སེར་བྱེས་མཁས་སྙན་གྲྭ་ཚང་གི་ལོ་རེའི་མཛད་རིམ་ཆེ་ཁག

རིས་མེད་མཁས་པའི་ལེགས་བཤད་རྒྱ་མཚོ་ངོམས་མེད་ཐུགས་ཀྱི་ཀློང་དུ་ཆུབ།།
བསམ་གཞིག་བཙོ་སྦྱང་ཞུན་ཐར་བཅད་དེ་སྒྲོ་འདོགས་མིང་གི་ལྷག་མར་བྱས།།
གུས་རྟག་བརྩོན་པས་ཉམས་སུ་བསྟར་བས་ཉམས་མྱོང་ཚད་མའི་ཉི་གཞོན་ཤར།།
སྟོང་ཉིད་སྙིང་རྗེ་སྙིང་པོར་སྦྲུམ་པའི་ལེགས་བཤད་འོད་དཀར་ཁྱེད་ཀྱིས་སྤྲོ།།

རྒྱལ་བ་ཐམས་ཅད་ཀྱི་མཁྱེན་བརྩེ་ནུས་གསུམ་གསུམ་ལྡན་ངུར་སྨྲིག་འཛིན་པའི་རྣམ་པར་རོལ་པ། འཇིག་རྟེན་ཞི་བདེའི་ལམ་སྟོན་པ་ཆེན་པོ། ྋསྤྱི་ནོར་ྋགོང་ས་ྋསྐྱབས་མགོན་ྋརྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ཕྱི་ལུགས་ལྟར་གྱི་དགུང་གྲངས་ ༨༨ ལ་ཕེབས་པའི་སྐུའི་འཁྲུངས་སྐར་གྱི་དུས་ཚེས་བཟང་པོར། སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས་དགའ་དད་སྤྲོ་གསུམ་གྱིས་འཚམས་འདྲིའི་བཀྲ་ཤིས་བདེ་ལེགས་གྲངས་མེད་ཞུ།
༢༠༢༣།༠༧།༠༦ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས།

༄༅། །ཕྱི་ལོ་ ༢༠༢༣ ལོའི་ྋརྒྱལ་བའི་བཀའ་དྲིན་རྗེས་དྲན་གྱི་སློབ་ཡོན།

ྋརྒྱལ་ཀུན་སྙིང་རྗེའི་རང་གཟུགས་ྋའཕགས་མཆོག་ཐུགས་རྗེའི་གཏེར་ཆེན་གང་ཉིད་ནས་ནམ་མཁའི་མཐས་གཏུགས་པའི་སྐྱེ་འགྲོ་ཡོངས་ཀྱི་འཕྲལ་ཡུན་ཕན་བདེའི་གཞི་རྩར་སྤྲུལ་པ་དང་ཡང་སྤྲུལ་དཔག་ཏུ་མེད་པ་འགྱེད་ཅིང་། ཟབ་ཅིང་རྒྱ་ཆེའི་ཆོས་འཁོར་རྒྱུན་མི་ཆད་དུ་བསྐོར་ཏེ། ྋརྒྱལ་མཆོག་དགེ་འདུན་གྲུབ་པ་ནས་བཟུང་བདག་ཅག་འགྲོ་བ་སྤྱི་དང་བྱེ་བྲག་རི་བོ་གངས་ཅན་པའི་བསྟན་དང་འགྲོ་བའི་དོན་དུ་སྐུ་ངལ་ཚད་མེད་བསྐྱོན་གནང་མཛད་པ་དང་། ལྷག་པར་དུ་ཡང་ྋརྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་གང་ཉིད་སྐུ་ན་ཤིན་ཏུ་ཕྲ་མོའི་དུས་ནས་བཟུང་བྱ་དཀའ་ལ་གྲངས་མེད་པའི་རྒྱལ་སྲས་ཀྱི་སྤྱོད་པ་དཔག་ཏུ་མེད་པ་སྐུ་ཉམས་སུ་བསྟར་ཏེ། རིས་སུ་མ་ཆད་པའི་བསྟན་འགྲོའི་མཛད་འཕྲིན་མཁའ་ཁྱབ་ཏུ་བསྐྱངས་དང་ སྐྱོང་བཞིན་པ་ནི། འཇིག་རྟེན་སྐྱེ་འགྲོ་སྤྱི་དང་། བྱེ་བྲག་ཁ་བ་རི་པ་རྣམས་ཀྱི་བཀའ་དྲིན་གྱི་ཆ་ཕྲ་མོ་ཙམ་ཡང་གཞལ་དཀའ་བའི་གནས་ལགས་ཤིང་། ངེད་ཅག་བོད་འབངས་ཡོངས་ཀྱི་ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་བཀའ་དྲིན་བསྐྱངས་དང་སྐྱོང་བཞིན་པ་ནི་བརྗེད་མི་ཕོད་པ་བཞིན། འདི་ག་སེར་བྱེས་གྲྭ་ཚང་ནས་རྗེས་དྲན་གྱི་ཆ་ཕྲ་མོ་ཙམ་བསྒྲུབ་སླད་ྋརྒྱལ་དབང་མཆོག་གི་སྐུའི་འཁྲུངས་སྐར་དགེ་བའི་ཉིན་དང་བསྟུན་ལུགས་བདེ་གཉིས་ཀྱི་གཙོས་མཐོ་སློབ་འགྲིམ་བཞིན་པའི་སློབ་ཕྲུག་འདེམས་ཐོན་བྱུང་བ་རྣམས་ལ་ད་བར་རྒྱལ་བའི་བཀའ་དྲིན་རྗེས་དྲན་གྱི་སློབ་ཡོན་ཐེངས་བརྒྱད་ཕུལ་ཡོད་ལ། འདི་ལོ་ཡང་ལུགས་བདེ་གཉིས་དང་། ཨོ་རི་ས། བྷན་དཱ་ར། བོད་ནས་གསར་དུ་འབྱོར་བ་བཅས་སློབ་ཕྲུག་གྲངས་ ༢༧ དང་། ས་གནས་རྒྱ་གར་ཡུལ་མི་མཐོ་རིམ་སློབ་མ་གཅིག་དང་། འཛིན་རིམ་བཅུ་གཅིག་དང་བཅུ་གཉིས་ཀྱི་སློབ་མ་དྲུག་བཅས་བསྡོམས་དགོས་ངེས་ཅན་གྱི་སློབ་ཕྲུག་གྲངས་ ༧ ལ་ཕྱི་ལོ་ ༢༠༢༣ ལོའི་ྋརྒྱལ་བའི་བཀའ་དྲིན་རྗེས་དྲན་གྱི་སློབ་ཡོན་འབུལ་རྒྱུའི་མཚན་གཞུང་ཟུར་སྦྱར་ནང་གསལ་ལྟར།

སེར་བྱེས་གྲྭ་ཚང་ནས་ཕྱི་ལོ་ ༢༠༢༣ ཟླ་ ༧ ཚེས་ ༦ ཉིན།