སེར་བྱེས་མཁས་སྙན་གྲྭ་ཚང་གི་ལོ་རེའི་མཛད་རིམ་ཆེ་ཁག

སྐུ་ཞི་བར་གཤེགས་པའི་སེར་བྱེས་གྲྭ་ཚང་གི་མཁན་རིན་པོ་ཆེའི་སྐུ་གདུང་ཞུགས་འབུལ་གནང་།

ཕྱི་ལོ་༢༠༡༦ ཕྱི་ཟླ་ ༧ ཚེས་ ༣༡ ཉིན་སེར་བྱེས་མཁས་སྙན་གྲྭ་ཚང་གི་༧སྐྱབས་རྗེ་མཁན་རིན་པོ་ཆེ་རྗེ་བཙུན་དགེ་འདུན་ཆོས་འཕེལ་དཔལ་བཟང་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ཏེ་བདུན་ཕྲག་གཅིག་ལྷག་རིང་ཐུགས་དམ་ལ་བཞུགས་ཤིང་། ཕྱི་ཚེས་༨ ཉིན་ཐུགས་དམ་ལས་གྲོལ་བ་དང་དེ་རིང་ཕྱི་ཚེས་༩ ཉིན་གྱི་སྔ་དྲོར་དགོན་སྡེ་དང་ཚོགས་སྡེ། ཁམས་ཚན་ཁག་གི་སྐུ་ཚབ་དང་། གྲྭ་ཚང་གི་བླ་སྤྲུལ་དགེ་འདུན་འདུས་པ་རྒྱ་མཚོས་བླ་བྲང་ནས་སྐུ་གདུང་གདན་ཞུ་གནང་སྟེ། སེར་བྱེས་གྲྭ་ཚང་གི་གཙུག་ལག་ཁང་ལ་གཡས་སྐོར་གྱིས་སེར་བྱེས་ཏྲེ་ཧོར་ཁམས་ཚན་གྱི་འདུ་ཁང་གི་མདུན་གྱི་གདུང་ཁང་དུ་བཞུགས་སུ་གསོལ་ཏེ་ཞུགས་འབུལ་གནང་། དེ་ཡང་༧སྐྱབས་རྗེ་མཁན་རིན་པོ་ཆེ་དགོངས་པ་རྫོགས་པ་ནས་གྲྭ་ཚང་ཁག་དང་གནད་ཡོད་དུ་མས་འདི་གའི་གྲྭ་ཚང་དུ་ཐུགས་གསོའི་གསུང་འཕྲིན་གནང་འབྱོར་བྱུང་བ་དང་། འདི་ག་གྲྭ་ཚང་ནས་ཀྱང་མྱ་ངན་གུས་འདུད་མཚོན་སླད་ཡིག་ཚང་དང་ཡན་ལག་ལས་ཁུངས་ཁག་ཉིན་གསུམ་ལ་སྒོ་བརྒྱབ་ཅིང་། གཙུག་ལག་ཁང་གི་ཕྱི་ནང་གཉིས་སུ་མཆོད་གློག་གྲངས་མེད་སྦར་ཏེ་སྣང་གསལ་གྱི་མཆོད་པ་དང་། དགོང་དྲོའི་ཆོས་རར་དགེ་འདུན་འདུས་མང་གིས་གཞུང་ཆེན་ཀློག་འདོན་དང་སྨོན་ལམ་གསུང་བ། བླ་མཆོད་ཚོགས་འབུལ་སོགས་ཞུས་ཏེ་༧སྐྱབས་རྗེ་དམ་པ་མཁན་རིན་པོ་ཆེ་མཆོག་ཉིད་ཀྱི་ཐུགས་དགོངས་ཟབ་མོ་ཡོངས་སུ་རྫོགས་པ་སོགས་ཀྱི་ཆེད་དུ་ཐུགས་སྨོན་རྒྱ་ཆེར་གནང་ཞིང་། ཕྱོགས་མཐའ་ཁག་གི་འདི་ག་གྲྭ་ཚང་གི་ཡན་ལག་ཚོགས་སྡེ་དག་ནས་ཀྱང་མཆོད་འབུལ་སྨོན་ལམ་གྱིས་མཚམས་སྦྱོར་དང་། དགུང་དྲོའི་ཆོས་རའི་རྗེས་སུ་བླ་བྲང་དུ་བླ་སྤྲུལ་དགེ་བཤེས་གྲྭ་མང་འདུས་ཚོགས་ཀྱིས་གཞུང་ཆེན་ཀློག་འདོན་དང་སྨོན་ལམ་གསུང་འདོན་གནང་བ་སོགས་ཀྱིས་དམ་པ་དེ་ཉིད་ཀྱི་ཆེད་དུ་དགོངས་རྫོགས་མཆོད་འབུལ་རྒྱ་ཆེར་གནང་།

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༨།༠༩ ལ།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།

 

སེར་བྱེས་གྲྭ་ཚང་གི་སྐབས་ཉི་ཤུ་པའི་ཕྱག་མཛོད་ཀྱི་ལས་ཡུན་རྫོགས་ཏེ་ཕྱག་མཛོད་གསར་པས་ལས་འགོ་ཚུགས།

ཕྱི་ལོ་ ༢༠༡༦ ལོའི་ཟླ་ ༤ ཚེས་ ༢ ཉིན་སེར་བྱེས་མཁས་སྙན་གྲྭ་ཚང་གི་སྐབས་ཉི་ཤུ་པའི་༼༢༠༡༡.༠༢.༢༧-༢༠༡༦.༠༤.༠༡༽ལས་ཡུན་རྫོགས་ཏེ་སྐབས་ཉེར་གཅིག་པའི་ཕྱག་མཛོད་རྣམ་པར་ལས་ཀ་རྩིས་སྤྲོད་གནང་སྟེ་ཉིན་དེར་ཕྱག་མཛོད་གསར་པ་རྣམ་པས་ལས་འགོ་བཙུགས་ཤིང་ལས་ཡུན་ལོ་གསུམ་ཡིན།

ཕྱག་མཛོད་གསར་པ་བཞི་ནི།

ཕྱག་མཛོད་ཆེན་མོ།      དགེ་བཤེས་ཐུབ་བསྟན་དབང་ཕྱུག

ཕྱག་མཛོད་ལས་རོགས།  དགེ་བཤེས་བསོད་ནམས་ཡར་འཕེལ།

                            དགེ་བཤེས་བློ་བཟང་བསྟན་པ།    

                            དགེ་བཤེས་བྱམས་པ་བདེ་ལེགས།

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༤།༡༥ལ།