སེར་བྱེས་མཁས་སྙན་གྲྭ་ཚང་གི་ལོ་རེའི་མཛད་རིམ་ཆེ་ཁག

ས་ག་ཟླ་བའི་ཚེས་བཅོ་ལྔའི་ཉིན་སེར་བྱེས་མཁས་སྙན་གྲྭ་ཚང་དུ་མཁན་བླ་འདུས་མང་ཡོངས་ནས་དགོང་མོར་དུས་བཟང་སྐབས་བླ་མ་མཆོད་པ་བདེ་སྟོང་དབྱེར་མེད་ཀྱི་སྒོ་ནས་ཚོགས་མཆོད་དང་བསྙེན་བཀུར་རྒྱས་པར་མཛད། བོད་ཟླ་བཞི་པར་རགས་རྩིས་ཀྱིས་བོད་ཟླ་བཞི་པའི་ཚེས་བཅོ་ལྔའི་ཉིན་ཟླ་བ་དང་མཉམ་དུ་འགྲོགས་པའི་སྐར་མ་ནི་རྒྱུ་སྐར་ཉེར་བརྒྱད་ཀྱི་ནང་ནས་རྒྱུ་སྐར་ས་ག་ཡིན་པའི་ཆ་ནས་བོད་ཟླ་བཞི་པར་ས་ག་ཟླ་བ་ཞེས་བརྗོད་པ་ཡིན། ཟླ་བ་འདི་ནི་བདག་ཅག་གི་སྟོན་པ་སྐུ་བལྟམས་པ་དང་། སངས་རྒྱས་པ། སྐུ་མྱ་ངན་ལས་འདས་པའི་དུས་ཆེན་ཏེ་དུས་ཆེན་གསུམ་འཛོམས་ཀྱི་ཟླ་བར་ངོས་འཛིན་བྱེད་ཀྱིན་ཡོད།
དེ་ཡང་བདག་ཅག་གི་སྟོན་པ་ཤཱཀྱ་ཐུབ་པ་དགའ་ལྡན་གྱི་གནས་ནས་གཟིགས་པ་ལྔས་གླང་པོ་ཆེ་ཐལ་དཀར་མཆེ་བ་དྲུག་ལྡན་གྱི་རྣམ་པར་བརྫུས་ཏེ། ས་ལུག་ཆུ་སྟོད་ཟླ་བ་དྲུག་པའི་ཚེས་ ༡༥ ཉིན་ལྷ་མོ་སྒྱུ་འཕྲུལ་མའི་ལྷུམས་སུ་ཞུགས་ནས་ལྕགས་སྤྲེལ་ས་ག་ཟླ་བའི་ཚེས་བདུན་ཉིན་ལུམ་བིའི་ཚལ་དུ་སྐུ་བལྟམས་པ་དང་གཅིག །
ཤིང་རྟ་ས་ཟླའི་ཚེས་༡༥ཡི་མཚན་མོར་བྱང་ཆུབ་ཤིང་གི་དྲུང་དུ་མཉམ་པར་བཞག་སྟེ་སྲོད་ལ་བདུད་བཏུལ་བ་དང་ཐོ་རེངས་མངོན་པར་སངས་རྒྱས་པ་དང་གཉིས།
ལྕགས་འབྲུག་ས་ག་ཟླ་བའི་ཚེས་༡༥ ཉིན་རྩྭ་མཆོག་གྲོང་དུ་གཤེགས་ཏེ་སཱ་ལའི་ཚལ་གྱི་དབུས་སུ་ཐ་མལ་གྱི་གཟིམས་ཁྲིར་བཞུགས་ཤིང་ཉན་ཐོས་འོད་སྲུངས་ཆེན་པོ་ལ་བསྟན་པ་གཏད་པ་སོགས་ས་ཟླའི་དུས་ཆེན་གྱི་གནས་ཚུལ་རྒྱས་པར་མཁྱེན་འདོད་ན་འབྲེལ་ཐག་འདི་ནས་རྒྱས་པར་གཟིགས་་་་

 ༢༠༢༢ ཟླ་ ༦ ཚེས་༡༤ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།

 

༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བཀའ་སློབ་ལམ་སྟོན་ཞུས་པའི་འོག་ཕྱི་ལོ་༢༠༢༢ ཟླ་ ༦ ཚེས་ ༡༠ ཉིན་མཁས་གྲུབ་བྱེ་བའི་འབྱུང་གནས་སེར་བྱེས་མཁས་སྙན་གྲྭ་ཚང་དུ་སྔགས་ཀྱི་འཛིན་གྲྭ་ཞིག་གསར་འཛུགས་གནང་བ་དང་། འཛིན་གྲྭ་འདིའི་དུས་ཡུན་ལོ་གཅིག་དང་། འཚོགས་ཡུན་ཟླ་བ་བདུན་དང་བདུན་ཕྲག་རེར་ཉིན་ལྔ་ལ་འཚོགས་དགོས་པ་དང་། བསླབ་གཞི་ནི་རྗེའི་སྔགས་རིམ་ཆེན་མོ་ཡིན་ཞིང་དེ་འབྲེལ་སྣ་ཚོགས་ཟུར་བལྟ་གནང་རྒྱུ་ཡིན་འདུག །ཐོག་མའི་ཟླ་གཉིས་ལ་རྒྱུད་སྡེ་འོག་མ་གསུམ་དང་། དེ་ནས་ཟླ་གཉིས་ལ་བསྐྱེད་རིམ། དེ་ནས་ཟླ་གཉིས་ལ་རྫོགས་རིམ་གཟིགས་དགོས་རྒྱུ། ལོ་གཅིག་གི་བསླབ་གཞི་ཡོངས་སུ་རྫོགས་ནས་བྲིས་རྒྱུགས་དང་རྩོད་རྒྱུགས་གཏོང་རྒྱུ་ཡིན་པ་དང་། རྒྱུགས་འབྲས་ལ་གཞིགས་ནས་སྔགས་ཀྱི་འཛིན་གྲྭ་རྫོགས་པའི་ཕྱག་འཁྱེར་ཚད་ལྡན་ཡང་འབུལ་འཆར་ཡོད་འདུག །དེ་ཡང་གདན་ས་འདི་ག་ནས་དགེ་བཤེས་ཐོན་ཟིན་པ་རྣམས་ལོ་གཅིག་རྒྱུད་གྲྭ་སྟོད་སྨད་ཀྱི་ཆོས་ཐོག་འགྲིམས་དགོས་པ་དང་། དེ་ནས་གྲྭ་ཚང་དུ་ཞབས་ཞུ་ལོ་གཅིག་ཞུས་མཚམས་ནས་སྔགས་ཀྱི་འཛིན་གྲྭ་འདི་འགྲིམས་དགོས་པ་ཡིན་འདུག །
ཕྱི་ཟླ་ ༦ ཚེས་ ༡༠ ཉིན་སྔགས་ཀྱི་འཛིན་གྲྭ་དབུ་འཛུགས་ཀྱི་མཛད་སྒོའི་ཚོགས་མགོན་དུ་ཞྭ་སེར་བསྟན་པའི་མངའ་བདག་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་ཆིབས་བསྒྱུར་བསྐྱངས་ནས་གསང་སྔགས་རྡོ་རྗེ་ཐེག་པའི་གལ་གནད་སྐོར་བཀའ་སློབ་ཟབ་ཅིང་རྒྱས་པ་གནང་བ་དང་།
གྲྭ་ཚང་གི་སྐྱབས་རྗེ་མཁན་རིན་པོ་ཆེ་བསྟན་འཛིན་བྱམས་པ་ཆོས་བཟང་དཔལ་བཟང་པོ་མཆོག་ནས་སྔགས་ཀྱི་འཛིན་གྲྭ་ཚུགས་རྒྱུའི་སྐོར་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་སྙན་གསན་ཇི་ལྟར་ཕུལ་བ་དང་། ༧གོང་ས་མཆོག་ནས་སྔགས་ཀྱི་སློབ་གཉེར་ཚུགས་ཐུབ་པར་ཤིན་ཏུ་དགེ་མཚན་ཆེ་བའི་སྐོར་ཐུགས་དགྱེས་ཚོར་དང་བཅས་བཀའ་སློབ་ཇི་ལྟར་གནང་བ་དང་། དེ་ནས་གྲྭ་ཚང་རང་གི་མཁས་པའི་ལྷན་ཚོགས་སུ་འཛིན་གྲྭ་འཛུགས་ཕྱོགས་དང་། མ་འོངས་པར་འཛིན་གྲྭ་འདིའི་ནང་ལས་རིམ་ཇི་ལྟར་བསྐྱང་རྒྱུའི་སྐོར་བཀའ་བགྲོས་ཇི་ལྟར་མཛད་པ་སོགས་ཀྱི་སྐོར་སོགས་བཀའ་སློབ་གནང་།

ལུང་རིགས་བྱེ་བའི་གཏེར་མཛོད་མཁན་ཟུར་རིན་པོ་ཆེ་རྗེ་བཙུན་བློ་བཟང་བདེ་ལེགས་དཔལ་བཟང་པོ་མཆོག་ནས་གྲྭ་ཚང་རིན་པོ་ཆེ་འདི་ཉིད་ཀྱི་ལས་ཀྱི་སྣེ་མོར་གཏོགས་པ་རྣམས་ཀྱིས་ཕྱག་ལས་གང་གནང་བར་འདུས་མང་ནས་རྒྱབ་སྐྱོར་དགོས་རྒྱུ་གལ་ཆེའི་སྐོར་དང་། ཚོགས་པ་འདིའི་ནང་གི་དགེ་འདུན་པ་སོ་སོའི་ལས་དོན་གང་ཡོད་གྲྭ་ཚང་རིན་པོ་ཆེ་སྙིང་བཅངས་ཀྱི་ཐོག་ནས་བསྒྲུབ་དགོས་པ་སོགས་བླང་དོར་བཀའ་སློབ་ཟབ་རྒྱས་གནང་།
མདོ་རྒྱུད་བསྟན་པའི་མཛོད་འཛིན་རྒྱུད་སྨད་བླ་མ་དབུ་མཛད་དགེ་བཤེས་ངག་དབང་སངས་རྒྱས་མཆོག་ནས་འཛམ་གླིང་འདིར་གསང་སྔགས་ཀྱི་བསྟན་པ་དར་བ་ལ་ཆོས་སྡེ་ཆེན་པོ་འདི་ལྟ་བུ་ནས་དར་དགོས་པའི་སྐོར་དང་། གསང་སྔགས་གཞུང་ལ་འཇུག་པར་སྤྲོ་བ་འཕེལ་བའི་ཆེད། རྗེ་ཙོང་ཁ་པས། འདི་ན་རྫོགས་སངས་རྒྱས་སུ་བགྲོད་པ་ལ། །ཟབ་མོ་རྡོ་རྗེ་ཐེག་དང་ཕར་ཕྱིན་ཐེག །རྣམ་པ་གཉིས་ཡོད་གསང་སྔགས་ཕར་ཕྱིན་ལས། །ཤིན་ཏུ་ཁྱད་པར་འཕགས་པ་ཡིན་ནོ་ཞེས། །ཉི་མ་ཟླ་བ་ལྟ་བུར་ཀུན་ཏུ་གྲགས། །ཚིག་དེ་བདེན་པའི་ཚིག་ཏུ་འདོད་བཞིན་དུ། །ཟབ་མོའི་ཐེག་དེ་ཇི་ལྟ་བུ་ཞིག་ཅེས། །ཚོལ་བར་མི་བྱེད་མཁས་པའི་ཁུར་འཛིན་པ། །དེ་འདྲ་དེ་ཡང་ཤེས་རབ་ཅན་ཡིན་ན། །དེ་ལས་གཞན་པའི་དབང་པོ་རྟུལ་པོ་གང་། །ཞེས་པ་ལུང་འདྲེན་དང་བཅས་གསང་སྔགས་ལ་འཇུག་པར་སྤྲོ་བ་སྐྱེ་བའི་བཀའ་སློབ་ཟབ་རྒྱས་གནང་།
དེ་ནས་སེར་བྱེས་མཁས་སྙན་གྲྭ་ཚང་གི་དགེ་བསྐོས་མཆོག་ནས་ཐུགས་རྗེ་ཆེ་ཞུ་བ་དང་འབྲེལ་དམིགས་བསལ་ལས་ཀྱི་སྣེ་མོར་གཏོགས་པ་རྣམས་ལ་ཡི་རང་བསྔགས་བརྗོད་དང་། འདུས་མང་ཡོངས་ནས་ཕྱག་དཔེ་བལྟ་རྒྱུའི་གོ་སྐབས་བསྐྲུན་པ་ལས་སྣེ་ཡོངས་ཀྱི་བཀའ་དྲིན་ཡིན་པ་ནམ་ཡང་བརྗེད་ཐབས་མེད་པའི་སྐོར་བཅས་གསུངས་ནས་མཛད་སྒོ་འཇུག་ཡོངས་སུ་གྲུབ།

 ༢༠༢༢ ཟླ་ ༦ ཚེས་༡༠ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།