སེར་བྱེས་མཁས་སྙན་གྲྭ་ཚང་གི་ལོ་རེའི་མཛད་རིམ་ཆེ་ཁག

སེར་བྱེས་མཁས་སྙན་གྲྭ་ཚང་གི་སྐབས་ཉེར་གཉིས་པའི་ཕྱག་མཛོད་ཆེན་མོ་དགེ་བཤེས་ངག་དབང་བཟང་པོ་མཆོག་དང་། དགེ་བཤེས་བློ་བཟང་སྒྲ་དབྱངས། དགེ་བཤེས་ཤེས་རབ་རྒྱ་མཚོ། དགེ་བཤེས་བློ་བཟང་བཀྲ་ཤིས་བཅས་ནས། ཕྱི་ལོ་ ༢༠༡༩ ལོའི་ཟླ་ ༤ ཚེས་ ༡ ཉིན་སེར་བྱེས་མཁས་སྙན་གྲྭ་ཚང་གི་སྐབས་ཉེར་གཉིས་པའི་ཕྱག་མཛོད་ཀྱི་ལས་འགོར་དངོས་སུ་ཚུགས་ནས་ལོ་ངོ་གསུམ་གྱི་རིང་ལྷག་བསམ་རྣམ་དག་གིས་གྲྭ་ཚང་རིན་པོ་ཆེར་སྲི་ཞུའི་ལས་དོན་རྒྱ་ཆེར་མཐར་སོན་གནང་སྟེ། སྐབས་ཉེར་གསུམ་པའི་ཕྱག་མཛོད་ཆེན་མོ་དགེ་བཤེས་ངག་དབང་བྱང་ཆུབ་མཆོག་དང་། དགེ་བཤེས་པ་བཟང་ཟླ་བ། དགེ་ངག་དབང་བརྩོན་འགྲུས། དགེ་བཤེས་ངག་དབང་རིག་གྲོལ་བཅས་ལ་རྩིས་སྤྲོད་ལེན་ལེགས་པར་གྲུབ་སྟེ། ཕྱི་ལོ་ ༢༠༢༢ ཟླ་ ༡༡ ཚེས་ ༡༩ ཉིན་ཞིང་མཆོག་འདུས་པ་རྒྱ་མཚོར་བསྙེན་བཀུར་མཆོད་འབུལ་ཟབ་རྒྱས་གནང་།
༢༠༢༢ ཟླ་ ༡༡ ཚེས་ ༢༠ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས།

 

ཕྱི་ལོ་༢༠༢༢ ཟླ་༡༠ ཚེས་༢༠ཉིན་ཨ་རུ་ན་ཅལ་མངའ་སྡེའི་བློན་ཆེན་པདྨ་མཁའ་འགྲོ་མཆོག་དང་འབྲེལ་ཡོད་དཔོན་རིག་ཁག་གཅིག་བཅས་སེར་བྱེས་མཁས་སྙན་གྲྭ་ཚང་དུ་གནས་གཟིགས་བསྐྱངས།

ཉེར་བའི་ཆར་སེར་བྱེས་མཁས་སྙན་གྲྭ་ཚང་དང་མེ་སོར་གཙུག་ལག་སློབ་གཉེར་ཁང་གི་བར་ཉེ་བའི་གཙུག་ལག་རབ་འབྱམས་པ་འཛུལ་ཞུགས་ཀྱི་གྲོས་ཆོད་བཞག་པ་ལྟར། སེར་བྱེས་གྲྭ་ཚང་དུ་བསླབ་གཞི་ཁག་གསུམ་གྱི་ཐོག་ཆེད་སྦྱོང་ཉེ་བའི་གཙུག་ལག་རབ་འབྱམས་དབུ་འཛུགས་བྱ་རྒྱུའི་མཛད་སྒོའི་སྐུ་མགྲོན་དུ་གདན་འདྲེན་ཞུས་དོན་ལྟར། རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་(Shri honourable Pema Khando)མཆོག་དང་། མེ་སོར་རྒྱལ་པོ་(HE Yaduveer Krishnadatta Chamaraja)མེ་སོར་གཙུག་ལག་སློབ་གཉེར་ཁང་གི་ཉེ་བའི་རིགས་བདག་ཆེན་མོ་སྐུ་ཞབས་ཧེ་མན་ཐ་ཀུ་མར་(Shri Prof G Hemantha Kumar)བཅས་ཆེད་ཕེབས་གནང་བའི་སྐབས། གྲྭ་ཚང་གི་དབུ་ཆོས་རྣམ་གསུམ་དང་། ཕྱག་མཛོད་རྣམ་པ་བཅས་ནས་ཕེབས་བསུ་གཟབ་རྒྱས་ཀྱི་སྣེ་ལེན་དང་འབྲེལ་སེར་བྱེས་མཁས་སྙན་གྲྭ་ཚང་དུ་ཆིབས་བསྒྱུར་གནང་།
དེའི་དགོང་མོར་ཆོས་རར་གཟིགས་སྐོར་གནང་བ་དང་། ཕྱི་ཚེས་༢༡སྔ་དྲོར་སེར་བྱེས་འབྲིང་རིམ་སློབ་གྲྭ་རྒྱ་གར་གཞུང་འབྲེལ་སློབ་གྲྭར་ངོས་བཞེས་ཐོབ་ནས་མི་ལོ་༢༥འཁོར་བའི་དུས་དྲན་མཛད་སྒོ་དང་གནང་བ་དང་། དེའི་ཉིན་རྒྱབ་ཆེད་སྦྱོང་ཉེ་བའི་གཙུག་ལག་རབ་འབྱམས་ཀྱི་དབུ་འཛུགས་མཛད་སྒོའི་སྐུ་མགྲོན་གཙོ་བོར་གནང་བ་བཅས།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༢༢ ཟླ་ ༡༠ ཚེས་ ༡༤ ལ། [དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།]