་པོད་ཉི་ཤུ་རྩ་དྲུག་ཙམ་པོ་ཏཱ་ལའི་ཞོལ་པར་ཁང་དུ་ཡོད་པར་བཤད། བསྒྱུར་རྩོམ་ཡང་དུ་མ་བཞུགས། བོད་གངས་ཅན་གྱི་མཁས་པའི་ཁྲོད་དུ་ཆོས་རྗེ་བུ་སྟོན་ནམ། བུ་སྟོན་ཐམས་ཅད་མཁྱེན་པ་ཞེས་གྲགས་ཤིང་། ཅི་ཡོད་བུ་ལ་དྲིས་[དོན་ནི། བཀའ་བསྟན་སོགས་གཞུང་ཆེན་མོ་རྣམས་སུ་ཅི་ཞིག་ཡོད་མེད་བུ་སྟོན་ཐམས་ཅད་མཁྱེན་པ་ལ་དྲིས་ཞེས་པ་ཡིན། གཟིགས་རྒྱ་ཆེ་བའི་དོན་ནོ། །]ཞེས་པའི་མཁས་པའི་གསུང་རྒྱུན་ཡང་ཡོད་དོ། །
   རྣམ་ཐར་རྒྱས་པ་ཁྲོ་ཕུ་བ་བསོད་ནམས་སེང་གེས་མཛད་པའི་[བུ་སྟོན་གྱི་རྟོགས་བརྗོད་ངོ་མཚར་གཏམ་གྱི་རོལ་མོ་ཉེར་གཅིག་པ་]དང་། སྒྲ་ཚད་པ་རིན་ཆེན་རྣམ་རྒྱལ་གྱིས་མཛད་པའི་[ཆོས་རྗེ་ཐམས་ཅད་མཁྱེན་པ་བུ་སྟོན་ལོ་ཙཱ་བའི་རྣམ་པར་ཐར་པ་སྙིམ་པའི་མེ་ཏོག] བླ་མ་མགོན་པོ་དཔལ་བས་མཛད་པའི་[ཆོས་རྗེའི་རྣམ་ཐར་རིན་ཆེན་ཕྲེང་བ།] ཁྱུང་པོ་ལྷས་པ་གཞོན་ནུ་བསོད་ནམས་ཀྱིས་མཛད་པའི་[ཐམས་ཅད་མཁྱེན་པ་བུ་སྟོན་རིན་པོ་ཆེའི་རྣམ་པར་ཐར་པ་ཡོན་ཏན་རིན་པོ་ཆེའི་ལྷུན་པོ་]སོགས་ཡོད།

༢༠༡༩.༠༤.༠༨.ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་དམ་འདྲེན་བཀོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་པ་ཡིན།]ཞེས་རྩོམ་ཁུངས་ཁ་གསལ་འགོད་དགོས།

མཁས་གྲུབ་དགེ་ལེགས་དཔལ་བཟང་ནི། ཕྱི་ལོ་ ༡༣༨༥ ལོར་གཙང་ལ་སྟོད་ཆུ་འོག་ཏུ་འཁྲུངས། བ་སོ་ཆོས་ཀྱི་རྒྱལ་མཚན་དང༌། བསོད་ནམས་བཀྲ་ཤིས་གཉིས་ཀྱང་འདི་ཉིད་དང་ཡབ་ཡུམ་གཅིག་པའི་སྐུ་མཆེད་ཡིན།
   ༡༣༩༡ ལོ་དགུང་གྲངས་བདུན་གྱི་སྐབས་མཁས་གྲུབ་སེང་གེ་རྒྱལ་མཚན་ལས་དགེ་ཚུལ་གྱི་སྡོམ་པ་བཞེས་པའི་མཚན་ལ་སྔར་གྱི་མཁས་གྲུབ་དགེ་ལེགས་གྱི་སྟེང་དུ་དཔལ་བཟང་པོ་ཞེས་པ་བསྣན་པས། མཁས་གྲུབ་དགེ་ལེགས་དཔལ་བཟང་པོ་ཞེས་གྲགས་པ་བྱུང༌།
   རྗེ་བཙུན་རེད་མདའ་བ་ལས་ཚད་མ་དང་། མངོན་པ་གོང་འོག །དབུ་ཕར་འདུལ་བ་བཅས་གསན་ནས་སྦྱངས་པ་མཐར་ཕྱིན་པ་མཛད། དཔལ་ས་སྐྱ་བའི་ལམ་འབྲས་པ་ཡེ་ཤེས་དཔལ་དང༌། བསོད་ནམས་རྒྱལ་མཚན། པཎ་ཆེན་ན་བཟའ་བ་གསུམ་ལས་གསང་སྔགས་ཀྱི་ཆོས་སྐོར་གང་མང་གསན།
   དགུང་ལོ་བཅུ་དྲུག་པ་ ༡༤༠༠ ལོར་བོ་དོང་པཎ་ཆེན་འཇིགས་མེད་གྲགས་པས་རིགས་གཏེར་དགག་པའི་གཞུང་བརྩམས་ཏེ་དམ་བཅའ་མཛད་པར་རྗེ་འདི་ཉིད་གཙང་ངམ་རིང་དུ་ཕེབས་ཏེ་རྩོད་གླེང་མཛད། སྐབས་དེར་བརྒལ་བརྟག་བགྱིས་པའི་ཚིག་རྣམས་གཞིར་བཟུང་སྟེ་དགུང་ལོ་ཉེར་དགུ་པ་ ༡༤༡༣ ལོར་ཉང་སྟོད་ལྕང་ར་དཔལ་འབར་གྱི་དགོན་པར་བཞུགས་སྐབས་ཚད་མ་སྡེ་བདུན་ཡིད་ཀྱི་མུན་སེལ་མཛད་པར་གྲགས། བོ་དོང་པཎ་ཆེན་གྱིས་མཁས་གྲུབ་རྗེ་ལ་བསྟོད་པ་བུང་བ་རྣམ་པར་རྩེན་པ་ཞེས་པ་མཛད་པར་གྲགས།
   དགུང་ལོ་བཅོ་བརྒྱད་པར་འཇམ་དབྱངས་སྨྲ་སེང་གི་བསྟོད་པ་མཚན་དཔེས་རབ་རྒྱན་མ་བརྩམས། དགུང་ལོ་ཉེར་གཅིག་པ་ ༡༤༠༥ ལོར་རེད་མདའ་བ་གཞོན་ནུ་བློ་གྲོས་ལས་བསྙེན་པར་རྫོགས།
   དགུང་ལོ་ཉེར་གསུམ་པ་ ༡༤༠༧ ལོར་དབུས་སུ་ཕེབས་ཏེ་རྗེ་བློ་བཟང་གྲགས་པ་སེ་ར་ཆོས་སྡིངས་སུ་བཞུགས་པ་དང་མཇལ་ཞིང་། དེ་མ་ཐག་དཔལ་རྡོ་རྗེ་འཇིགས་བྱེད་ཀྱི་དབང་དང་འཇམ་དབྱངས་ཨ་ར་པ་ཙའི་རྗེས་གནང་སྩལ་བ་དང་། དེ་ནས་བཟུང་རྗེ་བླ་མ་ཞིང་ཁམས་གཞན་དུ་མ་གཤེགས་བར་དུ་རྗེས་སུ་བཟུང་སྟེ། མདོ་སྔགས་ཀྱི་ཆོས་སྤྱི་དང་ཐུན་མོང་མ་ཡིན་པའི་གདམས་པ་ཡོངས་རྫོགས་གནང་ཞིང་། དེ་དག་ཐུགས་དམ་ཉམས་བཞེས་སུ་མཛད་པའི་བོགས་འདོན་གྱི་ཆེད་དུ་དམ་བཅའ་བཅུ་ཞེས་པ་མཛད་ནས་དེ་ལས་ནམ་ཡང་འདའ་བ་མེད་པར་སྐུ་ཚེ་མཐའ་འཁྱོལ་བ་གནང་།
   གཞན་ཡང་རྗེའི་དངོས་སློབ། རྒྱལ་ཚབ་ཆོས་རྗེ་དང༌། འདུལ་འཛིན་པ། འཇམ་དཀར་བ། རྟོགས་ལྡན་འཇམ་དཔལ་རྒྱ་མཚོ་སོགས་ལས་ཀྱང་མདོ་སྔགས་ཀྱི་ཆོས་ཚུལ་མང་དུ་ཞུས། གཙང་ཉང་སྟོད་དུ་ཕེབས་ནས། ལི་ཡུལ་ལྕང་ར་ལ་གདན་ས་མཛད་པས་ལྕང་ར་ཆོས་མཛད་ཅེས་གྲགས།
   རྒྱལ་རྩེ་སྡེ་པ་རབ་བརྟན་ཀུན་བཟང་པས་མཐུན་རྐྱེན་སྦྱར་བ་ལ་བརྟེན་ནས་རྒྱལ་རྩེ་དཔལ་འཁོར་ཆོས་སྡེ་དགོན་ཕྱག་བཏབ་ནས་འཆད་མཉན་སྤེལ། གཞན་ཡང༌། ནོར་བུ་དགའ་ལྡན་དང༌། བྲང་མོ་ཆེ་བ། ལེགས་གྲུབ་པ། ཤར་ཆེན་པ། ཞི་གནས་པ། གསེར་ཁང་གོང་འོག་གཉིས། ལྷ་ཁང་པ་སོགས་ཆོས་སྡེ་དུ་མ་ཕྱག་བཏབ། དབུས་གཙང་ཁུལ་གྱི་སྡེ་སྣོད་འཛིན་པ་མང་པོས་རྗེ་འདིའི་ཞབས་ལ་བཏུགས་ཏེ་མདོ་སྔགས་ཀྱི་ཆོས་ཚུལ་རྒྱ་ཆེར་ཞུས། དཔལ་འཁོར་ཆོས་སྡེའི་མཁན་ཐོག་དང་པོ་མཛད།
   སྡེ་པ་རབ་བརྟན་རྩེ་བས་དཔལ་འཁོར་ཆོས་སྡེར་སླར་ཡང་གདན་དྲངས་ཀྱང་མ་བྱོན་པར་རི་བོ་མདང་ཅན་དུ་བྱོན་ནས་ཐུགས་དམ་ཉམས་བཞེས་དང་སློབ་མ་མང་པོར་མདོ་སྔགས་ཀྱི་གཞུང་ལུགས་དུ་མའི་བཀའ་ཁྲིད་དང༌། གསུང་རབ་ཀྱི་དགོངས་པ་འགྲེལ་པའི་ལེགས་བཤད་དུ་མ་གསར་རྩོམ་གནང་།
   དགུང་ལོ་ཞེ་བདུན་པ་ ༡༤༣༡ ལོར་རྒྱལ་ཚབ་ཆོས་རྗེ་གནས་རྙིང་དུ་བཀའ་ཆོས་གསུང་ནས་བཞུགས་པ་དང་མཇལ་སྐབས་རྗེ་བླ་མའི་གསེར་ཁྲི་ལ་ཕེབས་དགོས་ཀྱི་ཞལ་ཏ་གནང༌བ་ལྟར་དགའ་ལྡན་གྱི་ཁྲིར་ཕེབས། ཁྲི་རབས་གསུམ་པ་ཡིན། དབང་ལུང་མན་ངག་རྒྱ་ཆེར་སྩལ། དགའ་ལྡན་དུ་གྲྭ་ཚང་བཞི་བཙུགས་ནས་འཆད་ཉན་གྱི་སྲོལ་བཏོད། དུས་ཕྱིས་ཤར་བྱང་གཉིས་སུ་ཐིམ། དགའ་ལྡན་རང་དུ་རྒྱུན་བཞུགས་མཛད་ནས་རྗེའི་བཞེད་སྲོལ་མ་ཉམས་པར་བསྐྱངས་པས་སློབ་མ་གྲགས་ཅན་མང་དུ་བྱུང་། རྗེ་བླ་མའི་དངུལ་གདུང་གི་དབུ་ཐོག་ཏུ་གསེར་ཟངས་ཀྱི་རྒྱ་ཕིབས་ཐོག་མར་འབུབས་པར་མཛད།
   རྗེ་ཙོང་ཁ་པ་ཞི་བར་གཤེགས་རྗེས་སུ་ཤུགས་དྲག་གདུངས་པས་གསོལ་བ་ཡང་ཡང་བཏབ་པ་ལས་དག་པའི་གཟིགས་སྣང་བྱུང་སྟེ་གསུང་གིས་དབུགས་དབྱུང་བ་ཡང་ཐེངས་ལྔ་བྱུང་བ་དེ་ལ་རྗེ་གཟིགས་པ་ལྔ་ལྡན་དུ་གྲགས། རྗེ་བླ་མའི་ནང་སྲས་ཀྱི་ཐུ་བོ་གཅིག་པུར་བགྲངས།
   འདིའི་སློབ་མ་ལ་དགའ་ལྡན་ཁྲི་ཐོག་བཞི་པ་ཞ་ལུ་ལེགས་པ་རྒྱལ་མཚན། ལྔ་པ་བློ་གྲོས་ཆོས་སྐྱོང༌། དྲུག་པ་གཅུང་པོ་བ་སོ་ཆོས་ཀྱི་རྒྱལ་མཚན། རྗེ་ཤེས་རབ་སེང་གེ །མཁས་ཆེན་བསོད་ནམས་མཆོག་གྲུབ། ཀུན་མཁྱེན་འཕགས་པ་འོད། སྤྱན་སྔ་བ་བློ་གྲོས་རྒྱལ་མཚན། ཞང་ཞུང་ཆོས་དབང་གྲགས་པ། ཆོས་རྗེ་དོན་གྲུབ་དཔལ་སོགས་མང་དུ་བྱུང༌།
   དགའ་ལྡན་གྱི་ཁྲི་ལོ་བརྒྱད་བསྐྱངས་ཏེ་མཐར་དགུང་ལོ་ང་བཞི་པ་ ༡༤༣༨ ལོར་དགའ་ལྡན་དུ་ཞི་བར་གཤེགས་པའི་གདུང་རྟེན་དངུལ་གྱི་མཆོད་སྡོང་རྗེའི་གསེར་སྡོང་ཆེན་མོའི་གཡོན་ཕྱོགས་ཀྱི་དང་པོར་བཞུགས།
   སེ་ར་རྗེ་བཙུན་པ་དང་། པཎ་ཆེན་བདེ་ལེགས་ཉི་མ། བྲག་གཡབ་བློ་བཟང་བསྟན་པ། དགེ་བཤེས་བློ་བཟང་སྙན་གྲགས་སོགས་ཀྱིས་མཛད་པའི་རྗེ་འདིའི་རྣམ་ཐར་དུ་མ་བཞུགས། སྐུ་ཕྲེང་ཕྱི་མ་ནི་བསོད་ནམས་ཕྱོགས་ཀྱི་གླང་པོ་ནས་ཉེ་བར་བཟུང་ད་ལྟའི་པཎ་ཆེན་ཆུང་སྲིད་རིན་པོ་ཆེ་དགེ་འདུན་ཆོས་ཀྱི་ཉི་མའི་བར་རིམ་པར་བྱོན་ཅིང༌། གསུང་རྩོམ་ལ། ཕར་ཕྱིན་རྟོགས་དཀའི་སྣང་བ་དང༌། འདུལ་བ་ཐུབ་བསྟན་བྱི་དོར། ཚད་མའི་ཊིཀ་ཆེན་རིགས་པའི་རྒྱ་མཚོ། དབུ་མ་སྟོང་ཐུན། བསྐྱེད་རིམ་དངོས་གྲུབ་རྒྱ་མཚོ། དུས་འཁོར་ཊིཀ་ཆེན་དེ་ཉིད་སྣང་བ་སོགས་པོད་ཆེན་བཅུ་གཉིས་ཙམ་བཞུགས།
 མཁས་གྲུབ་རྗེའི་དམ་བཅའ་བཅུ་ནི།
   [༡] གང་ཚེ་གཞན་གྱི་སེམས་ངེས་པར་བསྲུང་དགོས་པ་དང༌། ཆེས་ངོ་མཚར་བ་ལ་སོགས་པའི་ཆོས་ལྡན་གྱི་དམིགས་བསལ་རེ་རེ་ཙམ་མ་གཏོགས་པའི་སྐབས་གང་དུ་ཡང༌། དམག་དང་ཆོམ་རྐུན་རྒྱལ་པོའི་གཏམ་ལ་སོགས་པ་འདུ་འཛིའི་གཏམ་གྱི་སྦྱོར་བ་ཅུང་ཟད་ཀྱང་མི་བགྱི་བ་ནི་དམ་བཅའ་བ་དང་པོའོ། །
   [༢] ཀུན་སློང་སྐྱོན་ཆགས་པའམ། ལུང་དུ་མ་བསྟན་པ་རྣམ་པར་མ་བརྟགས་པའི་སེམས་ཀྱིས་བསླད་པ་ཡང་རུང་སྟེ། དེ་ཉིད་ཀྱི་ཉེས་པ་སེལ་བའི་ཆོས་ལྡན་གྱི་ཆེད་དུ་ཕན་པར་འདོད་པ་འབའ་ཞིག་གིས་བརྗོད་རིགས་པའི་ཚིག་གིས་བརྗོད་པ་མ་གཏོགས་པ། རང་ལས་རྒྱུད་ཐ་དད་པའི་གང་ཟག་དམིགས་ཀྱིས་བསལ་བའི་མིང་གིས་སྨོས་ཏེ། དེའི་སྒོ་གསུམ་གྱི་སྐྱོན་ཕྲ་མོ་ཙམ་ཡང་ཚིག་ཏུ་བརྗོད་པ་མི་བགྱི་བ་ནི། དམ་བཅའ་བ་གཉིས་པའོ། །
   [༣] གལ་ཏེ་རང་ལ་སེམས་རྒྱུད་ཅུང་ཟད་ཙམ་ཡང་འཁྲུག་པའི་ཉེས་པ་མི་འདྲེན་ཞིང༌། གཞན་ལ་ཐབས་དེས་ངེས་པར་ཕན་ཞིང་ཡིད་ཆེས་པའི་སྐབས་མ་གཏོགས་པ་རང་ལས་རྒྱུད་ཐ་དད་པའི་སེམས་ཅན་དང༌། དེ་ལས་གཞན་སེམས་ཅན་མ་ཡིན་པ་ཡུལ་དུ་བྱས་པའང་རུང་སྟེ། རྩུབ་མོའི་ཚིག་ཅུང་ཟད་ཙམ་ཡང་སྨྲ་བར་མི་བགྱིད་པ་ནི། དམ་བཅའ་བ་གསུམ་པའོ། །
   [༤] གང་གི་ཚེ་ཆོས་ལྡན་གྱི་བྱ་བའི་ཆེད་དུ་དྲན་ཤེས་ཉེ་བར་བཞག་སྟེ་ངེས་པར་བརྟག་དགོས་པའི་གནས་ལ་སེམས་པ་མ་གཏོགས་པ། གཉེན་བཤེས་དང་རྙེད་བཀུར་འདུ་འཛི་ཆགས་སྡང་སོགས་ཀྱི་གནས་ལ་ཅུང་ཟད་ཀྱང་ཉོན་མོངས་པ་དང་འདྲེས་པའི་སེམས་ཀྱིས་བརྟག་པར་མི་བགྱི་བ་ནི། དམ་བཅའ་བཞི་པའོ། །
   [༥] གང་གི་ཚེ་ནད་དང་ལམ་ལ་སོགས་པ་ཧ་ཅང་དུབ་པའི་སྐབས་མ་གཏོགས་པར་དགེ་བའི་སྦྱོར་བའི་སྐབས་གང་གི་ཚེ་ཡང༌། ཉལ་བ་དང༌། འཁྲེས་པ་དང༌། བྲེ་མོའི་གཏམ་དང༌། བཟའ་བཏུང་ཧ་ཅང་བསྟེན་པ་སོགས་ཀྱིས་ཆོས་ལྡན་གྱི་དགོས་པ་མེད་ཅིང་ལེ་ལོ་སྐྱེ་བ་མཐོང་བཞིན་དུ་འཕྲོ་མི་གཅོད་ཅིང༌། དང་དུ་ལེན་པ་ཅུང་ཟད་ཀྱང་མི་བྱ་བ་ནི། དམ་བཅའ་བ་ལྔ་པའོ། །
   [༦] བདག་ལ་རྫས་དེ་བདོག་ཅིང་དེ་གང་ཟག་དེ་ཉིད་ལ་བྱིན་ན་བདག་གི་དགེ་བའི་བྱ་བ་ཉམས་པའི་རྐྱེན་དང༌། འཕེལ་བའི་གེགས་སུ་འགྱུར་བའམ། ཡུལ་དེ་ལ་གནོད་པར་འགྱུར་བར་ངེས་པའམ་ཆོས་ལྡན་གཞན་དང་། ཡུལ་གཞན་ལ་བསྔོས་ཟིན་པ་མ་གཏོགས་གང་ཡང་རུང་བས་ཡོ་བྱད་བཟང་ངན་ཅི་འདྲ་ཞིག་སློང་ཡང་སེར་སྣའི་བློས་མི་སྟེར་བ་སྤངས་ཏེ། དེ་མ་ཐག་ཏུ་དགའ་བའི་སེམས་ཀྱིས་བྱིན་ནས་རྫོགས་པའི་བྱང་ཆུབ་ཏུ་བསྔོ་བ་ནི། དམ་བཅའ་བ་དྲུག་པའོ། །
   [༧] གང་གི་ཚེ་བདག་གམ་གཉེན་བཤེས་ལོངས་སྤྱོད་འཁོར་གཡོག་སོགས་གང་ཡང་རུང་བ་ལ་སུ་ཡང་རུང་བས་ཅི་ཡང་རུང་བའི་གནོད་པ་དང༌། མི་སྙན་པ་བརྗོད་པ་དང༌། མཚང་འབྲུ་བ་དང༌། སྲོག་གཅོད་པའི་བར་དུ་བྱེད་པ་ཐམས་ཅད་ལ་དང་པོ་ཁོང་འཁྲུག་པ་དང༌། རྗེས་སུ་འཁོན་དུ་འཛིན་པ། ལུས་ངག་གི་རྣམ་པར་འགྱུར་བ་ཕྲ་མོ་ཡན་ཆད་འབད་པས་འགོག་ཅིང༌། ཅུང་ཟད་ཀྱང་དང་དུ་མི་ལེན་པ་ལ་ཅི་ནས་ཀྱང་དེ་ཉིད་ལ་ལན་དུ་དངོས་བརྒྱུད་གང་ཡང་རུང་བའི་སྒོ་ནས་ཕན་གདགས་པའི་བློ་བསྐྱེད་ཅིང་སྨོན་ལམ་གདབ་པ་ནི། དམ་བཅའ་བ་བདུན་པའོ། །
   [༨] བདག་ཉིད་ཀྱིས་དབང་ཁྲིད་ལུང་མན་ངག་བསྟན་པ། མདོ་རྒྱུད་སོགས་བཤད་པ། བདུན་ཚིགས་རབ་གནས་སྦྱིན་སྲེག་རྣམས་ཀྱི་ཡོན་དང༌། ཆོས་ལ་དམིགས་ཏེ་གཞན་གྱིས་བྱིན་པ། འཕྲལ་དུ་ལོངས་སྤྱོད་ལ་ཉེ་བའི་སྟ་གོན་བྱས་པ། བཙེམས་ཤིང་དྲུབས་པའི་ཆོས་གོས་དང༌། གཡོས་སུ་བྱས་སམ་དེ༌ཉིད་ཀྱི་ཚེ་གཡོས་སུ་བྱེད་པར་ཆས་པ་ལྟ་བུའི་ཟས་གོས་མ་གཏོགས་པ། ཡོ་བྱད་ཆེ་ཆུང་གང་བྱུང་ཡང་། བདག་ཉིད་ཀྱིས་ཅུང་ཟད་ཀྱང་བདག་གིར་མི་འཛིན་ཅིང༌། བསོད་ནམས་གསོག་པའི་ཐབས་འབའ་ཞིག་ལ་གཏོང་བ་དང༌། ཆོས་ཀྱི་སྦྱིན་པ་ཚིག་བཞི་པ་གཅིག་ཡན་ཆད་ཀྱང་བྱང་ཆུབ་ཀྱི་སེམས་ཀྱིས་ཟིན་པར་བྱ་བ་ནི། དམ་བཅའ་བ་བརྒྱད་པའོ། །
   [༩] བསྟན་པ་འབའ་ཞིག་ལ་བསམས་པའི་བློས་གསུང་རབ་ཀྱི་དོན་ལ་ལོག་པར་རྟོག་པ་འགོག་བའི་ཡན་ལག་མ་གཏོགས་པར། བཤེས་གཉེན་སུ་ལ་ཡང་མི་བསྔགས་པ་ཅུང་ཟད་ཀྱང་མི་སྨྲ་ཞིང༌། ཡོན་ཏན་སྒྲོག་པ་ལྷུར་ལེན་པ་དང༌། གང་ཟག་མཆོག་དམན་སུ་ལའང༌། ཕུན་སུམ་ཚོགས་པའི་རྣམ་པ་ཆེ་ཆུང་ཅི་འདུག་པ་དང༌། ཡོན་ཏན་གྱི་ཁྱད་པར་ཆོས་དང་མཐུན་པ་ཅི་འདུག་པ་མཐོང་ངམ་ཐོས་པ་ན་ཡིད་ལ་ཟུག་རྔུ་ཅུང་ཟད་མི་སྐྱེད་ཅིང་དེ་མ་ཐག་ཏུ་སྙིང་ནས་དགའ་བའི་བློ་སྦྱོང་བ་ནི། དམ་བཅའ་བ་དགུ་བའོ། །
   [༡༠] དམ་བཅའ་བ་བཅུ་པ་ནི། ནད་དང་ཆོམ་རྐུན་སོགས་དྲག་པོས་གཙེས་པས་གཞན་དབང་དུ་གྱུར་པས་སྒྲུབ་པར་མི་ནུས་པའི་སྐབས་བྱུང་ན་མ་གཏོགས་པར། ཇི་སྲིད་འཚོའི་བར་དུ་ཉིན་ཞག་རེའི་ནང་དུ་དགེ་སྦྱོར་བཅུ་པོ་ཆག་མེད་དུ་བགྱི་བ་སྟེ། དེ་ཡང་འདི་ལྟར་སེམས་བསྐྱེད་ཆོ་ག་ཉུང་ངུས་ཐུན་དྲུག་ཏུ་ལེན་ཞིང༌། ཁྱད་པར་སྔ་དྲོ་སྨོན་སེམས་དང༌། བྱང་སེམས་ཀྱི་སྡོམ་པ་རང་གིས་བླང་བའི་ཆོ་ག་རྒྱས་པ། བྱང་ཆུབ་ཀྱི་སེམས་གཉིས་སྦྱོང་བའི་དམིགས་རྣམ་དངོས་གཞི་ཐུན་བཞིའམ་གསུམ་དུ་ལེན་པར་བསྒོམས་ནས་སྤྱོད་ལམ་ཐམས་ཅད་དེ་ཉིད་ཀྱི་རྩིས་ཟིན་པའི་དྲན་ཤེས་རྒྱ་ཡན་དུ་མ་ཤོར་བར་ནར་མར་བསྟེན་པ་ལ་འབད་པ། འཁོར་བའི་སྣང་ཤས་ཟིལ་གྱིས་གནོན་པའི་གཉེན་པོར། སྐྱེས་བུ་ཆུང་འབྲིང་གི་དམིགས་རྣམ་གཙོ་བོ་གང་སྐབས་དང་འཚམ་པར་ཐུན་གསུམ་མམ་བཞིར་བསྒོམས་ནས་སྔ་མ་ལྟར་དྲན་ཤེས་བསྟེན་པ། སྔགས་བླ་མེད་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ཡོངས་སུ་རྫོགས་པ་ཐུན་བཞིའི་རྣལ་འབྱོར་རྣམས་སོ། །

༢༠༡༦.༠༨.༡༦.ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་དམ་འདྲེན་བཀོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་པ་ཡིན།]ཞེས་རྩོམ་ཁུངས་ཁ་གསལ་འགོད་དགོས།

འཕགས་པ་ཐོགས་མེད་ནི། འཛམ་གླིང་མཛེས་པའི་རྒྱན་དྲུག་གི་ནང་ཚན་དང་སེམས་ཙམ་པའི་ཤིང་རྟའི་སྲོལ་ཕྱེ་བས་ཤིང་རྟའི་སྲོལ་འབྱེད་གཉིས་ཀྱི་ཡ་གྱལ་དུ་བགྲངས།
 འཛམ་གླིང་མཛེས་པའི་རྒྱན་དྲུག་གི་ནང་ཚན་དང་སེམས་ཙམ་པའི་ཤིང་རྟའི་སྲོལ་ཕྱེ་བས་ཤིང་རྟའི་སྲོལ་འབྱེད་གཉིས་ཀྱི་ཡ་གྱལ་དུ་བགྲངས།
   སྟོན་པ་ཉིད་ཀྱིས་འཇམ་དཔལ་རྩ་རྒྱུད་ལས། ང་ནི་མྱ་ངན་ལས་འདས་འོག་ཏུ། །ལོ་ནི་དགུ་བརྒྱ་ལོན་པ་ན། །༼བུ་སྟོན་ཆོས་འབྱུང་དུ། ཚིག་རྐང་འདི་གཉིས་རྒྱུད་ན་མེད་དོ། །འོན་ཀྱང་རྒྱའི་སློབ་དཔོན་རྫོགས་གསལ་གྱིས་དགོངས་འགྲེལ་གྱི་འགྲེལ་པར་བྲིས་པའོ། །ཞེས་འབྱུང་།༽ཐོགས་མེད་ཅེས་བྱའི་དགེ་སློང་ནི། །བསྟན་བཅོས་དེ་ནི་དོན་ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །འཇིག་རྟེན་རིག་པ་སྟོན་བདག་ཉིད། །གཞུང་འབྱེད་ངང་ཚུལ་ཅན་དུ་འགྱུར། །དེ་ཡི་རིག་པ་གྲུབ་པ་ནི། །ས་ལའི་ཕོ་ཉ་མོ་ཞེས་བརྗོད། །དེ་ཡི་སྔགས་ཀྱི་མཐུ་ཡིས་ནི། །བློ་ནི་བཟང་པོ་སྐྱེ་བར་འགྱུར། །བསྟན་པ་ཡུན་རིང་གནས་བྱའི་ཕྱིར། །མདོ་ཡི་དེ་ཉིད་བསྡུས་དོན་བྱེད། །ལོ་ནི་བརྒྱ་དང་ལྔ་བཅུར་འཚོ། །དེ་ལུས་ཞིག་ནས་ལྷ་ཡུལ་འགྲོ། །ཞེས་ལུང་བསྟན་གསལ་བར་གནང་བ་ལྟར། སྟོན་པ་མྱ་ངན་ལས་འདས་ནས་ལོ་དགུ་བརྒྱ་ལྷག་ལོན་པ་ན་༼དུས་རབས་བཞི་པ་ཙམ་མམ་ཁ་ཤས་སུ་དུས་རབས་ལྔ་པར་གསུངས།༽སྐུ་འཁྲུངས་པར་བཤད།
   དེ་ཡང་རྒྱལ་བ་མྱ་ངན་ལས་འདས་ནས་རིང་པོ་མ་ལོན་པ་ན་ནང་པའི་བསྟན་པ་སྡེ་པ་བཅོ་བརྒྱད་དུ་གྱེས་པ་དང༌། ཉན་ཐོས་ཀྱི་གྲུབ་མཐའ་སྨྲ་བ་མང་པོ་ཞིག་གིས་ཐེག་ཆེན་རྒྱལ་བའི་བཀའ་མིན་ནོ་ཞེས་ལོག་པར་བཟུང་སྟེ་ཐེག་པ་ཆེན་པོའི་བསྟན་པ་ཆེས་ཆེར་ཉམས་དམས་པར་བྱས་ཤིང་། ཉན་ཐོས་ཀྱི་གྲུབ་མཐའ་སྨྲ་བ་རྣམས་ཀྱང་ཕན་ཚུན་རྩོད་པར་བྱེད་པས་འདི་ནི་བདེན་གྱི་གཞན་ནི་གཏི་མུག་གོ་ཞེས་ཕྱོགས་ཕྱོགས་སུ་གྱེས་པས་རྒྱལ་བའི་བསྟན་པ་ཤིན་ཏུ་ཉམས་ཤིང༌། ལྷག་པར་དུ་ཆོས་མངོན་པ་ལ་དགྲ་ལན་གསུམ་དུ་བྱུང་སྟེ།
   དང་པོ་མུ་སྟེགས་ཀྱི་རྒན་མོ་ཞིག་ན་རེ། ནང་པའི་གཎྜིའི་སྒྲ་ལས་འགེམས་ཞེས་པ་ཞིག་སྣང་སྟེ། དེ་འོ་སྐོལ་ལ་གནོད་མི་གནོད་བརྟག་པར་རིགས་སོ། །ཟེར་ནས་བརྟགས་པས། ལྷ་དང་ཀླུ་དང་གནོད་སྦྱིན་གྱིས་མཆོད་པའི། །དཀོན་མཆོག་གསུམ་གྱི་ཏོག་སྡེ་འདི་བརྡུངས་པས། །མུ་སྟེགས་འཆལ་བའི་ཀླད་པ་རྣམ་པར་འགེམས། །ཞེས་པར་རིག་ནས་དམག་དྲངས་ཏེ་བསྟན་པ་བསྣུབས་སོ། །
   དེ་ནས་ཅུང་ཟད་འཕེལ་ནས་ཡོད་པའི་ཚེ། དབུས་ཀྱི་རྒྱལ་པོས་སྟག་གཟིག་གི་རྒྱལ་པོ་ལ་རས་ཀྱི་ན་བཟའ་སྲུབས་མེད་པ་ཞིག་སྐྱེས་སུ་བསྐུར་ཏེ། དེའི་སྙིང་ཁར་རྐང་རྗེས་འདྲ་བ་ཞིག་ཡོད་པས་ངན་སྔགས་བྱས་སོ་ཟེར་ནས་དམག་དྲངས་ཏེ་བསྣུབས་སོ། །
   དེ་ནས་ཡང་ཅུང་ཟད་འཕེལ་ནས་ཡོད་པའི་ཚེ་ནང་པའི་གཙུག་ལག་ཁང་ཞིག་ཏུ་ཕྱི་པའི་སྤྲང་པོ་གཉིས་སློང་དུ་འོངས་པ་ལ། བཀྲུ་ཆུ་སྟོར་བས་ཁྲོས་ཏེ་ཉི་མ་བསྒྲུབས་ནས་ནང་པའི་གཙུག་ལག་ཁང་དང་གསུང་རབ་མང་པོ་བསྲེགས་ནས་བསྣུབས་སོ། །
   དེའི་ཚེ་བྲམ་ཟེ་མོ་གསལ་བའི་ཚུལ་ཁྲིམས་[པྲ་ཀཱ་ས་ཤཱི་ལ། རབ་ཏུ་གསལ་བའི་ངང་ཚུལ་མ་ཞེས་ཀྱང་འབྱུང་། ]ཞེས་བྱ་བས། བསྟན་པའི་རྩ་བ་མངོན་པ་ལ་དགྲ་ལན་གསུམ་གྱིས་བསྣུབས་པས། འདི་དར་བར་བྱེད་ནུས་པ་གཞན་ཡང་མི་སྣང་། བདག་ཀྱང་བུད་མེད་དུ་སོང་བས་བསྟན་པ་གསོ་བར་མི་ནུས་ཀྱི། ལུས་ལ་བུ་བསྐྱེད་ལ་དར་བར་བྱེད་དུ་གཞུག་གོ་སྙམ་ནས་རྒྱལ་རིགས་དང་འདུས་པས་འཕགས་པ་ཐོགས་མེད་དང་། བྲམ་ཟེ་དང་འདུས་པས་སློབ་དཔོན་དབྱིག་གཉེན་བྱུང་ནས། བཙས་མ་ཐག་ནས་ལྕེ་ལ་གི་ཝང་གིས་ཨ་ཡིག་འབྲི་བ་ལ་སོགས་པའི་བློ་རྣོ་བའི་ཆོ་ག་བྱས། ཡིག་རྩིས་དང་། བྲམ་ཟེའི་རིག་བྱེད་སོགས་རིག་གནས་ཐུན་མོང་བ་རྣམས་ནི་ཡུམ་རང་ཉིད་ཀྱིས་བསླབས།
   ཆེར་སྐྱེས་པའི་ཚེ་ཕའི་ལས་གང་ཡིན་ཞུས་པས། ཡུམ་གྱིས་ཁྱོད་ཕའི་རིགས་ཀྱི་བྱ་བ་བྱེད་པའི་ཕྱིར་བསྐྱེད་པ་མིན་གྱི། དམ་པའི་ཆོས་དར་བར་བྱ་བའི་ཕྱིར་བསྐྱེད་པ་ཡིན་ན། རབ་ཏུ་བྱུང་ནས་མང་དུ་ཐོས་པ་དང་ཏིང་ངེ་འཛིན་ཐོབ་པར་གྱིས་ལ་རྒྱལ་བའི་བསྟན་པ་དར་བར་གྱིས་ཤིག་གསུངས་པ་ལྟར་རབ་ཏུ་བྱུང་སྟེ། མཁན་པོ་དང་སློབ་དཔོན་དང་དགེ་འདུན་གྱི་ཞབས་འབྲིང་གི་བྱ་བའི་དུས་འདའ་བ་ལོ་གཅིག་ཏུ་མཛད་ཅིང་། བསྙེན་པར་རྫོགས་ནས་ལོ་ལྔའི་བར་དུ་ཀློག་པ་ལ་བརྩོན་པར་གནས་ཏེ། ལོ་རེ་རེར་ཚིགས་སུ་བཅད་པ་འབུམ་འབུམ་གྱི་ཚིག་དོན་ཐུགས་སུ་ཆུད་པར་བྱས། དེ་ལྟར་ཐུན་མོང་གི་སྡེ་སྣོད་གསུམ་དང༌། ཐེག་པ་ཆེན་པོའི་མདོ་སྡེ་ཕལ་ཆེར་ནི་རྟོགས་པར་སླ་ཡང༌། ཤེར་ཕྱིན་གྱི་མདོ་སྡེའི་སྦས་དོན་མངོན་རྟོགས་ཀྱི་རིམ་པ་རྣམས་མ་ཟློས་ཤིང་མ་འཛིངས་པ་ནི་རྟོགས་པར་དཀའ་བར་དགོངས་ནས། དེའི་དོན་དུ་ལྷག་པའི་ལྷ་ཞལ་མཐོང་བར་བྱའོ་ཞེས་གཅིག་ཏུ་བརྣགས་པས། སློབ་དཔོན་ཨརྷ་ཏ་དེ་ཉིད་ལ་སྒྱུ་འཕྲུལ་དྲྭ་བའི་དབང་ཞུ་བར་མཛད་ནས་དེའི་དཀྱིལ་འཁོར་དུ་བཞུགས་ཏེ་ལྷག་པའི་ལྷ་གང་ལ་འབྲེལ་ཆེ་དང༌། གང་ལ་གསོལ་བ་བཏབ་ན་བྱིན་རླབས་འབྱུང་བརྟག་པའི་ཕྱིར་མེ་ཏོག་དོར་བ་ན་མེ་ཏོག་བྱམས་མགོན་ལ་བབས་སོ། །
   དེ་ནས་རྗེ་བཙུན་བྱམས་པ་བསྒྲུབས་ལ་བསྟན་པ་དར་བར་བྱའོ་སྙམ་དུ་དགོངས་ཏེ་གུར་པ་པརྦ་ཏ་སྟེ། ཀུག་ཀུ་ཊ་པཱ་ད་པརྦ་ཏ་ཞེས་ཀྱང་གྲགས་པའི་རི་བོ་བྱ་རྐང་ཅན་དུ་ཕུག་པ་གཅིག་ཏུ་འཕགས་པ་བྱམས་པ་བསྒྲུབས་ཏེ་ལོ་གསུམ་དུ་མཚན་མ་ཅི་ཡང་མ་བྱུང་བས་ཐུགས་སྐྱོ་སྟེ་ཕྱིར་ཐོན་པས། བྲག་གི་ངོས་ལ་བྱའི་ཚང་བཅས་པ་ལ་སྔ་དྲོ་ཟན་འཚོལ་དུ་འཕུར་བ་དང༌། དགོངས་ཀ་ཚང་དུ་ལོག་འོངས་པ་བྲག་གི་ངོས་ལ་གཤོག་པ་རེག་ཙམ་རེ་བྱུང་བ་ལ། ཡུན་རིང་པས་བྲག་ཟད་པར་གཟིགས་ནས་ངའི་བརྩོན་འགྲུས་ཆུང་ངོ་སྙམ་ནས་སླར་ལྡོག་སྟེ་ལོ་གསུམ་སྒྲུབ་པ་མཛད།
   དེ་བཞིན་དུ་ཡང་ཐོན་པ་ན། ཆུ་ཐིགས་ཀྱིས་བྲག་ཟད་པར་གཟིགས། ཡང་ལོ་གསུམ་བསྒྲུབས་ཏེ་ཐོན་པ་ན། མི་རྒན་པོ་ཞིག་རས་བལ་འཇམ་པོས་ལྕགས་ཀྱི་སྡོང་པོ་ལ་ཁབ་བྱེད་པ་མཐོང་ནས། ཁབ་ཇི་ལྟར་འབྱུང་ཞེས་དྲིས་པས། སྙིང་སྟོབས་ལྡན་པའི་སྐྱེས་བུ་ཡིས། །བསྒྲུབས་ན་མི་འགྲུབ་གང་ཡང་མེད། །དཀའ་ཡང་བརྣག་པ་མ་དོར་ན། །རི་བོ་རྣམས་ཀྱང་ཐལ་བར་རློག །ཅེས་དང་། སྔར་ཡང་རས་བལ་གྱིས་ཕྱིས་ཏེ་ལྕགས་ཟད་པ་ལས་ཁབ་འདི་ཙམ་བྱུང་ངོ༌། །ཞེས་སྣོད་ཅིག་ཁབ་ཀྱིས་གང་བ་བསྟན་ནོ། །
   ཡང་ལོ་གསུམ་བསྒྲུབས་ཏེ། དེ་ལྟར་ལོ་བཅུ་གཉིས་སུ་བསྒྲུབས་ཀྱང་མཚན་མ་མ་བྱུང་བས་ཐུགས་སྐྱོ་སྟེ་ཐོན་ནས་ཕྱིན་པས། གྲོང་ཁྱེར་ཞིག་ན་ཁྱི་མོ་རོ་སྟོད་མི་ལ་ཟུག་ཅིང་ཟ་བ། སྨད་འབུས་ཁྱེར་བ་ཞིག་གཟིགས་ནས་སྙིང་རྗེ་ལྷག་པར་སྐྱེས་ཏེ། འབུ་འདི་རྣམས་མ་བསལ་ན་ཁྱི་འདི་འཆི་ལ། བསལ་ནས་བོར་ན་འབུ་རྣམས་འཆི་བས་རང་གི་ལུས་ཀྱི་ཤ་རྣམས་བཅད་ནས་དེར་འབུ་རྣམས་གཞུག་པར་བྱའོ་སྙམ་སྟེ། ཨ་ཙནྟ་ཞེས་བྱ་བའི་གྲོང་ཁྱེར་དུ་ཕྱིན་ནས་ལྷུང་བཟེད་དང་འཁར་གསིལ་གཏེང་པར་བཞག་སྟེ་སྤུ་གྲི་གཡར། སྤུ་གྲིས་སྐུའི་བརླ་ཤ་ནས་བཅད་དེ། ལག་པས་འབུ་བླངས་ན་འབུ་རྣམས་ཤི་ཡིས་དོགས་ནས། སྤྱན་བཙུམས་ཏེ་ལྗགས་ཀྱིས་འབུ་རྣམས་བླང་བར་བརྩམས་པ་ན། ཕྱག་གིས་ཡུལ་བ་ལས་ཅི་ཡང་མ་རྙེད་ནས་སྤྱན་ཕྱེ་བ་ན། ཁྱི་དང་འབུ་མེད་པར་རྗེ་བཙུན་བྱམས་པ་མཚན་དཔེ་འོད་དུ་འབར་བ་མཐོང་ནས། ཀྱེ་མ་ཡབ་གཅིག་བདག་གི་སྐྱབས། །ངལ་བརྒྱས་འབད་ཀྱང་འབྲས་མ་མཆིས། །ཅི་ཕྱིར་ཆར་སྤྲིན་རྒྱ་མཚོའི་དཔུང་། །གདུང་བས་བསྲེགས་ཏེ་སྐོམ་ཚད་འབབ། །བདག་གིས་དེ་ཙམ་བསྒྲུབས་ཀྱང་རྟགས་ཙམ་མ་བྱུང་ན། ཐུགས་རྗེ་རེ་ཆུང་ཞེས་འཁངས་པས། རྗེ་བཙུན་གྱིས། ལྷ་ཡི་རྒྱལ་པོས་ཆར་ཕབ་ཀྱང་། །ས་བོན་མི་རུང་མི་འཁྲུངས་ལྟར། །སངས་རྒྱས་རྣམས་ནི་བྱོན་གྱུར་ཀྱང་། །སྐལ་བ་མེད་པས་བཟང་མི་མྱོང་། །ང་དང་པོ་ནས་ཡོད་དེ། ཁྱོད་རང་གི་སྒྲིབ་པས་མ་མཐོང་ལ། ད་ལྟ་སྙིང་རྗེ་ཆེན་པོ་སྐྱེས་པས་སྒྲིབ་པ་དག་ནས་མཐོང་བ་ཡིན། དེ་ལྟར་ཡིན་པར། ཁྱོད་རང་ང་ཕྲག་གོང་དུ་ཁུར་ལ་གྲོང་ཁྱེར་གྱི་སྐྱེ་བོ་རྣམས་ལ་སྟོན་ཅིག་གསུངས་ནས་བསྟན་པས། སུས་ཀྱང་ཅི་ཡང་མ་མཐོང་། ཆང་འཚོང་མ་ཞིག་གིས་ཁྱི་གུ་ཞིག་ཁུར་བར་མཐོང་བ་ན་ཡང་ཕྱིས་ལོངས་སྤྱོད་ཟད་མི་ཤེས་པ་བྱུང༌། དབུལ་པོ་ཁུར་བསྐྱེད་པས་འཚོ་བ་ཞིག་གིས་ཞབས་མགོ་ཙམ་མཐོང་བས་ཀྱང་ཏིང་ངེ་འཛིན་བརྙེས་ཤིང༌། ཐུན་མོང་གི་དངོས་གྲུབ་ཐོབ་བོ། །དེར་ཡིད་ཆེས་སོ། །
   ཁྱོད་ཅི་འདོད་གསུང་བ་ལ་ཐེག་ཆེན་དར་བར་ཞུ་འཚལ་བྱས་པས། ངའི་ཆོས་གོས་ཀྱི་མཐའ་ལ་འཇུས་ཤིག་གསུང་། འཇུས་པས་དེ་མ་ཐག་དགའ་ལྡན་དུ་སླེབས། ས་སྡེའི་སྣ་མཆན་ལས། ཟླ་བ་དྲུག་བཞུགས་ཏེ་གསན་ཞེས་འབྱུང་ཞིང་། གཞན་དུ་མི་ལོ་བཅོ་ལྔ་བཞུགས་པར་བཤད་པ་སོགས་ཅི་རིགས་འབྱུང་ནའང་། ཡོངས་གྲགས་སུ་དགའ་ལྡན་དུ་བྱོན་ཏེ་ལྷའི་དྲོ་སྐད་ཅིག །མི་ལོ་ལྔ་བཅུའམ། ལྔ་བཅུ་རྩ་གསུམ་དུ་བཞུགས་པར་བཤད་པ་དང་། དེ་ཡང་ལོ་ཕྱེད་ལོར་བརྩིས་པ་ཡིན་པས་ལོ་ཉེར་ལྔའོ་ཞེས་རྒྱ་གར་བ་རྣམས་གསུང༌ངོ་། །
   དེར་ཡུམ་གྱི་མདོ་རྣམས་དང་། རྣལ་འབྱོར་སྤྱོད་པའི་ས་ཆེན་པོ་དང་། ཐེག་ཆེན་གྱི་མདོ་སྡེ་མང་དུ་གསན་ཅིང་། དེར་བྱམས་ཆོས་ཏེ་བསྟན་བཅོས་མངོན་རྟོགས་རྒྱན། མདོ་སྡེ་རྒྱན། དབུས་མཐའ་རྣམ་འབྱེད། ཆོས་ཉིད་རྣམ་འབྱེད། རྒྱུད་བླ་མ་སྟེ་ཡོངས་གྲགས་སུ་བྱམས་པའི་ཆོས་ལྔ་མཛད་པ་རྣམས་ཀྱང་གསན་ཏེ། མི་ཡུལ་དུ་བྱོན།
   བྱམས་ཆོས་ཀྱི་སྐོར་ལ་འཕགས་པས་རྗེ་བཙུན་ལ་ཡུམ་གྱི་མདོ་རྣམས་ཀྱི་དོན་སྟོན་པའི་བསྟན་བཅོས་རྩོམ་པར་ཞུས་པས་བྱམས་ཆོས་ལྔ་བརྩམས་སོ། །ཞེས་སློབ་དཔོན་སེང་བཟང་སོགས་ཀྱིས་བཞེད་ཀྱང་། གནད་ཀྱི་ཟླ་ཟེར་ལས། བཀའ་བསྡུས་པའི་རྗེས་ལ་དུས་དེར་གནས་པ་ཉིད་ནས་མཆོག་ཏུ་ཟབ་ཅིང་རྟོགས་པར་དཀའ་ལ་རྟོགས་པར་མི་ནུས་པས། ཐུགས་རྗེ་དེ་རྟོགས་པའི་དོན་དུ་འཕགས་པ་བྱམས་པས་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པའི་བསྟན་བཅོས་ཀྱིས་གསལ་བར་མཛད་ཀྱི། འཕགས་པ་ཐོགས་མེད་ཀྱིས་ཞུས་ནས་དུས་ཕྱིས་བྱས་ཟེར་བ་ནི། སེང་གེ་བཟང་པོ་ལ་སོགས་པ་རྣམས་ཀྱི་འཁྲུལ་པ་སྟེ་སྔོན་དུ་བྱས་པ་ལས་བཤད་ཅེས་པ་ནི། གཞན་དག་གིའོ་ཞེས་གསུངས་སོ། །ཞེས་འབྱུང་ངོ་། །
   འཕགས་པ་དང་པོར་མ་ག་དྷའི་ཡུལ་གྱི་ཕྱོགས་གཅིག་བེ་ལུ་བ་ན་ཞེས་བྱ་བའི་ནགས་སུ་གཙུག་ལག་ཁང་མཛད་དེ་བཞུགས་ནས་སློབ་མ་ཚུལ་ཁྲིམས་དང་ལྡན་ཞིང་མང་དུ་ཐོས་པ་བརྒྱད་ལ་ཐེག་པ་ཆེན་པོའི་ཆོས་ཟབ་མོ་དག་བཀྲོལ་ཞིང་བསྟན་པས་དེ་དག་ཀྱང་བསྟན་པའི་བྱ་བ་རྒྱ་ཆེར་བྱེད་ནུས་པ་ཤ་སྟག་བྱུང་བས་གནས་དེར་ཆོས་ཀྱི་མྱུ་གུའི་དགོན་པ་ཞེས་གྲགས་པར་ཆོས་འབྱུང་འགའ་ཞིག་ལས་བཤད།
   དེར་བྱམས་པའི་ཆོས་ལྔ་ཡང་ཡི་གེར་བཀོད། མངོན་རྟོགས་རྒྱན་དང་ཡུམ་གྱི་དོན་སྟོན་པ་དེ་ཉིད་རྣམ་ངེས་བརྩམས། རིམ་གྱིས་རྒྱུད་བླ་མའི་འགྲེལ་པ་དང་། མདོ་སྡེ་དགོངས་འགྲེལ་གྱི་འགྲེལ་པ་མཛད་པ་དང་། རྗེ་བཙུན་གྱི་མན་ངག་ལ་བརྟེན་ནས་ཐེག་པ་ཆེན་པོའི་ལམ་གྱི་རིམ་པ་རྒྱས་པར་སྟོན་པ་བྱང་ཆུབ་སེམས་དཔའི་ས་སོགས་ས་སྡེ་ལྔ་སྟེ། སའི་དངོས་གཞི། གཞི་བསྡུ་བ། རྣམ་གྲངས་བསྡུ་བ། རྣམ་པར་བཤད་པའི་སྒོ་བསྡུ་བ། རྣམ་པར་གཏན་ལ་དབབ་པ་བསྡུ་བ་རྣམས་དང་། སྡོམ་གཉིས་ཏེ། ཐེག་པ་ཆེན་པོའི་སྡོམ་ཐེག་བསྡུས་དང༌། ཐེག་པ་ཐུན་མོང་གི་སྡོམ་མངོན་པ་ཀུན་བཏུས། ཤེས་རབ་ཀྱི་ཕ་རོལ་ཏུ་ཕྱིན་པ་གསེར་མདོག་ཅན་གྱི་སྒྲུབ་ཐབས། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། སངས་རྒྱས་རྗེས་དྲན་གྱི་མདོའི་འགྲེལ་པ། ཆོས་རྗེ་དྲན་གྱི་མདོའི་འགྲེལ་པ། དགེ་འདུན་རྗེས་དྲན་གྱི་མདོའི་འགྲེལ་པ། བསམ་གཏན་གྱི་སྒྲོན་མ། འཕགས་པ་བྱམས་པའི་སྒྲུབ་ཐབས། ཆོས་སྐུའི་ཡོན་ཏན་ཐུན་མོང་མ་ཡིན་པའི་བསྟོད་པ་སོགས་མཛད་ཅིང་ས་གསུམ་བརྙེས་པར་བཤད་པ་དང་། འགྲེལ་ཆུང་གི་བཤད་པ་ཚིག་གསལ་དུ། འཕགས་པ་ཐོགས་མེད་ས་གསུམ་པ་འོད་བྱེད་པ་བརྙེས་ཀྱང་སློབ་དཔོན་དབྱིག་གཉེན་གདུལ་བའི་དོན་དུ་སེམས་ཙམ་དུ་བསྟན་ནོ་ཞེས་དང་། སེམས་ཙམ་རྒྱན་ལས་ཀྱང་། བྱམས་པ་ཐོགས་མེད་ཀྱིས་གསུངས་ཤིང་། །ཀླུ་སྒྲུབ་ཀྱང་ནི་བཞེད་པ་ཡི། །ཚད་མ་ལུང་དང་ལྡན་པ་ཡི། །བདེན་པ་གཉིས་ནི་འདིར་བརྗོད་བྱ། །ཞེས་པའི་འགྲེལ་པར། བྱམས་པ་ནི་ས་བཅུ་པའི་བྱང་ཆུབ་སེམས་དཔའོ། །ཐོགས་མེད་ནི་ས་གསུམ་པ་ལ་གནས་པའི་བྱང་ཆུབ་སེམས་དཔའོ། །ཀླུ་སྒྲུབ་ནི་ས་དང་པོ་ལ་གནས་པའི་བྱང་ཆུབ་སེམས་དཔའོ། །ཞེས་ཀྱང་འབྱུང་ངོ་། །
   ཡང་སའི་སྟོད་འགྲེལ་ལས། འཇིག་རྟེན་ཀུན་ལ་ཕན་ཕྱིར་ཐོགས་མེད་ཅེས་བྱ་བ། །ཆོས་རྒྱུན་ཏིང་འཛིན་སྟོབས་ཀྱིས་དྲངས་པའི་བདུད་རྩིའི་ཆོས། །འཕགས་པ་མི་ཕམ་ཞལ་གྱི་བུམ་པ་ནས་བླུགས་པ། །གསན་པའི་སྙིམ་པས་གསོལ་བ་དེ་ལ་ཕྱག་འཚལ་ལོ། །ཞེས་དང་། རྣམ་པར་བཤད་པ་བསྡུ་བའི་མཇུག་ཏུ། འཕགས་པ་ཐོགས་མེད་བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་བྱོན་ནས་ཆོས་ཀྱི་རྒྱུན་གྱི་ཏིང་ངེ་འཛིན་གྱི་ཁྱད་པར་བརྙེས་པ་འཕགས་པ་མི་ཕམ་པའི་ཞབས་ཀྱི་པདྨ་རྙོག་པ་མེད་པ་སྤྱི་བོས་ལེན་པར་མཛད། ཅེས་སོགས་འཕགས་པའི་སྐོར་ལ་མང་དུ་འབྱུང་།
   དེ་ནས་ཡུལ་ནུབ་ཕྱོགས་དང་ཉེ་བ་གྲོང་ཁྱེར་ས་ག་རི་ཞེས་བྱ་བར་ཨུཥྨ་པུ་རི་ཞེས་བྱ་བའི་གཙུག་ལག་ཁང་དུ་རྒྱལ་པོ་ཟབ་མོའི་ཕྱོགས་ཀྱིས་སྦྱིན་བདག་བྱས་ཏེ་དགེ་འདུན་མང་པོ་འདུས་པ་ལ། འཕགས་པ་ཐོགས་མེད་ཀྱིས་ཆོས་མང་དུ་བསྟན་ཏེ། ཉན་ཐོས་ཀྱི་སྡེ་སྣོད་དང༌། ཐེག་པ་ཆེན་པོའི་མདོ་སྡེ་ལྔ་བརྒྱ་ཙམ་བཤད་པས། ཐེག་པ་ཆེན་པོར་རིགས་སད་ཅིང་མདོ་སྡེའི་དོན་ལ་བློ་གྲོས་རྒྱས་པ་སྟོང་ཕྲག་བརྒལ་བ་ཙམ་བྱུང་བ་དང་། གནས་འདི་ཉིད་དུ་བཞུགས་པའི་ཚེ། གཅུང་དབྱིག་གཉེན་ཡང་བཏུལ་བ་ཡིན་ནོ། །
   དུས་དེའི་ཚེ་ཐེག་པ་ཆེན་པོ་ཕལ་ཆེར་གྱིས་མདོ་སྡེ་སྣ་རེ་ཙམ་མ་ཞུས་པ་མེད་པ་ལྟ་བུ་ཡིན་ཞིང༌། རྒྱ་གར་ལྷོ་ཕྱོགས་ཀྱི་རྒྱུད་དུ་དམ་པའི་ཆོས་དར་སྤེལ་དང་། ལྷ་ཁང་དང་མཆོད་རྟེན་ཆོས་གཞིས་བརྒྱ་ལྷག་གསར་དུ་བཙུགས། སློབ་མ་ཁྲི་ཕྲག་མང་པོ་བསྐྱངས། དགེ་འདུན་གྱི་སྡེ་ཆེས་ཆེར་འཕེལ་བར་མཛད།
   སྐུ་ཚེའི་སྨད་ཀྱི་དུས་ན་ལེནྡྲའི་མཁན་པོ་མཛད་དེ་དེར་ལོ་བཅུ་གཉིས་བཞུགས་ཏེ་བསྟན་པ་བསྐྱངས་པར་མཛད། ཉིན་རེ་བཞིན་མུ་སྟེགས་རྒོལ་བ་རེ་ཡོང་བ་ལ་གྲུབ་མཐའ་རྣམས་རིགས་པ་སྣ་ཚོགས་ཀྱིས་སུན་ཕྱུང་སྟེ་ཆོས་བསྟན་པས་མུ་སྟེགས་སྟོང་དུ་ཉེ་བ་ཙམ་རབ་ཏུ་བྱུང༌། གཙུག་ལག་ཁང་གང་ན་དགེ་སློང་ལྟ་བ་དང༌། ཚུལ་ཁྲིམས་དང༌། སྤྱོད་པ་དང༌། ཚིག་ཉམས་པ་ཐམས་ཅད་ཆོས་བཞིན་ཚར་གཅོད་པར་མཛད་པས་དགེ་འདུན་ཤིན་ཏུ་དག་པར་མཛད་པ་དང་། ཐེག་ཆེན་དར་བར་མཛད་དོ། །
   སློབ་དཔོན་འདིས་མཛད་པའི་བསྟན་བཅོས་ལ། ས་སྡེ་ལྔ་དང་སྡོམ་རྣམ་གཉིས་སོགས་ཡོད། མཐར་དགུང་ལོ་བརྒྱ་དང་ལྔ་བཅུ་པར་གྲོང་ཁྱེར་རྒྱལ་པོའི་ཁབ་ཏུ་མྱ་ངན་ལས་འདས་པའི་ཚུལ་བསྟན། བདག་ཉིད་ཆེན་པོ་འདི་གང་དུ་མྱ་ངན་ལས་འདས་པའི་གནས་དེར་དད་པ་ཅན་དག་གིས་མཆོད་རྟེན་བརྩིགས་སོ། །
   སློབ་དཔོན་འདི་ལ་སློབ་མ་བསྟན་པ་འཛིན་པ་མང་དུ་བྱུང་། སྲས་ཀྱི་ཐུ་བོ་བསྟན་པའི་བདག་པོར་གྱུར་པ་ནི་མཁས་མཆོག་དབྱིག་གཉེན་ཡིན་ཞིང་སྐུ་མཆེད་གཉིས་ཀ་འཛམ་གླིང་མཛེས་པར་བྱེད་པའི་རྒྱན་དྲུག་གི་གྲངས་སུ་བགྲང་ངོ་། །
   སློབ་དཔོན་འདིའི་སྐོར་བུ་སྟོན་ཆོས་འབྱུང་དང་། རྗེ་བཙུན་ཏཱ་ར་ནཱ་ཐའི་རྒྱ་གར་ཆོས་འབྱུང་སོགས་ཆོས་འབྱུང་རྣམས་དང་། ཡོངས་འཛིན་ཡེ་ཤེས་རྒྱལ་མཚན་གྱི་ལམ་རིམ་བླ་མ་བརྒྱུད་པའི་རྣམ་ཐར། རྒྱའི་སློབ་དཔོན་ཞོན་ཙང་གི་རྒྱ་གར་ལམ་ཡིག་དང་། སློབ་དཔོན་དོན་དམ་པས་བསྒྱུར་བའི་དབྱིག་གཉེན་གྱི་རྣམ་ཐར་ལས་ཀྱང་མདོར་བསྡུས་རེ་འབྱུང་ལ། དོར་ཞི་རིན་པོ་ཆེས་རྒྱ་ཡིག་ལས་བསྒྱུར་བའི་སློབ་དཔོན་འདིའི་རྣམ་ཐར་བསྡུས་པ་རྒྱ་འགྱུར་མ་ཞིག་ཀྱང་མཇལ་རྒྱུ་འདུག་ནའང་། ཡོངས་གྲགས་ཀྱི་རྣམ་ཐར་དང་ཅུང་མི་འདྲའོ། །

༢༠༡༩.༠༦.༢༡.ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་དམ་འདྲེན་བཀོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་པ་ཡིན།]ཞེས་རྩོམ་ཁུངས་ཁ་གསལ་འགོད་དགོས།