སེར་བྱེས་མཁས་སྙན་གྲྭ་ཚང་གི་ལོ་རེའི་མཛད་རིམ་ཆེ་ཁག

སེར་བྱེས་སློབ་གཉེར་ཁང་གི་གོ་སྒྲིག་འོག་དབུ་རྙིང་འཛིན་གྲྭའི་སློབ་གཉེར་བ་ཁ་ཤས་འདེམས་སྒྲུག་གིས་དགེ་འདུན་འདུས་པའི་དབུས་སུ་རྗེའི་དགོངས་པ་རབ་གསལ་ལས་དཀའ་གནད་སྐོར་ཞིག་ལ་བགྲོ་གླེང་གནང་སོང་།
དེ་ཡང་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་བཀའ་དྲིན་རྗེས་དྲན་གྱི་ཆེད་དུ། སེར་བྱེས་གྲྭ་ཚང་གི་ཆོས་རའི་ཐོག་ཁའི་ལྷུན་གྲུབ་ཁང་གསར་དུ། སེར་བྱེས་སློབ་གཉེར་ཁང་ངམ་སེར་བྱེས་རྒྱུགས་ཞིབ་ལྷན་ཚོགས་ཀྱིས་བཀོད་སྒྲིག་བྱས་ཏེ། དབུ་རྙིང་འཛིན་གྲྭའི་སློབ་གཉེར་བའི་གྲས་ནས་སློབ་གཉེར་བ་ཁ་ཤས་འདེམས་སྒྲུག་གིས། གྲྭ་ཚང་གི་དབུ་མ་འཛིན་གྲྭ་བཞི་གཙོ་བྱས་པའི་དགེ་འདུན་འདུས་པ་རྒྱ་མཚོའི་དབུས་སུ། ཕྱི་ལོ་ ༢༠༡༥ ལོའི་ཟླ་ ༩ པའི་ཚེས་ ༩ ཡི་སྔ་ཕྱིའི་དྲོ་གཉིས་དང་། ཚེས་ ༡༠ ཡི་ཉིན་རྒྱབ། དགོང་དྲོའི་ཆུ་ཚོད་ ༦ པ་ནས་དགུ་པའི་བར་བཅས་ཚོགས་ཐུན་བཞི་ཡི་ཚོགས་ཐེངས་རེའི་ཆུ་ཚོད་གསུམ་རེར། རྗེ་བླ་མའི་དགོངས་པ་རབ་གསལ་ལས་བརྗོད་གཞི་དྲུག་ལ་དགག་སྒྲུབ་ཕྱོགས་གཉིས་ཀྱི་འཆད་མཁན་རྣམ་པས་སོ་སོའི་རྩོམ་ཤོག་སྒྲོགས་སྦྱང་དང་། ཕན་ཚུན་དྲི་བ་དྲི་ལན། འདུས་དམངས་ཀྱི་ནང་ནས་དྲི་བ་བཏོན་པར་ལན་འདེབས་གནང་བ་སོགས་དུས་བསྟུན་གྱི་བགྲོ་གླེང་གི་རྣམ་པ་གསར་པ་ཞིག་གི་སྟེང་ནས་ཚོགས་སོང་།
ལས་རིམ་གསལ་བསྒྲགས་སུ་བཀོད་པ་ལྟར་ན། བརྗོད་གཞི་དྲུག་ནི།
བདག་མེད་རྫོགས་པར་སྟོན་མི་སྟོན་དང་སྒོམ་མི་སྒོམ་གྱི་ཁྱད་པར།  ལྟ་བ་ངེས་པ་ལ་དགག་བྱ་ངོས་འཛིན་སྔོན་དུ་འགྲོ་དགོས་མིན་གྱི་ཁྱད་པར།  ཞིག་པ་དངོས་པོ་ཡིན་མིན་དང་ཀུན་གཞི་བཞེད་མི་བཞེད་ཀྱི་ཁྱད་པར།  ཐལ་རང་ལ་ལྟ་བ་མཐོ་དམན་དང་རང་བཞིན་ཡོད་མེད་ཀྱི་ཁྱད་པར།  ཕུང་པོ་གང་ཟག་གི་བདག་གཞིར་དང་ཐ་སྙད་ཚད་གྲུབ་འཐད་མིན་གྱི་ཁྱད་པར།  ཤེེས་པར་གྱུར་པའི་ཤེས་སྒྲིབ་ཡོད་མེད་དང་ཤེས་སྒྲིབ་སྐོར་དགུར་ཕྱེ་ནས་སྤོང་མིན་གྱི་ཁྱད་པར།  བཅས་ཡིན་འདུག

 

མདང་དགོང་མཁས་ཤིང་གྲུབ་པའི་དབང་ཕྱུག་༧སྐྱབས་རྗེ་ཆོས་ལྡན་རིན་པོ་ཆེ་མཆོག་དགོངས་པ་གཞན་དུ་གཏད་པའི་ཡིད་སྐྱོ་བའི་གནས་ཚུལ་བྱུང་འདུག

ཕྱི་ལོ་༢༠༡༥ལོའི་ཟླ་༩ཚེས་༡༡ གི་སྔ་དྲོའི་ཆུ་ཚོད་ ༡།༣༠ སྟེང་མཁས་ཤིང་གྲུབ་པའི་དབང་ཕྱུག་༧སྐྱབས་རྗེ་ཆོས་ལྡན་རིན་པོ་ཆེ་༧བློ་བཟང་བསྟན་འཛིན་འཇིགས་བྲལ་དབང་ཕྱུག་དཔལ་བཟང་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པའི་ཡིད་སྐྱོ་བའི་གནས་ཚུལ་བྱུང་བ་དང་། ཆུ་ཚོད་ ༧ པའི་སྟེང་སེར་བྱེས་གྲྭ་ཚང་གི་གཙུག་ལག་ཁང་དུ་གྲྭ་ཚང་བྱེས་སྨད་གཉིས་ཀྱི་བླ་སྤྲུལ་དགེ་བཤེས་དགེ་འདུན་འདུས་པ་རྒྱ་མཚོས་བླ་མཆོད་ཚོགས་འབུལ་སོགས་གནང་བ་དང་། གྲྭ་ཚང་རིན་པོ་ཆེ་དང་། ལྷོ་པ་ཁམས་ཚན། རིན་པོ་ཆེའི་གསུང་ཆོས་གོ་སྒྲིག་ཚོགས་ཆུང་སོགས་ཀྱིས་དགེ་འདུན་འདུས་པའི་སྡེ་ཆེན་པོར་མཆོད་འབུལ་རྒྱ་ཆེར་གནང་སོང་།

༧ སྐྱབས་རྗེ་ཆོས་ལྡན་རིན་པོ་ཆེ་བློ་བཟང་རྒྱལ་བསྟན་འཇིགས་བྲལ་དབང་ཕྱུག་དཔལ་བཟང་པོ་མཆོག་ནི། ༡༩༣༡ ལོར་སྐུ་འཁྲུངས། རྒྱལ་ཚབ་རྭ་སྒྲེང་རིན་པོ་ཆེས་ཆུང་སྲིད་འདི་ཉིད་གོང་མའི་ཡང་སྲིད་དུ་ངོས་འཛིན་གནང༌། ལོ་ལྔ་ཙམ་ནས་ཡི་གེ་འབྲི་ཀློག་སྦྱངས། ༡༩༣༧ ལོར་རབ་ཏུ་བྱུང་། ༡༩༤༦ ལོར་དབུས་སུ་ཕེབས་ཏེ་སེར་བྱེས་གྲྭ་ཚང་དུ་སྒྲིག་ཞུགས་མཛད། ང་དགུའི་བར་ལོ་བཅུ་གསུམ་གྱི་རིང་བླ་སྤྲུལ་གཞན་ལྟར་བླ་བྲང་དང་། ཕྱག་མཛོད། གསོལ་དཔོན་ཉར་བ་སོགས་གཏན་ནས་མ་མཛད་པར་གྲྭ་རྐྱང་དཀྱུས་མའི་ཚུལ་དུ་འཚོ་བ་སྐྱོ་བཞེས་དང༌། ཚོགས་ཆོས་ར་འགྲིམས་ཏེ་གཞུང་ཆེན་བཀའ་པོད་ལྔར་ཐོས་བསམ་སློབ་གཉེར་ཚུལ་བཞིན་དུ་མཛད། དགུང་ལོ་ཉི་ཤུའི་ཐོག་བསྙེན་རྫོགས་ཀྱི་སྡོམ་པ་བཞེས། ༡༩༦༥ ནས་༡༩༨༠ བར་སྒོ་ཕྱིར་མ་ཐོན་པར་དགེ་སྦྱོར་འབའ་ཞིག་ལ་གཞོལ་བ་མཛད། དེའི་གོང་དུ་རྒན་ཐུབ་བསྟན་རྒྱལ་མཚན་མཆོག་གི་དྲུང་ནས་སུམ་རྟགས། སྙན་ངག །དཀར་རྩིས། སྒྲ། སྡེབ་སྦྱོར་སོགས་ལའང་སྦྱང་བ་དཔྱིས་ཕྱིན་པ་གནང་། ༡༩༨༥ ལོར་འཕགས་ཡུལ་དུ་ཕེབས། སེར་བྱེས་གྲྭ་ཚང་དུ་གླིང་བསྲེ་དགེ་བཤེས་ཀྱི་དམ་འཇོག་གནང་ཞིང་། རྒྱུན་ཏུ་གྲྭ་ཚང་དུ་སློབ་གཉེར་པ་རྣམས་ལ་དཔེ་ཁྲིད་དང་། ཕྱི་ནང་གི་དོན་གཉེར་ཅན་མང་པོར་དབང་ཆོས་མན་ངག་སོགས་གནང་མུར། དེ་རིང་སྔ་དྲོའི་ཆུ་ཚོད་ ༡།༣༠ སྟེང་དགོངས་པ་གཞན་དུ་གཏད།

དེ་ཡང་༧སྐྱབས་རྗེ་ཆོས་ལྡན་རིན་པོ་ཆེ་མཆོག་གིས་ཉེ་ལམ་ཕྱི་ཟླ་ ༨ ཚེས་ ༢༩ ཉིན་རྒྱལ་ས་ལྡི་ལིའི་རསྚི་སན་མགྲོན་ཁང་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་ཡོད་པ་ལྟར། སྐབས་དེར་༧གོང་ས་༧སྐྱབས་མགོན་ཆེན་པོ་མཆོག་གིས་༧སྐྱབས་རྗེ་ཆོས་ལྡན་རིན་པོ་ཆེར་ཤིན་ཏུ་ཐུགས་མཉེས་པའི་བཀའ་གནང་དོན།
རིན་པོ་ཆེ་ཐོག་མར་ང་ལ་དོ་སྣང་བྱུང་ཡས་དེ། དབྱར་གྱི་དགག་དབྱེའི་སྐབས་སེ་ར་བ་ཚོ་ལྗོངས་རྒྱུར་ཡོང་ནས་ནོར་བུ་གླིང་གར་མཇལ་ཁ་བྱེད་དུས་སྤྱན་བསལ་ཕོ་བྲང་གི་གཟིམ་ཆུང་ཉི་འོད་ཀྱི་ནང་རེད། ངས་གསལ་པོར་དྲན་པ་ཞིག་ལ་མཇལ་ཁ་བྱེད་དུས་གཟིམ་ཆུང་གི་ཐོག་ནས་མར་ཉི་འོད་རིན་པོ་ཆེའི་མགོ་ལ་ཕོག་འདུག །དེ་དུས་ངོ་ཤེས་ཀྱི་མ་རེད། ཡིན་ནའང་དེ་དུས་རིན་པོ་ཆེའི་མགོ་ལ་ཉི་འོད་ཕོག་འདུག་པ་དང་། སྦྲང་བུ་ཞིག་རིན་པོ་ཆེའི་མགོ་ལ་བབ་འདུག་པ་དེ་ངས་གསལ་པོར་དྲན་གྱི་འདུག །རིན་པོ་ཆེས་དྲན་གྱི་འདུག་གམ་གསུངས་པར། ༼རིན་པོ་ཆེས་དྲན་གྱི་མི་འདུག་ཅེས་ཞུས།༽ དེ་དུས་བླ་མ་བག་དྲོ་པོ་ཞིག་འདུག་བསམ་བྱུང་། སྔོན་མ་དུས་འགྱུར་བྱུང་རྗེས་སུ་ལྷ་སར་གལ་ཆེའི་གནད་ཡོད་མི་སྣ་ཁ་ཤས་ཀྱིས་ངོས་ལ་ཐད་ཀར་འབྲེལ་པ་བྱ་སྟབས་མི་བདེ་བ་མང་པོ་ཞིག་རིན་པོ་ཆེ་བརྒྱུད་ནས་གནང་གི་ཡོད་པ་རེད། མི་དེ་ཚོའི་གྲས་སྙིང་སྟོབས་དང་ལྷག་བསམ་ཧ་ལས་པ་རེད། དེ་དུས་དཀའ་ངལ་ཡོད་པའི་སྐབས་ཡིན་པས་ཕན་ཐོགས་ཞེ་དྲགས་ཆེན་པོ་བྱུང་། དེ་སྔོན་ང་གྲྭ་སྐོར་དམ་བཅའ་འཇོག་སྐབས་རིན་པོ་ཆེ་རྟགས་གསལ་གཏོང་མཁན་གྲས་རེད། དེ་དུས་ཕལ་ཆེར་དབུ་མའི་ཕན་ཡོན་གྱི་སྐོར་ཞིག་ཡིན་ནམ། ཡང་ན་བདེན་གཉིས་རེད་པས། ༼ཞེས་བཀའ་འདྲི་གནང་བར་རིན་པོ་ཆེས་དབུ་མ་བདེན་གཉིས་ཀྱི་སྐོར་རེད་ཅེས་ཞུ།༽ འོ་དེ་དུས་ནས་ང་གཉིས་རྒྱུས་ཡོད་ཆགས་པ་མ་ཟད་ཆོས་གྲོགས་ཀྱང་ཆགས་པ་རེད། ཕྱིས་སུ་རྒྱ་གར་ལ་ཚུར་སླེབས་ནས་གདན་སའི་ཆོས་འཆད་ཉན་དང་དཔེ་ཁྲིད་རྒྱ་ཆེན་པོ་གནང་ནས་ཧུར་ཐག་གནང་བ་རེད། མཛོད་འགྲེལ་མངོན་པའི་རྒྱན་གྱི་སྐོར་ལ་ཧ་ལམ་རིན་པོ་ཆེ་རྒྱུས་ཡོད་ཆེ་ཤོས་ཤིག་ཆགས་བསྡད་ཡོད་པ་རེད། བསྟན་པའི་འགན་བཞེས་ཏེ་བོད་དང་རྒྱ་གར་དེ་བཞིན་ཕྱི་རྒྱལ་ཡུལ་གྲུ་ཁག་མང་པོ་ལ་ཡང་ཆོས་འཆད་སྤེལ་ཚུལ་བཞིན་གནང་ནས་སློབ་མ་མང་པོ་བསྐྱངས་ཡོད་པ་རེད། དེ་དག་ལ་དགའ་བ་བསྒོམས་ནས་ཐུགས་སྨོན་གནང་རྒྱུ་གལ་ཆེན་པོ་རེད་ལ། རིན་པོ་ཆེ་ནས་ཐུགས་སྨོན་གནང་ཡོད་ཤག་རེད། བར་ལམ་ཞིག་ལ་རིན་པོ་ཆེས་དོལ་རྒྱལ་སྐོར་ནུས་པ་ཆ་ཚང་བཏོན་མ་སོང་ཟེར་བའི་མཐོང་ཚུལ་ཞིག་ཡོང་བ་རེད། ཡིན་ནའང་རིན་པོ་ཆེ་རང་ངོས་ནས་སྔ་ཕྱི་བར་གསུམ་དུ་ལྷག་བསམ་རྣམ་དག་དང་། བླ་མའི་སློབ་མ་ཁ་ཞེ་གཉིས་མེད་ཅིག་གནང་ནས་བཞུགས་པ་རེད། ཞེ་དྲགས་ཡག་པོ་ཡིན། སངས་རྒྱས་ཀྱི་བསྟན་པ་དང་ཡང་སྒོས་བོད་བསྟན་པ་ཆབ་སྲིད་ཉག་ཕྲ་བའི་སྐབས་ང་དང་མཉམ་དུ་སངས་རྒྱས་ཀྱི་བསྟན་པ་དང་བོད་བསྟན་སྲིད་ཀྱི་ཆེད་དུ་དཀའ་ལས་བརྒྱབ་པ་རེད། དཀའ་ལས་བརྒྱབ་པའི་ནུས་པ་དང་བག་ཆགས་བཟང་པོ་དེས་ཏན་ཏན་ཚེ་རབས་ནས་ཚེ་རབས་འབྲེལ་པ་ཞིག་ཡོང་གི་རེད་ཅེས་ཞུ་རྒྱུ་བྱུང་། དེ་རིང་ཡང་དེ་དེ་བཞིན་བྱས་ནས་རིན་པོ་ཆེས་ཀྱང་དེ་དེ་བཞིན་མ་འོངས་པར་བསྟན་པ་ལ་བྱ་བ་ད་ལྟ་ནང་བཞིན་མཉམ་དུ་བྱ་རྒྱུའི་དགོངས་པ་བཞེས་དགོས། མི་ཚེ་མཐར་འཁྱོལ་བ་རེད། སྐྱེ་བའི་མཐའ་མ་འཆི་བ་ནི་ང་རང་ཚོ་ཚང་མ་གཅིག་པ་རེད། ང་ཡང་ལོ་རྒན་བརྒྱད་ཅུ་ལ་སླེབས་ཡོད། ཉེ་སྔོན་འཇར་མན་གྱི་སྨན་པ་ངོ་ཤེས་པ་ཞིག་ལ་པུས་མོའི་ན་ཚ་སྟོན་སྐབས། ཁོས་ང་ལ་ལོ་བཅོ་བརྒྱད་མ་རེད་ཅེས་ལབ་པ་རེད། བདེན་པ་རེད། ཡིན་ན་ཡང་བསྡད་པའི་རིང་བློ་འགྱོད་མེད་པ་ཞིག་བྱས་ཡོད་དུས་རིན་པོ་ཆེའི་མི་ཚེ་དོན་དང་ལྡན་པ་བྱུང་བ་རེད། བློ་བདེ་པོ་བྱས་ནས་བཞུགས་ཤིག །ངས་སྨོན་ལམ་དང་སེམས་ནང་འདུན་པ་འདྲ་ག་དུས་ཡིན་ནའང་གཏོང་གི་ཡོད། ཅེས་གནང་འདུག